Pinadayag 17–19

Si Apostol Juan nakakita nga ang espiritwal nga Babelonia, o ang dautan nga kalibutan, makiggubat batok sa Kordero sa Dios ug nga ang Kordero modaug batok sa dautan. Ang mga Santos gitawag nga mogawas gikan sa espiritwal nga Babelonia, ug ang limpyo ug matarung pagatawagon ngadto sa panihapon sa kasal sa Kordero. Nakita ni Juan ang pag-abut ni Jesukristo uban sa dakong gahum sa paglaglag niadtong nakig-away batok Kaniya.

Si Elder Lynn G. Robbins sa Seventy mitudlo, “Mas sayon ang paglikay sa tintasyon kay sa pagpakigbatok sa tintasyon” (“Avoid It” [debosyonal sa Brigham Young University, Sept. 17, 2013], 1, speeches.byu.edu).

Ngano kaha nga mas sayon ang paglikay sa tintasyon kay sa pagpakigbatok niini?

Hunahunaa kon unsay mahitabo kon atong ibutang ang atong kaugalingon sa mga sitwasyon diin kinahanglang kanunay kitang makigbatok sa tintasyon.

Samtang imong tun-an ang Pinadayag 17–18, pangita og kamatuoran nga makatabang kanimo nga masayud unsaon sa paglikay sa kadaghanan sa mga tintasyon ug mga sala sa kalibutan.

Diha sa Pinadayag 16 atong nakat-unan nga si Apostol Juan nakakita diha sa panan-awon sa pito ka mga anghel nga mobu-bu sa mga hampak [kasakitan] ngadto sa mga dautan sa katapusang mga adlaw. Basaha ang Pinadayag 17:1, nga mangita kon unsay gisulti sa usa sa pito ka mga anghel nga iyang ipakita ni Juan.

Sumala sa Pinadayag 17:15, ang “daghang katubigan” nga gilingkuran sa babaye (tan-awa sa bersikulo 1) nagrepresentar sa katawhan ug kanasuran diin siya adunay gahum ug impluwensya (tan-awa usab sa 1 Nephi 14:11).

Basaha ang Pinadayag 17:2–6, nga mangita sa mga pulong nga naghulagway sa babaye ug sa iyang impluwensya sa kalibutan. Ang pulong nga nakighilawas sa bersikulo 2 nagpasabut sa imoral ug dautan nga mga buhat.

Sa bersikulo 2, giunsa paghulagway ang impluwensya sa babaye diha sa mga magmamando ug mga katawhan sa yuta?

Unsa kaha ang girepresentahan sa Pinadayag 17:6 sa babaye nga nahubog sa dugo sa mga Santos ug mga martir? Timan-i nga ang pulong nga nahibulong dinhi niini nga bersikulo nagpasabut sa katingala.

Ang mananap nga gihulagway diha sa Pinadayag 17:3 mahimong nagrepresentar sa Roma sa panahon ni Juan ingon man usab sa dautan nga mga gingharian ug kanasuran sa katapusang mga adlaw (tan-awa sa Pinadayag 17:8–13).

Basaha ang Pinadayag 17:18, nga mangita kon unsay girepresentahan sa babaye.

Ang “bantugang siyudad” sa bersikulo 18 nagpasabut sa espiritwal nga Babelonia (tan-awa sa Pinadayag 14:8; D&P 133:14). Tungod sa pagkakalibutanon ug korupsyon sa karaang Babelonia, ug tungod kay kini usa ka lugar diin ang mga anak sa Israel nabihag, ang Babelonia kasagaran nga gigamit sa pasumbingay nga paagi diha sa mga kasulatan sa pagrepresentar sa sala, pagkakalibutanon, sa impluwensya sa yawa dinhi sa yuta, ug sa espiritwal nga pagkabihag (tan-awa usab sa 1 Nephi 13:1–9; 14:9–10).

Basaha ang Pinadayag 17:14, nga mangita kon kinsa ang pakigbatukan sa mga sumusunod sa Babelonia.

Unsay moresulta niini nga gubat?

Gikan niini nga bersikulo atong makat-unan nga sa katapusang mga adlaw, si Jesukristo mobuntog sa pagkadautan sa kalibutan. Ikonsiderar ang pagmarka o pagtimaan sa mga pulong diha sa Pinadayag 17:14 nga nagtudlo niini nga kamatuoran.

1. Sa imong scripture study journal, isulat kon sa unsang paagi ang pagkasayud niini nga kamatuoran makatabang nimo isip usa ka sumusunod ni Jesukristo.

Sa Pinadayag 18:1–3 atong mabasa nga ang lain nga anghel mipahibalo sa pagkapukan sa dautan nga Babelonia. Basaha ang Pinadayag 18:4, nga mangita kon unsay gisugo sa Manluluwas nga buhaton sa Iyang katawhan.

Unsa ang mga rason nga gihatag sa Ginoo aron ang Iyang katawhan mogawas sa Babelonia?

Usa ka baruganan nga atong makat-unan gikan sa Pinadayag 18:4 mao nga ang pagpahimulag sa atong kaugalingon gikan sa pagkadautan sa kalibutan makatabang kanato sa paglikay sa sala ug sa mga paghukom nga moabut diha sa mga dautan sa katapusang mga adlaw. Ikonsiderar ang pagsulat o pagtimaan niini nga baruganan diha sa imong mga kasulatan tupad sa Pinadayag 18:4.

2. Tubaga ang mosunod nga mga pangutana diha sa imong scripture study journal:

   1. Sa unsang paagi ang gipahiuli nga ebanghelyo ni Jesukristo makatabang kanato sa pagbulag sa atong kaugalingon gikan sa pagkadautan sa kalibutan?

   2. Unsa ang pipila ka mga hagit nga mahimong atubangon sa kabatan-onan samtang naningkamot sila nga mabulag ang ilang kaugalingon gikan sa pagkadautan sa kalibutan apan sa gihapon mopadayon sa pagpuyo, paghigugma, ug pakig-uban niadtong dili susama nila og mga sumbanan?

   3. Sa unsang paagi nga ang pagbulag gikan sa dili matarung nga mga impluwensya ug mga binuhatan nakatabang kanimo ug sa uban nga imong kaila nga malikayan ang pipila sa mga tintasyon ug sala sa kalibutan?

Hunahunaa kon unsang dili matarung nga mga impluwensya o binuhatan ang kinahanglan nimong ibulag sa imong kaugalingon ug unsaon nimo sa pagbuhat niini. Hangyoa ang Langitnong Amahan diha sa pag-ampo aron sa pagtabang kanimo sa imong mga paningkamot sa pagbulag sa imong kaugalingon gikan niadtong dili matarung nga mga impluwensya ug mga binuhatan.

Sa Pinadayag 18:5–24 atong mabasa nga si Juan nakakita sa pagkapukan sa dautan nga Babelonia ug sa kasubo sa iyang mga tigsuporta.

Imahe

bride and groom

Hunahunaa ang labing maayo nga gasa nga imong mahatag sa imong umaabut nga kapikas sa adlaw sa inyong kasal.

Imahe

Elder Jeffrey R. Holland

Basaha ang mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles: “Sa adlaw sa inyong kasal ang labing maayong gasa nga mahimo nimong ihatag sa imong mahangturong kompanyon mao ang labing maayo nimong kaugalingon—limpyo ug putli ug takus nga suklian sa ingon nga kaputli” (“Personal Purity,” Ensign, Nob. 1998, 77).

Ngano kaha nga ang pagkahimong limpyo ug putli maoy labing maayo nga gasa nga imong mahatag sa imong kapikas sa adlaw sa inyong kasal?

Ang Pinadayag 19 naglakip og pasumbingay sa kasal nga gigamit sa paghulagway sa Ikaduhang Pag-anhi sa Manluluwas. Sumala sa Pinadayag 19:1–6 si Apostol Juan nakakita nga ang mga matarung modayeg sa Dios alang sa Iyang mga paghukom batok sa mga dautan.

Basaha ang Pinadayag 19:7, nga mangita kon kang kinsang kasal ang gipahibalo sa anghel kang Juan.

Unsay nahibaloan ni Juan mahitungod sa asawa sa Kordero?

Ang “kasal sa Kordero” (Pinadayag 19:7) nagpasabut sa Ikaduhang Pag-anhi sa Manluluwas.

Imahe

Elder Bruce R. McConkie

Basaha ang mosunod nga pamahayag ni Elder Bruce R. McConkie sa Korum sa Napulog Duha ka mga Apostoles, nga mangita kon si kinsa ang pangasaw-unon sa Kordero: “Niini nga dispensasyon ang Pamanhunon, kinsa mao ang Kordero sa Dios, moanhi aron sa pag-angkon sa iyang pangasaw-unon, nga mao ang Simbahan nga gilangkuban sa matinud-anong mga santos kinsa nagbantay alang sa iyang pagbalik” (Mormon Doctrine, 2nd ed. [1966], 469).

Ikonsiderar ang pipila ka mga paagi nga ang relasyon sa kaminyoon usa ka haum nga simbolo alang sa atong relasyon sa pakigsaad uban ni Jesukristo. Sa imong pagpamalandong, hunahunaa kon sa unsang paagi nga kaminyoon usa ka relasyon nga nagkinahanglan og pagkamatinud-anon, sakripisyo, gugma, pasalig, ug pagsalig.

Basaha ang Pinadayag 19:8–9, nga mangita kon unsay mahimo sa mga Santos aron maandam ang ilang mga kaugalingon alang sa Ikaduhang Pag-anhi sa Manluluwas.

Ang puti nga lino nga gihisgutan diha sa bersikulo 8 mahimong magsimbolo sa pagkabalaan, pagkalimpyo, ug pagkamatarung. Sumala sa gisimbolohan sa sinina sa asawa sa Kordero, unsay kinahanglan natong buhaton aron maandam ang atong kaugalingon alang sa pag-anhi ni Ginoong Jesukristo?

Usa ka kamatuoran nga atong makat-unan gikan niini nga mga bersikulo mao nga kon kita limpyo ug matarung, niana kita andam sa pag-anhi ni Ginoong Jesukristo. Ikonsiderar ang pagmarka o pagtimaan sa mga pulong diha sa Pinadayag 19:8 nga nagtudlo niini nga kamatuoran.

Ang pulong nga gitugot diha sa Pinadayag 19:8 nagpasabut nga gihatag o gitugyan. Ang malimpyohan sa sala ug mahimong matarung usa ka gasa gikan sa Dios.

Hunahunaa ang mosunod nga mga pangutana: Unsay nabuhat sa Dios sa paghatag og paagi aron malimpyohan kita sa sala ug mahimong matarung? Ngano kaha nga ang pagkahimong limpyo ug matarung maoy usa sa pinakamaayong mga gasa nga atong mahatag sa Manluluwas sa Iyang pag-anhi og usab?

Desisyuni ang unsay kinahanglan nimong buhaton aron mahimong limpyo ug matarung aron mahimo kang andam sa pag-anhi ni Ginoong Jesukristo. Buhata ang bisan unsang pag-aghat nga imong madawat.

Basaha ang Pinadayag 19:10, nga mangita kon unsay reaksyon ni Juan human makadungog sa gisangyaw sa anghel kaniya. Kini nga anghel gihatagan og awtoridad gikan sa Dios aron mamulong ug morepresentar ni Jesukristo.

Unsay gideklarar sa anghel ngadto ni Juan nga gihuptan niya (sa anghel) ug sa ubang mga sulugoon sa Dios?

Ang “espiritu sa propesiya” (Pinadayag 19:10) nagpasabut sa gasa sa pagpadayag ug inspirasyon gikan sa Dios, nga nagtugot sa usa ka tawo nga makadawat ug mamulong sa Iyang pulong (tan-awa sa Giya ngadto sa mga Kasulatan, “Pagpanagna, Panagna,” scriptures.lds.org).

Sa unsang mga paagi kaha nga ang pagpamatuod susama sa pagpanagna?

Sa unsang paagi nga ang pagbaton og pagpamatuod kabahin ni Jesus makaimpluwensya sa imong pagpangandam alang sa Ikaduhang Pag-anhi?

Basaha ang Pinadayag 19:11–16, nga mangita sa mga pulong nga naghulagway sa Manluluwas sa Iyang Ikaduhang Pag-anhi. Basaha usab ang Hubad ni Joseph Smith, Pinadayag 19:15 (sa Giya ngadto sa mga Kasulatan, scriptures.lds.org).

Ang puti nga kabayo nga gihisgutan sa Pinadayag 19:11 nagsimbolo sa pagbuntog ug kadaugan. Ang Manluluwas moanhi aron sa pagbuntog sa sala ug pagkadautan.

Timan-i kon giunsa paghulagway ang sinina sa Manluluwas diha sa Pinadayag 19:13. Ang mga pulong nga “bisti nga gikatuslob sa dugo” nagpasabut nga kolor dugo ang Iyang sinina. Kini nga kolor nagsimbolo sa kalaglagan sa mga dautan sa Iyang pag-anhi (tan-awa sa Doktrina ug mga Pakigsaad 133: 46–51), ug kini makapahinumdom usab nato sa pag-antus nga Iyang nasinati atol sa Iyang Pag-ula.

Si Elder Neal A. Maxwell sa Korum sa Napulog Duha ka mga Apostoles mitudlo:

Imahe

Elder Neal A. Maxwell

“Kay miagas ang dugo sa matag lungag sa panit, unsa kaha ka pula ang Iyang saput sa Getsemani, unsa ka pula niana nga kupo!

“Dili ikatingala, inig anhi ni Kristo diha sa gahum ug himaya, nga Siya moanhi sul-ob ang makapahinumdom nga pulang sinina (tan-awa sa D&P 133: 48), nagpasabut dili lamang sa pigsanan sa kasuko, apan usab sa pagpahinumdom kanato kon sa unsang paagi Siya nag-antus alang kanato didto sa Getsemani ug didto sa Kalbaryo!” (“Overcome … Even As I Also Overcame,” Ensign, Mayo 1987, 72).

Sumala sa Hubad ni Joseph Smith, Pinadayag 19:15, nakita ni Juan nga sa pag-anhi sa Manluluwas isip Hari sa mga Hari ug Ginoo sa mga Ginoo (tan-awa sa Pinadayag 19:16), Siya magmando sa mga kanasuran pinaagi sa pulong sa Dios. Sa Pinadayag 19:17–21, nakita ni Juan ang pagkalaglag niadtong nakig-away batok sa Kordero sa Dios. Timan-i nga ang Joseph Smith Translation sa Pinadayag 19:18 nagklaro nga ang “tanang tawo, sa gawas ug sa mga ulipon, sa timawa ug sa mga dagko” nagpasabut sa “tanan nga makig-away batok sa Kordero.”

3. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Pinadayag 17–19 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: