Si Jesus miayo sa tawo kinsa gipakatawo nga buta. Ang mga Pariseo nangutana niining tawhana ug misalikway kaniya gikan sa sinagoga tungod kay midumili siya sa pagpanghimaraut ni Jesus isip usa ka makasasala tungod sa pagpangayo sa adlaw nga Igpapahulay. Gipangita sa Manluluwas ang tawo ug gipangutana unsay iyang gituohan, ug ang tawo misimba kang Jesus isip Anak sa Dios.
Ilha ang pipila ka mga ehemplo sa kalisdanan nga nasinati sa mga tawo sa imong palibut o nasinati sa mga tawo nga imong makita sa inyong lokal nga mga balita:
Pipila sa mga tawo natingala nganong ang Dios nagtugot sa kalisdanan nga moapekto og maayo sa ilang mga kinabuhi. Samtang magtuon ka sa Juan 9:1–5, pangita og usa ka kamatuoran nga makatabang kanato nga mas makasabut sa usa ka rason nganong ang Dios nagtugot sa kalisdanan nga makaapekto sa atong kinabuhi.
Samtang si Jesus didto sa Jerusalem, Siya nakasugat og tawo nga nakasinati og kalisdanan sukad sa pagkatawo. Basaha ang Juan 9:1-2, nga mangita sa kalisdanan nga gisagubang niining tawhana.
Unsay gipangutana sa mga disipulo kabahin sa hinungdan sa kalisdanan niining tawhana?
Daghang mga tawo sa kapanahunan sa Manluluwas mituo nga ang mga kalisdanan nga giatubang sa mga tawo resulta sa mga sala nga nabuhat nila o sa ilang mga ginikanan. Sa inyong hunahuna tinuod ba kini nga pagtuo? Ngano o nganong dili man?
Basaha ang Juan 9:3–5, nga mangita sa mga pagtulun-an sa Manluluwas ngadto sa Iyang mga disipulo kabahin sa pagkabuta niining tawhana.
Unsa kahay gipasabut sa “aron ang mga buhat sa Dios ikapadayag diha kaniya”? (Juan 9:3).
Gikan sa mga pagtulun-an sa Manluluwas niini nga mga bersikulo, atong nakat-unan nga ang Dios makagamit sa atong mga kalisdanan aron ipakita ang Iyang mga buhat ug gahum. Sa laing pagkasulti, samtang adunay daghang mga hinungdan sa kalisdanan sa atong kinabuhi, ang Dios makagamit sa atong mga hagit aron sa pagtabang nga matuman ang Iyang matarung nga mga katuyoan.
Aron mas masabtan kini nga kamatuoran, basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Kita gipadala dinhi aron masulayan. Kinahanglan nga adunay katugbang ang tanang butang. Gituyo nga kita makakat-on ug molambo pinaagi niana nga mga katugbang, pinaagi sa pag-atubang sa atong mga hagit, ug pinaagi sa pagtudlo sa uban sa pagbuhat sa ingon. … Ang Ginoo dili lamang mopahinungod sa atong kasakit alang sa atong kaayohan, apan Siya mogamit niini sa pagpanalangin sa kinabuhi sa daghan pa nga mga tawo.
“Si Jesus mitudlo niini nga leksyon sa dihang Siya ug ang Iyang mga disipulo nakasugat og usa ka tawo nga gipakatawo nga buta. [Si Elder Oaks dayon mikutlo sa Juan 9:2–3.]
“Kon kita motan-aw sa kinabuhi gamit ang espirituhanon nga panglantaw, makakita kita og daghang mga ehemplo sa mga buhat sa Dios nga napalambo pinaagi sa mga kalisdanan sa Iyang mga anak. …
“Kon atong masabtan kininga baruganan, nga ang Dios mitanyag kanato og mga oportunidad nga mapanalanginan ug mopanalangin kanato pinaagi sa atong kaugalingong mga kalisdanan ug sa mga kalisdanan sa uban, kita makasabut nganong mibalik-balik Siya sa pagsugo kanato sa ‘pagpasalamat sa Ginoo nga inyong Dios sa tanan nga mga butang’ (D&P 59:7)” (“Give Thanks in All Things,” Ensign o Liahona, Mayo 2003, 97–98).
Paghunahuna og kalisdanan nga imong nasinati o kasamtangan nga giatubang. Samtang magpadayon ka sa pagtuon sa Juan 9, pamalandong og mga pamaagi diin ang Dios makapakita sa Iyang mga buhat ug gahum pinaagi kanimo tungod niana nga kalisdanan.
Basaha ang Juan 9:6–7, nga mangita sa paagi diin ang Dios mipakita sa Iyang mga buhat ug gahum pinaagi sa kasinatian sa buta nga tawo.
Unsay imong mahunahuna nga sama sa unsa alang niini nga tawo nga makakita sa unang higayon?
Ang Manluluwas nangita sa tawo nga Iyang giayo human ang mga Pariseo misalikway sa tawo
Sama sa narekord diha sa Juan 9:8–15, human naayo ang buta nga tawo, pipila ka mga tawo nakiglalis kon siya ba gayud ang tawo nga gipakatawo nga buta. Ang uban naglibug kon sa unsang paagi siya naayo, ug siya gidala nila ngadto sa mga Pariseo, kinsa misugod sa pagpangutana kaniya.
Siksika ang Juan 9:14 alang sa adlaw diin giayo sa Manluluwas ang buta nga tawo.
Unsa kaha ang reaksyon sa mga Pariseo ngadto sa pag-ayo ni Jesus sa tawo sa adlaw nga Igpapahulay?
Basaha ang Juan 9:16, nga mangita kon unsay pangagpas sa mga Pariseo kabahin ni Jesus.
Basaha ang Juan 9:17, nga mangita kon unsay pangagpas sa buta nga tawo kabahin ni Jesus.
Samtang magpadayon ka sa imong pagtuon sa Juan 9, timan-i ang pag-uswag sa panabut sa buta nga tawo kabahin sa Manluluwas.
Nagduha-duha nga ang tawo tinuoray gayud nga buta, gipakuha sa mga Pariseo ang iyang mga ginikanan aron mapangutana. Diha sa Juan 9:19–23 atong nakat-unan nga sa dihang gipangutana, ang iyang mga ginikanan mipamatuod nga siya ilang anak ug nga siya natawo nga buta, apan sila nangangkon nga wala masayud kon giunsa siya pag-ayo. Nahadlok nga papahawaon gikan sa sinagoga ug sa komunidad, dili sila gustong mosulti nga sila mituo nga si Jesus mao ang Mesiyas, mao nga ilang gisugyot nga ang ilang anak ang mamulong alang sa iyang kaugalingon.
Basaha ang Juan 9:24–27, 30–33, nga mangita kon unsay tubag sa tawo ngadto sa mga Pariseo. Ikonsiderar ang pagmarka sa mga pulong nga iyang gigamit aron sa pagdepensa kang Jesus ug sa pagpamatuod nga Siya “gikan sa Dios” (Juan 9:33).
Tubaga ang mosunod nga mga pangutana diha sa imong scripture study journal: Unsa ang mopatigbabaw kanimo kabahin sa mga tubag niini nga tawo?
Sa Juan 9:34 atong nakat-unan nga kini nga tawo gisalikway (gituohan nga gikan sa sinagoga [tan-awa sa Juan 9:22]) tungod sa walay kahadlok nga pagpanalipod sa Manluluwas.
“Ang mga sinagoga nagsilbing sentro sa relihiyuso ug sosyal nga mga kalihokan alang sa daghang mga komunidad nga Judeo. Ang mga sinagoga mihatag og access ngadto sa espiritwal nga panudlo ug pagsimba, ingon man usab sa edukasyon ug sosyal nga mga oportunidad. Tungod kay ang sinagoga mahinungdanon kaayo sa katilingban nga Judeo, ang pagsalikway gikan sa sinagoga … nagpasabut og labaw pa kay sa pagka-excommunicate ug mawad-an sa pakigdait uban sa relihiyuso nga komunidad. Kini nagpasabut usab nga gipapahawa gikan sa sosyal ug kultural nga mga kalihokan” (New Testament Student Manual [manwal sa Church Educational System, 2014], 230).
Sa imong hunahuna nganong andam man kining tawhana nga magpabiling matinud-anon sa unsay iyang nahibaloan mahitungod ni Jesukristo, bisan kon kini nagpasabut nga isalikway gikan sa sinagoga?
Human ang tawo gisalikway gikan sa sinagoga, ang Manluluwas nakakita kaniya ug nangutana kon siya “[mi]salig sa Anak sa Dios” (Juan 9:35). Basaha ang Juan 9:36–38, nga mangita sa tubag sa tawo.
Ang iyang pamahayag nga “Ginoo, mosalig ako” ug ang kamatuoran nga “siya misimba kaniya” (Juan 9:38) nagpasabut nga ang iyang espirituhanong mga mata nabuka ug nga siya nakaila ni Jesukristo kon kinsa gayud Siya, ang gisaad nga Mesiyas ug ang Anak sa Dios.
Gikan niini nga istorya atong nakat-unan nga samtang kita magpabiling matinud-anon sa unsay atong nahibaloan bisan pa sa oposisyon, ang atong mga pagpamatuod malig-on. Paglabay sa panahon, ang atong mga pagpamatuod mas molig-on pa.
Tubaga ang mosunod nga mga pangutana diha sa imong scripture study journal:
Sa imong hunahuna nganong malig-on man ang atong mga pagpamatuod human makabuntog sa oposisyon o mga pagsulay sa hugot nga pagtuo?
Sa unsa nga paagi ang imong pagpamatuod napalig-on samtang matinud-anon ka nga milahutay sa oposisyon?
Aron sa pag-ila og lain nga baruganan gikan niini nga istorya, hiyunga ang imong mata nga gamay lamang nga kahayag ang imong makita. Dayon bukha kini og katunga. Dayon bukha og maayo ang imong mata. Timan-i kon sa unsang paagi nausab ang imong panan-aw sa matag higayon.
Hinumdumi nga ang pisikal nga panan-aw sa buta nga tawo nahimong klaro sa dihang giayo siya ni Jesus. Basaha ang Juan 9:11, 17, 33, 35–38, nga mangita sa mga pulong nga naghulagway sa nagkahingkod nga espirituhanong panglantaw o panabut niining tawhana kon kinsa si Jesus.
Sa sinugdanan iyang gipasabut si Jesus isip ang “tawo nga ginganlan si Jesus” (Juan 9:11), ug sa kaulahian iyang gipasabut Siya isip “propeta” (Juan 9:17) ug mipanalipod Kaniya isip “gikan sa Dios” (Juan 9:33). Paglabay sa panahon ang iyang espirituhanong panan-aw nahimong mas klaro hangtud nga sa katapusan iyang nakita nga si Jesukristo mao ang gisaad nga Mesiyas ug ang Anak sa Dios.
Sa imong hunahuna ngano kaha nga nahimong mas klaro ang iyang panan-aw ug panabut kabahin sa Manluluwas? Sa unsang mga paagi siya migamit sa hugot nga pagtuo diha ni Jesukristo sa tibuok niyang kasinatian?
Imahe
President Howard W. Hunter
Namulong kabahin sa kasinatian niini nga tawo, si Presidente Howard W. Hunter mitudlo: “Karon ang panan-aw gihatag sa makaduha—kausa aron pag-ayo sa usa ka pisikal nga depekto [nga anaa na sukad pa sa pagkatawo] ug kausa aron makakita sa Hari sa mga Hari sa wala pa Siya mosaka ngadto sa Iyang mahangturong trono. Gipabaskog ni Jesus ang temporal ug espiritwal nga panan-aw. Siya miiwag sa iyang kahayag sa mangitngit nga dapit, ug kini nga tawo, sama sa daghan pang uban nianang panahona ingon man usab sa atong panahon karon, midawat sa kahayag ug nakaangkon og panabut” (“The God That Doest Wonders,” Ensign, Mayo 1989, 16–17).
Gikan niini nga istorya atong nakat-unan nga samtang kita mogamit sa hugot nga pagtuo diha ni Jesukristo, ang atong espirituhanong panan-aw ug panabut mahimong mas klaro.
Sa imong hunahuna nganong ang paggamit og hugot nga pagtuo gikinahanglan aron mas klarong makakita ug makasabut sa espirituhanong kamatuoran?
Pipila ka mga Pariseo nanagtindog sa duol sa dihang ang tawo nakakita ug misimba ni Jesus isip Anak sa Dios. Basaha ang Juan 9:39–41, nga mangita kon unsay gitudlo sa Manluluwas kabahin sa pagkabuta.
Agi og tubag sa pangutana sa mga Pariseo, “Mga buta ba diay usab kami?” (Juan 9:40), “ang Manluluwas migamit og usa ka pasumbingay, nagtudlo nga ang mga indibidwal nga ‘buta’—kadtong wala makaila kinsa Siya—‘wala untay … sala’ (Juan 9:41). Sa laing bahin, ang mga indibidwal nga ‘makakita’—kadtong nakadawat og igo nga mga saksi mahitungod sa Manluluwas ug sa Iyang balaan nga misyon nga sila gayud nasayud kon kinsa Siya—manubag sa ilang mga binuhatan. Ang mga Pariseo apil niadtong kinsa ‘makakita’, ug sa ingon ang ilang ‘sala nagapabilin.’ Sa espirituhanong pagkasulti, sila mipili nga magpakabuta tungod kay sila mibalibad sa pag-ila ni Jesus isip Anak sa Dios, bisan pa sa daghang mga pagsaksi nga ilang nadawat” (New Testament Student Manual,231).
Tan-awa ang katapusang duha ka mga baruganan nga imong nakat-unan niini nga leksyon, ug pamalandungi unsaon nimo paggamit niini sa imong kinabuhi. Isulat ang imong mga tumong sa paggamit niini nga mga baruganan diha sa imong scripture study journal. Pag-ampo alang sa giya aron makab-ot ang imong mga tumong.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Juan 9 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: