Pasiuna sa Filemon

Ang Epistola ngadto ni Filemon naglangkob og personal nga tambag gikan ni Apostol Pablo kalabut sa usa ka sitwasyon sa ulipon ni Filemon nga si Onesimo. Samtang magtuon ka niini nga sulat, imong makat-unan nga kon ang mga tawo mopasakop sa Simbahan ni Jesukristo, mahimo sila nga mga igsoon diha sa ebanghelyo (tan-awa sa Filemon 1:16). Mabati usab nimo ang kaimportante sa katungdanan sa mga disipulo ni Jesukristo sa pagpadangat og kalooy ug kapasayloan ngadto sa uban (tan-awa sa Filemon 1:16–17).

Si Pablo mao ang misulat sa Filemon (tan-awa sa Filemon 1:1).

Ang Sulat ngadto ni Filemon giandam ni Pablo atol sa unang pagkabilanggo sa Apostol didto sa Roma, mga A.D. 60–62 (tan-awa sa Filemon 1:1, 9; Giya ngadto sa mga Kasulatan, “Mga Epistola ni Pablo,” scriptures.lds.org).

“Kini nga epistola usa ka pribado nga sulat mahitungod ni Onesimo, usa ka ulipon nga nangawat sa iyang agalon, nga si Filemon, ug milayas ngadto sa Roma” (Ang Giya ngadto sa mga Kasulatan, “Mga Epistola ni Pablo”). Si Filemon tingali usa ka kinabig nga Gresyanhon ug lumulupyo sa Colosas (tan-awa sa Mga Taga-Colosas 4:9). Gitugutan niya ang usa ka kongregasyon sa Simbahan nga magpundok diha sa iyang panimalay (tan-awa sa Filemon 1:2, 5). Human sa paglayas, si Onesimo mipasakop sa Simbahan ug nahimong “minahal nga igsoon … diha sa Ginoo” (Filemon 1:16; tan-awa sa Filemon 1:10–12).

Misulat si Pablo kang Filemon aron pag-awhag kaniya nga dawaton og balik si Onesimo isip usa ka igsoon diha sa ebanghelyo nga wala ang grabe nga mga silot nga kasagarang ipahamtang sa milayas nga mga ulipon (tan-awa sa Filemon 1:17). Mitanyag pa gani si Pablo nga bayaran ang bisan unsang nawala sa panalapi nga gi-antus ni Filemon tungod ni Onesimo (tan-awa sa Filemon 1:18–19).

Ang Filemon mao ang kinamub-an ug siguro ang pinakapersonal sa mga sulat ni Pablo. Usa kini ka sulat nga gitumong ngadto sa usa ka pribado nga indibidwal; tungod niini, wala kini maglakip og daghang doktrinal nga sulod. Hinoon, ang pangamuyo ni Pablo nga makig-uli og buot si Filemon sa ulipon nga si Onesimo naghulagway kon sa unsang paagi nga ang mga doktrina sa ebanghelyo magamit sa inadlaw nga kinabuhi—niining sitwasyuna, nagpakita nga ang atong relasyon ngadto kang Jesukristo moresulta sa suod nga relasyon ngadto sa ubang mga sumusunod ni Kristo ug naghatag og gibug-aton sa kaimportante sa kalooy ug pagpasaylo.

Filemon 1. Gidayeg ni Pablo si Filemon tungod sa gugma nga iyang gipakita ngadto sa mga Santos. Gipasabut niya nga ang milayas nga ulipon ni Filemon, nga si Onesimo, nakabig sa ebanghelyo. Gihangyo ni Pablo si Filemon nga dawaton og balik si Onesimo isip usa ka igsoon diha sa Ginoo. Mitanyag siya nga bayaran si Filemon sa bisan unsang nawala sa panalapi nga gi-antus niya tungod ni Onesimo.