Juan 14–15

Human sa Pagpalabay nga pagpangaon, si Jesus mitudlo sa Iyang mga Apostoles unsaon sa pagbalik ngadto sa Langitnong Amahan ug unsaon sa pagpakita sa ilang gugma alang Kaniya. Si Jesus dayon misaad sa Iyang mga Apostoles nga Siya mopadala kanila og lain nga Maghuhupay. Siya mitudlo nga Siya mao ang Tinuod nga Tanum nga Parras ug nga ang Iyang mga disipulo [tinun-an] mao ang mga sanga. Ang Manluluwas misugo usab sa Iyang mga disipulo nga maghigugmaay sa usag usa ug mipasidaan kanila sa pagpanggukod nga ilang masinati tungod sa ilang pakig-uban Kaniya.

Hunahunaa nga ang usa ka higala nangutana, “Giingnan ko nga dunay daghang agianan padulong sa langit ug nga ang lain-laing mga relihiyon nagpakita kanato sa lain-laing mga dalan padulong sa gingharian sa Dios. Nagtuo ba ka nga tinuod kini?” Sa luna nga giandam, isulat kon unsaon nimo pagtubag kini nga pangutana, ug ipasabut nganong ikaw nagtuo o wala motuo nga kini nga pamahayag tinuod.

Basaha ang Juan 14:1–6, nga mangita sa mga pagtulun-an sa Manluluwas kon unsaon sa pagbalik ngadto sa gingharian sa Langitnong Amahan. (Ang Juan 14:6 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)

Gikan sa Juan 14:6 atong nakat-unan nga pinaagi lamang sa Pag-ula ni Jesukristo ug pinaagi sa pagsunod sa Iyang dalan nga kita makasulod sa gingharian sa Langitnong Amahan.

1. Tubaga ang mosunod nga mga pangutana diha sa imong scripture study journal:

   1. Sa unsang paagi nga ang Manluluwas mao lamang ang Dalan aron makabalik sa Langitnong Amahan?

   2. Sa unsang paagi si Jesukristo mao ang Kamatuoran?

   3. Sa unsang paagi si Jesus mao ang Kinabuhi?

Sa dalan sa Manluluwas naglakip sa pagpalambo sa hugot nga pagtuo diha Kaniya ug sa Langitnong Amahan; paghinulsol; pagdawat sa mga ordinansa sa kaluwasan, sama sa bunyag ug mga ordinansa sa templo; ug paglahutay hangtud sa katapusan diha sa hugot nga pagtuo ug pagkamasulundon.

Basaha ang Juan 14:7–14, nga mangita kon unsay gisulti ni Jesus sa Iyang mga disipulo kabahin sa Iyang relasyon sa Iyang Amahan. Ikonsiderar ang pagmarka sa mga pulong nga “ang nakakita kanako nakakita sa Amahan” diha sa bersikulo 9.

Si Elder Jeffrey R. Holland sa Korum sa Napulog Duha ka mga Apostoles mitudlo nga ang Amahan mipadala sa Iyang Anak aron sa pagtabang kanato nga makaila, mohigugma, ug mosunod sa atong Amahan sa Langit:

Imahe

Elder Jeffrey R. Holland

“Sa tanang gisulti ug gibuhat ni Jesus, lakip na ug ilabi na gayud sa Iyang maulaong pag-antus ug sakripisyo, Siya nagpakita kanato kon kinsa ug unsa gayud ang Dios nga atong Mahangturong Amahan, unsa ka hingpit ang Iyang pagkamaunongon ngadto sa Iyang mga anak sa tanang panahon ug kanasuran. Sa pulong ug sa buhat si Jesus nagtinguha sa pagpadayag ug sa paghimong personal ngari kanato sa tinuod nga kinaiya sa Iyang Amahan, ang atong Amahan sa Langit.

“Iya kining gibuhat sa usa ka bahin tungod kay kaniadto ug karon kitang tanan nagkinahanglan nga mas hingpit nga makaila sa Dios aron mas bug-os nga mohigugma Kaniya ug mas hingpit nga mosunod Kaniya. …

“Human ang mga henerasyon sa mga propeta misulay pagtudlo sa katawhan sa kabubut-on ug paagi sa Amahan, kasagaran gamay ra kaayo og kalampusan, ang Dios sa Iyang labing mahinungdanong paningkamot aron makaila kita Kaniya, mipadala sa yuta sa Iyang Bugtong ug hingpit nga Anak, gilalang diha sa Iya gayud nga panagway ug hitsura, aron mopuyo ug moserbisyo sa mga mortal sa matag adlaw nga kalisud sa kinabuhi. …

“… Si Jesus … mianhi aron sa pagtabang sa mga tawo nga mas makasabut sa Dios ug sa paghangyo kanila sa paghigugma sa ilang Langitnong Amahan sama nga Siya sa kanunay nahigugma ug mohigugma kanila. Ang plano sa Dios, ang gahum sa Dios, ang kabalaan sa Dios, oo, bisan ang kasuko ug paghukom sa Dios nga sila adunay higayon nga makasabut. Apan ang gugma sa Dios, ang hilabihan kalawum sa Iyang debosyon ngadto sa Iyang mga anak, sila sa gihapon wala pa hingpit nga masayud—hangtud nga miabut si Kristo.

“Mao nga ang pagpakaon sa gigutom, pag-ayo sa masakiton, pagbadlong sa pagpakaaron-ingnon, paghangyo sa hugot nga pagtuo—kini mao si Kristo nga nagpakita kanato sa paagi sa Amahan, Siya kinsa ‘maloloy-on ug mabination, dugay nga masuko, mainantuson ug puno sa pagkamaayo’ [Lectures on Faith (1985), 42]. Sa Iyang kinabuhi ug ilabi na sa Iyang kamatayon, si Kristo mipahayag, ‘Kini mao ang kalooy sa Dios nga akong gipakita kaninyo, ingon man usab ang sa akong kaugalingon’” (“The Grandeur of God,” Ensign o Liahona, Nob. 2003, 70–72).

2. Ang pagsag-ulo sa scripture mastery passage diha sa Juan 14:6 makatabang kanimo sa pagtubag sa mga pangutana sama sa pangutana sa sinugdanan niini nga leksyon. Sag-uloha kini nga tudling pinaagi sa pagbalik-balik niini og kusog sa makadaghan nga higayon. Dayon i-recite kini ngadto sa usa ka sakop sa pamilya o higala. Pagkahuman, isulat ang nakasag-ulo ko sa Juan 14:6 diha sa imong scripture study journal, ug hangyoa ang tawo nga naminaw sa imong pag-recite sa pagpirma sa imong journal.

Paghunahuna og tawo nga imong gimahal. Unsaon nimo pagpakita sa imong gugma alang niining tawhana?

Basaha ang Juan 14:15, nga mangita kon unsay gisulti ni Jesus nga buhaton sa Iyang mga Apostoles aron sa pagpakita sa ilang gugma alang Kaniya. (Ang Juan 14:15 usa ka scripture mastery passage. Mahimo nimo kining markahan sa lahi nga paagi aron makit-an nimo kini sa umaabut.)

Basi sa unsay gitudlo ni Jesus sa Iyang mga Apostoles, kompletuha ang mosunod nga kamatuoran: Atong mapakita ang atong gugma alang kang Jesukristo pinaagi sa .

Hunahunaa kon sa unsang paagi ang pagsunod sa matag usa sa mosunod nga mga sugo nagpakita sa imong gugma alang ni Jesukristo: pagbalaan sa adlawng Igpapahulay, pagtahud sa imong amahan ug inahan, pagbayad sa ikapulo, ug paghigugma sa imong silingan.

Paggahin og tulo o upat ka minuto ug paghunahuna kon unsa ka maayo nimo nga napakita ang imong gugma sa Manluluwas pinaagi sa pagsunod sa Iyang mga sugo.

Basaha ang Juan 14:16–17, 26, nga mangita sa saad sa Manluluwas ngadto sa Iyang mga Apostoles.

Ang mga pulong nga “laing Maglalaban [Maghuhupay]” diha sa bersikulo 16 nagpasabut sa Espiritu Santo. Tungod kay ang Manluluwas nahimong usa ka Maghuhupay ngadto sa Iyang mga Apostoles sa panahon sa Iyang mortal nga pangalagad, Siya mitawag sa Espiritu Santo nga laing Maghuhupay. Tungod sa pipila ka rason, ang Espiritu Santo wala hingpit nga maglihok panahon sa mortal nga pangalagad ni Jesus, bisan tuod Siya hingpit nga naglihok sa wala pa ug sa pagkahuman na sa mortal nga pangalagad sa Manluluwas (tan-awa sa Bible Dictionary sa LDS English version sa Biblia, “Holy Ghost”).

Si Elder Bruce R. McConkie sa Korum sa Napulog Duha ka mga Apostoles mipasabut sa tahas sa Espiritu Santo isip Maghuhupay:

Imahe

Elder Bruce R. McConkie

“Samtang si Jesus anaa uban kanila, siya nahimong ilang Maghuhupay; siya namulong og kalinaw sa ilang mga kalag; kadtong mga nabug-atan sa kasubo ug pag-antus ug kalisud sa kalibutan miadto kaniya ug nakakaplag og kapahulayan alang sa ilang mga kalag. Siya mihupay sa mga biyuda ug usa ka amahan ngadto sa mga ilo. Ang Iyang mga pulong midasig sa matuohon nga mga kalag ngadto sa bag-ong mga gitas-on sa kahilom ug kalinaw. Karon siya mobiya, apan siya mopadala sa lain nga Maghuhupay—ang Espiritu Santo—nga makig-uban sa matinud-anon hangtud sa kahangturan.

“Alang sa tanang mga tawo gawas sa pipila kinsa nakadungog sa iyang tingog sa pagka-mortal, ang Espiritu Santo mao ang unang Maghuhupay. Kini nga sakop sa Diosnong Kapangulohan mamulong og kalinaw sa mga kalag sa mga matarung sa tanang kapanahonan. Ang Espiritu Santo ‘mao ang gasa sa Dios ngadto sa tanan niadto kinsa sa makugihon nga paagi mangita kaniya, ingon sa karaan nga panahon hangtud sa panahon nga siya magpakita sa iyang kaugalingon ngadto sa mga anak sa katawhan’ (1 Ne. 10:17), ug, ingon man usab, sa kapanahonan nga moabut. Siya mao ang Espiritu sa kamatuoran—nga mao usab si Kristo—apan ang kalibutan dili makadawat sa Espiritu Santo tungod kay ang Espiritu dili mopuyo sa mahugaw nga mga tabernakulo” (The Mortal Messiah: From Bethlehem to Calvary, 4 vols. [1979–81], 4:74–75).

Sumala sa Juan 14:16–17, 26, unsa ang tulo ka mga butang nga mabuhat sa Espiritu Santo alang kanato? Tubaga kini nga pangutana pinaagi sa pagkompleto sa mosunod nga kamatuoran: Ang Espiritu Santo makahimo .

3. Tubaga ang usa o sobra pa sa mosunod nga mga pangutana diha sa imong scripture study journal:

   1. Kanus-a ka mibati nga ang Espiritu Santo naghupay kanimo?

   2. Kanus-a ka mibati nga ang Espiritu Santo nagtudlo kanimo?

   3. Kanus-a man ang Espiritu Santo nakatabang kanimo sa paghinumdom og usa ka butang?

Basaha ang Juan 14:18–23, nga mangita sa saad sa Manluluwas niadtong nagpakita sa ilang gugma alang Kaniya pinaagi sa pagsunod sa Iyang mga sugo.

Gikan niini nga mga bersikulo atong nakat-unan nga kon kita mosunod sa mga sugo, ang Langitnong Amahan ug si Jesukristo magauban kanato.

Basaha ang Doktrina ug mga Pakigsaad 130: 3, nga mangita kon unsay ipasabut nga ang Langitnong Amahan ug si Jesukristo anaa uban kanato.

Basaha ang Juan 14:27, nga mangita sa makapadasig nga mga pulong sa Manluluwas ngadto sa Iyang mga Apostoles.

Pamalandungi ang kalainan tali sa kalinaw nga gitanyag sa Manluluwas ug sa kalinaw nga gitanyag sa kalibutan.

Imahe

Elder Bruce R. McConkie

Si Elder McConkie mihulagway sa kalinaw nga gitanyag sa Manluluwas: “[Kini] ang malinawong mga pagbati sa kasingkasing agig sangputanan sa lig-ong kombiksyon sa kabalaan sa yutan-ong gingharian sa Ginoo; usa ka kalinaw nga nagdala og kasiguroan sa mas maayo nga kalibutan nga moabut; usa ka kalinaw nga manimuyo diha sa mga kalag sa tawo bisan kon sila anaa taliwala sa mga gubat ug kasamok” (Doctrinal New Testament Commentary, 3 vols. [1965–73], 1:742).

Sa Juan 14:28–30 atong nakat-unan nga si Jesus miingon sa Iyang mga Apostoles nga kinahanglan sila nga magmaya tungod kay hapit na Siya mobiya kanila aron mobalik ngadto sa Langitnong Amahan. Sama sa giklaro sa Hubad ni Joseph Smith, si Jesus usab misulti kanila nga si Satanas walay gahum batok Kaniya tungod kay Siya nakabuntog sa kalibutan, apan si Satanas makaimpluwensya gihapon kanila tungod kay wala pa nila mahuman ang ilang buhat dinhi sa yuta (tan-awa sa Hubad ni Joseph Smith, Juan 14:30 [sa Giya ngadto sa mga Kasulatan]).

Basaha ang Juan 14:31, nga mangita kon giunsa sa Manluluwas pagpakita sa Iyang gugma alang sa Iyang Amahan. Mahimo nimong markahan ang unsay imong makit-an.

4. Tan-awa kon unsa ka kadugay mosag-ulo sa Juan 14:15. Kusga kini sa pag-recite. Dayon isulat kini gikan sa imong panumduman diha sa imong scripture study journal.

Basaha og balik ang Juan 14:31, nga mangita sa ehemplo nga gihimo ni Jesukristo alang kanato kabahin sa baruganan nga Iyang gitudlo sa Juan 14:15. Tan-awa ang sentence nga “Panindog kamo, manglakaw na kita” (Juan 14:31). Ang Manluluwas malagmit nagpasabut sa pagbiya sa itaas nga lawak diin gipahigayon ang Katapusang Panihapon ug dayon sa pagtuman sa Iyang katungdanan ngadto sa Dios diha sa Getsemani ug sa Golgota. Ang labing lisud nga sugo gikan sa Amahan ngadto sa Anak mao nga si Jesus mag-antus ug mamatay alang kanato (tan-awa sa 3 Nephi 27:13–14). Hunahunaa ang mga kasugoan ug mga sumbanan sa Ginoo nga alang kanimo lisud sundon. Pamalandungi kon sa unsang paagi ang pagsunod niadto nga mga sugo mopakita sa imong gugma sa Manluluwas. Sa imong personal nga journal, pagsulat og usa ka tumong nga magmasulundon sa mga paagi nga imong gipamalandungan.

Hunahunaa nga naghinumdom ka sa imong kinabuhi 60 ka tuig gikan karon. Lingini hain sa mosunod nga mga pulong ang gusto nimo sa katapusan nga maghulagway sa imong kinabuhi: malampuson, masulub-on, malipayon, bililhon, dili mabungahon, mabungahon, abunda, dili malampuson.

Si Jesus migamit og usa ka pasumbingay sa usa ka paras aron sa pagtabang sa Iyang mga disipulo sa pagsabut kon unsaon sa pagbaton og usa ka mabungahon, mauswagon, ug sa abunda nga kinabuhi.

Imahe

grapevine

Basaha ang Juan 15:1–5, nga mangita kon unsay girepresentaran sa lain-laing mga elemento niini nga pasumbingay.

Gikan niini nga mga bersikulo atong nakat-unan nga ang tanom nga paras nagrepresentar ni Jesukristo, ug ang mga sanga nagrepresentar sa mga disipulo ni Jesukristo. Ang bunga mahimong nagrepresentar sa matarung nga mga buhat ug mga lihok nga kinahanglang mamugna sa mga disipulo ni Jesukristo. Isulat kini nga mga kahulugan tapad sa mga label diha sa litrato. Ang tig-alima, sama sa giingon sa Manluluwas diha sa Juan 15:1, mao ang Langitnong Amahan. Ang tig-alima mao ang tawo nga nag-amuma sa parasan.

Ikonsiderar ang pagmarka sa matag gawas sa mga pulong pabilin o magapabilin diha sa Juan 15:4–5. Ang pulong nga pabilin ingon nga gigamit dinhi niini nga mga bersikulo nagpasabut nga magpabiling lig-on ug kanunay nga nakahawid ngadto ni Jesukristo ug sa Iyang Simbahan.

Sa Juan 15:5 atong nakat-unan nga kon kita magpabilin diha sa Manluluwas, kita makamugna og matarung nga mga buhat.

Imahe

branch

Sa Juan 15:6–8 atong makat-unan nga ang Manluluwas mitudlo nga kadtong dili magpabilin diha Kaniya mahisama sa usa ka sanga nga giputol—kini malaya ug mamatay. Ang mga indibidwal nga magpabilin diha ni Jesukristo makamugna og matarung nga mga buhat nga mohimaya sa Dios.

Unsa ang atong mahimo aron magpabilin, o lig-on nga nakakonektar, sa Manluluwas?

Basaha ang Juan 15:9–11, nga mangita kon unsay gitudlo ni Jesus nga buhaton sa Iyang mga disipulo ug unsa nga mga panalangin ang ilang madawat. Ikonsiderar ang pagmarka sa unsay imong nakit-an.

Ang Amahan ug Anak nahigugma kanato uban sa hingpit ug malungtaron nga gugma, ug ang pagsunod sa Ilang mga sugo nagtugot kanato nga makadawat sa kahingpitan sa mga panalangin nga mahigugmaon Nilang gitinguha nga ihatag kanato (tan-awa sa 1 Nephi 17:35; D&P 95:12; 130:20–21).

Gikan sa Juan 15:10–11 atong nakat-unan nga kon kita mosunod sa mga sugo, kita magpabilin diha sa gugma sa Manluluwas ug makadawat sa hingpit nga kalipay.

5. Tubaga ang mosunod nga mga pangutana diha sa imong scripture study journal:

   1. Ngano kaha nga ang pagpabilin diha sa Manluluwas nagtugot nato nga makadawat sa hingpit nga kalipay?

   2. Ngano kaha nga kadtong magpabilin diha sa Manluluwas makamugna og matarung nga mga buhat?

Paghunahuna og mga paagi nga magpabilin ka nga lig-on nga nakakonektar sa Manluluwas ug sa ingon makadawat og mas dakong kalipay.

Imahe

Elder Russell M. Nelson

Si Presidente Russell M. Nelson sa Korum sa Napulog Duha ka mga Apostoles miingon, “Sigurado nga ang labing maayo nga ebidensya sa atong pagsimba ni Jesus mao ang pagsunod Kaniya” (“Ang Misyon ug Pagpangalagad ni Jesukristo,” Liahona, Abr. 2013, 24).

Ang pagsimba usa ka dakong gugma ug pagtahud, ug ang pagsunod nagpasabut sa pagsundog o pagkopya.

Basaha ang Juan 15:12, nga mangita kon sa unsang paagi ang Manluluwas mihangyo kanato sa pagsunod Kaniya. Mahimo nimong markahan ang unsay imong makit-an.

Basaha ang Juan 15:13–17, nga mangita sa paagi nga gihigugma kita sa Manluluwas. Sa bersikulo 13, ikonsiderar ang pagmarka sa unsay gisulti sa Manluluwas nga mao ang labing mahinungdanong pagpakita sa gugma.

Imahe

Elder Claudio R. M. Costa

Badlisi ang unsay gisugyot ni Elder Claudio R. M. Costa sa Kapangulohan sa Seventy misugyot nga atong buhaton aron sa paghalad sa atong mga kinabuhi alang sa atong mga minahal: “Kita makahalad sa atong kinabuhi alang niadtong atong gihigugma dili pinaagi sa pisikal nga pagpakamatay alang kanila, pero pinaagi hinoon sa pagpakabuhi alang kanila—paghatag sa atong panahon; kanunay anaa sa ilang kinabuhi; moalagad kanila; magmatinahuron, magmahigugmaon, ug magpakita og tinuod nga gugma alang sa atong pamilya ug sa tanang tawo—sama sa gitudlo sa Manluluwas” (“Ayaw Paugmai Unsay Inyong Mabuhat Karon,” Ensign o Liahona, Nob. 2007, 74).

Paghunahuna og tawo kinsa mihalad sa iyang kinabuhi sa usa niini nga mga paagi alang kanimo.

Human ang Manluluwas mitudlo sa Iyang mga disipulo kabahin sa pagpabilin diha Kaniya ug sa pagpakita og gugma alang usag usa, Siya mitudlo kanila kon unsa ang mahitabo kanila tungod sa ilang pagpakig-uban Kaniya. Sa Juan 15:18–25 atong nakat-unan nga ang kalibutan, o kadtong mga makasasala, masilag sa mga Apostoles. Si Jesukristo miingon nga kadtong nasilag Kaniya nasilag usab sa Amahan ug nga sila adunay tulubagon sa ilang mga pagpili.

Bisan pa sa kasilag ug pagpanggukod sa uban ngadto sa Iyang mga sumusunod, Si Jesukristo mihatag og mga paagi aron ang kalibutan makadawat og pagpamatuod Kaniya. Basaha ang Juan 15:26–27, nga mangita sa mga saksi nga magpamatuod kabahin ni Jesukristo ngadto sa kalibutan.

6. Isulat ang mosunod sa ubos sa mga assignment karong adlawa diha sa imong scripture study journal:

   Akong natun-an ang Juan 14–15 ug nahuman kini nga leksyon sa (petsa).

   Dugang nga mga pangutana, mga hunahuna, ug mga panabut nga gusto nakong ipakigbahin sa akong magtutudlo: