Gihimo ni Jesus ang Iyang madaugong pagsulod ngadto sa Jeruslem sa sinugdanan sa katapusang semana sa Iyang kinabuhi. Samtang didto, Iyang gilimpyohan ang templo sa ikaduhang higayon ug giayo ang buta ug bakol kinsa miduol Kaniya.
Gihimo ni Jesus ang Iyang madaugong pagsulod ngadto sa Jerusalem
Paghunahuna og kalihokan nga makadani nga buhaton uban sa imong mga higala o mga miyembro sa pamilya. Diha sa imong scripture study journal pagsulat og mubo nga paragraph mahitungod sa unsa kahay imong isulti o buhaton aron sa paghaylo sa imong mga higala o mga miyembro sa pamilya sa pag-apil niana nga kalihokan.
Daghang mga tawo nga wala kaayo makaila mahitungod ni Jesukristo ug sa Iyang ebanghelyo, ug kita adunay responsibilidad sa pagtabang sa uban sa pagkat-on mahitungod Kaniya. Samtang imong tun-an ang Mateo 21:1–11, pamalandungi kon unsay imong mabuhat sa pagtabang sa uban nga makagustong makahibalo pa mahitungod ni Kristo.
Tan-awa ang pahina niini nga leksyon nga giulohan og “Ang Katapusang Semana, Pag-ula, ug Pagkabanhaw ni Jesukristo.” Kini nga mubo nga pagpasabut sa katapusang semana sa mortal nga kinabuhi sa Manluluwas nagsummarize sa mga panghitabo nga midangat ngadto sa Iyang kamatayon ug Pagkabanhaw. Kini makapaklaro ug makapasabut nimo og maayo sa mga istorya, mga pagtulun-an, mga doktrina, ug mga baruganan kalabut sa katapusang semana sa mortal nga pangalagad ni Jesukristo.
Ang Mateo 21 nagrekord sa mga panghitabo nga nahitabo lima ka adlaw sa wala pa ang Paglansang sa Krus sa Manluluwas, nagsugod sa Iyang madaugong pagsulod ngadto sa Jerusalem. Hinumdumi nga ang pundok sa katawhan misunod kang Jesus ug sa Iyang mga Apostoles samtang sila mibiyahe ngadto sa Jerusalem gikan sa Jericho (tan-awa sa Mateo 20:17–18, 29).
Basaha ang Mateo 21:1–5, nga mangita sa unsay gitudlo ni Jesus nga buhaton sa duha Niya ka mga disipulo.
Ang mga panagna nga gihisgutan sa Mateo 21:4–5 makaplagan diha sa Zacarias 9:9–10. Ikonsiderar ang pagsulat niini nga cross reference diha sa margin sa imong mga kasulatan tupad sa Mateo 21:4–5. Kini nga panagna mahitungod sa gisaad nga Mesiyas, o “ang dinihugan nga Propeta, Pari, Hari, ug and Tigluwas kansang pag-anhi ang mga Judeo naghinamhinam sa pagpaabut” (Giya ngadto sa mga Kasulatan, “Mesiyas,” scriptures.lds.org). Kini mahimong motabang kanimo nga mahibalo nga sa biblikanhong mga panahon ang asno “usa ka simbolo sa harianong Judeo. … Ang pagsakay sa asno … nagpakita nga si Jesus mianha isip usa ka malinawon ug ‘maaghup’ nga Manluluwas, dili isip usa ka tigbuntog nga nagsakay og kabayo nga igugubat ” (New Testament Student Manual [Manwal sa Church Educational System , 2014], 64).
Basaha ang Mateo 21:6–8, nga mangita sa unsay gihimo “sa kadaghanan sa mga tawo” (bersikulo 8) sa matinahurong pag-ila ni Jesukristo isip ang Mesiyas samtang nagkabayo ngadto sa Jerusalem.
Ang Ebanghelyo ni Juan nagpiho nga ang kadaghanan sa mga tawo nanguha og “mga palwa sa palmera” (Juan 12:13). Ang mga palwa sa palmera mga simbolo sa Judeo sa kalinaw ug kadaugan ibabaw sa mga kaaway. Ang pagbutang og agianan nga may alpombra, sama sa gihimo sa kadaghanan sa katawhang naggamit og mga sanga ug mga panapton, maoy usa ka lihok nga gigamit sa pagpasidungog og harianon o mga tigbuntog. Pinaagi sa pagbuhat niini ang kadaghanan sa mga tawo miila ug miabi-abi ni Jesus isip ilang Tigluwas ug Hari.
Tan-awa ang hulagway Ang Madaugon nga Pagsulod ni Kristo ngadto sa Jerusalem (Libro sa mga Hulagway sa Ebanghelyo [2009], no. 50; tan-awa usab sa LDS.org). Hunahunaa nga kamo usa sa mga tawo taliwala sa pundok sa katawhan. Basaha ang Mateo 21:9, ug hunahunaa nga kamo misinggit uban kanila.
Imahe
Madaugon nga Pagsulod
Tan-awa ang mga tawo mibalik sa pulong hosanna, nga nagpasabut og “palihug luwasa kami” (Giya ngadto sa mga Kasulatan, “Hosanna”). Ikonsiderar ang pagsulat niini nga depenisyon diha sa margin tupad sa Mateo 21:9.
Kabahin sa singgit sa kadaghanan sa mga tawo mituman sa messianic nga panagna nga makaplagan diha sa Salmo 118:25–26. Ikonsiderar ang pagsulat niining cross-reference diha sa margin tupad sa Mateo 21:9 o pagmarka niini diha sa Mateo 21:9. Ang harianon ug messianic nga ulohan “Anak ni David” (Mateo 21:9) gitagana alang sa manununod sa trono ni David. Pinaagi sa pagsulti niini ang mga tawo nagpahayag nga si Jesus mao ang Mesiyas nga gipili ug gipadala sa Dios sa pagluwas ug paggiya sa Iyang mga katawhan.
Hunahunaa nga kamo nagpuyo sa Jerusalem niini nga panahon. Unsa kaha ang imong mga hunahuna ug mga pagbati samtang imong nasaksihan ang madaugong pagsulod sa Manluluwas?
Liboan ang nadugang sa mga tawo didto sa Jerusalem niana nga panahon sa pagsaulog sa Pagpalabay. Basaha ang Mateo 21:10–11, nga mangita sa epekto sa kinaiya sa kadaghanan sa mga tawo ngadto sa uban diha sa Jerusalem.
Unsa nga pangutana ang gipangutana sa uban tungod sa kinaiya sa kadaghanan sa mga tawo?
Kini nga istorya nagpakita sa mosunod nga baruganan: Samtang atong ilhon diha sa publiko ug mosulti mahitungod ni Jesukristo, makatabang kita sa uban sa pag-ugmad og tinguha nga mahibalo pa mahitungod Kaniya.
Diha sa imong scripture study journal, paglista og mga sitwasyon nga walay labut sa mga miting sa simbahan diin ikaw makapaila ug makasulti mahitungod ni Jesukristo diha sa publiko. Dayon pagsulat og angay nga mga paagi diin ikaw makapaila ug makasulti mahitungod Kaniya diha sa publiko nga makatabang sa uban nga gustong mahibalo pa mahitungod Kaniya.
Tubaga ang usa o ang duha sa mosunod nga mga pangutana diha sa imong scripture study journal:
Kanus-a nga ang paningkamot sa usa ka tawo sa pagpaila ug pagsulti mahitungod ni Jesukristo diha sa publiko migiya kanimo nga gustong mahibalo pa mahitungod Kaniya?
Kanus-a ka, o ang usa ka tawo nga imong nailhan, mitabang og usa ka tawo nga gustong mahibalo pa mahitungod ni Jesukristo tungod kay ikaw nag-ila o nagsulti mahitungod Kaniya diha sa publiko?
Pangita ug paningkamot og mga oportunidad sa pagpaila sa maayong paagi ug pagsulti mahitungod ni Jesukristo.
Naghinlo si Jesus sa templo ug nag-ayo sa buta ug sa bakol
Imahe
Templo sa Orlando Florida
Pamalandungi kon ang mga hunahuna ug mga pagbati nga ikaw aduna diha sa templo. Kon ikaw wala pa gayud sukad makasulod sa templo, hunahunaa ang mga pagbati nga maanaa kanimo kon makasulod ka.
Unsa ang mahitabo sulod sa templo nga nagtabang kanato sa pagbati nga kini usa ka sagrado nga dapit?
Human ang Manluluwas misulod sa Jerusalem, miadto Siya sa templo.
Imahe
Ang templo ni Herodes makita gikan sa Bungtod sa mga Olivo
Basaha ang Mateo 21:12–13, nga mangita sa unsay gibuhat sa pipila ka mga tawo diha sa templo nga nakapasuko sa Langitnong Amahan ug ni Jesukristo.
Ang mga bisita kinsa miadto sa Jerusalem sa pagsaulog sa Pagpalabay nagkinahanglan nga mopalit og mga hayop aron ihalad nga mga sakripisyo diha sa templo isip kabahin sa ilang pagsimba. Ang mga tig-ilis og kwarta miilis sa Romano ug ubang mga kwarta og kwarta sa templo aron ang mga hayop mapalit, ug ang ubang tigpamaligya mibaligya sa gikinahanglan nga mga hayop. Bisan tuod og kini nga negosyo gikinahanglan ug naghatag og maayong katuyoan, ang pagbuhat niini diha sa templo usa ka walay pagrespeto ug balaang pagtahud. Agi og dugang, ang Mateo 21:13 nagsugyot nga ang mga tig-ilis sa kwarta ug ang mga tigbaligya mas nainteresado sa paghimo og ganansya kay sa pagsimba sa Dios ug sa pagtabang sa uban sa pagbuhat og mao.
Timan-i nga diha sa Juan 2:16, sa panahon sa unang paghinlo sa templo, gitawag ni Jesus ang templo og “balay sa akong Amahan.” Diha sa Mateo 21:13, sa panahon sa ikaduhang paghinlo, gitawag ni Jesus ang templo og “Akong balay.”
Usa ka kamatuoran mahitungod sa templo nga atong makat-unan gikan sa mga pulong ug mga lihok sa Manluluwas diha sa Mateo 21:12–13 nga ang balay sa Ginoo usa ka sagradong dapit, ug Siya nagtinguha nga atong tagdon kini uban sa balaan nga pagtahud.
Tubaga ang mosunod nga mga pangutana diha sa imong scripture study journal:
Unsaon nato pagpakita og balaan nga pagtahud alang sa balay sa Ginoo?
Unsa ang kinahanglan gayud natong buhaton aron kita mahimong takus sa pagsulod sa templo?
Basaha ang Mateo 21:14, nga mangita sa unsay gibuhat sa Manluluwas diha sa templo human hinloi ang templo sa ikaduhang higayon.
Kini makatabang nga mahibaloan nga “ang bakol” diha sa Mateo 21:14 nagpasabut ngadto sa mga indibidwal kinsa nabakol o may pipila ka matang sa pagkadili makalakaw.
Gikan sa unsay gibuhat sa Ginoo alang sa buta ug sa bakol kinsa miduol Kaniya didto sa templo, atong makat-unan ang mosunod nga kamatuoran: Samtang kita nagtambong sa templo, ang Ginoo makaayo kanato.
Sa unsa nga mga paagi ikaw mobati nga ang Ginoo makahimo sa pag-ayo kanato samtang kita nagtambong sa templo.
Imahe
Presidente James E. Faust
Si Presidente James E. Faust sa Unang Kapangulohan mipamatuod sa pagpang-ayo nga atong masinati samtang kita nagtambong sa templo: “Ang Ginoo naghatag og daghang mga dalan diin kita mahimong makadawat sa [Iyang] pagpang-ayo nga impluwensya. Mapasalamaton ako nga gipahiuli sa Ginoo ang buhat sa templo nganhi sa yuta. Kini usa ka importanting bahin sa buhat sa kaluwasan alang sa buhi ug sa patay. Ang atong mga templo naghatag og dangpanan diin kita moadto sa pagtalikod sa daghan nga mga kabalaka sa kalibutan. Ang atong mga templo mga dapit sa kalinaw ug kahilum. Dinhi niining balaan nga mga dangpanan ang Dios ‘nag-ayo sa kasingkasing nga nangadugmok, ug ginabugkusan niya ang ilang mga samad.’ (Ps. 147:3.)” (“Spiritual Healing,” Ensign, Mayo 1992, 7).
Ang pagkamamaayo nga atong masinati samtang kita magsimba diha sa templo mahimong diha dayon, sama sa buta ug sa bakol nga gihulagway diha sa Mateo 21:14, o kini mahitabo sa kadugayan.
Pamalandungi sa dihang ikaw, o usa ka tawo nga imong nailhan, misinati sa pagpang-ayo nga impluwensya sa Ginoo pinaagi sa pagsimba diha sa templo.
Ingon nga narekord diha sa Mateo 21:15–16, ang mga sacerdote nga punoan ug mga escriba wala mahimuot sa unsay gibuhat ni Jesus didto sa templo ug sa mga tawo nga nanagsinggit Kaniya didto og “Hosanna”. Gipasabut ni Jesus nga ang pag-ila sa publiko Kaniya nagtuman og usa ka panagna (tan-awa sa Salmo 8:2).
Isulat ang mosunod diha ubos sa mga assignment karong adlawa sa imong scripture study journal:
Akong natun-an ang Mateo 21:1–16 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo:
