Samtang nagbiyahe padulong sa Galilea, si Jesus miagi sa Samaria ug mitudlo og usa ka babaye sa atabay. Ang babaye mipamatuod ngadto sa uban nga si Jesus mao ang Kristo. Sa wala madugay, giayo ni Jesus ang anak sa usa ka opisyal.
Si Jesukristo nagtudlo og usa ka babaye sa Samaria
Hunahunaa ang mosunod nga pangutana: Unsa man ang labing bililhon nga kapanguhaan sa kinaiyahan ibabaw sa yuta? Samtang naghunahuna ka kon unsay imong tubag, ikonsiderar ang mga kapanguhaan sa kinaiyahan sama sa yuta, puthaw, karbon, lana, bulawan, ug dyamante.
Basaha ang mosunod nga pamahayag ni Elder David A. Bednar sa Korum sa Napulog Duha ka mga Apostoles:
Imahe
Elder David A. Bednar
“Tingali nagtuo kita sa sinugdanan nga ang bulawan, lana, o dyamante maoy adunay labing dako og bili. Apan sa tanang mga mineral, metal, mutya, ug likido nga makita sa ibabaw ug ubos sa yuta, ang labing bililhon mao ang tubig.
“Ang tubig maoy tinubdan sa kinabuhi. Ang kinabuhi gipatunhay sa tubig. Ang tubig maoy gikinahanglang paagi sa pagpahigayon sa nagkalain-laing mga kalihokan kalabut sa tanang nailhan nga mga matang sa kinabuhi. Ang atong pisikal nga mga lawas gibana-bana nga duha sa katulo ka bahin nga tubig. Samtang ang usa ka tawo makalahutay og daghang mga adlaw o gani mga semana nga walay pagkaon, ang usa ka indibidwal kasagaran mamatay sulod sa tulo o upat lamang ka adlaw nga walay tubig. Kadaghanan sa mga sentro sa dagkong populasyon sa kalibutan nahimutang dug-ol sa mga tinubdan sa presko nga tubig. Sa yano nga pagkasulti, ang kinabuhi dili makapadayon kon walay magamit ug walay access ngadto sa igong suplay sa limpyong tubig” (“A Reservoir of Living Water,” [Church Educational System fireside alang sa mga young adult, Peb. 4, 2007], 1; lds.org/broadcasts).
Samtang magtuon ka sa Juan 4, pangitaa kon unsa nga matang sa tubig ang mahinungdanon sa imong espiritu ug kon asa ka makakita niining bililhon nga kapanguhaan.
Sa Hubad ni Joseph Smith, Juan 4:1–4 (sa Giya ngadto sa mga Kasulatan) atong nasayran nga si Jesus ug ang Iyang mga disipulo namunyag.
Si Jesus mibiya sa Judea ug mibiyahe ngadto sa Galilea. Basaha ang Juan 4:4, nga mangita sa dapit nga Iyang naagian samtang nagbiyahe padulong sa Galilea.
Ang mga Judeo kasagaran mibiyahe libot sa Samaria kaysa moagi sulod niini tungod sa gihambin nga pagdumot tali sa mga Judeo ug mga Samarianhon (tan-awa sa Giya ngadto sa mga Kasulatan, “Samarianhon, Mga”). Si Jesus mipili sa pagbiyahe agi sa Samaria imbis nga molibut niini.
Basaha ang Juan 4:5–9, nga mangita kon unsay nahitabo sa dihang si Jesus mihunong sa atabay duol sa lungsod sa Sicar sa Samaria. (Ang mga pulong nga “may ikaunom na ang takna” diha sa bersikulo 6 nagpasabut nga kini udto na.) Timan-i ang katingala sa babaye sa dihang si Jesus nangayo kaniya og mainom.
Basaha ang Juan 4:10–12, nga mangita kon unsay tubag ni Jesus sa pangutana sa babaye.
Imahe
Jesus and woman at well
Unsay Iyang gitanyag kaniya?
Sa dihang ang Manluluwas migamit sa mga pulong nga “gasa sa Dios” diha sa bersikulo 10, Iyang gipasabut ang iyang Kaugalingon isip ang Manluluwas sa kalibutan ug ang tinubdan sa buhi nga tubig.
Basaha ang Juan 4:13–14, nga mangita kon unsay gisulti ni Jesus kabahin sa tubig nga Iyang gitanyag.
Imahe
Elder David A. Bednar
Aron mas makasabut unsa ang girepresentar sa buhi nga tubig, basaha ang mosunod nga pamahayag ni Elder Bednar: “Ang buhi nga tubig nga gipasabut dinhi niini nga sitwasyon usa ka representasyon ni Ginoong Jesukristo ug sa Iyang ebanghelyo. Ug sama nga ang tubig gikinahanglan sa pagpatunhay sa pisikal nga kinabuhi, ang Manluluwas ug ang Iyang mga doktrina, mga baruganan, ug mga ordinansa mahinungdanon alang sa kinabuhing dayon. Ikaw ug ako nagkinahanglan sa Iyang buhi nga tubig sa kada adlaw ug sa igong suplay aron sa pagpatunhay sa atong nagpadayon nga espirituhanong pagtubo ug paglambo” (“A Reservoir of Living Water,” 2).
Sa imong scripture study journal, pagdrowing og usa ka kopa sa tubig ug ngalani kini og: Ang Manluluwas ug ang Iyang ebanghelyo. Dayon pagsulat ngano nga ang tubig angay nga simbolo sa Manluluwas ug sa Iyang ebanghelyo.
Magtimaan niini nga pagkasimbolo, basaha ang Juan 4:14 pag-usab, ug hunahunaa unsa nga baruganan ang atong makat-unan kabahin sa Manluluwas ug sa Iyang ebanghelyo.
Usa ka baruganan nga atong mailhan gikan niini nga bersikulo mao ang kon kita moduol kang Jesukristo ug matinguhaong moambit sa Iyang ebanghelyo, nan kita makadawat og kinabuhing dayon. Ikonsiderar ang pagsulat niini nga baruganan diha sa margin sa imong mga kasulatan.
Basaha ang Juan 4:15–18, nga mangita kon unsay gihangyo sa babaye kang Jesus ug unsay tubag sa Manluluwas. Hunahunaa kon sa unsang paagi kini nga babaye nagkinahanglan sa tubig nga gitanyag sa Manluluwas.
Ang tubag ni Jesus nagpasabut nga Siya nasayud sa sitwasyon niini nga babaye.
Unsa kaha ang mga hunahuna o pagbati niini nga babaye sa dihang si Jesus mibutyag og mga detalye mahitungod kaniya nga dili unta mahibaloan sa usa ka estranghero?
Usa ka kamatuoran nga atong makat-unan gikan niini nga mga bersikulo mao nga si Jesukristo nahibalo sa atong mga sala ug nagtanyag kanato sa Iyang ebanghelyo aron sa pagtabang kanato sa pagbuntog niini. Nganong importante man nga mahibaloan ug masabtan kini nga kamatuoran?
Basaha ang Juan 4:19–20, nga mangita kon unsay gisulti sa babaye kang Jesus nga nagpakita nga ang iyang pagtan-aw Kaniya nagkausab.
Sa Samaria anaa ang bukid nga ginganlan og Bukid sa Gerizim. Mga siglo sa wala pa ang mortal nga pangalagad sa Manluluwas, ang mga Samarianhon mitukod og usa ka templo didto isip usa ka dapit nga ampoanan. Dili sama sa mga Judeo, hinoon, ang mga Samarianhon walay awtoridad sa priesthood aron sa pagpahigayon sa mga ordinansa, ug ilang gisalikway ang daghang mga pagtulun-an sa mga propeta sa Dios.
Basaha ang Juan 4:21–24 ug ang Hubad ni Joseph Smith, Juan 4:26 (sa Giya ngadto sa mga Kasulatan ), nga mangita kon unsay gitudlo ni Jesus sa babaye kabahin sa pagsimba sa Dios.
Sumala sa Hubad ni Joseph Smith, unsa nga panalangin ang moabut samtang kita nagsimba sa Dios diha sa “espiritu ug diha sa kamatuoran”?
Gikan niini nga mga bersikulo atong nakat-unan nga kon kita nagsimba sa Amahan diha sa espiritu ug diha sa kamatuoran, Siya mopanalangin kanato uban sa Iyang Espiritu.
Samtang imong basahon ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles, pangitaa ug markahi kon unsay gipasabut sa pagsimba sa Amahan diha sa espiritu ug kamatuoran.
Imahe
Elder Bruce R. McConkie
“Ang atong katuyoan mao ang pagsimba sa tinuod ug buhi nga Dios ug sa pagbuhat niini pinaagi sa gahum sa Espiritu ug sa paagi nga iyang gi-orden. Ang giaprubahan nga pagsimba sa tinuod nga Dios mopadulong ngadto sa kaluwasan; ang debosyon nga gihalad ngadto sa mga dios-dios ug nga wala gipasikad sa mahangturong kamatuoran walay ingon nga kasiguroan.
“Usa ka kahibalo sa kamatuoran mahinungdanon sa tinuod nga pagsimba. …
“… Ang tinuod ug hingpit nga pagsimba naglakip sa pagsunod sa mga lakang sa Anak sa Dios; kini naglakip sa pagsunod sa mga sugo ug pagsunod sa kabubut-on sa Amahan hangtud niana nga matang nga kita mouswag gikan sa grasya ug dugang pa nga grasya hangtud nga kita mahimaya diha kang Kristo sama kaniya diha sa iyang Amahan. Kini mas labaw pa kay sa pag-ampo ug wali ug kanta. Kini mao ang pagpakabuhi ug pagbuhat ug pagsunod. Kini mao ang pagsunod sa kinabuhi sa talagsaon nga Ehemplo [Jesukristo]” (“How to Worship,” Ensign, Dis. 1971, 129–30).
Tubaga ang mosunod nga mga pangutana diha sa imong scripture study journal:
Kanus-a man nga ang imong pagsimba sa Langitnong Amahan midapit sa Espiritu sa pagtabang kanimo sa imong kinabuhi?
Sumala sa pamahayag ni Elder McConkie, unsay imong mabuhat aron mas makasimba sa Amahan diha sa espiritu ug kamatuoran? (Pagsulat og usa ka tumong sa usa ka piho nga butang nga mas maayo nimo nga mabuhat.)
Basaha ang Juan 4:25–26, nga mangita kon unsay gipadayag ni Jesus ngadto sa babaye kabahin sa Iyang kaugalingon.
Basaha ang Juan 4:27–30, nga mangita kon unsay gibuhat sa babaye human makig-istorya sa Manluluwas.
Unsa man ang iyang gisulti nga nagpasabut nga siya nakaangkon og pagpamatuod kabahin ni Jesukristo?
Gikan niini nga istorya makakat-on kita nga samtang kita makaangkon og pagpamatuod kabahin ni Jesukristo, kita mapuno sa tinguha sa pagpakigbahin niini ngadto sa uban.
Sa Juan 4:31–37 atong mabasa nga ang mga disipulo ni Jesus mibalik nga nagdala og pagkaon. Dihang ila siyang giagda sa pagkaon, Siya mitudlo kanila nga Siya nabuhi dili pinagi sa pagkaon apan pinaagi sa pagbuhat sa kabubut-on sa Iyang Amahan. Dayon siya midapit kanila sa pagtan-aw nga daghan kaayo ang mga oportunidad sa pagsangyaw sa ebanghelyo.
Basaha ang Juan 4:39–42, nga mangita sa epekto sa pagpamatuod sa babaye diha sa mga tawo sa iyang siyudad.
Sumala sa Juan 4:42, unsay gisulti sa mga tawo ngadto sa babaye?
Ang Juan 4:43–45 nagrekord nga si Jesus mibiya sa Samaria ug misulod sa Galilea. Basaha ang Juan 4:46–54, nga mangita kinsa ang misugat ni Jesus ug unsa nga panalangin ang gitinguha niining tawhana gikan kang Jesus.
Basi sa unsay gisulti ni Jesus diha sa bersikulo 48, nganong Iya mang gilangay ang paghatag sa panalangin nga gitinguha niini nga tawo? Giunsa man niining tawhana pagpakita nga wala siya magkinahanglan og timailhan aron motuo?
Gikan niini nga istorya makakat-on kita nga samtang kita motuo kang Jesukristo nga dili magkinahanglan og mga timailhan, lig-unon sa Ginoo ang atong pagtuo.
Imahe
Elder Bruce R. McConkie
Si Elder Bruce R. McConkie mitudlo sa kaimportante sa pagkaayo sa anak sa opisyal: “Kini mao ang unang milagro sa pag-ayo nga gidetalye diha sa mga Ebanghelyo. Kadtong gipahigayon sa Fiesta sa Pagpalabay ug sa tibuok Judea wala gihulagway o gipasabut. Kini nga milagro—ang ikaduha nga gipahigayon sa Cana—nagpakita og bag-ong aspeto sa pagpang-ayo nga pangalagad ni Jesus nga wala nato makita hangtud niining puntoha. Sa pagkatinuod kini duha ka mga milagro: ang usa nga nag-ayo sa lawas sa anak nga lalaki nga wala diha, ug ang usa nga miayo sa pagkawalay pagtuo ug mitanom og hugot nga pagtuo diha sa kasingkasing sa amahan nga anaa” (The Mortal Messiah: From Bethlehem to Calvary, 4 vols. [1979–81], 2:12).
Tubaga ang mosunod nga mga pangutana diha sa imong scripture study journal:
Nganong importante man nga motuo kita kang Jesukristo nga dili magkinahanglan og mga timailhan?
Sa unsang paagi ang Ginoo molig-on sa atong pagtuo samtang matinud-anon kitang motuo diha Kaniya?
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Juan 4 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: