Juan 5–6

Si Jesus mitambong og usa ka fiesta (malagmit ang Pagpalabay) sa Jerusalem ug miayo sa usa ka nagluya nga tawo didto sa tuburan sa Betsata. Siya usab mihulagway sa uban pang mga saksi kinsa mipamatuod sa Iyang kabalaan. Human makabalik sa Galilea, milagroso Niyang gipakaon ang pundok sa sobra 5,000 ka mga tawo ug mitudlo nga Siya mao ang Tinapay sa Kinabuhi.

Hunahunaa ang usa ka panahon dihang ikaw o imong kaila nakabuak og usa ka butang nga importante o bililhon.

Imahe

broken clay pot

Isip mga anak sa Langitnong Amahan, kitang tanan mahinungdanon ug bililhon kaayo. Hinoon, tungod sa atong mga pagpili o mga hagit nga atong giatubang, usahay kita mobati nga nadaut o daw wala kaayoy bili.

Unsa ang pipila ka mga paagi nga ang usa ka tawo mahimong mobati nga nadaut sa espiritwal, pisikal o emosyonal nga paagi?

Paghunahuna og higayon dihang ikaw tingali mibati niini nga paagi. Samtang magtuon ka sa Juan 5:1–9, pangita og kamatuoran nga makatabang sa paghupay kanimo ug makahatag kanimo og paglaum kon gibati nimo nga nadaut.

Diha sa Juan 5:1 atong mabasa nga human si Jesukristo nangalagad sa Galilea, mibiyahe Siya ngadto sa Jerusalem aron sa pag-obserbar sa usa ka fiesta sa mga Judeo, labing siguro ang Pagpalabay . Samtang didto sa Jerusalem, miadto Siya sa usa ka tuburan sa tubig duol sa templo.

Basaha ang Juan 5:2–4, nga mangita kon kinsa ang nagpundok libut sa tuburan ug unsay ilang gihulat.

Ang mga pulong nga masakiton, buta, bakol, ug paralitiko diha sa bersikulo 3 naghulagway og mga tawo nga nasakit, nagluya, o nabakol sa bisan unsang paagi. Tingali adunay usa ka tubod nga usahay midagayday ngadto sa tuburan ug maoy hinungdan sa pagbula-bula sa tubig (tan-awa sa Bible Dictionary sa LDS English version nga Biblia, “Bethesda”).

Imahe

Elder Bruce R. McConkie

Si Elder Bruce R. McConkie sa Korum sa Napulog Duha ka mga Apostoles mitudlo sa mosunod: “Walay duda nga ang tuburan sa Betsata usa ka tubod nga mineral diin ang mga tubig adunay makaayo nga mga epekto. Apan ang bisan unsa nga ideya nga usa ka anghel mikanaug ug mikutaw sa tubig, aron nga ang unang tawo nga moubog human niana mamaayo, usa lamang ka tuo-tuo. Ang makaayo nga mga milagro dili buhaton sa ingon nga paagi” (Doctrinal New Testament Commentary, 3 vols. [1965–73], 1:188).

Hunahunaa kon sama sa unsa kaha ang talan-awon didto sa tuburan, nga daghan kaayong mga tawo nga nanghinaut nga mamaayo pinaagi sa pag-una og ubog niini.

Basaha ang Juan 5:5–7, nga mangita kon kinsay nakit-an sa Manluluwas nga naghigda duol sa tuburan.

Unsay gisulti niini nga mga bersikulo kalabut sa tawo nga nakit-an sa Manluluwas? Nganong wala man makahimo ang tawo sa pag-una og ubog sa tubig?

Imahe

Christ Healing the Sick at Bethesda

Basaha ang Juan 5:8–9, nga mangita kon unsay gitubag sa Manluluwas ngadto sa tawo.

Ikonsiderar ang pagmarka sa mga pulong “ang tawo naayo” diha sa bersikulo 9. Kini nga pag-ayo nahitabo didto sa tuburan sa Betsata. Ang pulong nga Betsata mahimong hubaron isip “balay sa kalooy” (Bible Dictionary sa LDS English version sa Biblia, “Bethesda”). Ang kalooy mao ang kapuangod o kamabination. Ang labing mahinungdanong buhat sa kalooy nga sukad nahimo mao ang Pag-ula ni Jesukristo.

Ngano nga ang Betsata usa ka tukma nga ngalan alang niini nga dapit, ilabi na human ang Manluluwas miayo niini nga tawo?

Sa unsang mga paagi kitang tanan mahimong sama niini nga tawo sa kilid sa tuburan sa Betsata?

Usa ka kamatuoran nga atong makat-unan gikan sa pag-ayo sa Manluluwas niining tawhana mao nga pinaagi sa gahum ug kalooy ni Jesukristo, kita mahimo nga mamaayo.

Imahe

Elder Merrill J. Bateman

Aron mas masabtan kini nga kamatuoran, basaha ang mosunod nga pamahayag gikan ni Elder Merrill J. Bateman sa Seventy, nga mangita sa mga paagi nga iyang gisulti nga ang Manluluwas makaayo kanimo: “Sama sa tawo nga bakol didto sa Tuburan sa Betsata nga nagkinahanglan og usa ka tawo nga mas lig-on kay sa iyang kaugalingon aron mamaayo (tan-awa sa Juan 5:1–9), mao usab kita nga nagsalig sa mga milagro sa Pag-ula ni Kristo aron ang atong mga kalag mamaayo gikan sa kasubo, kaguol, ug kasal-anan. … Pinaagi kang Kristo, ang masulub-ong mga kasingkasing maayo ug ang kalinaw mohulip sa mga kabalaka ug kasubo” (“The Power to Heal from Within,” Ensign, Mayo 1995, 13).

Importante nga hinumduman nga kita mamahimong maayo dinhi niini nga kinabuhi o sa sunod, basi sa panahon sa Ginoo.

1. Pamalandungi ang mga higayon dihang imong nasaksihan o gibati ang gahum, kalooy, ug kapuangod ni Jesukristo nga nagtabang kanimo o sa laing tawo kinsa mibati nga nadaut, sa espiritwal, pisikal o emosyonal nga paagi. Sa imong scripture study journal, isulat ug dayon humana ang mosunod nga dili kompleto nga pamahayag: Ako nasayud nga ang Manluluwas maloloy-on ug mapuanguron tungod kay …

Sa Juan 5:10–30 atong mabasa nga ang Manluluwas sa wala madugay nakakita sa tawo diha sa templo ug mitambag kaniya nga dili na magpakasala pa. Sa dihang nasayran sa mga lider nga Judeo nga ang tawo giayo ni Jesus sa adlaw nga Igpapahulay, ilang gilutos ug gisulayan sa pagpatay ang Manluluwas. Si Jesus mitudlo sa mga lider nga Judeo nga pinaagi sa pag-ayo sa tawo, Siya nagbuhat sa buhat sa Langitnong Amahan. Ang Manluluwas mitudlo dayon mahitungod sa Iyang relasyon ngadto sa Amahan. Siya usab mitudlo nga kadtong anaa sa kalibutan sa espiritu pagatudloan sa ebanghelyo sa dili madugay.

Hunahunaa ang usa ka panahon nga adunay misulti kanimo og usa ka butang nga lisud kaayo tuohan.

Sa unsang paagi ang kamatuoran sa bisan unsang pangangkon malig-on kon adunay sobra sa usa ka saksi?

Basaha ang Juan 5:31, nga mangita kon unsay gisulti sa Manluluwas mahitungod sa Iyang kaugalingong saksi sa Iyang relasyon ngadto sa Langitnong Amahan.

Ang Hubad ni Joseph Smith nagklaro sa Juan 5:31–32:

“Busa kon ako magpanghimatuod sa akong kaugalingon, bisan pa niana ang akong panghimatuod tinuod.

“Kay wala ako mag-inusara, adunay lain nga nagapanghimatuod mahitungod kanako” (Joseph Smith Translation, Juan 5:32–33).

Ang Manluluwas nagtudlo sa mga Judeo nga sila adunay laing mga saksi agig dugang sa Iyaha.

Basaha ang mosunod nga mga bersikulo, ug ilha ang uban pang mga saksi nga nagpamatuod sa pagkabalaan ni Jesus:

Juan 5:32–35:

Juan 5:36:

Juan 5:37–38:

Juan 5:39:

Juan 5:45–47:

Bisan pa nga adunay daghan nga mga saksi mahitungod ni Jesukristo, ang mga lider nga Judeo wala motuo sa kabalaan ni Jesus. Timan-i sa Juan 5:39 nga samtang si Jesus namulong kabahin sa mga kasulatan, Siya miingon, “Kay nagahunahuna man kamo nga pinaagi niini makakaplag kamo sa kinabuhing dayon.” “Daghang Judeo sa panahon ni Jesus nagtuon sa mga kasulatan, nagtuo nga pinaagi sa pagtuon niini sila makaangkon og kinabuhing dayon. … Ang Manluluwas misulay sa pagkorihir niining sayop nga pagtuo pinaagi sa pagtudlo nga ang mga kasulatan, nga gitan-aw sa mga Judeo isip katapusang awtoridad, nagpamatuod nga ang kinabuhing dayon dili makaplagan diha sa mga kasulatan apan sa pagsunod ni Jesukristo. Ang mga Judeo napakyas usab sa pagkaamgo nga ang mga kasulatan mao ang mga pulong ni Kristo ug ang ilang katuyoan mao ang pagdala sa mga katawhan ngadto kang Kristo, kay Siya ang pinakatinubdan sa kamatuoran ug kinabuhi” (New Testament Student Manual [manwal sa Church Educational System, 2014], 219–20).

Basaha ang Juan 5:40, nga mangita kon unsay kinahanglang buhaton sa mga Judeo aron makaangkon og kinabuhing dayon.

Bisan tuod ang mga Judeo nagtuon sa mga kasulatan, unsay gidumilian nila sa pagbuhat nga makatabang unta nila sa pagdawat sa kinabuhing dayon?

Gikan sa unsay imong nakat-unan sa mga pagtulun-an sa Manluluwas diha sa Juan 5:39–40, kompletuha ang mosunod nga baruganan: Pinaagi lamang sa pag-anha kang nga atong madawat ang kinabuhing dayon.

Hinumdumi nga ang kinabuhing dayon naglakip sa pagkahimong sama sa Langitnong Amahan ug sa pagpuyo hangtud sa kahangturan uban sa atong takus nga mga sakop sa pamilya diha sa Iyang presensya. Aron madawat kini nga gasa kita kinahanglan nga moduol kang Jesukristo pinaagi sa hugot nga pagtuo diha Kaniya, paghinulsol sa atong mga sala, pagdawat sa mga ordinansa sa ebanghelyo, pagtuman sa atong mga pakigsaad, ug pagsunod sa mga sugo sa Ginoo.

Hunahunaa nganong ang pagduol ngadto ni Jesukristo mahinungdanon sa pagdawat sa kinabuhing dayon.

2. Tan-awa ang mga saksi ni Jesukristo nga imong gilista sa ibabaw. Sa imong scripture study journal, isulat kon sa unsang paagi ang usa niini nga mga saksi ni Jesukristo nakatabang kanimo (o makatabang kanimo) nga moduol ngadto Kaniya.

Pamalandungi kon unsay imong buhaton aron mas hingpit nga makaduol sa Manluluwas aron ikaw makadawat sa kinabuhing dayon.

Diha sa Juan 6:1–13 atong mabasa nga human mobalik ngadto sa Galilea, si Jesus milagruso nga mipakaon sa kapin sa 5,000 ka mga tawo sa lima ka tinapay ug duha ka gagmayng isda. (Imong natun-an kini nga hitabo diha sa mga leksyon sa Mateo 14 ug Marcos 6.)

Basaha ang Juan 6:14–15, nga mangita kon unsay gustong buhaton sa mga tawo human si Jesus milagrusong mipakaon kanila.

Usa ka tradisyon sa mga Judeo sa panahon ni Jesus misugyot nga kon ang Mesiyas, o Hari sa Israel, moabut, Siya mopakaon sa katawhan og tinapay gikan sa langit.

Ang Juan 6:16–21 nagrekord nga ang Manluluwas mipadala sa iyang mga disipulo tabok sa Dagat [Lanaw] sa Galilea, ug unya sa lawom na nga kagabhion samtang ang mga disipulo nanlimbasug sa pagbugsay batok sa mga balud ug sa hangin, si Jesus milakaw tabok sa dagat sa pagkuyog kanila. Ang istorya ni Juan niini nga hitabo nagklaro nga sa dihang “gikalipay” sa mga disipulo ang pagdawat kang Jesus sa ilang sakayan sila “diha-diha dayon” (Juan 6:21) luwas nga midunggo sa ilang destinasyon. Kon andam kitang modawat sa Manluluwas ug sa Iyang mga pagtulun-an, makatabang Siya sa paggiya kanato agi sa mga panlimbasaug sa pagka-mortal.

Ang Juan 6:22–59 nagrekord nga daghan sa mga tawo kinsa milagrusong gipakaon ni Jesus mibiyahe ngadto sa Capernaum nga nangita Kaniya, nagtinguha nga pakan-on og dugang nga pan. Pipila ka mga tawo nagbagulbol batok sa Manluluwas tungod kay nagtudlo Siya nga Siya mao ang tinapay nga nanaug gikan sa langit. Si Jesus mitudlo nga Siya mao ang Tinapay sa Kinabuhi ug nga kon ang tawo moduol ngadto Kaniya ug modawat sa Iyang mga pagtulun-an ug Pag-ula, ilang madawat ang kinabuhing dayon.

Paghunahuna og higayon nga kinahanglan ka nga mopili tali sa pagpadayon sa pagbuhat sa usa ka lisud nga butang o pag-undang.

Imahe

violinist, runner

Human si Jesus mitudlo nga Siya mao ang Tinapay sa Kinabuhi, pipila sa Iyang mga disipulo nag-atubang sa desisyon kon mopadayon ba o dili mopadayon sa pagsunod Kaniya. Basaha ang Juan 6:60, 66, nga mangita sa gibuhat sa daghang mga disipulo ni Jesus agig tubag sa Iyang mga pagtulun-an.

Ang mga pulong nga “lisud kining sultiha” sa bersikulo 60 nagpasabut nga ilang gibati nga lisud sundon ang mga pagtulun-an ni Jesus.

Hain sa mga pagtulun-an ni Jesukristo ang mahimong lisud sundon sa pipila ka mga tawo sa atong panahon karon? (Kon gikinahanglan, pangita og mga pagtulun-an diha sa Alang sa Kalig-on sa Kabatan-onan nga mahimong lisud alang sa pipila ka batan-on.)

Basaha ang Juan 6: 67–69, nga mangita sa pangutana ni Jesus ngadto sa Iyang mga Apostoles ug sa tubag ni Pedro sa pangutana.

Usa ka kamatuoran nga atong makat-unan gikan sa tubag ni Pedro mao nga ang lig-on nga pagpamatuod kabahin ni Jesukristo motabang kanato nga magpabiling matinud-anon atol sa mga panahon nga mahimong lisud ang pagsunod sa Manluluwas o sa pagsunod sa Iyang mga pagtulun-an. Ikonsiderar ang pagsulat niini nga kamatuoran sa imong mga kasulatan tupad sa Juan 6:67–69.

3. Sa inyong scripture study journal, isulat kon sa unsa nga paagi ang usa ka lig-on nga pagpamatuod sa Manluluwas nakatabang kanimo o sa imong kaila nga magpabiling matinud-anon bisan kon ang mga pagtulun-an sa ebanghelyo ingon og lisud sundon.

4. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Juan 5–6 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: