Gibadlong ni Jesukristo ang mga Pariseo ug mga Saduceo kinsa nangayo Kaniya og timailhan sa Iyang pagkabalaan. Mipamatuod si Pedro nga si Jesus mao si Kristo, ug Siya gisaaran sa mga yawe sa gingharian sa langit. Si Jesukristo, Moises, ug Elijah mitugyan sa mga yawe sa priesthood diha ni Pedro, Santiago, ug Juan didto sa Bukid sa Transpigurasyon. Human milugsong gikan sa bukid, gipapahawa ni Jesus ang yawa gikan sa batang lalaki. Sa Capernaum, mihatag si Jesus og salapi sa milagrosong paagi aron sa pagbayad og buhis.
Gibadlong ni Jesus ang mga Pariseo ug mga Saduceo, ug gisaad Niya ang mga yawe sa priesthood ngadto ni Pedro
Unsa ang imong isulti ngadto sa tawo aron pagtabang kaniya sa pagsabut nganong ikaw nagtuo nga Ang Simbahan ni Jesukristo sa mga Santos sa Ulahing mga Adlaw mao lamang ang tinuod nga simbahan dinhi sa yuta?
Samtang imong tun-an ang Mateo16, pangitaa ang mga kamatuoran nga makatabang kanimo sa pagsabut ug sa pagpasabut ngadto sa uban kon unsa ang nakalahi sa Ang Simbahan ni Jesukristo sa mga Santos sa Ulahing mga Adlaw isip ang Simbahan sa Ginoo dinhi sa yuta (tan-awa sa D&P 1:30).
Diha sa Mateo 16:1–12 atong mabasa nga gibadlong sa Manluluwas ang mga Pariseo ug ang mga Saduceo sa dihang nangayo sila og timailhan sa Iyang pagkabalaan. Dayon iyang gipasidan-an ang Iyang mga disipulo sa dili pagsunod niining dautang mga tawo.
Dayon ang Manluluwas miadto kuyog sa Iyang mga disipulo “ngadto sa kayutaan sa Cesarea Filipo” (Mateo 16:13; niini nga bersikulo ang pulong kayutaan nagpasabut sa rehiyon o dapit). Diha sa nag-uban nga hulagway sa Cesarea Filipo, unsa ang imong makita luyo sa suba ug sa mga kahoy?
Imahe
suba nga may paril nga bato sa likod
Tinubdang suba sa Suba Jordan duol sa Cesarea Filipo
Basaha ang Mateo 16:13–19, nga mangita kon giunsa sa Manluluwas paggamit ang simbolo sa usa ka dakong bato sa paghulagway sa katukuran sa Iyang Simbahan. (Ang Mateo 16:15–19 usa ka scripture mastery passage. Mahimo nimong markahan kini nga tudling sa lahi nga paagi aron dali nimo nga madumduman kini.)
Tan-awa sa mga bersikulo 16–17 nga kini pinaagi sa pagpadayag gikan sa Langitnong Amahan nga si Pedro nahibalo nga si Jesukristo mao ang Anak sa Dios. Si Jesus dayon naghisgut sa pagpadayag samtang Iyang gihulagway ang katukuran sa Iyang Simbahan.
Imahe
Propeta Joseph Smith
Si Propeta Joseph Smith mipasabut: “Si Jesus sa Iyang mga pagtulun-an nag-ingon, ‘Sa ibabaw niining bato pagatukuron ko ang akong iglesia, ug ang mga gahum sa kamatayon dili gayud makabuntog niini.’ [Mateo 16:18.) Unsa nga bato? Pagpadayag” (Mga Pagtulun-an sa mga Presidente sa Simbahan: Joseph Smith [2007], 233).
Siya usab mipamatuod: “Ang Simbahan ni Jesukristo sa mga Santos sa Ulahing mga Adlaw natukod diha sa direkta nga pagpadayag, isip tinuod nga Simbahan sa Dios sukad pa kaniadto, sumala sa mga Kasulatan (Amos 3:7, ug Mga Buhat 1:2)” (Mga Pagtulun-an: Joseph Smith,233).
Hunahunaa ang mosunod nga mga impormasyon: “Samtang gitudloan si Pedro sa Manluluwas mahitungod sa pagpadayag, migamit Siya og madulaong mga pulong sa pangalan ni Pedro, nagpahayag ngadto ni Simon, ‘Ikaw mao si Pedro [Petros], ug ibabaw niining bato [petra] pagatukuron ko ang akong iglesia’ (Mateo 16:18). Ang Gresyanhon nga pulong petros nagpasabut og nag-inusarang gamay nga bato. Ang Gresyanhon nga pulong petra mahimo usab nga nagpasabut og ‘bato,’ apan agi og dugang kini mahimong magpasabut ngadto sa batoon nga yuta, tukurang bato, o usa ka dako kaayo nga bato [tan-awa sa Mateo 16:18]. Gikan niini nga mga pulong atong nakat-unan nga dili diha ni Pedro isip usa ka tawo nga ang Simbahan pagatukuron, apan diha sa tukurang bato sa pagpadayag” (New Testament Student Manual [Manwal sa Church Educational System, 2014], 53).
Mahimo nga imong isulat ang mosunod nga kamatuoran diha sa imong mga kasulatan duol sa Mateo 16:18: Ang Simbahan ni Jesukristo gitukod diha sa pagpadayag gikan sa Dios.
Tubaga ang mosunod nga mga pangutana diha sa imong scripture study journal:
Nganong importante kini nganha kanimo nga mahibalo nga Ang Simbahan ni Jesukristo sa mga Santos sa Ulahing mga Adlaw gitukod diha sa pagpadayag gikan sa Dios?
Sa unsa nga paagi kini nakaapekto sa paagi nga ikaw mosunod sa tambag gikan sa mga propeta karong panahona samtang sila nagdawat og mga pagpadayag alang sa atong panahon?
Ribyuha ang Mateo 16:19, nga mangita sa unsay gisaad sa Manluluwas ngadto ni Pedro.
Gikan sa mga pulong sa Manluluwas “Hatagan ko ikaw sa mga yawe sa gingharian sa langit,” atong nakat-unan nga gisalig ni Jesukristo ang mga yawe sa Iyang gingharian ngadto sa Iyang pinili nga mga propeta ug mga apostoles. Ang mga yawe sa Iyang gingharian mao ang mga yawe sa priesthood, ug ang gingharian sa Manluluwas nagpasabut ngadto sa Simbahan ni Jesukristo.
Imahe
Elder Dallin H. Oaks
Si Elder Dallin H. Oaks sa Korum sa Napulog Duha ka mga Apostoles mipasabut kon unsa ang mga yawe sa priesthood ug ngano nga kini mga importante: “‘Ang mga yawe sa priesthood mao ang awtoridad nga gihatag sa Dios ngadto [sa mga naghupot] sa priesthood aron sa pagmando, pagkontrolar, ug pagdumala sa paggamit sa Iyang priesthood dinhi sa yuta.’ [Handbook 2: Administering the Church, 2010, 2.1.1]. Matag buhat o ordinansa nga gipahigayon sa Simbahan gihimo ubos sa direkta o indirekta nga pagtugot sa tawo nga naghupot sa mga yawe niana nga kalihokan” (“Ang mga Yawe ug Awtoridad sa Priesthood,” Ensign o Liahona, Mayo 2014, 49).
Ang mga yawe nga gisaad sa Manluluwas ngadto ni Pedro naglakip sa gahum sa sealing—ang gahum sa pagbugkos o pagbadbad dinhi sa yuta ug sa langit. Kini nga gahum nagtugot sa mga ordinansa nga gipahigayon ubos sa awtoridad sa mga lider sa Simbahan dinhi sa yuta nga mahimong balido sa langit. Kini gigamit usab sa paghiusa og bugkos sa mga pamilya alang sa kahangturan. Ang Mateo 16:19 nagtabang kanato sa pagsabut ngano si Jesukristo naghatag og mga yawe sa priesthood ngadto sa Iyang mga propeta ug mga apostoles. Ang mga yawe sa priesthood gikinahanglan sa pagpangalagad sa Simbahan sa Ginoo dinhi sa yuta. Ang Simbahan ni Jesukristo sa mga Santos sa Ulahing mga Adlaw mao lamang ang simbahan dinhi sa yuta nga nakadawat ug sa karon naghupot sa awtoridad ug mga yawe sa priesthood gikan sa Ginoo.
Diha sa Mateo 16:21–28 atong nahibaloan nga si Jesus misulti sa Iyang maulaong sakripisyo ug mitudlo sa Iyang mga disipulo nga sila kinahanglan gayud andam sa pagsakripisyo aron sa pagsunod Kaniya. Ang Hubad ni Joseph Smith naghatag og mas tin-aw nga pagpasabut sa unsay kahulugan sa pagpas-an sa kaugalingong krus:
“Ug karon alang sa usa ka tawo nga mopas-an sa iyang krus, mao ang pagdumili sa iyang kaugalingon sa tanan nga dili diosnon, ug sa matag kalibutanong kahigal, ug maghupot sa akong mga sugo.
“Ayaw pagsupak sa akong mga sugo alang sa pagluwas sa inyong kinabuhi; kay bisan kinsa ang magaluwas sa iyang kinabuhi niini nga kalibutan, mawagtangan niini sa kalibutan nga moabut” (Hubad ni Joseph Smith, Matthew 16:26–27 [sa Bible appendix sa LDS English version sa Biblia]).
Pangita og miyembro sa pamilya o higala nga motabang nimo sa pagrole-play sa mosunod nga mga sitwasyon:
Hunahunaa nga nakigsulti ka ngadto sa usa ka higala kinsa dili miyembro sa Simbahan. Ang imong higala nangutana sa mga pangutana sa ubos. Gamita ang mga kamatuoran nga imong nakat-unan gikan sa Mateo 16:15–19 aron sa pagtubag sa mga pangutana sa imong higala.
Akong nadunggan nga ang inyong simbahan nag-angkon nga mao lamang ang tinuod nga simbahan ni Jesukristo. Mao ba kana ang imong gituohan?
Ang akong simbahan nagtuo usab ni Jesukristo, busa nganong naghunahuna mo nga ang inyong simbahan mao lamang ang usa nga tinuod ?
Human makompleto nimo ang role-play, hangyoa ang imong miyembro sa pamilya o higala sa pagsulat diha sa imong scripture study journal nga imong makompleto kini nga assignment. Kon walay makuha nga miyembro sa pamilya o higala mahimong imo lamang tubagon ang mga pangutana sa ibabaw diha sa imong scripture study journal.
Si Jesukristo, Moises, ug Elijah mitugyan sa mga yawe sa priesthood ngadto ni Pedro, Santiago, ug Juan
Paghunahuna kon sa unsa nga paagi ang awtoridad sa priesthood ikakumparar ngadto sa usa ka lisensya sa pagdrive ug ang mga yawe sa priesthood ikakumparar ngadto sa mga yawe nga gikinahanglan sa pagpadagan sa sakyanan.
Imahe
lisensya sa pagdrive, yawe sa kotse
Pamalandungi ang mosunod nga mga pangutana: Unsay gitugot sa pagkaadunay lisensya sa pagdrive nga buhaton sa usa ka tawo? Nganong importante nga makagamit sa mga yawe sa kotse dugang sa pagkaadunay lisensya sa pagdrive? Sa unsa nga paagi nga ang pagkaadunay lisensya sa pagdrive ug mga yawe sa pagdrive og kotse makumparar ngadto sa awtoridad ug mga yawe sa priesthood nga gikinahanglan sa pagdumala sa buhat sa Dios?
Sa dihang ang Ginoo misaad sa paghatag ni Pedro “sa mga yawe sa gingharian sa langit” (Mateo 16:19), o sa awtoridad sa pagdumala sa buhat sa Dios dinhi sa yuta, si Pedro ug ang uban nga mga Apostoles nahatagan na sa awtoridad sa priesthood, apan wala pa sila mahatagi sa mga yawe sa priesthood sa pagdumala sa gingharian—ang Simbahan ni Jesukristo. Samtang imong tun-an ang Mateo 17, pangitaa giunsa ni Pedro, Santiago, ug Juan pagdawat sa mga yawe sa gingharian.
Basaha ang Mateo 17:1–2, nga mangita kon diin dad-a ni Jesus si Pedro, Santiago, ug Juan aron pagdawat sa mga yawe sa priesthood.
Unsa ang nahitabo sa Manluluwas didto sa bukid?
Ang Transpigurasyon nagpasabut ngadto “sa kahimtang sa mga tawo kinsa temporaryong nausab ang panagway ug kinaiyahan—nga mao, nasaka sa mas taas nga ang-ang sa pagka-espirituhanon—aron sila makalahutay sa presensya ug himaya sa langitnong mga binuhat” (Ang Giya ngadto sa mga Kasulatan, “Transpigurasyon,” ; ). Nabalhin usab ang panagway ni Pedro, Santiago ug Juan niining higayona (tan-awa sa D&P 67:11–12).
Samtang imong basahon ang Mateo 17:3, idugang sa mosunod nga tsart ang pangalan sa duha ka lain nga mga indibidwal kinsa dinha sa Bukid sa Transpigurasyon. Timan-i nga si Elias dinhi nagpasabut ni Elijah, ang propeta sa Daang Tugon (tan-awa sa Mateo 17:3, footnote b). “Adunay daghan nga kagamitan niini nga pulong [Elias] diha sa mga kasulatan. (1) Kini mao ang Bag-ong Tugon (Gresyanhon) sa pulong nga Elijah (Hebreohanon) , ingon sa Lucas 4:25–26, Santiago 5:17, ug Mat. 17:1–4. Si Elias niining mga higayuna mao lamang ang karaang propeta Elijah kansang pangalagad girekord diha sa 1 ug 2 nga Mga Hari” ( ; tan-awa sa Giya ngadto sa mga Kasulatan, “Elias”scriptures.lds.org)
Mga indibidwal kinsa dinha sa Bukid sa Transpigurasyon
Basaha ang mosunod nga pahayag ni Propeta Joseph Smith, ug markahi ang rason nganong si Moises ug si Elijah didto sa bukid: “Ang Manluluwas, si Moises, ug Elias [Elijah], mihatag sa mga yawe [sa priesthood] ngadto kang Pedro, Santiago ug Juan, didto sa bungtod, sa dihang nahimaya ang ilang panagway diha sa iyang atubangan” (Mga Pagtulun-an: Joseph Smith [2007], 123).
Gihuptan ni Moises ang mga yawe sa pagpundok sa Israel (tan-awa sa D&P 110:11, ug gihuptan ni Elijah ang gahum sa pagbugkos (tan-awa sa D&P 110:13–16).
Ang Hubad ni Joseph Smith sa Biblia nagpahayag nga si Juan Bautista—kinsa gipapatay ni Herodes—mipakita usab didto sa bukid (tan-awa sa Hubad ni Joseph Smith, Marcos 9:3 [sa Marcos 9:4, Giya ngadto sa mga Kasulatan]). Ang Bible Dictionary sa LDS English version sa Biblia nagpahayag nga ang “pagkasulti sa HJS, Marcos 9:3 wala magpasabut nga ang Elias diha sa Transpigurasyon mao si Juan Bautista, apan nga dugang ni Elias nga propeta, dinha si Juan Bautista” (Bible Dictionary sa LDS English version sa Biblia, “Elias”). Idugang si Juan Bautista ngadto sa tsart sa ibabaw.
Basaha ang Mateo 17:4–9, nga mangita kon kinsa pa ang didto sa Bukid sa Transpigurasyon.
Idugang ang Dios nga Amahan ngadto sa tsart.
Imahe
Elder Bruce R. McConkie
Ang kasinatian ni Pedro, Santiago, ug Juan didto sa Bukid sa Transpigurasyon usa ka importanting hitabo sa pagtukod sa Simbahan ni Jesukristo dinhi sa yuta. Si Elder Bruce R. McConkie sa Korum sa Napulog Duha ka mga Apostoles mipahayag, “Hangtud ang mga tawo makaangkon og mas taas nga kahimtang sa espirituhanong pagsabut kay sa ila karong gipahimuslan, makakat-on lamang sila og tipik sa unsay nahitabo didto sa Bukid sa Transpigurasyon” ug ang atong nahibaloan “gikan sa Bag-ong Tugon nga mga istorya ug gikan sa gidugang nga kahayag pinaagi ni Joseph Smith” (Doctrinal New Testament Commentary, 3 vols. [1965–73], 1:399).
Imong mahinumduman nga ang usa ka dispensasyon sa ebanghelyo maoy usa ka yugto sa panahon diin ang Langitnong Amahan naghatag og awtoridad sa priesthood, mga ordinansa, ug kahibalo sa Iyang plano sa kaluwasan sa katawhan dinhi sa yuta pinaagi sa Iyang gihatagan og pagtugot nga mga sulugoon (Ang Giya ngadto sa mga Kasulatan, “Dispensasyon,” scriptures.lds.org). Ang kada tawo nga giila diha sa tsart kinsa didto sa Bukid sa Transpigurasyon mipakita usab kang Propeta Joseph Smith sa atong dispensasyon.
Pagdrowing og linya gikan sa mga ngalan sa mga indibidwal nga gilista diha sa tsart ngadto sa tugma nga hulagway nga nagpakita og panahon sa dihang sila mipakita ngadto kang Propeta Joseph Smith. Sa imong paghuman, i-tsek ang imong mga tubag pinaagi sa paggamit sa mosunod nga impormasyon:
Ang Langitnong Amahan ug si Jesukristo mipakita ngadto ni Joseph Smith diha sa Unang Panan-awon (tan-awa sa Joseph Smith—Kasaysayan 1:16–17).
Gitugyan ni Juan Bautista ang mga yawe sa Aaronic Priesthood diha ni Joseph Smith ug Oliver Cowdery (tan-awa sa D&P 13).
Gitugyan ni Pedro, Santiago, ug Juan ang mga yawe sa Melchizedek Priesthood diha ni Joseph Smith ug Oliver Cowdery (tan-awa sa D&P 27:12).
Gitugyan ni Elijah ang mga yawe sa gahum sa pagbugkos diha ni Joseph Smith ug Oliver Cowdery didto sa Templo sa Kirtland. Gitugyan ni Moises ang mga yawe alang sa pagpundok sa Israel diha kanila sa samang adlaw (tan-awa sa D&P 110).
Gikan sa mga panghitabo nga nahitabo didto sa Bukid sa Transpigurasyon ug sa mga kasinatian ni Joseph Smith sa sinugdanan sa Pagpahiuli, atong nakat-unan nga sa kada dispensasyon, ang Dios nagtugyan sa mga yawe sa priesthood diha sa Iyang pinili nga mga sulugoon aron sila makadumala sa Iyang buhat dinhi sa yuta.
Ang mga propeta ug mga apostoles karon naghupot sa samang mga yawe sa priesthood nga nadawat ni Propeta Joseph Smith. Kini nga mga yawe gihatag gikan ni Joseph Smith ngadto ni Brigham Young ug sa sumusunod nga mga propeta.
Tubaga ang mosunod nga mga pangutana diha sa imong scripture study journal:
Nganong gibati nimo nga importanting mahibaloan nga ang samang sumbanan sa pagtugyan sa mga yawe sa priesthood nga nahitabo sa panahon ni Jesukristo gibalik sa atong panahon diha ni Joseph Smith?
Unsaon nimo sa pagpasabut ngadto sa usa ka higala nga ang langitnong mga mensahero (mga anghel) nga naghatag og mga yawe sa priesthood ngadto ni Propeta Joseph Smith nagsunod og sumbanan nga gihimo sa Dios?
Sa imong scripture study journal, pagsulat og tumong kalabut sa unsay imong buhaton nga mas makasunod og maayo ug makapaluyo niadtong kinsa naghupot sa mga yawe sa gingharian sa langit sa atong panahon.
Sa katapusan sa sagradong kasinatian didto sa Bukid sa Transpigurasyon ang Manluluwas mimando kanila, “Ayaw ninyo isugilon ang panan-awon kang bisan kinsa, hangtud nga ang Anak sa tawo mabanhaw na gikan sa patay” (Mateo 17:9).
Imahe
Presidente Boyd K. Packer
Hunahunaa kong sa unsa nga paagi kini nga panudlo susama sa mosunod nga tambag ni Presidente Boyd K. Packer sa Korum sa Napulog Duha ka mga Apostoles: “Nagtuo usab ako nga dili maalamon ang pagpadayon og pagpanabi sa dili kasagaran nga mga espirituhanong kasinatian. Kinahanglan nga ampingan kini ug ipakigbahin lamang kon ang Espiritu mismo ang modasig kaninyo sa paggamit niini sa pagpanalangin sa uban” (“The Candle of the Lord,” Ensign, Ene. 1983, 53).
Nganong kinahanglan kitang mag-amping mahitungod sa pagpakigbahin og sagradong mga kasinatian ug buhaton lamang ang mao kon giaghat sa Espiritu?
Diha sa Mateo 17:10–27 atong nakat-unan nga si Jesukristo nagpapahawa og yawa gikan sa batang lalaki ug sa milagrosong paagi mihatag og salapi para sa buhis alang Kaniya Mismo ug ni Pedro.
Isulat ang mosunod diha ubos sa mga assignment karong adlawa sa imong scripture study journal:
Akong natun-an ang Mat.16–17 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: