Gitudloan ni Apostol Pablo ang mga miyembro sa Simbahan mahitungod sa pagtuo ug sa kaimportante sa paggamit og hugot nga pagtuo kang Jesukristo. Migamit siya og mga ehemplo sa matarung nga mga lalaki ug mga babaye gikan sa Daang Tugon kinsa migamit sa ilang hugot nga pagtuo kang Kristo ug sa ingon mihimo og mga milagro, milahutay sa mga kalisdanan ug nakadawat og dagkong panalangin.
Gitudloan ni Apostol Pablo ang mga miyembro sa Simbahan sa kaimportante sa paggamit og hugot nga pagtuo kang Jesukristo
Basaha ang mosunod nga istorya, ug tan-awa kon unsa ang gibuhat sa batan-ong babaye sa paggamit og hugot nga pagtuo:
Usa ka batan-ong babaye gikan sa Pilipinas mipasabut nga usa ka summer ang iyang papa kinahanglang manarbaho sa layo. Dihang nadawat niya ang iyang sweldo iya kining gipadala sa iyang pamilya. Usa ka Sabado, nagamit na sa pamilya ang tanang kwarta gawas sa duha ka kwartang papel nga tag-20 pesos. Dihang gitan-aw sa batan-ong babaye ang lista sa mga item nga gikinahanglan sa iyang pamilya, nakita niya nga dili paigo ang kwarta aron mapalit ang tanang item ug para ipamilete sa iyang pamilya pag-adto sa simbahan sa sunod nga adlaw. Gipangutana niya ang iyang mama unsay iyang buhaton. Giingnan siya sa iyang mama nga paliton ang mga item ug ang Ginoo mohatag ra og paagi sa pamilete.
Nag-ampo ang batan-ong babaye nga iyang mapalit ang mga item nga naa sa lista ug unta may mahabilin pang pamilite sa simbahan sa sunod nga adlaw. Una paliton niya ang uling aron dunay ikaluto sa pagkaon. Nakalitan siya kay ang presyo kada putos sa uling midoble gikan sa tag-5 pesos ngadto sa 10. Tungod kay gikinahanglan sa iyang pamilya ang uling para iluto sa ilang pagkaon, mipalit siya og duha ka putos nga uling sa total nga 20 pesos. Mas gihugtan sa batan-ong babaye ang iyang pag-ampo nga makaadto gihapon sa simbahan ang iyang pamilya. Sa iyang pag-ampo, dunay mihunghong kaniya: “Padayon ug palita ang mga butang nga imong gikinahanglan. Mamaayo ra ang tanan.” Mao nga mipadayon siya sa palitanan dala ang 20 pesos nga nahibilin (gikuha gikan sa video nga “Pure and Simple Faith,” LDS.org).
Tubaga ang mosunod nga pangutana diha sa imong scripture study journal: Sa unsang paagi kining batan-on nga babaye migamit sa iyang hugot nga pagtuo kang Jesukristo?
Basaha ang Mga Hebreohanon 11:1, nga mangita kon unsay gitudlo ni Apostol Pablo mahitungod sa pagtuo. Basaha usab ang Hubad ni Joseph Smith, Mga Hebreohanon 11:1.
Si Elder David A. Bednar sa Korum sa Napulog Duha ka mga Apostoles migamit sa Mga Hebreohanon 11:1, ingon man sa ubang mga kapanguhaan, aron mapasabut ang tulo ka nag-unang mga elemento sa hugot nga pagtuo:
Imahe
Elder David A. Bednar
“Si Apostol Pablo mipasabut nga ang pagtuo mao ‘ang mga butang nga atong ginapaabut, ug ang panghimatuod sa pagkaanaa sa mga butang nga dili nato makita” (Mga Hebreohanon 11:1). Gipamahayag ni Alma nga ang pagtuo dili usa ka pagbaton og hingpit nga kasayuran sa mga butang; busa kon kamo adunay hugot nga pagtuo kamo ‘molaum alang sa mga butang diin dili makita, [apan] mga tinuod’ (Alma 32:21). Agig dugang, atong nakat-unan gikan sa Lectures on Faith nga ang pagtuo mao ‘ang unang baruganan sa pinadayag nga relihiyon, ug mao ang pundasyon sa tanang pagkamatarung’ ug kini usab ‘ang baruganan sa buhat sa tanang intelehenting mga binuhat’ [Lectures on Faith (1985), 1].
“Kini nga mga pagtulun-an miklaro sa tulo ka sukaranang mga elemento sa hugot nga pagtuo: (1) ang hugot nga pagtuo isip kasiguroan sa mga butang nga gilauman nga tinuod, (2) ang hugot nga pagtuo isip ebidensya sa mga butang nga dili makita, ug (3) ang hugot nga pagtuo isip baruganan sa paglihok sa tanang intelehente nga mga binuhat. Akong gihulagway kining tulo ka mga bahin sa hugot nga pagtuo diha sa Manluluwas nga nagdungan og atubang sa umaabut, pagtan-aw sa nangagi, ug pagpasiugda og lihok sa karon.
“Ang hugot nga pagtuo isip kasiguroan sa mga butang nga gilauman naglantaw sa umaabut. …
“Ang hugot nga pagtuo kang Kristo kauban gayud, ug mosangput sa, paglaum diha kang Kristo alang sa atong katubsanan ug kahimayaan. Ug ang kasiguroan ug ang paglaum maghimong posible nga kita maglakaw sa ngilit sa kahayag ug mohimo og pipila ka pagtikang ngadto sa kangitngit—maglaum ug mosalig nga ang kahayag molihok ug modan-ag sa agianan [tan-awa sa Boyd K. Packer, ‘The Candle of the Lord,’ Ensign, Ene. 1983, 54]. Ang kombinasyon sa kasiguroan ug paglaum mopasiugda sa paglihok niini karon.
“Ang hugot nga pagtuo isip ebidensya sa mga butang nga dili makita mohinumdom sa nangagi ug mopamatuod sa atong pagsalig sa Dios ug sa atong pagsalig sa katinuod sa mga butang nga dili makita. Motikang kita ngadto sa kangitngit uban sa kasiguroan ug paglaum, ug makadawat kita og ebidensya ug panghimatuod samtang ang kahayag molihok ug mohatag og kahayag nga atong gikinahanglan. Ang saksi nga atong naangkon human sa pagsulay sa atong hugot nga pagtuo (tan-awa sa Ether 12:6) ebidensya nga mopadako ug mopalig-on sa atong kasiguroan.
Ang kasiguroan, paglihok, ug ebidensya moimpluwensya sa usag usa sa nagpadayon nga proseso” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 61–63).
Kompletuha ang mosunod nga mga assigment diha sa imong scripture study journal:
Pagsulat og mubo nga pagpasabut kon unsay ipasabut sa pagkaadunay hugot nga pagtuo kang Jesukristo.
Kompletuha ang mosunod nga depinisyon sa hugot nga pagtuo, sigun sa gihatag ni Apostol Pablo diha sa Hubad ni Joseph Smith sa, Mga Hebreohanon11:1: Ang hugot nga pagtuo mao ang kasiguroan sa mga … , ang katin-awan sa … (Hunahunaa ang pagmarka o pagtimaan niini nga kamatuoran diha sa Mga Hebreohanon 11:1.)
Paghunahuna og usa ka panahon dihang gihangyo ka sa paghimo og butang nga gibati nimo ang kahadlok sa pagbuhat o ingon og lapas sa unsay imong mahimo. Tingali ang imong kamasaligon nalig-on dihang nahinumduman nimo ang butang nga imong nahimo o nasinati sa miagi. Kana nga milabayng kasinatian naghatag og katin-awan o ebidensya nga makatabang nga imong masagubang ang bag-ong hagit uban sa kasiguroan nga ikaw molampos. Sa mga butang nga espiritwal, ang ebidensya sa tabang sa Dios sa miagi naghatag nato og kasiguroan samtang ang umaabut atong atubangon, ug makatabang kini nga molihok kita nga masaligon uban sa pagtuo karon. Sigun sa gitudlo ni Elder Bednar, ang kasiguroan, katin-awan [ebidensya], ug paglihok—mao ang tulo ka elemento sa hugot nga pagtuo—nagtambayayong samtang kita moatubang sa umaabut, molingi sa nangagi, ug pagbuhat niini karon.
Tubaga ang mosunod diha sa imong scripture study journal:
Sa unsang paagi ang paggamit sa hugot nga pagtuo kang Jesukristo lahi kay sa motuo lamang Kaniya?
Sa unsang paagi ang istorya bahin sa batan-ong babaye gikan sa Pilipinas naghulagway sa tulo ka elemento sa hugot nga pagtuo nga gihulagway ni Elder Bednar?
Ihulagway ang panahon sa dihang ikaw migamit og hugot nga pagtuo sa Ginoo.
Basaha ang Mga Hebreohanon 11:2–5, nga mangita sa mga ehemplo nga gigamit ni Pablo sa paghulagway kon unsay mahitabo kon ang mga tawo mogamit og hugot nga pagtuo kang Jesukristo. Ang mga pulong nga “ang mga tawo sa karaan nanagpakadawat sa langitnong pag-uyon” diha sa bersikulo 2 gipasabut nga ang mga elder nakadawat og saksi, o pagpamatuod.
Basaha ang Mga Hebreohanon 11:6, nga mangita kon unsay gitudlo ni Apostol Pablo mahitungod sa hugot nga pagtuo.
Usa ka baruganan nga atong makat-unan gikan sa Mga Hebreohanon 11:6 mao nga aron mapahimuot ang Dios kinahanglan natong gamiton ang atong hugot nga pagtuo pinaagi sa pagduol ngadto Kaniya, pagtuo Kaniya, ug pagtuo nga Siya moganti niadtong makugihon nga mangita Kaniya. Ikonsiderar ang pagmarka o pagtimaan niini nga kamatuoran diha sa bersikulo 6.
Basaha ang konklusyon sa istorya bahin sa batan-ong babaye gikan sa Pilipinas, nga mangita kon unsay nahitabo tungod kay migamit siya og hugot nga pagtuo kang Jesukristo:
Dihang nag-ampo ang batan-ong babaye para sa lain pang mga item nga gikinahanglan sa iyang pamilya, gikuot niya ang iyang bulsa ug nahikapan ang dako nga linukot nga papel. Dihang giablihan niya kini iyang nakita nga dunay dugang nga lima ka kwartang papel, nga tag-20 pesos, nga naputos kauban sa nahibilin niyang 20 pesos nga kwarta. Nianang higayona nakita niya nga may igo na siyang ikapalit sa mga butang nga gikinahanglan sa iyang pamilya ug may ikapamilite sa iyang pamilya sa pag-adto sa simbahan. Kini nga batan-on mipasabut nga atol niini nga kasinatian iyang gibati ang tabang ug gugma sa Dios ngadto kaniya. Dihang nauli na siya iyang gipasalamatan ang Langitnong Amahan sa milagro (gikuha gikan sa video nga “Pure and Simple Faith,” LDS.org). Makabaton kita og hugot nga pagtuo nga ang Ginoo motubag sa mga pag-ampo sa kaugalingon Niya nga pamaagi ug sa kaugalingon Niya nga panahon.
Kon may access ka sa internet, mahimo nimong tan-awon ang video nga “Pure and Simple Faith” (5:22), nga anaa sa LDS.org.
Unsa nga ebidensya ang naangkon niini nga batan-ong babaye gikan sa paggamit niya og hugot nga pagtuo kang Jesukristo?
Sa unsa kaha nga paagi kini nga kasinatian makatabang sa batan-ong babaye sa paggamit og hugot nga pagtuo sa umaabut?
Kon tan-awon nato ang nangaging mga ebidensya nga ang Dios mitabang kanato, makasiguro kita nga Siya motabang na usab kanato sa umaabut. Tungod niini nga ebidensya ug kasiguroan, makabaton kita og hugot nga pagtuo sa pagbuhat niini karon. Kon padayon kitang mobuhat pinaagi sa hugot nga pagtuo, niana kini nga proseso magpadayon ug ang atong pagtuo mas magkalig-on.
Hunahunaa kon unsa nga matinud-anong mga buhat ang kinahanglan nimong buhaton sa imong kinabuhi. Mituo ka ba nga ang Dios motabang nimo kon ikaw molihok? Mahimo nimong isulat ang usa ka tumong nga lihukon ang usa sa mga pag-aghat nga imong nadawat atol niini nga leksyon. Sa imong pagtuman niini nga tumong, imong maangkon ang ebidensya sa gugma sa Dios alang kanimo.
Mihatag si Apostol Pablo og mga ehemplo sa matarung nga mga tawo gikan sa Daang Tugon kinsa migamit sa ilang hugot nga pagtuo
Unsa ang ubang sitwasyon nga imong giatubang karon o atubangon sa umaabut nga nagkinahanglan sa imong paggamit og hugot nga pagtuo kang Jesukristo?
Samtang imong tun-an ang Marcos 11:7–40, pangitaa ang mga panalangin sa paggamit og hugot nga pagtuo kang Jesukristo.
Mihatag si Apostol Pablo og mga ehemplo sa matarung nga mga tawo sa Daang Tugon kinsa migamit sa ilang hugot nga pagtuo. Usa kini ka pagsiguro sa iyang mga tigbasa nga sila usab mapanalanginan pinaagi sa paggamit og hugot nga pagtuo. Sa daklit basaha ang Mga Hebreohanon 11, nga mangita sa mga pulong nga “pinaagi sa pagtuo” ug “tungod sa pagtuo.” Ikonsiderar ang pagmarka o pagtimaan niana nga mga pulong diha sa imong mga kasulatan.
Basaha ang Mga Hebreohanon 11:7, nga mangita kon sa unsang paagi migamit si Noe og hugot nga pagtuo sa Dios. Unsa nga mga panalangin ang nadawat ni Noe tungod kay mibuhat siya uban sa hugot nga pagtuo?
Basaha ang mahitungod sa mga ehemplo sa hugot nga pagtuo sa tulo o daghan pang mga tudling nga gilakip sa kauban nga tsart. Samtang basahon nimo kini, tan-awa kon sa unsang mga paagi ang mga indibidwal migamit og hugot nga pagtuo ug kon unsang mga panalangin ang ilang nadawat. Sa imong scripture study journal, pagdrowing og tsart nga sulatan sa mga tudling nga imong gipili, ug ilakip ang imong mga hunahuna mahitungod sa mga indibidwal nga imong gibasa. Ilakip usab og lista ang susamang mga panalangin nga gilauman nimong madawat pinaagi sa paggamit og hugot nga pagtuo sa Manluluwas.
Basaha ang Mga Hebreohanon 11:13–16, nga mangita kon unsay atong makat-unan gikan sa ehemplo ni Abraham, Sarah, ug sa uban mahitungod sa paggamit og hugot nga pagtuo. Ang mga pulong nga “labi pa ka maayong yuta” sa bersikulo 16 nag-refer sa kinabuhing dayon.
Daghan sa mga saad nga gihatag kang Abraham ug kang Sarah wala matuman samtang buhi pa sila. Ngano kaha nga nagpabilin man silang matinud-anon bisan og wala nila madawat ang tanang gisaad sa Ginoo niining kinabuhia? Sa unsang paagi nga ang ilang ehemplo makatabang nga kita magpabiling matinud-anon?
Basaha ang Mga Hebreohanon 11:32–35, nga mangita sa dugang nga mga panalangin nga miabut niadtong migamit og hugot nga pagtuo kang Jesukristo. Mahimo nimong markahan o timan-an ang imong nakit-an.
Basaha ang Mga Hebreohanon 11:36–40, nga mangita kon unsay nahitabo sa daghang mga indibidwal bisan og nagmatinud-anon sila.
Ang Joseph Smith Translation sa Mga Hebreohanon 11:40 mabasa nga “ang Dios mihatag og mas maayong mga butang para kanimo pinaagi sa ilang mga pag-antus, kay kon wala ang mga pag-antus dili sila pagahingpiton” (Joseph Smith Translation, Mga Hebreohanon 11:40 ). Tan-awa ang panalangin nga gisaad niadtong mga mogamit og hugot nga pagtuo diha Kaniya.
Usa ka kamatuoran nga atong mailhan gikan sa ehemplo niining matinud-anong mga tawo mao nga kon gamiton nato ang atong hugot nga pagtuo kang Jesukristo, makalahutay kita sa pag-antus, makahimo og mga milagro, makadawat og balaanong mga saad, malig-on ang atong pagpamatuod Kaniya, ug makapadayon sa pagkahingpit.
Sa imong scripture study journal, isulat ang mahitungod sa tawo nga imong nailhan kinsa usa ka ehemplo sa paggamit og hugot nga pagtuo kang Jesukristo. Unsa nga mga panalangin ang imong nakita nga miabut sa kinabuhi nianang tawhana tungod kay migamit siya og hugot nga pagtuo?
Paghunahuna og usab og mga sitwasyon nga nagkinahanglan kang mogamit og hugot nga pagtuo kang Jesukristo. Pangita og mga oportunidad nga mosalig sa Iyang mga saad ug matinud-anong mobuhat sa paagi nga madapit ang Iyang giya ug mga panalangin.
Isulat ang mosunod diha sa ubos sa mga assignment karong adlawa sa imong scripture study journal:
Akong natun-an ang Mga Hebreohanon 11 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: