Mga Buhat 2

Ang mga tinun-an napuno sa Espiritu Santo sa adlaw sa Pentecostes ug napanalanginan sa gasa sa pinulongan samtang sila nagsangyaw sa ebanghelyo, Mipahayag si Pedro nga si Jesus mao ang “Ginoo ug Kristo” (Mga Buhat 2:36) ug midapit sa mga tawo nga maghinulsol, magpabunyag, ug modawat sa gasa sa Espiritu Santo. Mga 3,000 ka tawo ang nakabig ug nabunyagan nianang adlawa, ug nagpadayon sila nga matinud-anon sa Simbahan.

Paghunahuna og labing bag-o nga oportunidad nga imong nasinati sa pagpamulong sa simbahan, pagtudlo og leksyon, o pagpakigbahin sa ebanghelyo ngadto sa uban. Unsay mahagiton alang kanimo mahitungod sa pagpamulong, pagtudlo, o pagpamatuod ngadto sa uban mahitungod sa ebanghelyo ni Jesukristo?

Samtang magtuon ka sa Mga Buhat 2:1–13, pangitaa ang kamatuoran nga makatabang nimo kon kamo mobati nga gikulbaan o nahadlok sa pagpamulong, pagtudlo, ug pagpamatuod ngadto sa uban sa gipahiuli nga ebanghelyo.

Mga usa ka semana human mokayab ang Manluluwas ngadto sa langit, ang mga Judeo gikan sa daghang mga nasud miadto sa Jerusalem aron moapil sa fiesta sa Pentecostes ug sa pagsimba sa templo ug pagpasalamat ngadto sa Ginoo. “Isip kabahin sa balaod ni Moises, ang fiesta sa Pentecostes o Unang mga Bunga gihimo kalim-an ka adlaw human sa Fiesta sa Pagpalabay (Lev. 23:16). Ang Pentecostes mao ang pagsaulog sa ani, ug sa Daang Tugon gitawag kini ang Fiesta sa Ani o ang Fiesta sa mga Semana” (Giya ngadto sa mga Kasulatan, “Pentecost,” scriptures.lds.org).

Basaha ang Mga Buhat 2:1–4, nga mangita unsay nasinati sa mga tinun-an ni Jesukristo sa adlaw sa Pentecostes.

Ang mga pulong nga “mga dila nga daw kalayo,” sa literal, nagpasabut sa mga dila nga pikas, o dunay hitsura sa siga sa kalayo. Samtang ang Espiritu Santo gibu-bu diha sa mga tinun-an, ang “mga dila nga daw kalayo” (Mga Buhat 2:3) mao ang timailhan sa presensya sa Espiritu.

Gipahisama ni Juan Bautista ang presensya sa Espiritu Santo ngadto sa usa ka bunyag “sa kalayo” (Mateo 3:11; Lucas 3:16). Sa karaang israel, ang kalayo sa kasagaran nagsimbolo sa presensya sa Dios. Ang imahe sa “mga dila nga daw kalayo,” gigamit sa paghulagway sa balaan nga kalayo sa adlaw sa Pentecostes, nagsimbolo nga ang mga tinun-an nakadawat sa gasa sa Espiritu Santo, nga gisaad sa Manluluwas (tan-awa sa Mga Buhat 1:8).

Basaha ang Mga Buhat 2:5–8, nga mangita unsay nahitabo sa dihang ang mga tinun-an napuno sa Espiritu Santo. Hunahunaa kon unsa kaha ka sama nga makasaksi niini nga hitabo.

I-scan ang Mga Buhat 2:9–11, ug ipha ang lain-laing mga grupo sa mga tawo o mga nasyonalidad kinsa nakadungog sa mga tinun-an nga nagsulti og mga pinulongan pinaagi sa gahum sa Espiritu Santo. Sa gisukip nga mapa, pangitaa ang pipila ka mga dapit nga gihisgutan.

Imahe

mapa, silangang Mediterranean

Panid-i nga ang matag usa niini nga grupo nakadungog “sa kahibulongang mga buhat sa Dios” nga gisangyaw sa ilang kaugalingong pinulongan (Mga Buhat 2:11). Sa unsa nga mga paagi ang mga tawo sa tibuok kalibutan makadungog sa mga kamatuoran sa ebanghelyo nga gisangyaw sa ilang kaugalingong pinulongan sa atong panahon?

Isip resulta sa pagkapuno sa Espiritu Santo, ang mga tinun-an nakahimo sa pagpakigbahin sa mga kamatuoran sa ebanghelyo ni Jesukristo ngadto sa uban, bisan sa lumad nga mga pinulongan niadtong ilang gitudloan. Usa ka kamatuoran nga atong makat-unan gikan niini nga asoy mao nga kon kita puno sa Espiritu Santo, Siya motabang nato sa pagtudlo ug pagpamatuod ngadto sa uban.

Usa ka paghulagway niini nga kamatuoran sa dihang ang Espiritu Santo motabang nato sa pagtudlo sa ebanghelyo niadtong kinsa namulong og pinulongan nga dili atoa.

Aron mas makasabut unsay gipasabut nga mapuno sa Espiritu Santo, tan-awa ang mosunod nga drowing ug hunahunaa nga nagsulay sa pagbu-bu og tubig ngadto sa mga baso. Panid-i nganong lisud ang pagbu-bu sa bisan unsa nga mga baso.

Imahe

drawing of cups

Ikonsiderar kon sa unsa nga paagi ang mga baso mahisama sa mga tawo ug ang tubig ngadto sa Espiritu Santo. Unsa kaha ang girepresentaran sa mga babag sa pagbu-bu sa mga baso? Unsa nga mga kinaiya ang makapugong nato nga mapuno sa Espiritu Santo?

1. Tubaga ang mosunod nga mga pangutana diha sa imong scripture study journal:

   1. Unsay imong mabuhat aron mapuno sa Espiritu Santo aron nga Siya makatabang kanimo sa pagtudlo ug pagpamatuod ngadto sa uban?

   2. Sa unsa nga mga paagi ang Espiritu Santo nakatabang kanimo sa pagtudlo sa ebanghelyo o pagpakigbahin sa imong pagpamatuod ngadto sa uban?

   3. Sa unsa nga paagi nga ang pag-ambit sa sakrament makapahimo sa Espiritu Santo sa pagpakig-uban nato?

Sa Mga Buhat 2:12–13 mabasa nato nga ang pipila ka mga Judeo natingala sa ilang nadungog sa dihang ang mga tinun-an namulong og mga pinulongan, samtang ang uban nagbugal-bugal sa mga tinun-an pinaagi sa pag-akusar nila nga nakainom og daghang bino.

Basaha ang Mga Buhat 2:14, nga mangita kon kinsa ang nagsugod sa pagtudlo sa katawhan.

Hunahunaa ang imong kaugalingon nga anaa sa sitwasyon ni Apostol Pablo, nagbarug atubangan sa katawhan. Unsa nga mga kamatuoran sa ebanghelyo ang imong itudlo ug ipamatuod? Ngano?

Sumala sa Mga Buhat 2:15–35, si Pedro namahayag nga ang gasa sa mga pinulongan ug ubang mga timailhan sa Espiritu diha sa mga tinun-an mao ang usa sa mga katumanan ug mga kahulugan sa panagna nga gihatag ni propeta Joel (tan-awa sa Joel 2:28–32). Si Pedro dayon mitudlo ug mipamatuod ngadto sa mga tawo gamit ang pipila ka mga pulong ug mga salmo ni Haring David.

Si Elder Dallin H. Oaks sa Korum sa Napulog Duha ka mga Apostoles mitudlo nga ang Joel 2:28–32 usa ka ehemplo sa kasulatan nga mahimong dunay daghang mga kahulugan ug mga katumanan:

Imahe

Elder Dallin H. Oaks

“Daghan sa mga panagna ug doktrinal nga mga tudling sa mga kasulatan dunay daghang mga kahulugan. …

“[Usa] ka paghulagway sa daghang mga kahulugan kabahin sa panagna sa basahon ni Joel nga sa katapusang mga adlaw ang Ginoo mobu-bu sa iyang espiritu sa tanang unod ug nga ang atong mga anak nga lalaki ug ang atong mga anak nga babaye managpanagna (tan-awa sa Joel 2:28). Sa adlaw sa Pentecostes, si Apostol Pedro namahayag nga ang mga hitabo nga ilang nasaksihan mao kadtong ‘giingon sa propeta nga si Joel’ (Mga Buhat 2:16). Paglabay sa dise otso ka gatus ka tuig, si anghel Moroni mikutlo niining sama nga panagna ug miingon nga ‘kini wala pa matuman, apan hapit na mahitabo’ [Joseph Smith—Kasaysayan 1:41]” (“Scripture Reading and Revelation,” Ensign, Ene. 1995, 8).

Sila si Pedro ug Moroni sakto nga mipahayag nga ang panagna nga gihatag ni propeta Joel dunay katumanan, kahulugan, ug kagamitan sa adlaw sa Pentecostes ug sa ulahing mga adlaw.

2. Basaha ang Mga Buhat 2:22–24, 29–33, 36, ug dayon tubaga ang mosunod nga mga pangutana sa imong scripture study journal:

   1. Unsa ang pipila ka importanting kamatuoran nga gitudlo ug gipamatuod ni Pedro?

   2. Unsa ang importante nganha nimo bahin sa pagpamatuod ni Pedro ngadto sa mga Judeo?

Ikonsiderar unsa ang gisulti ug gibuhat ni Pedro sa dihang gipangutana kabahin sa iyang relasyon ngadto ni Jesus sa gabii nga gidakop ang Manluluwas (tan-awa sa Lucas 22:54–62).

Hunahunaa sa unsa nga paagi magkalahi ang mga pulong ug aksyon ni Pedro sa adlaw sa Pentecostes gikan sa insidente sa dihang siya milimud makatulo ka higayon nga siya nakaila ni Jesus. Unsa sa imong hunahuna ang nakaimpluwensya niini nga kausaban diha ni Pedro?

Basaha ang Mga Buhat 2:37, nga mangita kon sa unsa nga paagi ang mga pulong ni Pedro nakaapekto sa katawhan. (Mga Buhat 2:36–38 usa ka scripture mastery passage. Mahimong markahan nimo kini sa lahi nga paagi aron sayon nimo kining makit-an.)

Tan-awa ang mga pulong “gisakitan sila sa kasingkasing” sa Mga Buhat 2:37. Ang pulong gisakitan dinhi nagpasabut nga midulot ug nagsugyot nga ang mga tawo mibati og kasubo ug pagbasol tungod sa mga Judeo, isip mga tawo ug nasud, mipalansang sa ilang Ginoo, nga si Jesukristo. Wala mag-ingon si Pedro nga ang grupo sa mga Judeo gikan sa lain-laing mga nasyunalidad nga iyang gitudloan sa adlaw sa Pentecostes mao ang responsable sa pagpalansang sa Manluluwas.

Sumala sa Mga Buhat 2:37, unsay gipangutana sa mga tawo? Ikonsiderar sa unsa nga paagi kini nga pangutana nagpadayag nga ang mga tawo nagsugod sa pagsinati og kausaban sa kasingkasing.

Basaha ang Mga Buhat 2:38–41, nga mangita unsay gisugo ni Pedro nga buhaton sa mga tawo. Ang pulong sukwahi nagpasabut nga masukulon, masinupakon, o malimbungon.

Sumala sa Mga Buhat 2:41, giunsa pagtubag sa mga tawo ang mga pagtulun-an ug imbitasyon ni Pedro sa paghinulsol ug pagpabunyag?

Imahe

crowd at baptism in river

Basaha ang Mga Buhat 2:42–47, nga mangita unsay gibuhat sa bag-ong mga kinabig ngadto sa ebanghelyo ni Jesukristo human nila madawat ang kamatuoran pinaagi sa gahum sa Espiritu Santo ug nabunyagan.

Sa unsa nga paagi nga ang ilang mga aksyon nagpakita nga sila tinud-anay nga nakabig?

Ang mga pulong “pagpikaspikas sa tinapay” (Mga Buhat 2:42) nagpasabut sa pag-apil sa ordinansa sa sakrament, ug sa pag-ambit “sa tanang mga butang” (Mga Buhat 2:44) nagpasabut sa mga Santos nga nagpuyo sa balaod sa pagpahinungod, nga naglakip sa pag-atiman sa kabus ug timawa taliwala kanila.

Hinumdumi nga sa wala pa sila makadungog ug mosunod sa mga pulong ni Pedro, kini nga mga Judeo wala modawat ni Jesus isip ilang Manluluwas, ni sila misunod sa Iyang mga pagtulun-an. Ikonsiderar kon unsa ka dako ang kausaban sa mga tawo.

Usa ka baruganan nga atong makat-unan gikan sa Mga Buhat 2:37–47 mao nga sa atong pagdawat sa pulong sa Dios pinaagi sa gahum sa Espiritu Santo, ang atong mga kasingkasing mausab ug kita makabig ngadto ni Jesukristo.

3. Sa imong scripture study journal, buhata ang mosunod:

   1. Isulat unsa ang mabuhat sa tawo aron makadawat sa pulong sa Dios pinaagi sa gahum sa Espiritu Santo.

   2. Ipangutana ang mosunod nga pangutana ngadto sa usa ka sakop sa pamilya, higala, o silingan, ug isulat ang iyang tubag (mahimo usab nga imong isulat ang imong kaugalingong tubag sa pangutana): Samtang maningkamot ka sa pagkat-on ug pagpuyo sa mga kamatuoran sa ebanghelyo, sa unsa nga paagi ang Espiritu nakatabang kanimo nga mausab ug makabig ngadto ni Jesukristo?

4. Paggahin og pipila ka minuto sa paghunahuna og maayo unsay imong mabuhat aron mas makadawat pa sa mga pulong ug mga pagtulun-an sa Dios pinaagi sa gahum sa Espiritu Santo. Unsa nga piho nga mga kausaban ang imong mahimo samtang maningkamot ka sa pagsunod sa mga aghat nga imong nadawat? Isulat ang imong mga hunahuna ug mga pagbati diha sa imong scripture study journal. Paghimo og tumong mahitungod unsay imong mahimo karong semanaha aron mas makadawat sa mga pulong ug mga pagtulun-an sa Dios pinaagi sa gahum sa Espiritu Santo.

Basaha pag-usab ang Mga Buhat 2:38, nga mangita unsa nga panalangin ang gisulti ni Pedro nga madawat sa mga tawo isip resulta sa paghinulsol sa ilang mga sala ug sa pagpabunyag.

Gikan niini nga bersikulo atong makat-unan nga kon kita dunay pagtuo ni Jesukristo, maghinulsol, ug magpabunyag, andam kita nga modawat sa gasa sa Espiritu Santo. Sa unsa nga paagi nga ang paghinulsol ug pagpabunyag makaandam sa usa ka tawo sa pagdawat sa gasa sa Espiritu Santo? Gikan sa Basahon ni Mormon atong makat-unan nga kita “pagasantoson pinaagi sa pagdawat sa Espiritu Santo,” (3 Nephi 27:20) ug nga pinaagi sa Espiritu Santo makadawat kita og kapasayloan sa atong mga sala (tan-awa sa 2 Nephi 31:17).

5. Itandi ang Mga Buhat 2:36–38 ngadto sa ikaupat nga artikulo sa hugot nga pagtuo. Ilha sa Mga Buhat 2:36–38 ang mga pulong nga nagpakita o nagtudlo sa unang mga baruganan ug mga ordinansa sa ebanghelyo. Isulat ang unang mga letra sa matag pulong sa Mga Buhat 2:38 diha sa imong scripture study journal (sama pananglit, U s P m k, P, u p …). Dayon gamita unsay imong gisulat aron sa pagtabang nimo nga makamemorya niana nga bersikulo gikan sa scripture mastery passage. I-recite ang bersikulo hangtud imo kining mamemorya. Hunahunaa ang pagdapit og usa ka tawo nga magpabunyag aron siya makatagamtam sa gasa sa Espiritu Santo sa iyang kinabuhi.

6. Isulat ang mosunod sa ubos sa imong mga assignment karong adlawa diha sa imong scripture study journal:

   Akong natun-an ang Mga Buhat 2 ug nahuman kini nga leksyon sa (petsa).

   Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: