Pasiuna sa Mga Taga-Colosas

Gisulat ni Apostol Pablo ang iyang Epistola ngadto sa Mga Taga-Colosas tungod sa usa ka report nga sila dunay dakong kasaypanan (tan-awa sa Ang Giya ngadto sa mga Kasulatan, “Mga Epistola ni Pablo”). Sayop nga mga pagtulun-an ug mga pamaagi didto sa Colosas nakaimpluwensya sa mga Santos didto ug nakahulga sa ilang pagtuo. Ang susama nga kultural nga mga pagpamugos nakahatag og mga hagit sa mga miyembro sa Simbahan karon. Kabahin sa bili niining epistola nagdepende kon giunsa niini sa pag-ila ug pagpakita sa mga sayop samtang naghatag og gibug-aton sa kabalaan ug makaluwas nga buhat ni Jesukristo. Pinaagi sa pagtuon sa basahon sa Mga Taga-Colosas, mapalambo nimo ang imong pagkakabig ngadto sa Manluluwas ug makadawat og proteksyon gikan sa pagpanglingla ug sa sala.

Ang Epistola ngadto sa mga Mga Taga-Colosas gipadala ni Pablo ug ni Timoteo (tan-awa sa Mga Taga-Colosas 1:1, 23; 4:18). Klaro nga gisulat ni Pablo og kinamot ang iyang pagtimbaya diha sa katapusan sa epistola (tan-awa sa Mga Taga-Colosas 4:18), nagpasabut nga usa ka tigsulat, tingali si Timoteo, ang mitabang niya sa pagsulat sa kinadak-ang bahin sa sulat.

Gisulat ni Pablo ang Epistola ngadto sa Mga Taga-Colosas atol sa una niyang pagkabilanggo didto sa Roma, mga A.D. 60–62 (tan-awa sa Giya ngadto sa mga Kasulatan, “Mga Epistola ni Pablo,” scriptures.lds.org). Siguro gisulat niya kini sa samang panahon sa pagsulat niya sa Mga Taga-Filipos, Mga Taga-Efeso, ug Filemon.

Kini nga epistola gisulat ngadto sa matinud-anong mga Santos sa Colosas, usa ka dapit sa Turkey karon. Gisugo ni Pablo ang mga Santos nga taga-Colosas nga ipakigbahin ang sulat ngadto sa mga miyembro sa Simbahan sa duol nga Laodicea (tan-awa sa Mga Taga-Colosas 4:16).

Gisulat ni Pablo kini nga epistola “human siya mabisitahi ni Epafras, ang ebanghelista sa Simbahan didto sa [Colosas] [tan-awa sa Mga Taga-Colosas 1:7–8]. Gisultihan ni Epafras si Pablo nga ang mga taga-Colosas dunay dakong kasaypanan—naghunahuna sila nga mas maayo pa sila kay sa ubang mga tawo tungod kay mabinantayon silang mituman sa dayag nga mga ordinansa [tan-awa sa Mga Taga-Colosas 2:16], mihikaw sa ilang kaugalingon sa piho nga gusto sa lawas, ug misimba sa mga manulonda o mga anghel [tan-awa sa Mga Taga-Colosas 2:18]. Kini nga mga paagi mihimo sa mga taga-Colosas nga mobati nga nabalaan sila. Mibati usab sila nga mas nasabtan nila ang mga misteryo sa universe kay sa ubang mga miyembro sa Simbahan. Diha sa iyang sulat, gikorihian kini ni Pablo pinaagi sa pagtudlo kanila nga ang katubsanan moabut pinaagi lamang ni Kristo ug kinahanglan kita nga magmaalamon ug moserbisyo Kaniya” (Giya ngadto sa mga Kasulatan, “Mga Taga-Colosas, Epistola ngadto sa,” scriptures.lds.org).

Diha sa Epistola ngadto sa Mga Taga-Colosas, mitudlo si Pablo batok sa sayop nga mga pagtulun-an didto sa Colosas pinaagi sa paghatag og gibug-aton sa kabalaan, makaluwas nga misyon, ug kahalangdon ni Jesukristo (tan-awa sa Mga Taga-Colosas 1:15–23). Gitudlo niya nga si Kristo susama gayud sa Dios nga Amahan, ang Tiglalang, ang Pangulo sa Simbahan, ang una nga nabanhaw, ug ang Manunubos. Siya “ang ulo sa tanang pamunoan ug kagahum” (Mga Taga-Colosas 2:10), ug gituman Niya ang Iyang balaanong misyon ubos sa direksyon sa Amahan (tan-awa sa Mga Taga-Colosas 1:19; 3:1).

Mipasidaan si Pablo batok niadtong nagtudlo nga ang tinuod nga pagkaespirituhanon maangkon pinaagi sa espesyal nga mga ritwal, mga kasaulogan, ug mga pagkaon (tan-awa sa Mga Taga-Colosas 2:16–18, 20, 23). Gitudlo hinoon niya nga ang kahamtong sa pagkaespirituhanon ug kahibalo bahin sa Dios makita pinaagi sa pagtumong sa atong “mga hunahuna diha sa mga butang nga anaa sa itaas” (Mga Taga-Colosas 3:2), pagtangtang sa dili matarung nga mga binuhatan (tan-awa sa Mga Taga-Colosas 3:5–9), ug pagpalambo og Kristohanong mga kinaiya (tan-awa sa Mga Taga-Colosas 3:12–17). Gitambagan ni Pablo ang iyang mga magbabasa nga magmahimong “dili matarug ug malig-on” diha sa ebanghelyo (Mga Taga-Colosas 1:23) ingon man usab “pinagamut ug pinatubo diha ni [Jesukristo], ug linig-on diha sa pagtuo” (Mga Taga-Colosas 2:7).

Mga Taga-Colosas 1:1–23. Gipangumusta ni Pablo ang mga Santos didto sa Colosas ug namahayag nga si Jesukristo mao ang Manunubos, ang Unang Natawo sa tanang nilalang, ang Tiglalang, ug ang Ginoo sa tanang balaanong pagkahingpit, diin gipasig-uli ang universe. Giawhag ni Pablo ang mga Santos sa pag-establisar sa ilang hugot nga pagtuo diha ni Jesukristo.

Mga Taga-Colosas 1:24–2:23. Mipasidaan si Pablo batok sa pagtuo sa bisan unsa nga sayop nga pilosopiya o tradisyon sa mga tawo, lakip na ang pagsimba sa mga anghel ug pagpasulabi sa paghikaw sa kaugalingon sa nag-unang mga panginahanglang pisikal isip matang sa espirituhanong pagdisiplina.

Mga Taga-Colosas 3:1–4:18. Giawhag ni Pablo ang mga Santos sa pagtumong sa ilang kasingkasing diha sa mga butang nga anaa sa itaas, sa pagsalikway sa mga sala sa ilang kanhi nga kinabuhi, ug magmaloloy-on sa usag usa. Naghatag siya og instruksyon kon unsaon sa mga Santos pagsimba, ug dayon naghatag siya og tambag ngadto sa mga asawa, mga bana, mga anak, mga ginikanan, mga sulugoon, ug mga agalon. Gitapos niya ang Epistola ngadto sa Mga Taga-Colosas uban sa mga pagdayeg, mga pangumusta, ug sa katapusang mga instruksyon ug mga panalangin.