Si Apostol Juan nakakita og panan-awon kabahin sa Kordero sa Dios nga nag-abli sa unang unom ka mga timri [silyo] sa basahon nga sinilyohan. Sa ikaunom nga silyo, nga nagsimbolo niining dispensasyon sa ulahing mga adlaw, si Juan nakakita sa mga sulugoon sa Dios kinsa “ang ilang mga tag-as nga bisti gilabhan nila ug gipaputi diha sa dugo sa Kordero” (Pinadayag 7:14).
Si Juan nakakita sa Kordero sa Dios nga nag-abli sa unang unom ka mga silyo sa basahon nga sinilyohan
Unsa ang pipila ka mga kabalaka o kahadlok nga mahimong anaa kanimo o sa mga tawo nga imong kaila kabahin sa pagpuyo sa ulahing mga adlaw?
Imahe
Prophet Joseph Smith
Si Propeta Joseph Smith mitudlo kon unsay gibati sa karaang mga propeta sa atong panahon: “Ang pagtukod sa Zion mao ang katuyoan nga nakapaikag sa katawhan sa Dios sa matag panahon; usa kini ka tema diin ang mga propeta, mga pari ug mga hari nagpakabuhi uban sa talagsaon nga kahimuot; ila kining gilauman uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabot nga ilang giawit ug gisulat ug gipanagna kining atong panahon” (Mga Pagtulun-an sa mga Presidente sa Simbahan: Joseph Smith [2007], 221).
Ngano kaha nga ang karaang mga propeta ingon niini og gibati sa atong panahon?
Si Apostol Juan, nga gitawag usab og Juan nga Tigpadayag, usa sa mga propeta kinsa nasayud mahitungod sa mga panghitabo sa ulahing mga adlaw ug nanagna sa atong panahon uban sa malipayong pagpaabut. Samtang imong tun-an ang Pinadayag 6–7 pangita og mga kamatuoran nga makahupay kanimo ug sa imong mga kaila mahitungod sa mga panghitabo sa ulahing mga adlaw.
Hinumdumi nga ang Pinadayag 5:1–5 nagrekord nga si Juan nakakita og usa ka basahon nga adunay pito ka mga timri nga ang Kordero lamang ang takus nga makaabli. Sa iyang panan-awon, nakita ni Juan ang pinasumbingay nga mga representasyon sa pipila sa mahinungdanong mga panghitabo kalabut sa matag usa sa 1,000 ka tuig nga mga panahon nga girepresentahan sa pito ka mga silyo.
Sa imong scripture study journal, pagdrowing og yano nga hulagway nga nagpakita sa mga panghitabo sa unang lima ka mga silyo, nga makita diha sa mga reference sa ubos. Samtang magbasa ka kabahin sa matag silyo, hunahunaa kon unsay gipasabut sa pipila sa mga simbolo.
Bisan tuod wala gipadayag sa Ginoo ang kahulugan sa pipila ka simbolo nga makita diha sa mga kasulatan, Iyang gipadayag ang kahulugan sa daghan niini pinaagi sa Iyang mga propeta. Samtang magtuon ka sa kasulatan ug adunay mga pangutana, mahimo nimong tan-awon ang propetikanhong komentaryo aron makita unsay gisulti sa mga kadagkoan sa Simbahan kabahin sa piho nga mga tudling. Ang impormasyon diha sa kauban nga tsart makatabang kanimo nga makasabut sa pipila sa mga simbolismo nga makita diha sa Pinadayag 6:1–11 kabahin sa pag-abli sa unang lima ka mga silyo.
Unang silyo
(Mga 4000 ngadto sa 3000 B.C.)
Puti nga kabayo = Kadaugan
Pana = Gubat
Purong-purong = Tigbuntog
Si Elder Bruce R. McConkie sa Korum sa Napulog Duha ka mga Apostoles misugyot nga ang Pinadayag 6:1–2 naghulagway sa kapanahunan ni Enoch ug nga ang nagkabayo mao si Enoch (tan-awa sa Doctrinal New Testament Commentary, 3 vols. [1966–73], 3:476–78).
Ikaduhang silyo
(Mga 3000 ngadto sa 2000 B.C.)
Pula nga kabayo = Pagbanaw sa dugo
Espada = Gubat ug kalaglagan
Si Elder McConkie misugyot nga ang Pinadayag 6:3–4 naghulagway sa panahon ni Noe, sa dihang ang pagkadautan milukop sa yuta. Ang nagsakay sa pula nga kabayo mahimong ang yawa mismo o, tingali, “usa ka tawo nga nagrepresentar sa daghang tigpatay nga mga manggugubat” (tan-awa sa Doctrinal New Testament Commentary, 3:478–79).
Ikatulong silyo
(Mga 2000 ngadto sa 1000 B.C.)
Itom nga kabayo = Kagutom
Mga timbangan = Tag-as nga mga presyo sa pagkaon
Si Elder McConkie misugyot nga ang Pinadayag 6:5–6 naghulagway sa panahon ni Abraham, sa dihang daghan ang nangamatay sa kagutom (tan-awa sa Doctrinal New Testament Commentary, 3:479–80). Ang tawo makapalit lamang og igong pagkaon aron mabuhi gamit ang sweldo sa tibuok adlaw, nga nagpasabut sa grabeng presyo sa pagkaon panahon sa kagutom.
Ikaupat nga silyo
(Mga 1000 B.C. hangtud sa pagkatawo ni Kristo)
Luspad nga kabayo = Kamatayon
Kamatayon ug hades [impyerno] = Kalaglagan sa mga dautan ug ang ilang pagsulod ngadto sa bilanggoan sa espiritu (tan-awa sa Isaias 5:14)
Si Elder McConkie misugyot nga ang Pinadayag 6:7–8 nagpasabut ngadto sa panahon “niadtong dagko nga mga gingharian ug mga kanasuran kansang mga gubat ug mga pagbudhi pabalik-balik nga misakit ug milupig sa [Israel]” (tan-awa sa Doctrinal New Testament Commentary, 3:481). Kini nga mga nasud naglakip sa Babelonia, Persia, Ehipto, Asiria, Gresya, ug Roma.
Ikalimang silyo
(Panahon sa pagkatawo ni Kristo hangtud A.D. 1000)
Altar = Sakripisyo
Mga kalag = Mga martir, mga Kristiyano nga gipamatay tungod sa ilang mga gituohan
Si Elder McConkie misugyot nga ang Pinadayag 6:9–11 nagpasabut ngadto sa daghang una nga mga Kristiyano, lakip ang kadaghanan sa orihinal nga mga Apostoles, kinsa nangamatay isip mga martir (tan-awa sa Doctrinal New Testament Commentary, 3:482–83). Tungod kay kini nga mga Santos mihatag sa ilang mga kinabuhi “[alang] sa pulong sa Dios ug tungod sa pagpanghimatuod nga ilang gihimo” (Pinadayag 6:9), gihatagan sila og “maputi ug tag-as nga bisti” (Pinadayag 6:11), nga nagsimbolo sa kaputli (tan-awa sa Pinadayag 7:13–14; 3 Nephi 27: 19).
Ang ikaunom nga silyo nagrepresentar sa atong panahon ug sa mga panghitabo, ilabi na sa mga kalamidad, nga padulong ngadto sa Milenyum, kon si Jesukristo maghari na dinhi sa yuta (tan-awa sa Bruce R. McConkie, Doctrinal New Testament Commentary, 3:485–86).
Basaha ang Pinadayag 6:12–17, nga mangita sa mga panghitabo nga nakita nang daan ni Juan sa atong panahon padulong ngadto sa Ikaduhang Pag-anhi sa Ginoo. Timan-i nga ang Joseph Smith Translation sa bersikulo 14 mabasa nga, “Ug ang kalangitan naabli sama sa pag-abli sa linukot nga basahon kon kini gilukot; ug ang tanang kabukiran ug kapuloan nabalhin gikan sa dapit niini.
Timan-i nga ang Pinadayag 6:16 naghulagway kon unsa ka desperado nga magtinguha ang ubang mga tawo sa paglingkawas sa kasuko sa Dios. Si Juan dayon nangutana, “Kinsa bay arang makabangbang niini?” (Pinadayag 6:17). Ang Pinadayag 7 nagtabang kanato nga makasabut kinsay makahimo sa pagbarug, o makaagwanta, sa mga kalamidad sa ikaunom nga silyo.
Nakita ni Juan ang mga sulugoon sa Dios kinsa milaba sa ilang tag-as nga mga bisti diha sa dugo sa Kordero
Basaha ang Pinadayag 7:1–4, nga mangita kon unsa pa ang nakita ni Juan sa ikaunom nga silyo. Basaha usab ang Doktrina ug mga Pakigsaad 77:8–11, diin ang Ginoo mipasabut sa kahulugan niini nga mga bersikulo.
Imahe
Elder Bruce R. McConkie
Si Elder Bruce R. McConkie mipasabut nga ang pulong nga Elias, nga makita sa Doktrina ug mga Pakigsaad 77:9, maoy “usa ka pangalan ug usa ka titulo sa mga tawo kansang misyon mao ang pagtugyan sa mga yawe ug mga gahum ngadto sa mga kalalakin-an niining katapusang dispensasyon” (Mormon Doctrine, 2nd ed. [1966] 221).
Pipila sa mga tawo nga miabut aron sa pagtugyan sa mga yawe ug mga gahum mao si Adan; Moroni; Juan Bautista; Pedro, Santiago, ug Juan; Moises; ug Elijah.
Ang pagsilyo o pagmarka sa “mga ulipon [sulugoon] sa atong Dios … diha sa ilang mga agtang” (Pinadayag 7:3) usa ka simbolo sa ilang debosyon, serbisyo, ug pagkahisakop ngadto sa Dios.
Imahe
Prophet Joseph Smith
Si Propeta Joseph Smith mitudlo nga ang pagsilyo sa mga matinud-anon diha sa ilang mga agtang “nagpasabut sa pagsilyo sa mga panalangin diha sa ilang mga ulo, nagpasabut sa walay katapusan nga pakigsaad, sa ingon gisiguro ang ilang balaan nga tawag ug pagkapinili” (sa History of the Church, 5:530).
Ang gidaghanon nga 144,000 nga gihisgutan diha sa Pinadayag 7:4 “mao ang gidaghanon sa mga representante gikan sa napulog duha ka mga tribo sa Israel kinsa i-orden sa pagtabang sa uban sa ilang tumong sa pagkab-ot sa kahimayaan. … Dili kana, sama sa gituohan sa uban, nga mao ang total nga gidaghanon sa mga tawo nga mahimaya” (New Testament Student Manual [Manual sa Church Educational System, 2014], 544).
Sumala sa narekord diha sa Pinadayag 9, si Juan mipasabut pag-usab ngadto niining matarung nga mga sulugoon. Basaha ang Pinadayag 9:3–4, nga mangita kon unsa ang mahitabo niadtong wala masilyuhi isip mga sulugoon sa Dios.
Basaha ang Pinadayag 7:9–10, nga mangita kon kinsa ang nakita ni Juan. Timan-i kon unsa ang gisul-ob niining mga tawhana.
Sumala sa narekord diha sa Pinadayag 7:11–12, si Juan nakakita nga kini nga mga katawhan, uban ang 24 ka mga anciano ug ang upat ka mga buhing binuhat [mga mananap] nga gihisgutan diha sa Pinadayag 4, mialirong sa trono sa Dios ug misimba Kaniya.
Basaha ang Pinadayag 7:13–17, nga mangita og mga tubag sa mosunod nga mga pangutana. Mahimo nimong markahan o timan-an ang unsay imong makit-an.
Unsay gilahutay niining mga tawhana?
Sa unsang paagi nga ang ilang tag-as nga mga bisti nahimong puti?
Unsa nga mga panalangin ang ilang madawat?
Timan-i nga ang tag-as nga mga bisti sa katawhan “gipaputi diha sa dugo sa Kordero” (Pinadayag 7:14), nga nagsimbolo sa mga katawhan nga gihimong putli pinaagi sa Pag-ula ni Jesukristo. Ang mga panalangin sa mga bersikulo 16–17 naghulagway sa hingpit nga kalipay, kalinaw, ug debosyon niadtong makapanunod sa celestial nga himaya (tan-awa usab sa D&P 138:12–15).
Atong makat-unan gikan niining mga bersikulo nga kon matinud-anon kitang molahutay sa kalisdanan ug mahimong putli pinaagi sa Pag-ula ni Jesukristo, kita makatagamtam sa celestial nga himaya uban sa Dios.
Hunahunaa kon sama sa unsa kini ug unsay imong bation nga makahimo ka sa pagbarug nga putli diha sa atubangan sa Dios. Sa unsang paagi kini nga mga pagbati ikakumpara sa mga pagbati sa katawhan nga gihulagway diha sa Pinadayag 6:16?
Tubaga ang mosunod nga mga pangutana diha sa imong scripture study journal:
Unsay kinahanglan natong buhaton aron ang Manluluwas makaputli kanato pinaagi sa Iyang Pag-ula?
Sa unsang paagi ang paghinumdom sa mga panalangin sa celestial nga himaya nakatabang kanimo sa imong mga paningkamot sa paglahutay sa kalisdanan ug mamahimo nga putli?
Ribyuha ang mga lista sa kabalaka nga imong gisulat sa sinugdanan niini nga leksyon. Ikonsiderar kon sa unsang paagi ang baruganan nga nahibaloan diha sa Pinadayag 7 makatabang kon mobati ka nga nabalaka kabahin sa pagpakabuhi sa ulahing mga adlaw.
Mahimo nga mogahin og pipila ka minuto sa pagpamalandong ug pag-ampo diha sa imong kasingkasing kon unsaon nimo sa paggamit niini nga mga baruganan sa imong kinabuhi.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Pinadayag 6–7 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: