Gipanagna ni Jesukristo ang kalaglagan sa Jerusalem ug sa templo. Mipadayag usab Siya ug mga timailhan sa Iyang Ikaduhang Pag-anhi ug gitudloan ang matinud-anon sa pagbantay ug pag-andam alang niana nga adlaw.
Gipanagna ni Jesus ang kalaglagan sa Jerusalem ug sa templo
Imahe
Nabanhaw nga Jesukristo
Diha sa imong scripture study journal, pagsulat og usa o sobra pa ka mga pangutana nga ikaw aduna kalabut sa Ikaduhang Pag-anhi ni Jesukristo. Samtang ikaw magtuon sa Joseph Smith—Mateo karon, pangitaa ang mga tubag sa mga pangutana nga imong gisulat.
Ang Joseph Smith—Mateo mao ang Hubad ni Joseph Smith, Mateo 23:39–24:56. Kini makaplagan diha sa Perlas nga Labing Bililhon human sa basahon ni Abraham.
Basaha ang Joseph Smith—Mateo 1:4, nga mangita sa duha ka mga pangutana nga gipangutana sa mga disipulo ni Jesus. Mahimo nimong markahan kini nga mga pangutana diha sa imong mga kasulatan.
Sa Joseph Smith—Mateo 1:5–20 gitubag sa Manluluwas ang unang pangutana—mahitungod sa kanus-a ang Jerusalem ug ang templo pagalaglagon. Diha sa mga bersikulo 21–37 Iyang gitubag ang ikaduhang pangutana—mahitungod sa timailhan sa Iyang Ikaduhang Pag-anhi ug ang kalaglagan sa dautan.
Basaha ang Joseph Smith—Mateo 1:5–12, nga mangita sa mga timailhan kalabut sa kalaglagan sa Jerusalem.
Bisan tuod og si Jesus miingon nga ang iyang mga disipulo mag-antus nianang panahona, mihimo Siya og importanting saad nga kon kita magpabilin nga dili matarug ug dili mabuntog, niana kita maluwas. Mahimo nimong markahan kini nga kamatuoran diha sa bersikulo 11.
Ang magpabilin nga dili matarug nagpasabut nga dili mabuntog sa mga tintasyon ug sa dautan. Diha sa mga kasulatan, ang pulong nga dili matarug usahay ipares sa pulong nga dili mausab (sama pananglit, tan-awa sa Mosiah 5:15).
Ang kinatibuk-ang mga kapangulohan sa Young Men ug Young Women mipasabut sa kahulugan sa mga pulong “dili matarug ug dili mausab”: “Unsay buot ipasabut sa pagkadili matarug ug pagkadili mausab? Ang pagkadili matarug mao ang kalig-on sa pagkatukod ug dili ulipon sa kausaban, ang kalig-on sa tinuohan ug determinasyon, ug sa pagkamaunungon ug pagkamatinud-anon. Ingon usab, ang pagkadili mausab mao ang pagkadili mauyonon ug dili mahimong irugon o pasimangon. Ang pagkadili matarug ug pagkadili mausab diha sa ebanghelyo ni Jesukristo mao ang paghimo og pasalig sa pagsunod Kaniya, sa ingon niana kanunay nga puno sa maayong mga buhat” (“Steadfast and Immovable,” New Era, Ene. 2008, 8).
Si Elder A. David Bednar sa Korum sa Napulog Duha ka mga Apostoles mihatag sa mosunod nga panan-aw. Markahi ang mga kinaiya nga iyang gihatag sa “usa ka tawo kinsa dili matarug ug dili mausab.” (Mahimo nga imong isulat ang mga pulong nga iyang gigamit diha sa margin sa imong mga kasulatan sunod sa pulong nga dili matarug diha sa Joseph Smith—Mateo 1:11.)
Imahe
Elder David A. Bednar
“Ang pulong nga ‘dili matarug’ gigamit sa pagsugyot og posisyon nga lig-on nga pagkatukod, solido, ug hugot, dili mauyog ug determinado (Oxford English Dictionary Online, 2nd ed. [1989], “Steadfast”). … Ang usa ka tawo nga dili matarug ug dili mausab maoy usa ka solido, determinado, masaligon, ug dili mahimong pasimangon gikan sa pinakauna nga katuyoan o misyon” (“Steadfast and Immovable, Always Abounding in Good Works,” New Era, Ene. 2008, 2).
Ang pulong nga giluwas diha sa Joseph Smith—Mateo 1:11 wala magpasabut nga kita malikay gikan sa tanang kalisud sa kinabuhi.
Imahe
Propeta Joseph Smith
Basaha ang mosunod nga pahayag ni Propeta Joseph Smith, ug markahi unsa ang gipasabut sa maluwas: “Usa ka sayop nga ideya nga ang mga Santos makalingkawas sa tanang mga paghukom, samtang ang mga dautan mag-antus; kay ang tanang tawo ubos sa pag-antus, ug ‘ang matarung maglisud sa pag-ikyas;’ [tan-awa sa D&P 63:34]; … daghan sa mga matarung mabiktima sa sakit, katalagman, ug uban pa, gumikan sa katarungan sa kahuyang sa unod, ug gani maluwas bisan pa niana mangaluwas ngadto sa Gingharian sa Dios” (Mga Pagtulun-an sa mga Presidente sa Simbahan: Joseph Smith [2007], 304).
Diha sa Joseph Smith—Mateo 1:13–20 atong nakat-unan nga gipahimangnoan ni Jesus ang Iyang mga disipulo sa pagpangandam sa pagkagiw ngadto sa kabukiran ug sa dili pagbalik ngadto sa ilang mga panimalay tungod kay ang Jerusalem pagasulungon ug pagalaglagon. Iyang gipanagna nga ang kasakit nianang mga adlawa mao ang labing pait nga makita sa Israel sukad.
Sa 70 A.D., mga 40 ka tuig human si Jesus misulti niini nga mga pulong, ang mga Romano misulong ngadto sa Jerusalem ug gipamatay ang sobra sa milyon ka mga Judeo, ug hapit 100,000 ka mga Judeo ang gidala nga bihag. Ang templo naguba, ug walay usa ka bato nga nagpabilin ibabaw sa lain nga bato—sama lamang sa gipanagna sa Manluluwas (tan-awa sa Joseph Smith—Mateo 1:3). Hinoon, kadtong kinsa misunod sa pahimangno ni Jesus luwas nga milayas ngadto sa Pella, usa ka lungsod nga mga 50 ka milya amihanang silangan sa Jerusalem (tan-awa sa Bible Dictionary, “Pella”).
Sa unsa nga paagi nga ang kasinatian sa mga Judeo naghulagway sa ka importansya sa pagpabiling dili matarug sa pagsunod sa mga pulong sa Manluluwas?
Ikonsiderar kon sa unsa nga paagi nga ang pagtuman ug pagsunod sa buhing propeta sa atong panahon sama ka importante sa pagsunod sa mga Judeo sa pahimangno ni Jesus.
Si Jesus nanagna sa mga timailhan sa Iyang Ikaduhang Pag-anhi
Basaha ang Joseph Smith—Mateo 1:21–23, nga mangita kon ngano nga ang Ginoo mipadayag sa mga timailhan sa Iyang Ikaduhang Pag-anhi.
Timan-i nga ang Manluluwas mipahimangno batok sa “mini nga mga Kristo ug mini nga mga propeta” (Joseph Smith—Mateo 1:22). Kini nga mga pulong nagpasabut ngadto sa bisan kinsa nga tawo—sulod ug gawas sa Simbahan— kinsa nag-angkon sa pagsulti alang sa Ginoo nga walay awtoridad o kinsa nagpalambo og mga pagtulun-an nga mga supak ngadto sa mga pulong sa buhing mga propeta. Ang mga pulong “mga pinili sumala sa pakigsaad” diha sa bersikulo 22 nagpasabut ngadto sa mga miyembro sa Simbahan ni Jesukristo.
Kalabut niining mini nga mga Kristo ug mini nga mga propeta, atong mabasa nga “kon mahimo, sila molingla sa labing pinili” (Joseph Smith—Mateo 1:22).
Imahe
Elder Bruce R. McConkie
Si Elder Bruce R. McConkie sa Korum sa Napulog Duha ka mga Apostoles mihatag sa mosunod nga pahimangno kalabut sa mini nga mga Kristo ug mini nga mga propeta: “Kining mini nga mga Kristo mao ang mahimo nga dili tinuod nga mga relihiyosong sistema sa kalibutan, ug ang mini nga mga propeta mao ang mga magtutudlo ug mga tigpasabut niadto nga mga sistema. Hilabihan ka lawom ug ka maalamon sa ilang mga doktrina ug kahibulongan ang ilang mga buhat … nga ang labing pinili hapit malingla” (Doctrinal New Testament Commentary, 3 vols. [1965–73], 1:647).
Unsa ang pipila ka mga butang ang atong mahimo sa paglikay nga malingla, bisan sa pipila kinsa mga miyembro sa Simbahan.
Si Presidente Joseph Fielding F. Smith mihatag sa mosunod nga pahimatngon ngadto sa mga miyembro sa Simbahan:
Imahe
Presidente Joseph F. Smith
“Kita walay dawaton ingon nga tinuod nga doktrina apan kana nga direktang nagagikan pinaagi sa gitudlo nga agianan, ang gitukod nga mga organisasyon sa priesthood, nga mao ang agianan nga gitudlo sa Dios pinaagi diin mapahibalo ang iyang salabutan ug kabubut-on ngadto sa kalibutan.
“… Ug sa higayon nga kanang mga indibidwal mangita sa bisan unsa nga tinubdan, kana nga higayon sayon silang madani sa matintalong mga impluwensya ni Satanas, ug maghatag sa ilang mga kaugalingon nga may purohan nga mahimong mga sulugoon sa yawa; mawad-an sila sa panan-aw sa tinuod nga mga kapunongan pinaagi diin ang mga panalangin sa Priesthood mapahimuslan; sila nagtunob gawas sa mga ali [mga utlanan] sa gingharian sa Dios, ug anaa sa makuyaw nga yuta. Kon ikaw makakita og tawo nga mobarug nag-angkon nga nakadawat og direkta nga pagpadayag gikan sa Ginoo ngadto sa Simbahan, walay labut sa kapunongan ug sa agianan sa priesthood, hunahunaon nimo siya nga usa ka impostor” (Gospel Doctrine, 5th ed. [1939], 42).
Basaha ang Joseph Smith—Mateo 1:24–26, nga mangita sa unsay gisulti sa Manluluwas mahitungod sa unsaon Niya pagpakita diha sa Iyang Ikaduhang Pag-anhi.
Basaha ang Joseph Smith—Mateo 1:27–31, nga mangita sa mga timailhan sa dili pa ang Iyang Ikaduhang Pag-anhi.
Ilista ang mga timailhan:
Timan-i nga dili tanan nga mga timailhan mga negatibo. Sumala sa mga bersikulo 27 ug 31, sa wala pa ang Ikaduhang Pag-anhi ni Jesukristo, ang mga pinili sa Ginoo pagapundukon ug ang ebanghelyo isangyaw sa tibuok kalibutan.
Diha sa imong scripture study journal, pagsulat mahitungod sa giunsa kini nga panagna pagtuman karon. Ilakip ang mga ideya kon sa unsa nga paagi ikaw mahimong kabahin sa pagtuman niini nga panagna.
Ang Manluluwas mipahimangno nga sa katapusang mga adlaw “mini nga mga Kristo, ug mini nga mga propeta” maninguha sa “paglingla sa labing pinili” (Joseph Smith—Mateo 1:22). Basaha ang Joseph Smith—Mateo 1:37, mangita sa unsaon nato paglikay nga malingla.
Sa imong mga kasulatan sunod sa Joseph Smith—Mateo 1:37, mahimong imong isulat kini nga baruganan: Kon atong mahalon ang pulong sa Ginoo, niana kita dili malingla.
Basaha ang mosunod nga istorya ni Elder Russell M. Ballard, sa Korum sa Napulog Duha ka mga Apostoles. Markahi ang mga bahin sa istorya nga naghulagway sa baruganan nga gitudlo diha sa Joseph Smith—Mateo 1:37.
Imahe
Elder M. Russell Ballard
“Usa sa akong buotan nga mga misyonaryo kinsa miserbisyo dungan kanako sa dihang ako presidente sa misyon sa Toronto [Canada] nakigkita kanako pipila ka tuig ang milabay. Gipangutan ko siya, ‘Elder, sa unsa nga paagi ako makatabang kanimo?’
“‘President,’ miingon siya, ‘Ako nagtuo nga nagkawala ang akong pagpamatuod.’
“Dili ako makatuo niini! Gipangutana ko siya kon sa unsang paagi kini naingon niana.
“‘Sa unang higayon ako nakabasa og pipila ka supak sa Mormon nga basahon,’ miingon siya. ‘Diha akoy pipila ka mga pangutana, ug walay motubag niini alang kanako. Naglibug ako, ug ako nagtuo nga nagkawala ang akong pagpamatuod’” (“When Shall These Things Be?” Ensign, Dis. 1996, 60).
Ikaw ba, o ang mga indibdwal nga imong nailhan, nakasinati og usa ka butang susama niining kanhiay nga misyonaryo? Unsa nga tambag imong ihatag ngadto niining usa ka tawo niini nga sitwasyon? Ngano?
Si Elder Ballard mipadayon:
“Gipangutana ko siya unsay iyang mga pangutana, ug misulti siya kanako. Kini mao ang kasagarang mga isyu sa supak sa Simbahan, apan gusto ako og gamay nga panahon sa pagpangita og mga basahon aron makahatag ako og makahuluganong mga tubag. Busa naghimo kami og takda nga magkita human sa 10 ka adlaw, diin nga panahon gisultihan ko siya nga akong tubagon ang kada usa sa iyang mga pangutana. Sa pagsugod niya og biya, gihunong ko siya.
“‘Elder, daghan ka og gipangutana kanako dinhi karon,’ miingon ako. ‘Karon adunay koy usa ka pangutana kanimo.’
“‘Unsa man, President?’
“‘Unsa ang gidugayon niini sukad imong nabasa ang Basahon ni Mormon?’ Nangutana ako.
“Niduko siya. Mitan-aw siya sa salog sa makadiyot. Dayon mitan-aw siya kanako. ‘Dugay na kaayong panahon, President,’ mikumpisal siya.
“‘Sige,’ ako miingon. ‘Mihatag ka kanako sa akong assignment. Patas lang nga akong ihatag ang imo. Gusto ko nga ikaw mosaad nga imong basahon ang Basahon ni Mormon sa dili mominos og usa ka oras kada adlaw tali sa karon ug sa atong sunod nga takda sa pagkita.’ Miuyon siya nga iya kanang buhaton.
“Human sa napulo ka adlaw mibalik siya sa akong opisina, ug ako andam na. Gikuha ko ang mga papel aron sa pagsugod og tubag sa iyang mga pangutana, apan gihunong ako niya.
“‘President,’ miingon siya, ‘kana dili na kinahanglan.’ Dayon mipasabut siya: ‘Nasayud ako nga ang Basahon ni Mormon tinuod. Nasayud ako nga si Propeta Joseph Smith usa ka propeta sa Dios.’
“‘Aw, kana maayo kaayo,’ miingon ako. ‘Apan ikaw makakuha sa mga tubag sa imong pangutana sa gihapon. Giayo ko kini og buhat, busa lingkod lang diha ug paminaw.’
“Ug busa gitubag ko ang iyang tanang mga pangutana ug dayon nangutana, ‘Elder, unsay imong nakat-unan gikan niini?’
“Ug miingon siya,‘Hatagi ang Ginoo og patas nga panahon’” (“When Shall These Things Be?” 60).
Diha sa imong scripture study journal, pagrekord og usa ka paagi nga ikaw mas “magmahal sa pulong [sa Ginoo] ” (Joseph Smith—Mateo 1:37).
Ang pagmahal sa pulong sa Ginoo nagtabang kanato sa paglikay nga malingla, ug ang mga padayag karon nagpahimangno kanato sa “pagbarug … sa balaang mga dapit, ug ayaw pagbalhin, hangtud ang adlaw sa Ginoo moabut” (D&P 87:8). Agi og dugang sa pagtuon sa mga kasulatan aron sa pagtabang kanato sa pagmahal sa pulong sa Ginoo, kita makadawat sa mga pulong sa Dios pinaagi sa pagbarug o sa pagtambong, diha sa balaan nga mga dapit sama sa mga templo ug mga meeting house ug maninguha sa paghimo sa atong mga panimalay nga balaan nga mga dapit. Ikonsiderar kon sa unsa nga paagi nga ang pagkaanaa niini nga mga dapit makatabang kanimo sa pagkat-on sa tinuod nga doktrina ug sa paglikay nga malingla.
Si Jesus nagtudlo sa Iyang mga disipulo mahitungod sa pagpangandam alang sa Iyang Ikaduhang Pag-anhi
Gitapos sa Manluluwas ang Iyang pakigpulong pinaagi sa pagtudlo sa Iyang mga disipulo kon unsaon pagmahal sa Iyang pulong ug pag-andam alang sa Iyang Ikaduhang Pag-anhi.
Sa mga kahon nga gibutang sa mosunod nga tsart, pagdrawing og yano nga mga hulagway nga nagpakita sa mga ehemplo nga gigamit sa Manluluwas sa pagtudlo mahitungod sa pagpangandam alang sa Iyang Ikaduhang Pag-anhi. Dayon, ubos sa kada drawing, isulat ang kamatuoran nga imong nailhan mahitungod sa pagpangandam alang sa Ikaduhang Pag-anhi.
Gikan niini nga mga ehemplo atong nakat-unan nga ang Langitnong Amahan lamang ang nahibalo kanus-a ang Ikaduhang Pag-anhi sa Manluluwas mahitabo, ug kon atong bantayan ang mga timailhan ug sundon ang mga sugo sa Ginoo, niana kita maandam alang sa Ikaduhang Pag-anhi sa Manluluwas.
Ribyuha ang mga kamatuoran nga nailhan diha sa Joseph Smith—Mateo, ug hunahunaa giunsa niini nga mga kamatuoran sa pagtabang og tubag sa mga pangutana nga imong gisulat sa sinugdanan sa leksyon.
Usa sa labing maayo nga pagpangandam alang sa Ikaduhang Pag-anhi ni Jesukristo mao ang pagsunod sa mga pagtulun-an sa Iyang mga propeta ug mga apostoles karong panahona. Ikonsiderar ang mosunod nga pahayag ni Elder Dallin H. Oaks, sa Korum sa Napulog Duha ka mga Apostoles:
Imahe
Elder Dallin H. Oaks
“Unsa kaha kon ang adlaw sa Iyang pag-abut ugma? Kon kita nahibalo nga atong sugaton ang Manluluwas ugma—pinaagi sa atong wala paabuta nga kamatayon o sa Iyang wala damha nga pag-anhi—unsay atong buhaton karong adlawa? Unsa nga mga pagkumpisal ang atong himoon? Unsa nga mga buhat atong hunungon? Unsa nga mga utang atong husayon? Unsa nga mga pagpasaylo atong ihatag? Unsa nga mga pagpamatuod atong ipadungog?
“Kon atong buhaton kining mga butanga nan, nganong dili man karon?” (“Preparation for the Second Coming,” Ensign o Liahona, Mayo 2004, 9).
Tubaga ang mosunod nga pangutana diha sa imong scripture study journal: Kon ikaw pasugaton sa Manluluwas ugma, unsay imong usbon karon?
Isulat ang mosunod diha ubos sa mga assignment karong adlawa sa imong scripture study journal: