Lucas 3–4

Si Juan Bautista nagsangyaw sa paghinulsol ug mipamatuod sa pag-anhi sa Mesiyas. Si Jesukristo nabunyagan pinaagi ni Juan Bautista ug dayon nagpuasa didto sa kamingawan sulod sa 40 ka adlaw. Human mibiyahe ngadto sa Galilea, si Jesus mipadayag ngadto sa mga tawo sa Nazaret nga Siya mao ang Mesiyas. Ang mga katawhan sa Nazaret misalikway Kaniya, ug Siya miadto sa Capernaum, diin giayo Niya ang masakiton, ug gipapahawa ang mga yawa.

Paggahin og pila ka minuto sa pagpamalandong sa mosunod nga mga pangutana:

• Aduna bay tawo nga nagsungog o nagbugalbugal kanimo tungod kay ikaw usa ka miyembro sa Simbahan?

• Aduna bay tawo nga naghimo nimong kataw-anan o naghagit sa usa ka butang nga imong gituohan o sumbanan nga imong gipaningkamutan sa pagsunod?

• Aduna bay mga salo-salo o mga panagpundok nga wala ka imbitara o diin mibati ka nga dili mahimutang tungod sa imong relihiyon?

Samtang ikaw magtuon sa Lucas 3:1–22, pangita og mga kamatuoran nga makapasabut kon nganong kadtong nagsunod sa ebanghelyo usahay mobati nga nabulag sa uban.

Ubos sa balaod ni Moises, ang nagdumalang opisyal sa Aaronic Priesthood gitawag og labawng sacerdote. Apan, sa panahon sa pagpangalagad sa Manluluwas, ang katungdanan sa labawng sacerdote nahimong malimbungon. Ang mga labawng sacerdote mao usab ang politikanhong pamunoan sa nasud, apan ang mga naghupot niana nga mga katungdanan dili na pinili sa Dios niining higayona. Pinili sila sa mga katawhan sama ni Herodes ug ang uban nga mga opisyal nga Romano (tan-awa sa Bible Dictionary, “Labawng sacerdote”).

Basaha ang Lucas 3:2–6, nga mangita diha sa bersikulo 2 ngadto kang kinsa nakigsulti ang Dios imbis ngadto sa mga labawng sacerdote.

I-summarize unsa ang gitudlo ni Juan Bautista sa mga katawhan sa Lucas 3:3–6. (Alang sa dugang tabang sa unsay gitudlo ni Juan, basaha ang Hubad ni Joseph Smith , Lucas 3:4–11 [sa appendix sa Biblia].)

Sa panahon ni Juan ang uban nga mga tawo mituo nga tungod kay sila mga kaliwatan ni Abraham, mas maayo sila kay sa uban o nga ang Dios labaw nga nagmahal kanila kay sa dili mga Israelita. Kini nga sitwasyon mahimong parehas sa mga tawo karon naghunahuna nga makaadto sa langit kay lagi miyembro sila sa Simbahan.

Basaha ang Lucas 3:7–9, nga mangita kon unsay gitudlo ni Juan sa mga Judeo nga kinahanglan nilang buhaton aron madawat ang kaluwasan. (Sa bersikulo 9, ang bunga usa ka simbolo sa mga sangputanan sa mga pagpili nga atong gihimo.)

Hinumdumi diha sa bersikulo 9 kon unsa ang mahitabo niadtong kinsa dili makadala og “maayong bunga,” o magpuyo sa matarung nga paagi.

Sa Lucas 3:10–15 atong mabasa nga si Juan mitudlo og piho nga mga grupo sa katilingban nga Judeo kon sa unsa nga paagi nga makadala sila og maayong bunga pinaagi sa pagpuyo nga matarung. Ang pagpangalagad ni Juan makapadani, ug ang uban naghunahuna nga malagmit siya mao ang Mesiyas.

Basaha ang Lucas 3:16–17, nga mangita kon unsay gisulti ni Juan nga buhaton sa Mesiyas kon Siya moanhi.

Ang mga pulong “igabautismo mao ang Espiritu Santo ug kalayo” (Lucas 3:16) nagpasabut sa paglimpyo ug pagpabalaan nga epekto sa pagdawat sa gasa sa Espiritu Santo. Ang Propeta Joseph Smith mitudlo: “Ang indibidwal kinahanglang matawo sa tubig ug sa espiritu aron makasulod ngadto sa gingharian sa Dios” (Mga Pagtulun-an sa mga Presidente sa Simbahan: Joseph Smith [2007], 107).

Aron masabtan pa gyud ang Lucas 3:17, makatabang kini nga masabtan ang mahitungod sa paglain sa trigo gikan sa tahop.

Imahe

paglain sa trigo gikan sa tahop

Human ang trigo maani ug magiok (panahon nga ang lugas ilain gikan sa nahibilin sa tanom ), alig-igon dayon sa mag-uuma ang lugas. Ang pag-alig-ig mao ang karaan nga pamaagi sa paglain sa mga lugas sa trigo gikan sa tipasi (tipaka) ug sa panit. Ang tig-alig-ig mogamit og dakong pala o kahoy nga idugkal nga gitawag og paliran aron huypon ang tahop ngadto sa hangin. Ang huyohoy mopadpad sa mas gaan , wala kinahanglana nga tahop, ug ang mas bug-at nga mga lugas sa trigo mangahulog ngadto sa giokanan nga salog.

Sa analohiya ni Juan, unsa kaha ang girepresentar sa trigo?

Unsa kaha ang girepresentar sa tahop?

Usa ka importanting doktrina nga gitudlo sa Lucas 3:16–17 mao nga si Jesukristo molain sa matarung gikan sa mga dautan.

1. Tubaga ang mosunod nga mga pangutana diha sa imong scripture study journal:

   1. Bisan og ang katapusan nga pagpalain sa mga matarung gikan sa mga dautan mahitabo sa Adlaw sa Paghukom, sa unsa nga mga paagi nga ang pagsunod ni Jesukristo ug sa Iyang ebanghelyo nakahimo sa Iyang mga tinun-an nga mapalain gikan sa pagkadili matarung karon?

   2. Nganong kinahanglan natong sabton nga samtang kita magtinguha sa pagsunod ni Jesukristo ug sa Iyang ebanghelyo mahimong kita mobati o mahimulag gikan sa uban.

Ang Lucas 3:18–22 nagrekord nga si Jesus mianhi aron magpabunyag ni Juan Bautista (tan-awa usab sa Mateo 3:13–17). Sa wala madugay, si Juan Bautista gipabilanggo ni Herodes.

Sa Lucas 3:23–38, si Lucas milakip og genealogy ni Jesus nga naghatag sa direkta o bug-os nga kadugo ni Jesus. Siya mipamatuod usab nga si Jose mao ang “ama-ama” (dili tinuod) nga amahan ni Jesus (Lucas 3:23).

Ang Lucas 4:1–13 naglangkob sa usa ka istorya ni Jesus nga nagpuasa sulod sa 40 ka adlaw didto sa kamingawan og nagsalikway sa mga tintasyon ni Satanas (tan-awa usab sa Mateo 4:1–11).

Ikonsiderar ang mosunod nga mga pulong: puno sa kaguol, gibun-og, gibihag, kabus, ug buta. Gibati mo ba sukad nga ang usa o mas labaw pa niini nga mga pulong nahimong naghulagway unsay imong gibati mahitungod sa imong kaugalingon? Samtang ikaw magtuon sa Lucas 4:14–30, pangitaa ang mga pulong nga nagtudlo kon sa unsa nga paagi si Jesukristo gipadala aron sa pag-ayo sa mga puno sa kaguol ug sa pagtubos sa mga bihag.

Sa Lucas 4:14–17 atong mabasa nga human si Jesus mipauli gikan sa pagpuasa ug gitintal didto sa kamingawan, Siya misugod sa pagtudlo diha sa mga sinagoga sa Galilea. Sa wala madugay, mibalik Siya sa Iyang lungsod nga natawhan sa Nazaret. Samtang anaa didto, mibarug siya sa usa ka sinagoga aron sa pagbasa gikan sa basahon ni Isaias, kinsa nanagna kalabut sa balaan nga misyon sa Mesiyas.

Basaha ang Lucas 4:18–20, nga mangita kon unsa ang gipanagna ni Isaias nga buhaton sa Mesiyas alang sa mga katawhan. Mahimo nimong markahan unsay imong nakaplagan.

Basaha ang Lucas 4:21, nga mangita kon unsay gisulti ni Jesus mahitungod sa tudling sa kasulatan nga Iyang nabasa.

Pinaagi sa pagsulti nga natuman ang gipanagna ni Isaias, si Jesus mipahibalo nga Siya mao ang Mesiyas nga gipasabut sa panagna. Ikonsiderar ang pagsulat sa mosunod nga doktrina diha sa imong mga kasulatan: Si Jesukristo gipadala aron sa pag-ayo sa mga napuno sa kaguol ug pagtubos sa mga binihag.

Gikan sa unsay imong nahibaloan mahitungod sa pagpangalagad sa Manluluwas, unsa ang pipila ka mga butang nga Iyang gibuhat nga mituman niini nga panagna?

2. Tubaga ang mosunod nga pangutana diha sa imong scripture study journal: Unsa nga mga kasinatian nga imong nakita nga nagpakita kon giunsa ni Jesukristo pagpadayon sa pag-ayo ug pagtubos kanato sa atong panahon?

Basaha ang Lucas 4:22, nga mangita kon sa unsa nga paagi nga ang mga tawo sa Nazaret mi-react sa pagpahayag ni Jesus nga Siya ang dugay nang gipaabut nga Mesiyas.

Sa Lucas 4:23 atong mabasa nga si Jesus nasayud nga ang mga tawo sa Nazaret mohagit Kaniya sa pagmatuod nga Siya mao ang Mesiyas pinaagi sa paghimog usab sa mga milagro nga Iyang gihimo didto sa Capernaum. Si Jesus mitubag pinaagi sa pagkutlo og duha ka mga istorya sa kasulatan aron sa pagtudlo kanila og usa ka barunganan mahitungod sa hugot nga pagtuo.

Imahe

Si Elias, biyuda sa Sarepta, ug ang iyang anak nga lalaki

Basaha ang Lucas 4:24–27, nga mangita sa duha ka istorya nga gibasihan ni Jesus. Mahimo nimong basahon sa laktud ang istorya ni Elias ug sa biyuda sa Sarepta sa 1 Mga Hari 17:1–16 ug ang istorya ni Naaman ug ni Eliseo sa 2 Mga Hari 5:1–14. Hatagi og partikular nga pagtagad kon unsay gibuhat sa biyuda ug ni Naaman aron ipakita ang ilang hugot nga pagtuo.

Sa unsa nga mga paagi nga ang biyuda sa Sarepta ug si Naaman nagpakita og hugot nga pagtuo?

Kini importantingmahibaloan nga ang Daang Tugon nga mga propeta nga si Elias (Elijah) ug Eliseo (Elisha) mihimo og mga milagro alang sa mga katawhan kinsa dili mga Israelita (mga Hentil). Si Jesus nagtudlo niadtong anaa sa Nazaret nga bisan adunay mga biyuda ug mga sanlahon taliwala sa mga Islraelita, duha ka mga Hentil ang nakasinati og mga milagro tungod kay sila adunay hugot nga pagtuo ug midawat sa mga propeta sa Dios.

Tungod kay daghan kaayo nga mga tawo sa Israel nga nagkulang og hugot nga pagtuo diha Kaniya, si Jesus mihimo og dyutay ra kaayo nga mga milagro didto (tan-awa sa Mateo 13:54–58; Marcos 6:1–6). Atong makat-unan ang importanting baruganan mahitungod sa hugot nga pagtuo kon kita motan-aw sa kalahian sa mga tawo sa Nazaret uban sa biyuda sa Zarephat ug ni Naaman: Kon atong ipakita ang atong hugot nga pagtuo diha ni Jesukristo, kita makakita og mga milagro nga mahitabo.

Imahe

Si Naaman ug sulugoon ni Elias

3. Sa imong scripture study journal, paglista og mga paagi nga atong mapakita ang atong hugot nga pagtuo diha ni Jesukristo isip atong Manluluwas. Ribyuha ang Lucas 4:18, ug ikonsiderar ang mga paagi nga imong gikinahanglan aron makapakita og hugot nga pagtuo diha ni Jesukristo aron ikaw makadawat sa mga panalangin nga nalista didto.

Basaha ang Lucas 4:28–30, nga mangita kon sa unsa nga paagi mitubag kadtong diha sa sinagoga sa unsay gisulti ni Jesus.

Palandonga kon sa unsa nga paagi kini nga istorya nagpakita kon unsaon ni Jesukristo paglain sa dautan gikan sa mga matarung (tan-awa sa Lucas 3:17).

Basaha ang Lucas 4:31–44, nga mangita kon sa unsa nga paagi ang tubag sa mga tawo sa Capernaum lahi gikan sa tubag niadtong anaa sa Nazaret.

Sa unsa nga paagi nga kining mga istorya nagpakita sa baruganan nga kon atong ipakita ang atong hugot nga pagtuo diha ni Jesukristo, kita makadawat sa Iyang mga panalangin?

4. Taposa ang imong pagtuon alang karong adlawa pinaagi sa pagsulat diha sa imong scripture study journal sa imong pagpamatuod ni Jesukristo isip ang Manluluwas ug sa mga panalangin nga imong nasinati samtang imong gipakita ang imong hugot nga pagtuo diha Kaniya.

5. Isulat ang mosunod diha sa ubos sa mga assignment karong adlawa sa imong scripture study journal:

   Akong natun-an ang Lucas 3–4 ug nakompleto kini nga leksyon sa (petsa).

   Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: