Pasiuna sa 3 Juan

Niining mubo nga sulat, si Apostol Juan midayeg kang Gayo, usa ka miyembro sa Simbahan nga nagmaunungon atol sa panahon sa pagsukol batok sa mga lider sa Simbahan. Ang mga pagtulun-an ni Juan makatabang kanimo nga mas makasabut sa apostasiya nga nahitabo sa Simbahan sa Bag-ong Tugon ug makaawhag kanimo sa pagpabilin nga matinud-anon sa mga lider sa Simbahan bisan pa sa oposisyon.

Ang tagsulat mipaila sa iyang kaugalingon isip “ang anciano” (3 Juan 1:1) ug kasagaran gipasabut nga mao si Apostol Juan.

Wala gayud masayri kon kanus-a ug diin gisulat ang 3 Juan. Kon husto ang tradisyon nga dugay nga nagpuyo si Juan sa Efeso, tingali gihimo niya kini nga sulat gikan didto tali sa mga tuig A.D. 70 ug 100.

Ang Ikatulo nga Sulat ni Juan gisulat ngadto ni Gayo, usa ka matinud-anong miyembro sa Simbahan kinsa gidayeg ni Juan tungod sa pagpakita og mabinationg debosyon ngadto sa kawsa ni Kristo pinaagi sa paghatag og kapuy-an alang sa nagbiyahe nga mga sulugoon sa Dios (tan-awa sa 3 Juan 1:5–8).

Si Juan mipasidaan usab ni Gayo kabahin sa usa ka tawo nga ginganlan og Diotrefes, kinsa tingali naghupot og usa ka lokal nga posisyon sa pagpangulo diha sa Simbahan. Si Diotrefes dayag nga misupak ni Apostol Juan ug sa ubang mga opisyales sa Simbahan ug gani mipugong sa lokal nga mga miyembro sa Simbahan kinsa gustong moabi-abi kanila sa pagtambong sa mga miting sa Simbahan (tan-awa sa 3 Juan 1:9–10). Si Juan miawhag ni Gayo sa pagpadayon diha sa pagkamatarung ug miingon nga siya naglaum nga mobisita kang Gayo (tan-awa sa 3 Juan 1:11–14).

Sa 3 Juan atong makita ang mga kabalaka ni Juan kabahin sa mga impluwensya sa miapostasiya diha sa simbahan. Makita usab nato ang iyang gugma alang sa uban ug sa kalipay nga iyang gibati alang niadtong nagpili og usa ka kinabuhi sa pagkamasulundon (tan-awa sa 3 Juan 1:4).

3 Juan. Si Juan nagdayeg ni Gayo tungod sa iyang pagkamatinud-anon ug nagpasidaan batok sa usa ka lider nga nakigbatok ni Juan ug sa ubang mga lider sa Simbahan.