Gibadlong ni Apostol Pablo ang mga Santos nga taga-Galacia tungod sa pagsunod sa sayop nga mga pagtulun-an, ug iyang gibadlong ang mini nga mga magtutudlo nga mipahisalaag kanila. Nagtudlo usab siya nga ingon nga si Abraham nahimong manununod sa Dios, ang mga Santos nga taga-Galacia mahimong mga manununod sa Dios pinaagi sa pagbaton og hugot nga pagtuo ug pagsunod kang Jesukristo imbis nga pinaagi sa pagtuman sa ritwal nga mga kinahanglanon sa balaod ni Moises.
Gibadlong ni Pablo ang mga Santos tungod sa pagsunod sa mini nga mga magtutudlo ug miawhag kanila nga mobalik ngadto sa ebanghelyo
Hunahunaa nga usa sa imong mga igsoon o mga higala misulti kanimo nga dili na siya sigurado nga ang mga pagtulun-an sa Simbahan tinuod. Isip resulta, kining tawhana miundang na sa pagsimba ug wala na magsunod sa ebanghelyo.
Isulat sa imong scripture study journal kon unsay imong isulti sa imong igsoon o higala aron matabangan siya nga mobalik sa pagtuo sa mga pagtulun-an sa Simbahan.
Samtang magtuon ka sa Mga Taga-Galacia 1 ug magkat-on nganong ang mga Santos sa Galacia mipalayo man sa tinuod nga ebanghelyo, pangitaa ang usa ka kamatuoran nga makatabang sa imong igsoon o higala nga mahibalik ang iyang pagtuo.
Ang Galacia usa ka rehiyon sa amihanang-sentro sa Asia Minor nga naglakip sa daghang siyudad nga nabisitahan ni Apostol Pablo atol sa iyang ikaduha ug ikatulong misyonaryo nga mga biyahe (tan-awa sa Mga Buhat 16:6; 18:23; tan-awa usab sa Mga Mapa sa Biblia, nu. 13, “Ang Misyonaryo nga mga Panaw ni Apostol Pablo”). Basaha ang Mga Taga-Galacia 1:6–7, mangita og usa ka problema nga nahitabo taliwala sa mga miyembro sa Simbahan didto sa Galacia.
Kadtong nagpagubot sa mga Santos nga taga-Galacia ug nagatuis sa mga pagtulun-an sa ebanghelyo midasig og mga pagduda bahin sa mga pagtulun-an ni Pablo nga ang kaluwasan moabut pinaagi lamang ni Jesukristo. Kining mini nga mga magtutudlo mga Kristiyano nga Judeo nga nailhan isip mga Judaizer. Ilang giangkon nga ang mga Santos nga mga taga-Galacia kinahanglan nga magpasirkunsisyon ug motuman sa mga ritwal sa balaod ni Moises aron maluwas.
Basaha ang Mga Taga-Galacia 1:8–9, nga mangita sa unsay gisulti ni Pablo bahin niadtong mga nagsangyaw og lahi nga ebanghelyo kay sa gisangyaw niya isip usa ka Apostol sa Ginoo.
Basaha ang Mga Taga-Galacia 1:10–12, nga mangita sa tinubdan sa mga pagtulun-an ni Pablo. Mahimo nimong markahan o isulat diha sa imong mga kasulatan kon unsay imong makit-an.
Gikan sa mga pagtulun-an ni Pablo atong makat-unan nga si Jesukristo mipadayag sa tinuod nga doktrina ngadto sa Iyang mga propeta.
Tubaga ang duha o tanan sa mosunod nga mga pangutana diha sa imong scripture study journal:
Sa unsang paagi nga ang paghinumdom nga ang Dios mao ang tinubdan sa tinuod nga doktrina makatabang nato kon kita dunay mga pangutana bahin sa mga pagtulun-an sa mga propeta?
Unsay atong mabuhat aron makadawat og pinadayag gikan sa Dios aron kita masayud sa atong kaugalingon nga ang mga pagtulun-an sa mga propeta tinuod?
Sa unsang paagi nga kining kamatuoran makatabang sa usa ka tawo nga nanlimbasug sa pagtuo sa mga pagtulun-an sa mga propeta?
Sama sa narekord sa Mga Taga-Galacia 1:13–2:21, gisultihan ni Pablo ang mga Santos bahin sa iyang pagkakabig ug sa iyang unang misyonaryo nga mga panaw. Gipasabut usab niya nganong ang Kristiyanong mga Hentil wala magkinahanglan nga magsalig sa tradisyon nga ang kaluwasan anaa sa balaod ni Moises, apan pinaagi kini sa hugot nga pagtuo diha ni Jesukristo nga kita mapasaylo (o mahatagan og kaangayan). Mipamatuod si Pablo nga nagpakabuhi siya “pinaagi sa akong pagtuo sa Anak sa Dios, nga nahigugma kanako, ug mitugyan sa iyang kaugalingon alang kanako” (Mga Taga-Galacia 2:20).
Gidapit ni Pablo ang mga taga-Galacia nga batunan ang tanang panalangin nga gisaad ngadto ni Abraham pinaagi ni Jesukristo
Ngano kaha nga ang mosunod nga mga indibidwal mibati nga mahimong dili sila makadawat sa tanang panalangin sa Ginoo, kon itandi sa uban diha sa Simbahan nga nahibalo ug nagmatinud-anon sa ebanghelyo gikan pa sa ilang pagkabata?
Usa ka batan-ong lalaki ang nagdako sa usa ka dili kaayo aktibo nga pamilya ug wala matudloi sa ebanghelyo sa dihang bata pa siya. Ang iyang pamilya mibalik na sa pagkaaktibo sa Simbahan karon ug nagsugod sa pagkat-on ug pagsunod sa ebanghelyo.
Usa ka babaye nga mitamay ug misaway sa Simbahan sulod sa daghang katuigan. Bag-ohay lang siya nakasinati og kausaban sa kasingkasing ug nabunyagan.
Samtang magtuon ka sa Mga Taga-Galacia 3–4, pangitaa ang kamatuoran nga makatabang nga masabtan nimo kon unsa nga mga panalangin ang madawat sa tanan, bisan pa man sa iyang mga kahimtang o mga pagpili sa una.
Tungod kay daghang mga Santos nga taga-Galacia mga kinabig nga hentil ngadto sa pagka-Kristiyano, dili sila literal nga kaliwatan ni Abraham, kang kinsa ang tanang panalangin sa Dios gisaad.
Sumala sa bersikulo 8, unsa may gisaad sa Ginoo kang Abraham?
Sumala sa bersikulo 9, unsa may mahitabo niadtong dunay hugot nga pagtuo kang Jesukristo?
Imahe
Abraham on the Plains of Mamre
Ang “mabulahan uban kang Abraham nga may pagtuo” (Mga Taga-Galacia 3:9) nagpasabut nga makadawat sa mga panalangin sa pakigsaad nga gihimo sa Dios ngadto ni Abraham nga pinaagi kaniya ang tanang tawo makatagamtam sa mga panalangin sa mas labaw nga priesthood, celestial nga kaminyoon, ug kahimayaan (tan-awa sa Giya ngadto sa mga Kasulatan, “Pakigsaad sama kang Abraham,” scriptures.lds.org).
Atong mabasa diha sa Mga Taga-Galacia 3:10–25 nga ang balaod ni Moises wala gayud gitumong nga mahimong paagi diin ang mga tawo “pagamatarungon” (Mga Taga-Galacia 3:11), buot ipasabut nga sila gipasaylo gikan sa sala ug gideklarar nga inosente. Gitumong kini aron mahimong giya o “magtatagad sa pag-agak” (Mga Taga-Galacia 3:24) aron matabangan ang mga Israelite nga moduol kang Jesukristo ug pagamatarungon pinaagi sa ilang hugot nga pagtuo diha Kaniya. Hinumdumi nga ang pagamatarungon nagpasabut nga “mapasaylo gikan sa silot tungod sa sala ug madeklarar nga walay sala” (Giya ngadto sa mga Kasulatan, “Kapaangayan, Paghatag og Kaangayan,” scriptures.lds.org).
Kompletuha ang mosunod nga tsart pinaagi sa pagbasa sa mga tudling sa kasulatan ug sa pagtubag sa mga pangutana:
Mga Taga-Galacia 3:26–27. Unsa ang kinahanglan natong buhaton aron makadawat sa gisaad nga mga panalangin ngadto ni Abraham?
Mga Taga-Galacia 3:28–29; 4:7. Bisan kinsa pa o unsa pa kita kaniadto, unsa may mahitabo kanato kon mosulod kita sa pakigsaad sa ebanghelyo pinaagi sa bunyag?
Gikan sa Mga Taga-Galacia 3:26–29; 4:7 atong makat-unan nga tanan niadtong mopakita og hugot nga pagtuo diha ni Jesukristo ug mosulod sa pakigsaad sa ebanghelyo mahimong usa diha ni Kristo ug mga manununod sa Dios.
Nganong importante man nga masayran nga gisaad sa Dios kini nga mga panalangin ngadto sa tanan nga misulod sa pakigsaad, bisan pa man sa iyang mga kahimtang o mga pagpili sa una?
Atong mabasa diha sa Mga Taga-Galacia 4:8–31 nga gidapit ni Pablo ang mga Santos nga taga-Galacia nga mobalik ngadto kang Jesukristo ug aron makalingkawas sa pagkaulipon nga moabut tungod sa pagsulay sa pagpabilin sa daghang tradisyon sa balaod ni Moises.
Giawhag ni Pablo ang mga Santos nga taga-Galacia sa pagpahiuli sa ilang hugot nga pagtuo diha ni Jesukristo
Unsa ang pipila sa labing lisud nga mga tintasyon nga imong giatubang? Unsaon nimo sa pagbuntog niining mga tintasyon?
Samtang magtuon ka sa Mga Taga-Galacia 5–6, pangitaa ang mga baruganan nga makatabang nimo sa pagbuntog sa mga tintasyon.
Basaha ang Mga Taga-Galacia 5:16–17, nga mangita sa duha ka nagkompetensya nga mga pwersa nga gihulagway ni Pablo.
Ang “panaggawi diha sa Espiritu” (Mga Taga-Galacia 5:16) nagpasabut nga magpuyo nga takus ug mosunod sa mga pag-aghat sa Espiritu Santo. Ang “pagtuman sa pangibog sa unod” (Mga Taga-Galacia 5:16) nagpasabut nga monunot sa tintasyon nga magpakasala.
Kompletuha ang mosunod nga baruganan basi sa unsay imong nakat-unan gikan sa Mga Taga-Galacia 5:16: Samtang managgawi kita diha sa Espiritu, atong mabuntog ang .
Hunahunaa kon sa unsang paagi nga ang panaggawi diha sa Espiritu makatabang nimo nga mabuntog ang mga tintasyon.
Basaha ang Mga Taga-Galacia 5:22–23, nga mangita sa ubang mga resulta sa panaggawi diha sa Espiritu. (Hinumdumi nga ang Mga Taga-Galacia 5:22–23 usa ka scripture mastery passage. Mahimo nimo kining markahan sa usa ka talagsaong paagi aron matultulan nimo kini sa umaabut.)
Aron matabangan ka nga mamemorya ang Mga Taga-Galacia 5:22–23, diha sa imong scripture study journal pagdrowing og usa ka kahoy nga dunay siyam ka bunga—tulo ka linya nga dunay tulo ka bunga ang matag usa. Ibabaw sa kahoy, isulat ang Apan ang bunga sa Espiritu mao ang … Ubos sa kahoy, isulat ang nga sa maong mga butang walay kasugoan nga kabatok. Sugod sa ibabaw sa linya sa bunga, isulat ang unang letra sa matag bunga nga gilista ni Pablo. Praktisa ang pag-recite sa scripture mastery pinaagi sa pagtan-aw niini nga imahe ug sa pag-adto sa tudling sa kasulatan kon gikinahanglan. Padayon sa pag-recite hangtud masubli nimo ang scripture mastery nga dili na motan-aw sa hulagway o sa imong mga kasulatan. I-recite ang kasulatan ngadto sa usa ka sakop sa imong pamilya o sa klase sa seminary.
Tubaga ang mosunod nga mga pangutana diha sa imong scripture study journal: Sa unsang paagi nga ang pagbaton niining mga gasa makapalambo sa imong abilidad sa pagtabang sa mga tawo?
Basaha ang Mga Taga-Galacia 6:1–2, nga mangita sa unsay gitudlo ni Apostol Pablo bahin kon unsay angayang buhaton sa mga miyembro sa Simbahan ngadto sa usa ka tawo nga nakasala. Ang “mahiligas ngadto sa kalapasan” (Mga Taga-Galacia 6:1) nagpasabut nga makasala.
Nganong importante man nga magbaton “sa espiritu sa kalumo” (Mga Taga-Galacia 6:1) samtang maningkamot kita sa pagtabang sa usa ka tawo nga mobalik ngadto sa dalan sa ebanghelyo?
Sama sa narekord diha sa Mga Taga-Galacia 6:3–5, gitudlo ni Pablo nga kinahanglan nga dili kita mahimong mapasigarbuhon ug magpakatarung sa kaugalingon ug nga ang matag tawo “magapas-an sa iyang kaugalingong luwan” (Mga Taga-Galacia 6:5), o manubag alang sa iyang mga pagpili.
Unsa may motubo kon magtanum ka sa matag usa sa mosunod nga mga liso? Isulat ang imong mga pangagpas diha sa blangko nga mga luna. (Ang mga tubag anaa sa katapusan niini nga leksyon.)
a.
Imahe
sunflower seeds
b.
Imahe
pumpkin seeds
c.
Imahe
beans
Gigamit ni Pablo ang ideya sa mga liso aron sa pagtudlo og espirituhanong mga kamatuoran. Basaha ang Mga Taga-Galacia 6:7–8, nga mangita sa unsay gitudlo ni Pablo bahin sa unsay atong malauman kon kita mag-ani, o magtanum, og mga liso. Ang mga pagtulun-an ni Pablo niining mga bersikulo kasagaran gitawag og balaod sa pag-ani.
Basaha ang Mga Taga-Galacia 6:9–10, nga mangita kon nganong gitudlo ni Pablo ang balaod sa pag-ani human niya gidapit ang mga taga-Galacia sa pagtinabangay sa usag usa nga magpabilin o mobalik ngadto sa dalan sa ebanghelyo.
Gikan niining mga bersikulo atong makat-unan nga kon makugihon kita sa pagbuhat og maayo, anihon nato ang mga panalangin sa atong mga lihok.
Buhata ang dili mominus sa duha sa mosunod nga mga buluhaton diha sa imong scripture study journal:
Sa unsang paagi nga ang saad nga anihon nato “sa nahaigo nga panahon” makatabang nato nga dili “magakaluya” (Mga Taga-Galacia 6:9), o mohunong sa atong mga paningkamot sa pagserbisyo sa uban ug sa pagsunod sa ebanghelyo sa atong kaugalingong kinabuhi?
Kanus-a man nga ikaw o ang usa ka tawo nga imong nailhan nagmakugihon sa pagbuhat og maayo bisan kon ang mga panalangin wala dayon moabut?
Mainampuong ikonsiderar kon kinsay imong matabangan nga makabalik ngadto sa dalan sa ebanghelyo. Sa pagkonsiderar nimo niini nga tawo, isulat ang usa ka tumong kon unsaon nimo nga magmakugihon sa pagbuhat og maayo samtang maningkamot ka sa pagtabang niya, bisan kon mahimong dili dayon nimo makita ang mga resulta sa imong mga paningkamot.
Sama sa narekord diha sa Mga Taga-Galacia 6:11–18, gitapus ni Pablo ang iyang epistola ngadto sa mga Santos nga taga-Galacia pinaagi sa pagpamatuod nga ang kalinaw ug kalooy ni Jesukristo maanaa sa tanan niadtong nahimong bag-o nga mga binuhat pinaagi sa hugot nga pagtuo diha sa Iyang ngalan.
Isulat ang mosunod sa ubos sa mga assignment karong adlawa diha sa imong scripture study journal: