Si Apostol Juan, nailhan usab nga si Juan ang Hinigugma, mirekord sa importanting mga doktrina kalabut sa tahas ni Jesukristo didto sa kinabuhi nga wala pa dinhi sa yuta. Si Juan Bautista usab mihatag og pagsaksi kabahin ni Jesukristo ug mibunyag Kaniya. Si Jesukristo midapit sa uban nga magkat-on kabahin Niya.
Si Juan nagpamatuod ni Jesukristo isip ang Anak sa Dios
Niini nga leksyon imong sugdan ang imong pagtuon sa basahon ni Juan. Si Apostol Juan mirekord sa unsay iyang gusto nga mahibaloan sa uban mahitungod ni Jesukristo. Si Juan personal nga nakasaksi sa daghan sa mga istorya nga iyang gisulat. Kadaghanan sa materyal diha sa Ebanghelyo ni Juan dili makita sa mga Ebanghelyo ni Mateo, Marcos ug Lucas, nga gisulat aron sa pagtabang sa mga Judeo ug Hentil nga motuo nga si Jesus mao ang Mesiyas ug Manluluwas sa tanang katawhan. Si Juan misulat niadtong nakasabut na sa mga kasulatan ug mituo nga si Jesus mao ang Kristo, ang gisaad nga Mesiyas.
Hunahunaa nga ikaw nagkig-istorya sa usa ka tawo kinsa gamay ra kaayo og nasayran kabahin ni Jesukristo ug kinsa nangutana nimo unsay imong nahibaloan mahitungod Kaniya. Sa imong scripture study journal, paglista og tulo ka butang nga imong itudlo niana nga tawo mahitungod ni Jesukristo.
Imahe
Jesus Christ
Samtang magtuon ka sa Juan 1, pangitaa ang mga kamatuoran kabahin sa Manluluwas nga makatabang sa paglig-on sa imong hugot nga pagtuo ug pagpamatuod ni Jesukristo.
Basaha ang Hubad ni Joseph Smith, Juan 1:1–2 (sa Giya ngadto sa mga Kasulatan), nga mangita sa mga kamatuoran nga gitudlo ni Juan mahitungod ni Jesukristo. (Samtang magtuon ka niini nga leksyon, imong mabasa ang Hubad ni Joseph Smith, Juan 1:1–34. Ang mga pulong nga gi-italics mao kadtong gidugang o giusab ni Propeta Joseph Smith.)
Usa ka kamatuoran nga atong mahibaloan gikan niini nga mga bersikulo mao nga si Jesukristo kauban sa Dios sa sinugdanan. Idugang kini nga kamatuoran ngadto sa lista nga imong gisulat sa imong scripture study journal.
Ang mga pulong nga “sa sinugdanan” nagpasabut sa kinabuhi sa wala pa dinhi sa yuta. Sa dihang ang mga kasulatan naghisgut nga si Jesukristo uban sa Dios “sa sinugdanan,” kini nagtudlo kanato nga si Jesus mao ang Unang Natawo sa Amahan diha sa espiritu (tan-awa sa D&P 93:21), Siya “sama sa Dios” taliwala sa mga espiritu nga nagpundok “sa wala pa matukod ang kalibutan” (tan-awa sa Abraham 3:22–24), ug Siya gipili sa Amahan sukad sa sinugdanan (tan-awa sa Moises 4:2).
Basaha ang Hubad ni Joseph Smith, Juan 1:3, nga mangita og dugang nga kamatuoran nga gitudlo ni Juan mahitungod ni Jesukristo. Mahimo nimong markahan ang unsay imong makit-an.
Gikan niini nga tudling atong nakat-unan nga ang tanan nga mga butang gihimo pinaagi ni Jesukristo. Idugang kini ngadto sa lista sa mga kamatuoran mahitungod ni Jesukristo nga imong gisulat diha sa imong scripture study journal.
Si Jesukristo milalang sa langit ug yuta ug “mga kalibutan nga dili maihap” ubos sa direksyon sa Langitnong Amahan (Moises 1:33).
Imahe
Elder Bruce R. McConkie
Hinoon, si Elder Bruce R. McConkie sa Korum sa Napulog Duha ka mga Apostoles misulat nga ang Langitnong Amahan mao Mismo ang mibuhat sa “duha ka mamugnaong mga panghitabo”: “Una, siya mao ang Amahan sa tanan nga mga espiritu, lakip kang Kristo. … Ikaduha, siya mao ang Tiglalang sa pisikal [nga mga lawas ni Adan ug Eva]” (A New Witness for the Articles of Faith [1985], 63; tan-awa usab sa Moises 2:27).
“Ang Pamilya: Usa ka Pamahayag ngadto sa Kalibutan” dugang nga nagklaro nga “Ang tanan nga mga tawo—lalaki ug babaye—gilalang diha sa hitsura sa Dios. Ang matag usa hinigugmang espiritu nga anak nga lalaki o babaye sa langitnong mga ginikanan, ug, sa ingon, ang matag usa adunay mga kinaiya sa pagkadios ug kalagmitan nga mahimong usa ka dios” (Ensign o Liahona, Nob. 2010, 129).
Unsa kaha ang gipasabut nga si Jesukristo ug ang ebanghelyo mao ang kahayag nga “nagdan-ag sa kalibutan, ug ang kalibutan wala makasabut niini”?
Si Apostol Juan sunod nga nagtudlo mahitungod ni Juan Bautista. Basaha ang Hubad ni Joseph Smith, Juan 1:6–10, nga mangita kon unsa nga dugang nga kamatuoran ang gipamatud-an ni Juan Bautista.
Idugang ang mosunod nga kamatuoran sa lista diha sa imong scripture study journal: Si Jesukristo mao ang Kahayag sa Kalibutan. Pamalandungi kon sa unsa nga mga paagi si Jesukristo mao ang kahayag sa kalibutan. Tan-awa sa Doktrina ug mga Pakigsaad 88:5–13 alang sa dugang nga panabut.
Ang Hubad ni Joseph Smith, Juan 1:11–18 naglangkob, lakip sa ubang mga pagtulun-an, sa pagpamatuod ni Juan Bautista nga ang tanan nga mituo ni Jesukristo makadawat og imortalidad ug kinabuhing dayon. Timan-i nga diha sa mga bersikulo 14 ug 16 nga mipasabut si Juan nga si Jesukristo mao ang “Pulong.” Kini usa ka tawag ni Jesukristo nga makita sa pipila ka mga bersikulo sa mga kasulatan (tan-awa usab sa Juan 1:1; 1 Juan 1:1; Pinadayag 19:13; D&P 93:8; Moises 1:32).
Tungod kay kita mogamit og mga pulong sa pagpasabut o pagpadayag og usa ka butang ngadto sa uban, sa unsang mga paagi nga ang “Pulong” usa ka angay nga tawag ni Jesukristo?
Pamalandungi ang pipila sa mosunod nga mga hinungdan nga kini angay nga tawag: Siya ang pagpahayag sa Amahan ngadto sa kalibutan; Siya nagpahayag sa mga pulong sa Amahan; Siya mao ang sinugo sa kaluwasan (tan-awa sa D&P 93:8); Siya ang hingpit nga ehemplo kon unsaon sa pagsunod sa pulong sa Dios; Siya naghatag sa mga pulong sa kinabuhing dayon; ug ang Iyang mga pulong naghatag og kinabuhi.
Itandi ang Juan 1:18 ngadto sa kasusama nga Hubad ni Joseph Smith, Juan 1:19. Kon wala ang Hubad ni Joseph Smith, pipila sa mga tigbasa sa Juan 1:18 mahimong masayop sa pagsabut ug pagtuo nga walay tawo dinhi sa yuta nga nakakita gayud sa Dios nga Amahan. Sa unsang paagi ang Hubad ni Joseph Smith sa Juan 1:19 nagklaro sa Juan 1:18 sama sa kasagaran nga makita kini sa Bag-ong Tugon?
Ikonsiderar pag-usab ang kalihokan sa sinugdanan niini nga leksyon diin gihangyo kamo sa paghunahuna sa pagtudlo og usa ka tawo kinsa gamay ra og nahibaloan kabahin ni Jesukristo. Sa imong scripture study journal, isulat kon ngano kaha nga importante alang sa usa ka tawo nga masayud sa dugang nga mga doktrina mahitungod ni Jesukristo nga imong nahibaloan gikan sa Hubad ni Joseph Smith, Juan 1:1–19?
Si Juan Bautista nagpamatuod ni Jesukristo ug nagbunyag Kaniya
Diha sa Hubad ni Joseph Smith, Juan 1:20–28 (sa Giya ngadto sa mga Kasulatan), ang mga Judeo mipadala og mga pari ngadto ni Juan Bautista sa pagpangutana kon siya ba ang Mesiyas. Si Juan mipasabut nga ang iyang tahas mao ang pagpamatuod kabahin sa Mesiyas, kinsa mobunyag uban sa kalayo ug uban sa Espiritu Santo. Pagkasunod adlaw, nakita ni Juan Bautista si Jesus, kinsa human na niya nga nabunyagan.
Basaha ang mga pulong ni Juan Bautista sa Huban ni Joseph Smith, Juan 1:29–33, nga mangita kon unsay gusto ni Juan Bautista nga mahibaloan sa uban kabahin ni Jesukristo.
Balik ngadto sa mga kamatuoran nga imong gilista diha sa imong scripture study journal kabahin ni Jesukristo. Unsa pay lain nga mga kamatuoran o mga deskripsyon kabahin ni Jesukristo ang mahimo nimong madugang gikan sa Hubad ni Joseph Smith, Juan 1:29–33? (Ilista ang imong mga nakit-an ubos sa uban nga mga kamatuoran nga imong gilista diha sa imong scripture study journal.)
Timan-i nga si Juan mitawag ni Jesus isip “ang Kordero sa Dios.” Sama nga ang dugo sa mga karnero sa Pagpalabay miluwas sa Israel gikan sa kamatayon ug nakahatag og kaluwasan gikan sa pagkaulipon sa Ehipto, ang tawag nga “Kordero sa Dios” nagsimbolo nga si Jesus mopaagas sa Iyang dugo aron sa pagluwas sa Iyang mga katawhan ug pagpalingkawas kanila gikan sa sala.
Si Jesus nagdapit sa Iyang mga sumusunod sa pagkat-on og dugang mahitungod Kaniya
Hunahunaa nga ang usa ka tin-edyer nga nagtambong sa miting sa puasa ug pagpamatuod nakadungog sa pipila ka mga higala nga nagpamatuod nga sila nasayud nga si Jesukristo mao ang ilang Manluluwas. Kini nga batan-on natingala kon giunsa “pagkasayud” sa mga higala niadto nga mga butang. Pamalandungi kon unsaon nimo sa pagtubag sa ingon nga pangutana.
Samtang magtuon ka sa Juan 1:35–51, bantayi unsa ang gitudlo niini nga mga bersikulo mahitungod sa unsay imong mahimo aron madawat o malig-on ang imong kaugalingong pagsaksi ni Jesukristo isip imong Manluluwas.
Basaha ang Juan 1:35–37, nga mangita kon unsay gisulti ni Juan Bautista ngadto sa duha sa iyang mga disipulo sa adlaw human si Jesus nabunyagan.
Sunod, basaha ang Juan 1:38–39, nga mangita kon unsay gisulti ni Jesus ngadto sa duha ka mga disipulo ug unsa ang ilang gibuhat.
Unsa nga pagdapit ang gihatag ni Jesus sa duha ka mga disipulo?
Basaha ang Juan 1:40–42. Samtang magbasa ka, markahi ang nakat-unan sa usa sa mga lalaki human niya dawata ang pagdapit sa Manluluwas nga “umari kamo ug makita ninyo.”
Sa Hubad ni Joseph Smith, Juan 1:42 atong nakat-unan nga si Jesus miingon nga si Pedro pagatawgon og “Cefas, diin mao, pinaagi sa paghubad, usa ka manalagna, o usa ka bato” (diha sa Giya ngadto sa mga Kasulatan), nagpasabut nga si Pedro mahimong usa ka propeta, manalagna, ug tigpadayag.
Basaha ang Juan 1:43–46, nga mangita kon unsa ang gidapit sa Manluluwas nga buhaton sa laing tawo, nga si Felipe.
Markahi ang mga pulong sa bersikulo 45 nga nagpasabut nga si Felipe nakadawat og pagsaksi kabahin ni Jesukristo human niya gidawat ang pagdapit sa Manluluwas sa pagsunod Kaniya. Unsa nga pagdapit ang gihatag dayon ni Felipe kang Natanael?
Siksika ang Juan 1:47–51, nga mangita kon unsa ang nahitabo samtang gidawat ni Natanael ang pagdapit nga magkat-on kabahin ni Jesus.
Basi sa unsay imong nakat-unan gikan niini nga mga istorya, kompletuha ang mosunod nga baruganan: Samtang atong dawaton ang pagdapit nga magkat-on ug mosunod ni Jesukristo, atong madawat .
Imahe
Elder Jeffrey R. Holland
Basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles, nga mangita nganong importante alang kanato nga modawat sa pagdapit nga magkat-on ug mosunod sa Ginoo: “Masabtan nga ang nag-unang katuyoan sa atong mortal nga panaw ug ang mga tubag sa labing mahinungdanong mga pangutana sa kinabuhi mahimong marepresentar niining duha ka mubo kaayo nga mga elemento sa unang mga panghitabo sa yutan-ong pangalagad sa Manluluwas. Usa ka elemento mao ang pangutana alang sa matag usa kanato dinhi niining kalibutan: ‘Unsa ang inyong gipangita? Unsa ang inyong gusto?’ Ang ikaduha mao ang Iyang tubag sa atong mga tubag, bisan unsa pa kana nga tubag. Bisan kinsa pa kita ug bisan unsa pa ang atong tubag, ang Iyang tubag kanunay nga mao ra gihapon: ‘Umanhi ka,’ nag-ingon Siya nga mahigugmaon. ‘Umanhi ka ug sumunod kanako’ Bisan asa kamo padulong, anhi una ug tan-awa unsay akong gibuhat, tan-awa kon asa ug giunsa nako paggahin ang akong panahon. Pagkat-on kanako, paglakaw uban kanako, pakig-istorya kanako, pagtuo. Paminaw kanako nga mag-ampo. Agig resulta makakaplag kamo og mga tubag sa kaugalingon ninyong mga pag-ampo. Ang Dios mohatag kaninyo og kapahulayan sa inyong mga kalag. Umanhi kamo ug sumunod kanako” (“He Hath Filled the Hungry with Good Things,” Ensign, Nob. 1997, 65).
Sumala sa katapusan sa pamahayag ni Elder Holland, unsa ang duha ka mga butang nga atong madawat samtang atong dawaton ang pagdapit sa Manluluwas nga “umari kamo ug tan-awa”?
Tubaga ang mosunod nga pangutana diha sa imong scripture study journal: Sa unsang paagi ang imong pagpamatuod kabahin ni Jesukristo mitubo samtang ikaw nagkat-on ug misunod Kaniya?
Pamalandungi ang imong kaugalingong paningkamot sa pagkat-on kabahin ni Jesukristo ug sa pagsunod Kaniya. Hunahunaa unsay imong mahimo aron mas hingpit nga dawaton ang pagdapit nga mosunod Kaniya aron ang imong hugot nga pagtuo ug pagpamatuod molambo.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Juan 1 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: