Pasiuna sa Judas

Ang Sulat ni Apostol Judas naghulagway sa mga pwersa sa apostasiya nga naglihok sa una nga Simbahan. Samtang imong tun-an kini nga sulat, makakat-on ka sa pag-ila niadtong nagtinguha sa pagpabiya sa mga disipulo ni Jesukristo gikan sa tinuohan. Mahimo usab nimong bation ang kaimportante sa tinuoray nga pagpanalipod sa tinuohan ug sa pagpabiling matinud-anon niini.

Ang tigsulat niini nga sulat mipaila sa iyang kaugalingon isip “si Judas, ulipon ni Jesukristo ug igsoon ni Santiago” (Judas 1:1). Sagad nga nasabtan nga ang tigsulat mao si Judas kinsa igsoon ni Jesukristo sa inahan (tan-awa sa Mateo 13:55; Marcos 6:3; Giya ngadto sa mga Kasulatan, “Judas,” scriptures.lds.org).

Si Judas tataw nga usa ka miyembro sa Simbahan nga gitamud diha sa Jerusalem, ug tingali siya nakabiyahe isip usa ka misyonaryo (tan-awa sa Mga Buhat 1:13–14; 1 Mga Taga-Corinto 9:5). Walay indikasyon kon unsa nga katungdanan sa priesthood ang gihuptan ni Judas, apan ang sulat mismo nagsugyot nga siya naghupot og katungdanan nga may awtoridad nga naghimo niyang sarang aron mohimo og mga sulat nga panambag.

Wala kita masayud kon diin gisulat ang Sulat ni Judas. Kon kini nga sulat tinuod gayud nga gisulat ni Judas nga igsoon ni Jesus, kini tingali nasulat tali sa mga tuig A.D. 40 ug 80.

Ang sulat ni Judas gitumong ngadto sa matinud-anong mga Kristiyano—“nganha kanila nga mga tinawag, mga hinigugma diha sa Dios nga Amahan ug mga binantayan alang kang Jesukristo” (Judas 1:1). Ang gipahayag nga katuyoan ni Judas mao ang pag-awhag sa iyang mga tigbasa nga “makigbisog … sa pagpanalipod sa tinuohan” (Judas 1:3) batok sa dili diosnon nga mga magtutudlo kinsa mipasakop sa Simbahan ug nagpasiugda og imoral nga pamatasan ug sayop nga mga pagtulun-an nga naglimud sa Ginoo nga si Jesukristo.

Bisan og usa kini sa kinamub-an nga mga basahon sa Bag-ong Tugon, ang Sulat ni Judas naglakip og impormasyon nga dili makita bisan asa sa Biblia. Si Judas misulat kabahin sa mga “anghel nga wala managpabilin diha sa ilang nahimutangan” (Judas 1:6; tan-awa usab sa Abraham 3:26), sa komprontasyon tali ni Miguel ug ni Lucifer kabahin sa lawas ni Moises (Judas 1:9), ug sa usa ka panagna ni Enoch mahitungod sa Ikaduhang Pag-anhi sa Manluluwas (Judas 1:14–15; tan-awa usab sa Moises 7:65–66).

Si Elder Bruce R. McConkie sa Korum sa Napulog Duha ka mga Apostoles mihisgut og pipila ka talagsaon nga mga aspeto sa sulat ni Judas:

“Sa tibuok Biblia, si Judas lamang ang nagpreserbar alang kanato sa konsepto nga ang kinabuhi sa wala pa dinhi sa yuta maoy una natong nahimutangan ug ang pipila ka mga anghel napakyas sa pagpasar sa mga pagsulay niini.

“Ngadto kaniya nga kita modangup alang sa atong gamay nga kahibalo sa panaglalis tali ni Miguel ug ni Lucifer kabahin sa lawas ni Moises.

“Siya lamang ang nagrekord sa mahimayaong panagna ni Enoch mahitungod sa Ikaduhang Pag-anhi sa Anak sa Tawo” (Doctrinal New Testament Commentary, 3 vols. [1965–73], 3:415).

Hait ang mga pulong ni Judas batok niadtong misupak sa Dios ug sa Iyang mga sulugoon ug batok niadtong nagbuhat og imoral nga pagano nga pagsimba ug nangangkon nga wala sila magkinahanglan nga mosunod sa mga sugo sa Dios, lakip ang balaod sa kaputli. Siya mihulagway sa pipila ka mga kinaiya niining dautan nga mga indibidwal.

Judas 1. Si Judas nag-awhag sa mga miyembro sa Simbahan nga “makigbisog … sa pagpanalipod sa tinuohan” (Judas 1:3). Siya nagpasabut nga dunay mga tawo nga sekretong nakig-uban sa mga Santos ug nagpakatap og sayop nga doktrina ug nagpasiugda og dautang mga binuhatan. Siya nagpasidaan sa mga paghukom nga modangat niadtong nagpalayo sa Dios, ug siya nagtambag sa mga miyembro sa Simbahan sa pagpalig-on sa ilang pagtuo ug nga “bantay[an] ang [ilang mga kaugalingon] diha sa gugma sa Dios” (Judas 1:21).