Ang Pinadayag 12–14 naglakip og pagkahunong sa kronolohiya nga han-ay sa panan-awon ni Apostol Juan. Si Juan nakakita og panan-awon sa usa ka dragon nga naghulga sa usa ka babaye ug sa iyang anak. Misulat siya mahitungod sa Gubat sa Langit ug mahitungod sa mga gingharian sa kalibutan nga makig-away batok sa mga sumusunod sa Dios.
Gipakita kang Juan nga si Satanas ug ang iyang mga anghel kanunay nga nakigbatok sa Ginoo ug sa Iyang Simbahan
Pagdrowing og mga linya nga nagkonektar sa matag usa sa mga hulga nga gilista diha sa kolum sa wala ug sa mga paagi sa pakigbatok niini nga gilista diha sa tuo nga kolum.
Asa niini nga mga hulga ang bag-o lang nimong gipakigbatukan? Asa kaha niini ang labing kuyaw? Ngano man?
Samtang magtuon ka sa Pinadayag 12, pangita og mga kamatuoran nga makatabang nimo sa pagpakigbatok sa mga impluwensya ni Satanas. Ang Pinadayag 12–14 usa ka paghunong sa paghulagway ni Juan sa iyang panan-awon sa mga panghitabo sa ikapito nga silyo. Niini nga paghunong ang Ginoo tingali mitabang ni Juan nga masabtan ang kahulugan sa mga pulong nga “ang gingharian sa kalibutan” ug “gingharian sa atong Ginoo” (Pinadayag 11:15). Ang Hubad ni Joseph Smith sa tibuok Pinadayag 12 makita diha sa Giya ngadto sa mga Kasulatan.
Tan-awa ang mosunod nga litrato, ug hunahunaa kon unsa kaha ang girepresentahan sa mga simbolo diha niini.
Timan-i nga ang anak sa babaye “magahari sa tanang kanasuran pinaagi sa olisi nga puthaw” (Pinadayag 12:5).
Basaha ang Pinadayag 12:3–4, nga mangita kon unsa ang naghulga sa babaye ug sa iyang anak.
Unsa kaha ang girepresentahan sa mga simbolo nga gihulagway diha sa mga bersikulo 1–4?
Basaha ang Hubad ni Joseph Smith, Pinadayag 12:7–8 (sa Giya ngadto sa mga Kasulatan, scriptures.lds.org), nga mangita kon unsa ang girepresentahan sa dragon, sa babaye, ug sa anak. Mahimo nimong isulat o timan-an ang kahulugan sa matag usa sa simbolo tupad sa Pinadayag 12:1–5.
Ang dragon nagrepresentar ni Satanas (tan-awa sa Hubad ni Joseph Smith, Pinadayag 12:8), ang babaye nagrepresentar sa “simbahan sa Dios”, ug ang bata nagrepresentar sa “gingharian sa atong Dios ug sa iyang Kristo” (Hubad ni Joseph Smith, Pinadayag 12:7). Ang gingharian naglakip sa matinud-anong mga miyembro sa Simbahan sa Ginoo. (Alang sa dugang nga pagpasabut sa mga simbolo niini nga mga tudling, tan-awa sa New Testament Student Manual [manwal sa Church Educational System, 2014], 550–52.)
Sumala sa Pinadayag 12:4, unsa man ang katuyoan sa dragon?
Ngano kaha nga si Satanas makugihon man kaayo nga nagtinguha sa paglaglag sa gingharian sa Dios ug ni Kristo?
Basaha ang Pinadayag 12:6, nga mangita kon unsay gibuhat sa babaye tungod sa naghulga nga dragon.
Ang pagkagiw sa babaye ngadto sa kamingawan nagrepresentar sa pagsulod sa Simbahan sa Dakong Apostasiya ug pagkuha sa priesthood gikan sa yuta human sa kamatayon ni Jesukristo ug sa Iyang mga Apostoles.
Human makita ni Apostol Juan ang dragon nga naghulga sa babaye ug sa iyang anak, gipakita siya og usa ka panghitabo gikan sa atong premortal nga kinabuhi—sa dihang si Satanas ug ang iyang mga sumusunod nakig-away batok sa plano sa kaluwasan ug sa mga Santos sa Dios.
Basaha ang Hubad ni Joseph Smith, Pinadayag 12:6–11 (sa Giya ngadto sa mga Kasulatan, scriptures.lds.org), nga mangita kon unsay nahitabo ni Satanas atol sa Gubat sa Langit ug giunsa pagbuntog sa mga Santos sa Dios si Satanas ug ang iyang mga sumusunod. Mahimo nimong markahan o timan-an ang unsay imong makit-an.
Ang Pinadayag 12:4 nag-ingon nga ang ikog sa dragon “misapupo sa ikatulo ka bahin sa mga bitoon sa langit.” Kini nagsimbolo sa kadaghan sa espiritu nga mga anak sa Langitnong Amahan kinsa mipili nga mosunod kang Satanas. “Si Miguel ug ang iyang mga manolunda” (Pinadayag 12:7) mao si Adan ug ang ubang matarung nga espiritu nga mga anak sa Dios.
Sumala sa Pinadayag 12:11, giunsa man sa matarung nga mga panon sa langit (lakip kanimo) sa pagbuntog si Satanas?
Sumala sa Pinadayag 12:8–9, asa gitambog si Satanas ug ang iyang mga sumusunod human sa ilang rebelyon?
Basaha ang Hubad ni Joseph Smith, Pinadayag 12:12, 17 (sa Giya ngadto sa mga Kasulatan, scriptures.lds.org), nga mangita kon kang kinsa nakiggubat si Satanas human siya gisalikway gikan sa langit.
Ang pagsabut kon giunsa nato sa pagbuntog si Satanas sa atong kinabuhi sa wala pa dinhi sa yuta makatabang kanato nga masayud unsaon sa pagbuntog sa iyang mga impluwensya ug pagpangataki dinhi sa yuta. Gikan niini nga mga tudling sa Pinadayag 12 atong mahibaloan ang mosunod nga baruganan: Makabuntog kita sa mga impluwensya ni Satanas pinaagi sa Pag-ula sa Manluluwas ug sa pagpabilin nga matinud-anon sa atong mga pagpamatuod sa ebanghelyo. Mahimo nimong markahan o timan-an kini nga baruganan diha sa imong mga kasulatan.
Si Elder James J. Hamula sa Seventy mitudlo kon sa unsang paagi si Satanas nag-ataki sa inyong henerasyon:
Imahe
Elder James J. Hamula
“Giandam nga motunga niining katapusang mga adlaw ug paghago alang sa atong Amahan ug sa Iyang Anak mao ang pipila sa labing isug ug hamiling mga anak lalaki ug babaye sa atong Amahan. Ang ilang kaisug ug kahamili gipakita didto sa kinabuhi nga wala pa dinhi sa yuta sa pakigbisog ni Satanas. …
“Uban sa gipahiuli nga gingharian sa Dios sa yuta ug sa inyong pag-anhi sa kalibutan, si Satanas nasayud nga ‘hamubo na lamang ang iyang panahon’ [Pinadayag 12:12]. Busa, si Satanas nagtigum sa matag kapanguhaan nga iyang magamit aron sa pagdani kaninyo ngadto sa pagpakasala. Siya nasayud nga kon siya makabitad ninyo sa pagpakasala, siya mahimong mopugong kaninyo sa pag-alagad og full-time nga misyon, sa pagminyo sa templo, ug sa pagsiguro sa umaabut ninyong mga anak diha sa pagtuo, ang tanan mohuyang dili lamang kaninyo apan sa Simbahan. Siya nasayud nga walay makalumpag sa gingharian sa Dios ‘gawas [lang sa] kalapasan sa [iyang] mga katawhan’ [Mosiah 27: 13]. Ayaw pagkasayop kabahin niini—ang tumong sa iyang gubat karon anaa na kaninyo” (“Pagdaug sa Gubat batok sa Dautan,” Ensign o Liahona, Nob. 2008, 50–51).
Sa unsang paagi si Satanas ug ang iyang mga sumusunod mosulay sa pagpahuyang kanato?
Hunahunaa kon sa unsang paagi si Satanas nakiggubat kanimo sa personal nga paagi.
Sa imong scripture study journal, paglista og pipila ka mga paagi nga imong mapalambo ang imong hugot nga pagtuo diha ni Jesukristo ug mapalig-on ang imong pagpamatuod Kaniya.
Buhata ang usa o duha sa mosunod diha sa imong scripture study journal:
Pagsulat kabahin sa usa ka kasinatian sa dihang ang imong pagpamatuod ug hugot nga pagtuo sa Pag-ula sa Manluluwas nakatabang nimo sa pagpakigbatok sa mga impluwensya ni Satanas.
Isulat ang imong pagpamatuod sa Pag-ula ni Jesukristo, ug ipasabut kon sa unsang paagi ang Pag-ula makatabang kanato sa atong pakiggubat batok ni Satanas ug sa iyang mga sumusunod.
Pagpili og usa o sobra pa sa mga ideya nga imong gilista, ug gamita kini sa imong pakig-away batok ni Satanas ug sa iyang mga sumusunod. Mahimo nimong isulat ang imong mga tumong sa laing piraso nga papel ug ibutang ang papel sa dapit nga permi nimo kining makit-an. Samtang mosalig ka sa Pag-ula sa Manluluwas, ang Ginoo motabang kanimo sa imong pakig-away batok ni Satanas.
Si Juan nagsulat mahitungod sa mga gingharian sa kalibutan nga makadawat og gahum gikan ni Satanas
Sa Pinadayag 13 atong mabasa nga si Juan nakakita og panan-awon sa mapintas tan-awon nga mga mananap nga nagrepresentar sa dautan nga yutan-ong mga gingharian nga gikontrolar ni Satanas. Si Juan nakakita usab nga pinaagi niini nga mga gingharian, si Satanas mohimo og mga kahibulongan ug mini nga mga milagro sa paglingla sa mga lumulupyo sa yuta.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Pinadayag 12–13 ug nahuman kini nga leksyon sa (petsa).
Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: