Mga Buhat 6–7

Ang mga Apostoles mi-orden og pito ka tinun-an aron sa pagtabang sa buhat sa Ginoo. Si Esteban, usa niadtong napili, mihimo og daghang milagro. Ang pipila ka mga Judeo miakusar niya nga nanamastamas ug midala kaniya sa atubangan sa Sanhedrin, diin nausab ang iyang panagway aron sa pagpakita nga ang Dios uyon kaniya. Human mobadlong sa mga Judeo tungod sa pagsalikway sa Manluluwas, nakita ni Esteban ang Langitnong Amahan ug si Jesukristo. Gipagawas dayon siya sa siyudad ug gibato hangtud namatay.

Samtang magtuon ka sa Mga Buhat 6:1–8, pangita sa problema nga giatubang sa unang mga lider sa Simbahan.

Basaha ang Mga Buhat 6:1–2, nga mangita sa kabalaka nga gidala sa mga Gresyanhon ngadto sa mga Apostoles.

“Samtang kusog nga mitubo ang Simbahan, ang mga Apostoles dili na makaatiman sa mga panginahanglan sa tanang mga miyembro. Ang mga ‘Gresyanhon,’ kinsa Judeo nga Kristiyano nga ang pinulongan Griyego, mibati nga ang ilang mga babayeng balo pagahisayloan lamang ug nagbagotbot batok sa ‘mga Judiyong-lumad,’ kinsa Judeo nga Kristiyano nga Palestino” (Manwal sa Estudyante sa Bag-ong Tugon [manwal sa Church Educational System, 2014], 288).

Basaha ang Mga Buhat 6:3–6, nga mangita kon giunsa sa mga Apostoles pagsulbad ang problema sa pag-atiman sa indibidwal nga panginahanglan sa mga miyembro sa Simbahan nga dili sila malayo gikan sa ilang apostolikanhong responsibilidad sa pagdala sa ebanghelyo ngadto sa “tanang kanasuran” (Mateo 28:19).

Imahe

Elder Bruce R. McConkie

Si Elder Bruce R. McConkie sa Korum sa Napulog Duha ka mga Apostoles mitudlo mahitungod sa mga responsibilidad niadtong pito ka mga tawo: “Ang buluhaton nga gihatag kanila anaa sa temporal nga mga butang nga sa kasagaran gibuhat sa Aaronic Priesthood, nga naghimo sa mga apostoles nga gawasnon sa pagbuhat sa mas lisud nga mga butang sa ilang Melchizedek nga pagpangalagad” (Doctrinal New Testament Commentary, 3 vols. [1965–73], 2:65).

Unsa nga mga hiyas ang gisulti sa mga tawo nga pangitaon sa pagpili niadtong kinsa motabang?

Sa unsa nga paagi nga kini nga proseso susama sa unsay gibuhat sa Ginoo sa Iyang Simbahan karon aron sa pagsiguro nga ang mga panginahanglan sa miyembro maatiman?

Usa sa kamatuoran nga atong makat-unan gikan niini nga asoy mao nga ang takus nga mga miyembro sa Simbahan gitawag sa pagtabang og pangalagad ngadto sa mga panginahanglan sa uban.

1. Ang mga calling sa Simbahan makahatag sa indibidwal og piho nga mga katungdanan sa pagpangalagad sa mga panginahangan sa uban. Pamalandong kon sa unsa nga paagi nga ang katakus sa indibidwal makaapekto sa iyang abilidad sa pagpangalagad sa mga panginahanglan sa uban. Dayon isulat sa imong scripture study journal ang usa ka kasinatian sa usa ka tawo kinsa nangalagad kanimo o ngadto sa laing tawo pinaagi sa pag-alagad nga takus sa usa ka calling. Ipahayag ang bisan unsa nga mga hunahuna o mga pagbati sa pagpasalamat alang niini nga pag-alagad.

Basaha ang Mga Buhat 6:7–8, nga mangita sa positibo nga mga sangputanan nga miresulta sa calling niining pito ka takus nga mga tinun-an sa pagpangalagad sa mga panginahanglan sa uban.

Diha bay higayon nga nagdumili ka nga tabangan sa usa ka tawo o dunay usa ka tawo nga nagdumili nga imong tabangan? Unsa ang mga kinaiya sa tawo nga misulay sa pagtabang ug sa tawo nga nagdumili nga tabangan?

Ngano nga usahay magdumili man kita sa tabang sa uban? Ikonsiderar unsa nga mga sangputanan ang moabut sa pagdumili sa tabang sa uban sa mosunod nga mga sitwasyon: naghimo sa homework, nagluto og pagkaon, nagsulbad og dakong problema sa atong kinabuhi, ug naghukom kon moalagad ba og misyon.

Usa ka paagi nga gihatag sa Langitnong Amahan aron sa pagtabang nato mao ang pinaagi sa Espiritu Santo. Samtang magtuon ka sa Mga Buhat 6:9–7:53, pangitaa ang mga sangputanan sa pagdumili sa Espiritu Santo.

Sumala sa narekord sa Mga Buhat 6:9, daghang mga tawo kinsa wala motuo ni Jesukristo nakiglalis ni Esteban samtang siya nagtudlo sa ebanghelyo. Basaha ang Mga Buhat 6:10–11, nga mangita kon unsay gibuhat niining mga tawhana sa dihang wala sila makabatok sa kaalam ug espiritu sa pagtulun-an ni Esteban. (Ang pulong nga gisibahan sa bersikulo 11 nagpasabut nga suborno.)

Ang Mga Buhat 6:12–14 nagrekord nga si Esteban gidala sa atubangan sa gobyerno sa Judeo (ang Sanhedrin) ug ang bakakong mga saksi miakusar niya sa pagpanamastamas, nga nagsulti sa masuk-anong paagi batok sa Dios o “butang nga nagbarug sa sagrado nga relasyon ngadto sa Dios, sama sa Iyang templo, Iyang balaod, o Iyang propeta” (Ang Giya ngadto sa mga Kasulatan, “Pagpanamastamas”). Sa bahin ni Esteban, ang Sanhedrin bakak nga miakusar niya nga nagsulti batok sa templo ug batok sa balaod ni Moises (tan-awa sa Mga Buhat 6:13–14). Ang mga miyembro sa Sanhedrin midumili ug misupak kang Esteban ug sa katapusan nagtinguha sa pagpatay kaniya.

Basaha ang Mga Buhat 6:15, nga mangita kon unsay dili sagad sa dagway ni Esteban samtang siya nagbarug sa atubangan sa konseho.

Nausab ang panagway ni Esteban sa atubangan sa konseho. Ang pagkahimaya sa panagway mao “ang kahimtang sa mga tawo kinsa sa mubo nga panahon nausab ang panagway ug kinaiyahan—nga, gibayaw sa usa ka labaw nga taas nga espirituhanon nga kahimtang—aron sila makalahutay sa atubangan ug himaya sa langitnon nga mga binuhat” (Giya ngadto sa mga Kasulatan, “Pagkahimaya sa Panagway,” scriptures.lds.org). Kining balaan nga pagkahimaya sa panagway mao ang usa ka paagi nga gipakita sa Dios sa mga tawo nga Siya miaprobar ni Esteban ug sa mensahe ni Esteban (tan-awa sa Bruce R. McConkie, Doctrinal New Testament Commentary, 2:67).

Ang Mga Buhat 7:1–50 nagpasabut nga agig tubag sa mga akusasyon batok kaniya, giasoy pag-usab ni Esteban ang kasaysayan sa Israel, ilabi na sa balik-balik nga pagsalikway sa mga Israelite kang Moises ug sa balaod nga gihatag sa Ginoo ngadto sa mga tawo didto sa Bukid sa Sinai. Basaha ang Mga Buhat 7:37, nga mangita kinsa ang gipanagna ni Moises nga paminawon sa mga anak ni Israel sa umaabut.

Ang gihisgutan nga “propeta” niini nga bersikulo mao si Jesukristo.

Basaha ang Mga Buhat 7:51–53, nga mangita kon giunsa pagkompara ni Esteban ang mga lider sa Judeo sa iyang panahon ngadto sa karaang mga Israelite nga iyang gihulagway. “Tikig og Liog” ug “walay sirkunsisyon sa kasingkasing” nagpasabut sa makasasala nga garbo ug dautang mga kasingkasing sa mga Judeo.

Ang Mga Buhat 7:52 nagrekord nga si Esteban miakusar sa mga lider sa mga Judeo sa pagsalikway sa “Matarung,” ang gipasabut mao ang Manluluwas.

Usa ka kamatuoran nga atong makat-unan gikan niini nga mga bersikulo mao nga ang pagpakigbatok sa Espiritu Santo mosangpot ngadto sa pagsalikway sa Manluluwas ug sa Iyang mga propeta.

Ang Espiritu Santo nagpamatuod ni Jesukristo ug nagsaksi sa kamatuoran sa Iyang mga pulong ug sa mga pulong sa Iyang mga propeta. Busa, ang pagpakigbatok sa Espiritu Santo makapahuyang sa pagpamatuod sa usa ka tawo ug sa iyang pasalig sa pagsunod sa Manluluwas ug sa Iyang mga propeta.

Ikonsiderar kon sa unsa nga paagi ang usa ka tawo matintal sa pagpakigbatok sa Espiritu Santo sa mosunod nga mga sirkumstansya:

• Pagpili og kalingawan ug media

• Pagpili kon mosunod ba sa tambag sa mga propeta bahin sa pagpakig-date

• Paghukom kon gamiton ba ang mga baruganan sa paghinulsol nga gitudlo ni Jesukristo ug sa Iyang mga propeta

2. Pamalandunga ang imong kaugalingong pagdawat sa mga aghat sa Espiritu Santo. Sa imong scripture study journal, isulat ang mahitungod sa usa ka panahon sa dihang ang pagsunod sa mga aghat sa Espiritu Santo migiya nimo ngadto sa usa ka sakto nga desisyon o sa pagdawat sa mga propeta ug sa ilang mga pagtulun-an. Ikonsiderar unsay imong mahimo sa pagdawat sa impluwensya sa Espiritu Santo.

Pamalandunga ang usa ka butang nga imong mahimo sa moabut nga semana sa aktibong pagdapit sa impluwensya sa Espiritu Santo sa imong kinabuhi. Ikonsiderar ang pagsulat sa imong tumong ug sa unsa nga paagi imong matuman kana nga tumong sa usa ka piraso sa papel.

Ang pulong kalisdanan nagpasabut nga kasamok o pag-antus. Ngano sa imong hunahuna nga ang mga sumusunod ni Jesukristo makapaabut nga makasinati og kalisdanan?

Samtang magtuon ka sa Mga Buhat 7:54–60, pangitaa ang baruganan nga makatabang nimo kon ikaw makasinati og kalisdanan.

Human si Esteban mibadlong sa dautan nga mga lider sa Judeo, nangasuko sila. Basaha ang Mga Buhat 7:54–56, nga mangita kon unsay nasinati ni Esteban atol sa ilang pagpanggukod. Usa sa kahulugan sa pulong “sila nanagpakagot sa mga bag-ang” (Mga Buhat 7:54) mao nga sila napuno sa hilabihan nga kasuko batok ni Esteban ug gusto silang mamatay na siya.

Unsa nga sukaranan nga doktrina mahitungod sa Dios nga Kapangulohan ang atong makat-unan gikan sa asoy sa kang Esteban nga panan-awon?

Imahe

Si Esteban Nakakita ni Jesus sa Tuo nga Kamot sa Dios

Kamo mahimong mosulat sa mosunod nga doktrina duol sa Mga Buhat 7:55–56: Ang Langitnong Amahan, si Jesukristo, ug ang Espiritu Santo tulo ka bulag ug managlahi nga mga binuhat.

Basaha ang Mga Buhat 7:57–60, nga mangita unsay gibuhat sa mga tawo ngadto ni Esteban.

Unsa may labing importane para nimo sa pag-ampo ni Esteban?

Gihulagway ni Lucas ang makalilisang nga kamatayon ni Esteban sa mga pulong nga “siya namatay” (Mga Buhat 7:60). Kining pulonga mahimong nagpasabut sa usa ka matarung nga kalag nga nakapahulay sa mga kasamok sa pagka-mortal ug ang kalinaw diin ang transisyon sa maong tawo niini nga kinabuhi ngadto sa sunod nga kinabuhi. (tan-awa sa D&P 42:46).

Hunahunaa unsay nasinati ni Esteban samtang siya miatubang sa Sanhedrin ug sa wala pa siya gidala ug gipatay.

Giunsa pag-lig-on sa Dios si Esteban sa iyang tibuok kasinatian uban sa mga lider sa Judeo?

Base sa unsay imong natun-an, kompletuha ang mosunod nga baruganan: Kon kita magpabilin nga matinud-anon ngadto ni Jesukristo panahon sa mga kalisdanan, .

Pamalandong sa mosunod nga mga pangutana: Sa unsang mga paagi nga ang Ginoo magauban nato samtang mag-atubang kita og mga kalisdanan? Bisan og namatay si Esteban, unsay iyang naangkon?

3. Tubaga ang mosunod nga mga pangutana diha sa imong scripture study journal:

   1. Alang ni Esteban, kabahin sa pagpabilin nga matinud-anon nagpasabut nga sakripisyo sa iyang kinabuhi. Dili kinahanglan nga kita mohalad sa samang sakripisyo karon, apan unsa nga mga sakripisyo ang kinahanglan natong buhaton?

   2. Unsa sa imong pagtuo ang imong maangkon samtang magmatinud-anon ka ngadto sa Ginoo panahon sa kalisdanan ug mohimo og mga sakripisyo nga kinahanglan nimong buhaton?

   3. Unsa may imong nang naangkon?

Si Esteban sa kinatibuk-an giisip nga ang unang martir nga Kristiyano. Dugang pa, makita siya isip usa ka matang ni Kristo: Siya ug ang Manluluwas mibarug atubangan sa konseho aron pagataralon, mipahayag sa mga kamatuoran sa atubangan sa ilang mga kaaway, mihatag sa ilang mga kinabuhi sa matarung nga kawsa, ug gani mituaw sa samang ekspresyon sa ilang pagkamatay (tan-awa sa Lucas 23:33–34, 46; Mga Buhat 7:59–60).

4. Isulat ang mosunod sa ubos sa imong mga assignment karong adlawa diha sa imong scripture study journal:

   Akong natun-an ang Mga Buhat 6–7 ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: