Ang Espiritu Santo migiya ni Pablo ug sa iyang mga kompanyon sa pagsangyaw sa ebanghelyo didto sa Macedonia (aminahang Gresya). Human papahawaa ni Pablo ang dautang espiritu gikan sa sulugoong babaye, siya ug si Silas gibunal-bunalan ug gipriso. Nianang gabhiona, milagroso silang nakagawas sa prisohan, pagkahuman ilang gibunyagan ang tigbantay sa bilanggoan ug ang iyang pamilya. Si Pablo ug Silas mitudlo usab sa ebanghelyo didto sa Tesalonica ug Berea. Ang panggukod gikan sa dili mga tumutuo niini nga mga siyudad nakapugos ni Pablo sa pag-adto sa Atenas, diin, sa Areopago, iyang gitudloan ang katawhan mahitungod sa kinaiya sa Dios.
Si Pablo ug ang iyang mga kompanyon misangyaw sa ebanghelyo didto sa Macedonia
Ang usa ka aghat nagpasabut sa mga pagbati o mga impresyon nga atong madawat gikan sa Espiritu Santo sa pagsulti o pagbuhat og usa ka butang.
Imahe
President Thomas S. Monson
Si Presidente Thomas S. Monson misaysay og kasinatian nga iyang nasinati sa dihang misunod siya sa usa ka aghat sa pag-adto ug paghatag og panalangin sa priesthood ngadto sa usa ka higala sa ospital. Miresulta kini sa pagkaluwas sa kinabuhi sa iyang higala. Si Presidente Monson miingon nga iyang nakat-unan ang mosunod nga leksyon nianang adlaw: “Ayaw, ayaw, ayaw gayud langana ang usa ka aghat” (“The Spirit Giveth Life,” Ensign, Hunyo 1997, 5).
Sa imong scripture study journal, isulat ang Ayaw gayud langana ang pagtubag sa usa ka aghat gikan sa Ginoo. Sa ubos niana nga pamahayag isulat ang posibling positibo nga mga sangputanan sa padayon nga pagpatalinghug sa aghat sa Espiritu Santo.
Samtang ikaw magtuon sa Mga Buhat 16, pangitaa ang baruganan nga makatabang nimo og dugang nga makasabut sa kaimportante sa pagpatalinghug sa mga aghat sa Espiritu Santo.
Sa Mga Buhat 16:1–5 mabasa nato nga silang Pablo, Silas, ug Timoteo mipanaw ngadto sa daghang mga branch sa Simbahan aron sa pagpahibalo sa mga desisyon nga gihimo sa mga lider sa Simbahan didto sa Jerusalem nga makaapekto sa tibuok Simbahan ug malig-on ang mga miyembro sa Simbahan diha sa pagtuo.
Basaha ang Mga Buhat 16:6–10, nga mangita kon giunsa ni Pablo ug sa iyang mga kompanyon sa pagkahibalo asa moadto samtang sila nagpanaw. Mahimo nimong gamiton ang mga Mapa sa Biblia, nu. 13, “Ang Missionaryo nga mga Panaw ni Apostol Pablo,” alang sa dapit nga giaadtoan ni Pablo.
Tan-awa nga sa Mga Buhat 16:10 nga si Pablo ug ang iyang mga kompanyon misunod sa Espiritu ug mitubag “dihadiha” sa panan-awon nga nadawat ni Pablo.
Atong mabasa sa Mga Buhat 16:11–13 nga si Pablo ug si Silas mipanaw gikan sa Troas hangtud sa Filipos, usa ka siyudad sa Macedonia. Sa adlaw nga Igpapahulay, mibiya sila sa siyudad aron mag-ampo duol sa daplin sa sapa ug nagsugod sa pagpakigsulti sa mga babaye nga tua didto.
Basaha ang Mga Buhat 16:14–15, nga mangita giunsa sa babaye nga ginganlan og Lidia pagtubag sa mga pagtulun-an ni Pablo. Sa bersikulo 14 ang mga pulong “namaligyag purpora” nagpasabut nga si Lidia namaligya og purpora nga tina, nga mahal kaayo ug tingali nagpasabut nga siya usa ka babaye nga daghan og bahandi ug dunay impluwensya. Ang pulong gipatalinghugan nagpasabut nga siya naminaw o nagpatalinghug.
Unsa nga mga pulong sa Mga Buhat 16:14 nga nagpakita nga si Lidia andam na nga modawat sa ebanghelyo?
Gikan sa kasinatian ni Pablo atong makat-unan nga kon kita mosunod sa pagpadayag nga gihatag nato gikan sa Dios, magiyahan kita ngadto niadtong andam na nga modawat sa ebanghelyo.
Basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug markahi unsay iyang gisulti nga kinahanglan nga atong buhaton aron magiyahan ngadto niadtong andam na nga modawat sa ebanghelyo:
Imahe
Elder Dallin H. Oaks
“Kinahanglang mag-ampo kita alang sa panabang ug direksyon sa Ginoo aron mahimo kitang mga instrumento sa Iyang mga kamot alang sa usa ka tawo nga andam na—ang tawo nga gusto Niya nga atong tabangan karon. Dayon, kinahanglang alerto kita sa pagpaminaw ug pagpatalinghug sa mga aghat sa Iyang Espiritu unsaon sa pagpadayon.
“Kadto nga mga aghat moabut. Nasayud kita gikan sa dili maihap nga personal nga mga pagpamatuod nga sa Iyang kaugalingong paagi ug sa Iyang kaugalingong panahon ang Ginoo nag-andam og mga tawo sa pagdawat sa Iyang ebanghelyo. Ang maong mga tawo nagpangita, ug kon kita naningkamot sa pag-ila nila ang Ginoo motubag sa ilang mga pag-ampo pinaagi sa pagtubag sa atong pag-ampo. Siya moaghat ug mogiya niadtong nagtinguha ug kinsa sinserong nagtinguha og giya kon unsaon, asa, kanus-a, ug kinsa ang paambiton sa Iyang ebanghelyo” (“Sharing the Gospel,” Ensign, Nob. 2001, 8).
Pamalandung og usa ka panahon sa dihang ikaw o usa ka tawo nga imong nailhan naminaw sa mga aghat sa Espiritu Santo ug nakakita og tawo nga andam na nga modawat sa ebanghelyo o sa dihang ang usa ka tawo misunod sa mga aghat sa Espiritu Santo sa pagpangita nimo sa dihang ikaw andam na nga modawat sa ebanghelyo. I-rekord ang kasinatian diha sa imong scripture study journal.
Paningkamuti ang pagsunod sa tambag nga gihatag ni Elder Oaks pinaagi sa pag-ampo sa panabang sa Ginoo ug dayon mosunod sa mga aghat sa Espiritu sa pagpakigbahin sa ebanghelyo niadtong anaa sa imong palibut.
Basaha ang Mga Buhat 16:16–18, nga mangita unsay gibuhat ni Pablo sa dihang iyang nakita ang “dalagitang ulipon” (Mga Buhat 16:16), o dalagitang binatonan, kinsa nasudlan og dautang espiritu. Ang pagpanag-an (Mga Buhat 16:16) mao ang “bisan unsa nga tuo-tuo nga paagi sa pagdiskobre sa dagan sa umaabut nga mga hitabo. Ang maong praktis nakita sa tanang mga nasud ug sa matag panahon, kanunay kini nga gipanghimaraut diha a kasulatan” (Bible Dictionary, “Divination”).
Basaha ang Mga Buhat 16:19–21, nga mangita kon unsay gibuhat sa agalon sa dalagitang binatonan sa mga aksyon ni Pablo.
Sa Mga Buhat 16:22–24 atong makat-unan nga ang pundok sa mga tawo ug lokal nga mga awtoridad mimando nga bunal-bunalan ug prisuhon si Pablo ug Silas.
Kopyaha ang mosunod nga tsart diha sa imong scripture study journal. Basaha ang mga tudling sa kasulatan nga gilista sa tsart ug pagdrowing og yanong litrato sa imong kaugalingong tsart nga nagpakita unsay gihulagway sa matag tudling.
Tan-awa sa Mga Buhat 16:31 giunsa pagtubag ni Pablo ug Silas ang pangutana sa gwardiya, “Unsay kinahanglang buhaton ko aron maluwas ako?” (Mga Buhat 16:30). Unsay gibuhat dayon sa gwardiya sa prisohan sa pagpakita sa iyang pagtuo ni Jesukristo?
Gikan sa mga pagtudlo ni Pablo ngadto sa gwardiya sa prisohan, atong makat-unan nga ang kaluwasan kinahanglan nga motuo ni Jesukristo, ug atong ipakita ang atong pagtuo diha Kaniya pinaagi sa pagpabunyag.
Ang Kaluwasan nagpasabut nga “maluwas gikan sa yutan-on ug espirituhanon nga kamatayon” (Giya ngadto sa mga Kasulatan, “Kaluwasan,” scriptures.lds.org). Sa unsa nga paagi nga ang pagpabunyag nagpakita sa atong pagtuo kang Jesukristo?
Dugang sa pagpabunyag, unsa pa ang uban nga mga paagi nga kita makapakita sa atong pagtuo kang Jesukristo?
Sa Mga Buhat 16:35–40 atong makat-unan nga ang mga maghuhukom mipadala og sulat ngadto sa gwardiya sa prisohan sa pagpagawas ni Pablo ug Silas. Nagdumili si Pablo sa paggawas tungod kay nasayud siya nga ang iyang mga katungod isip Romanhon ug nasayud nga ang ilang pagtratar kaniya dili makiangayon. Dili pinasubay sa balaod ang pagbunal sa usa ka Romanhon nga wala maghimo og husay. Sa dihang ang mga maghuhukom nasayud nga silang Pablo ug Silas mga Romanhon, nahadlok sila. Ang gwardya miluhod tupad ni Pablo ug ni Silas ug nangutana kon unsaon nga siya maluwas.
Ang pipila ka mga Judeo sa Tesalonica misulay sa pagpahunong ni Pablo sa pagsangyaw sa ebanghelyo
Hunahunaa ang tambag nga imong ihatag ngadto sa mga indibidwal sa mosunod nga mga senaryo:
Usa ka batan-ong lalaki nga usa ka miyembro sa Simbahan naminaw sa usa ka sakop sa Korum sa Napulog Duha ka mga Apostoles nga namulong mahitungod sa kaimportante sa kaminyoon ug pamilya sa plano sa Langitnong Amahan. Ang ubang mga higala sa batan-ong lalaki mipadayag sa ilang pagsupak sa mga pagtulun-an sa mga Apostoles. Ang batan-ong lalaki gusto nga masayud alang sa iyang kaugalingon kon tinuod ba ang mga pagtulun-an sa Apostol.
Usa ka batan-ong babaye mikwestyon sa kaimportante sa pagbalaan sa adlawng Igpapahulay. Kadaghanan sa iyang mga higala nga magpundok ma-Dominggo aron mamalit, mangaon sa gawas, o manan-aw og sine. Ang iyang inahan mipasabut sa mga panalangin nga moabut tungod sa pagtahud sa Ginoo sa adlaw nga Dominggo, apan ang batan-ong babaye nakigbisog gihapon sa pagtuo nga importante ang pagbalaan sa adlaw nga Igpapahulay.
Pangitaa ang mga baruganan samtang magtuon ka sa Mga Buhat 17 nga makatabang nimo nga makahibalo alang sa imong kaugalingon sa pagkatinuod sa mga mensahe nga atong madawat gikan sa mga sulugoon sa Ginoo.
Sa Mga Buhat 17:1 atong makat-unan nga silang Pablo ug Silas mipanaw ngadto sa Tesalonica, diin nagtudlo sila diha sa sinagoga sa Judeo.
Basaha ang Mga Buhat 17:2–3, nga mangita unsay gigamit ni Pablo sa pagtudlo sa mga Judeo nga si Jesus mao ang Kristo, ang Mesiyas.
Ang pulong nagpamatuod sa bersikulo 3 nagpasabut og nagpadayag o nag-angkon. Migamit si Pablo sa mga tudling sa kasulatan isip ebidensya sa pagsuporta sa iyang pagpamatuod nga si Jesus mao ang Kristo.
Basaha ang Mga Buhat 17:4–5, nga mangita giunsa pagtubag sa katawhan sa Tesalonica sa mga pagtulun-an ni Pablo. Ang pulong miipon sa bersikulo 4 nagpasabut nga nagpundok o miapil, ug ang bugoy sa bersikulo 5 nagpasabut nga dautan.
Sa Mga Buhat 17:6–9 atong makat-unan nga ang pundok sa mga dili tumutuo naningkamot sa pagpangita nilang Pablo ug Silas, apan sa dihang wala nila sila makit-i, ang pundok midala sa pipila sa mga tumutuo ug miadto sa mga magmamando sa Tesalonica ug miangkon nga ang mga pagtulun-an ni Pablo nakahulga sa awotoridad ni Cesar.
Basaha ang Mga Buhat 17:10–12, nga mangita kon diin moikyas silang Pablo ug Silas ug giunsa sa pagtubag sa mga Judeo didto ang mga pagtulun-an ni Pablo.
Ikonsiderar ang pagmarka sa Mga Buhat 17:11 unsay gibuhat sa mga tawo nga misangpot sa ilang pagtuo sa mga pagtulun-an ni Pablo. Dayon kompletuha ang mosunod nga equation uban sa mga aksyon nga imong gimarkahan:
Aron mas masabtan unsay gipasabut sa “[midawat] man sa pulong uban sa bug-os nga pagkamasibuton” (Mga Buhat 17:11), hunahunaa unsay hitsura sa usa ka tawo nga andam nga mosalo sa bola. Karon hunahuna unsay hitsura sa usa ka tawo kon dili andam sa pagsalo sa bola. Unsa kahay hitsura sa usa ka tawo kon andam na nga modawat sa mga pulong sa mga sulugoon sa Dios? Unsa kahay hitsura sa usa ka tawo nga dili andam nga modawat sa mga pulong sa Dios?
Ang usa ka tawo nga modawat sa pulong nga andam sa hunahuna mao ang tawo kinsa mapainubsanon, mapailubon, ug andam nga mosunod sa kabubut-on sa Ginoo kon kini makat-unan na niya (tan-awa sa Mosiah 3:19).
Gikan sa Mga Buhat 17:10–12 atong makat-unan nga kon kita modawat sa mga pulong sa mga sulugoon sa Dios uban sa tumang pagkaandam sa hunahuna ug mosiksik sa mga kasulatan matag adlaw, nan ang atong pagtuo sa ilang mga pulong malig-on.
Ribyuha ang mga senaryo nga gihulagway sa sinugdanan niini nga seksyon, ug dayon tubaga ang mosunod nga mga pangutana diha sa imong scripture study journal.
Sa unsang paagi kini nga baruganan makatabang sa mga tawo niini nga mga senaryo?
Sa unsang paagi nga ang pagkaandam sa pagkat-on makatabang sa atong abilidad sa pagtuo sa kamatuoran?
Sa unsang paagi nga ang inadlaw nga pagtuon sa kasulatan makaimpluwensya sa atong abilidad sa pagtuo sa kamatuoran?
Ikonsiderar ang mga panahon sa dihang ikaw nakasaksi sa kamatuoran niini nga baruganan. Mahimo nimong ikonsiderar ang pagpakigbahin sa imong mga kasinatian uban sa usa ka higala o miyembro sa pamilya.
Sa Mga Buhat 17:13–15 atong makat-unan nga sa dihang ang mga Judeo sa Tesalonica nakadungog nga si Pablo nagsangyaw sa Berea, nangadto sila aron gubton ang mga tawo sa Berea. Si Pablo kinahanglang mopalayo na usab, mao nga siya mipanaw ngadto sa Atenas.
Sa Mga Buhat 17:16–34 atong makat-unan nga sa Atenas si Pablo nakamatikod og altar nga dunay nakasulat nga “Alang sa dios nga wala hiilhi” (Mga Buhat 17:23). Dayon si Pablo mitudlo sa mga taga-Atenas mahitungod sa kinaiya sa tinuod nga Dios—sa Langitnong Amahan—sa Dios nga wala nila hiilhi.
Isulat ang mosunod sa ubos sa imong mga assignment karong adlawa diha sa imong scripture study journal:
Akong natun-an ang Mga Buhat 16–17 ug nahuman kini nga leskyon sa (petsa).
Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: