Pasiuna sa 1 Mga Taga-Corinto

Ang mga miyembro sa unang Simbahan nga nagpuyo didto sa Corinto nanlimbasug sa daghang mga problema nga anaa sa kalibutan karon, sama sa kawalay paghiusa, sayop nga mga pagtulun-an, ug imoralidad. Sa 1 Mga Taga-Corinto atong makat-unan nga ang Apostol Pablo mitudlo niini nga mga Santos unsaon pagpalambo og panaghiusa sa Simbahan, unsaon sa pagkat-on sa mga butang sa Dios, ang tahas sa pisikal nga lawas isip usa ka templo alang sa Espiritu Santo, ang matang sa espirituhanong mga gasa, ang kaimportante sa pag-ambit sa sakrament sa takus nga paagi, ug ang katinuod sa Pagkabanhaw. Pinaagi sa imong pagtuon sa mga pagtulun-an ni Pablo nga narekord diha sa 1 Mga Taga-Corinto, makakat-on ka sa mga doktrina ug mga baruganan nga motabang kanimo sa pagpuyo nga matarung bisan pa sa bisan unsang pagkadautan nga mahimo nimong masugatan.

Ang pangbukas nga bersikulo sa 1 Mga Taga-Corinto nagpasabut nga kini gipadala ni Apostol Pablo ug sa usa ka disipulo nga ginganlan og Sostenes, nga tingali nagserbisyo isip tigsulat ni Paul (tan-awa sa 1 Mga Taga-Corinto 1:1). Samtang ang mga detalye sa tahas ni Sostenes wala masayri, klaro nga si Pablo mao ang tagsulat sa unod sa epistola (tan-awa sa 1 Mga Taga-Corinto 16:21–24).

Gihimo ni Pablo ang sulat nga nailhan nga 1 Mga Taga-Corinto sa hapit na matapos ang iyang tulo ka tuig nga pagbisita sa Efeso (atol sa iyang ikatulong misyon), nga posibleng natapos niadtong A.D. 55 and 56 (tan-awa sa Mga Buhat 19:10; 20:31; Giya ngadto sa mga Kasulatan, “Epistola ni Pablo, Mga”).

Kini nga epistola gisulat ngadto sa mga miyembro sa Simbahan sa siyudad sa Corinto. Si Pablo misangyaw sa ebanghelyo didto sa Corinto sulod sa hapit duha ka tuig (tan-awa sa Mga Buhat 18:1–18) ug miorganisar og branch sa Simbahan didto (tan-awa sa Giya ngadto sa mga Kasulatan, “Epistola ni Pablo, Mga,”). Sa wala madugay, samtang si Pablo nagsangyaw didto sa Efeso panahon sa iyang ikatulong misyonaryo nga panaw, siya nakadawat og komunikasyon gikan sa mga miyembro sa Simbahan sa Corinto. Siya misulat og usa ka tubag ngadto sa branch (tan-awa sa 1 Mga Taga-Corinto 5:9), apan sa walay swerte kini nga epistola nawala ug busa dili makit-an sa atong mga kasulatan. Sa wala madugay, si Pablo nakadawat og lain nga report gikan sa mga miyembro sa Simbahan sa Corinto mahitungod sa mga problema sa simbahan didto (tan-awa sa 1 Mga Taga-Corinto 1:11), diin iyang gitubag pinaagi sa pagsulat og laing epistola, nga nailhan isip 1 Mga Taga-Corinto. Tungod niini, ang 1 Mga Taga-Corinto sa tinuod mao ang ikaduhang sulat ni Pablo ngadto sa mga miyembro sa Simbahan sa Corinto.

Sa panahon ni Pablo, ang Corinto mao ang kapital sa Romano nga probinsya sa Acaya, nga milukop sa kadaghanan sa karaang Gresya sa habagatang bahin sa Macedonia. Isip usa ka adunahang sentro sa komersyo, ang Corinto nakadani sa mga katawhan gikan sa tibuok Kagamhanan sa Roma, nakapahimo niining usa sa labing nagkadaiya nga mga dakbayan sa dapit. Ang pagsimba og mga dios-dios midominar sa relihiyuso nga kultura sa Corinto, ug daghan ang mga templo ug alampoanan sa tibuok siyudad. Sa panahon sa pagpangalagad ni Pablo, ang mga taga-Corinto naila sa hilabihan nga pagka-imoral. Sama pananglit, ang ritwal nga prostitusyon gi-report nga ginabuhat diha sa templo sa Aphrodite.

Dinhi niini nga sulat, giklaro ni Pablo nga ang mga miyembro sa Simbahan kulang sa pagkahiusa ug nga ang pipila ka mga pagano nga tinuohan ug binuhatan misugod sa pag-impluwensya sa ilang pagsunod sa mga baruganan ug ordinansa sa ebanghelyo (tan-awa sa 1 Mga Taga-Corinto 1:11; 6:1–8; 10:20–22; 11:18–22). Siya misulat ngadto sa mga miyembro sa Simbahan sa Corinto sa pagtabang kanila sa ilang mga pangutana ug mga problema ug sa paglig-on sa mga kinabig kinsa nanlimbasug nga dili makabalik sa ilang nangagi nga mga gituohan ug binuhatan.

Ang Bag-ong Tugon naglangkob og dugang nga mga tambag ug mga pagtulun-an gikan ni Pablo ngadto sa mga miyembro sa Simbahan sa Corinto kay sa bisan hain nga branch sa Simbahan. Sa pagkatinuod, duha ka mga sulat ni Pablo ngadto sa mga taga-Corinto molangkub og ikaupat nga bahin sa tanang sinulat ni Pablo.

Sama sa girekord diha sa 1 mga taga-Corinto, si Pablo mipasabut nga Si Jesukristo mituman sa balaod ni Moses. Si Pablo mihatag og gibug-aton sa kaimportante sa “pagbantay sa mga sugo sa Dios” (1 Mga Taga-Corinto 7:19) “ilalum sa balaod ni Kristo” (1 Mga Taga-Corinto 9:21) aron makadawat sa panalangin sa kaluwasan pinaagi sa ebanghelyo.

1 Mga Taga-Corinto 1–11. Si Pablo nagpasidaan batok sa mga pagkabahinbahin sulod sa Simbahan ug mihatag og gibug-aton sa kaimportante sa panaghiusa tali sa mga miyembro sa Simbahan. Siya mipasidaan sa mga miyembro batok sa sekswal nga imoralidad, nagtudlo nga ang lawas usa ka templo alang sa Balaang Espiritu, ug nag-awhag og disiplina sa kaugalingon. Siya nagtubag sa piho nga mga pangutana kabahin sa kaminyoon ug misyonaryo nga pagserbisyo, ingon man usab sa ordinansa sa sakrament ug kon gitugotan ba o dili ang pagkaon sa karne sa gisakripisyo nga gitanyag ngadto sa mga dios-dios sa pagano.

1 Mga Taga-Corinto 12–14. Si Pablo nagtudlo nga kita kinahanglan nga magtinguha sa mga gasa sa Espiritu. Siya nagpahinumdom sa mga Santos sa Corinto sa kaimportante sa mga apostoles, mga propeta, ug mga magtutudlo ug sa pag-amuma sa miyembro sa usag usa. Siya nagpatataw sa kaimportante sa gugma nga putli labaw sa tanan nga espirituhanong mga gasa.

1 Mga Taga-Corinto 15–16. Si Pablo nagpamatuod nga siya nagbarug isip usa sa daghan pang mga saksi sa nabanhaw nga Kristo. Siya nagtudlo nga ang tanan mabanhaw ug nga ang bunyag alang sa patay nagpamatuod sa kamatuoran sa umaabut nga Pagkabanhaw. Siya nagpasabut nga ang nabanhaw nga mga lawas magkalahi sa mga ang-ang sa himaya ug nga ang kadaugan ni Jesukristo batok sa lubnganan nagtangtang sa ikot [sting] sa kamatayon. Siya nag-organisar og koleksyon alang sa kabus nga mga Santos sa Jerusalem.