Samtang nagbiyahe si Jesukristo ngadto sa Galilea, naghimo Siya og daghang mga milagro. Gitawag usab Niya ang Napulog Duha ka mga Apostoles, gihatagan og gahum ug gitudloan sila, ug dayon gipalakaw aron sa pagpangalagad ngadto sa katawhan.
Imo bang natan-aw ang hilabihang kadako nga gahum nga si Jesus aduna? Siya adunay gahum batok sa mga elemento sa yuta, sa pagpang-ayo sa masakiton, ug sa pagpapahawa sa mga yawa.
Gikan niini nga mga istorya atong nakat-unan nga si Jesus makaayo kanato sa atong mga balatian ug mga sakit.
Ang balatian usa ka sakit, kaluya, o kahuyang. Pamalandungi kon unsaon sa Manluluwas nga makaayo kanato o makalig-on sa atong mga kahuyang bisan wala siya makig-uban kanato karon.
Si Jesus nagtawag og napulog duha ka mga Apostoles
Kon aduna, adto sa LDS.org ug pangita og mga hulagway sa mga Apostoles karon sa Simbahan, lakip ang Unang Kapangulohan (o pangitaa ang ilang mga hulagway diha sa usa ka edisyon sa komperensya sa Ensign o Liahona).
Unsa ang nakahimo niini nga mga indibidwal nga talagsaon taliwala sa katawhan dinhi sa yuta?
Samtang imong tun-an ang Mateo 9:35–10:8, pangitaa ang mga kamatuoran mahitungod sa tahas sa mga Apostoles ug ang mga panalangin nga ilang madala diha sa imong kinabuhi.
Basaha ang Mateo 9:35, nga mangita sa unsay gibuhat ni Jesus agi og dugang sa pagpang-ayo sa katawhan. Mahimo nimong markahan ang unsay imong nakit-an.
Samtang nagsangyaw si Jesus sa ebanghelyo ug naghimog mga milagro sa tibuok Judea, ang gidaghanon sa katawhan kinsa misunod ug mitinguha Kaniya nagkadaghan.
Basaha ang Mateo 9:36–38, nga mangita sa kinsa ang giingon sa Manluluwas nga iyang gikinahanglan nga motabang Kaniya sa pagpangalagad sa tanan niadtong kinsa misunod Kaniya.
Basaha ang Mateo 10:1–4, mangita sa unsay gibuhat ni Jesus aron sa pagtubag sa mga panginahanglan sa mga tawo. Mahimo nimong markahan ang unsay imong nakit-an. Gikan niini nga istorya atong nakat-unan nga si Jesukristo nagtawag og mga Apostoles ug nagtugyan sa Iyang awtoridad diha kanila isip usa ka paagi nga Siya nangalagad ngadto sa mga tawo dinhi sa yuta. Mahimo nga imong isulat kini nga doktrina diha sa margin tupad sa Mateo 10:1–4.
Imahe
Si Kristo Nag-orden sa mga Apostoles
Timan-i nga ang mga hitabo diha sa Ebanghelyo ni Mateo wala kanunay ihatag sa han-ay nga kronolohiya. Si Jesukristo nagtawag og una sa mga Apostoles ug dayon gibansay sila sa iyang Wali Ibabaw sa Bungtod (Mateo 5–7; tan-awa sa Panag-uyon sa mga Ebanghelyo).
Basaha ang Mateo 10:5–8, nga mangita sa unsay gisugo ni Jesukristo sa Iyang mga apostoles nga buhaton.
Sa Gresyanhon nga pulong ang apostol nagpasabut og “usa nga gipadala.” Sa una ang mga Apostoles gipadala lamang ngadto taliwala niadtong anaa sa balay ni Israel (tan-awa sa Mateo 10:5–6). Sa kadugayan, ang nabanhaw nga Manluluwas misugo nga ang ebanghelyo isangyaw usab taliwala sa mga Hentil, o niadtong kinsa wala masakop sa balay ni Israel (tan-awa sa Mateo 28:19; Mga Buhat 1:8). Ang mga Apostoles sa ulahing mga adlaw gisugo usab sa pagsangyaw sa ebanghelyo ug sa pagsaksi ni Jesukristo ngadto sa tibuok kalibutan (tan-awa sa D&P 107:23).
Unsa nga mga pagkasusama ang imong natan-aw tali sa mga buhat nga gihimo ni Jesus ug sa mga buhat nga Iyang gisugo sa Iyang mga Apostoles nga buhaton? Gikan sa Mateo 10:5–8 atong nakat-unan nga ang Ginoo nagtawag og mga Apostoles sa pagsangyaw sa Iyang ebanghelyo ug sa pagbuhat sa Iyang mga buhat.
Unsa ang pipila ka mga ehemplo giunsa sa mga Apostoles karon sa pagsangyaw ug pagpangalagad ingon nga buhaton ni Jesukristo kon Siya ania dinhi?
Kon anaa, adto sa LDS.org ug pagtan-aw o pagbasa og bag-ohay nga pakigpulong sa kinatibuk-ang komperensya nga gihatag sa usa ka Apostol niining moderno nga panahon (o pagbasa og usa diha sa usa ka edisyon sa kinatibuk-ang komperensya diha sa Ensign o Liahona).
Tubaga ang mosunod nga mga pangutana diha sa imong scripture study journal:
Sa unsang paagi nga ang pagsabut nga gitawag ni Jesukristo ang mga Apostoles sa pagbuhat sa Iyang buhat makaapekto sa unsaon nato pagtubag ngadto sa unsay ilang gitudlo ug gitambag kanato nga buhaton?
Sa unsa nga mga paagi ang mga pagpangalagad ug ang mga mensahe sa mga Apostoles niining moderno nga panahon nakaapekto sa imong kinabuhi?
Pamalandungi kon unsaon nimo sa matinud-anong paagi pagpangita og mga oportunidad sa pagpaminaw, pagtuon, ug sa paggamit sa mga pulong sa pinili nga mga Apostoles sa Ginoo.
Nagtudlo si Jesus sa Napulog Duha ka mga Apostoles sa wala pa sila manlakaw sa pagsangyaw ug sa pagpangalagad
Diha sa Mateo 10:9–18 atong mabasa nga ang Ginoo mitudlo sa mga Apostoles sa pagsalig sa Langitnong Amahan nga mohatag sa ilang mga panginahanglan samtang sila nagbiyahe sa pagsangyaw sa ebanghelyo. Nagtudlo usab ang Manluluwas kanila sa pagpanalangin sa katawhan kinsa mipasaka ug mipapuyo kanila.
Imahe
Si Jesus ug ang mga Apostoles
Si Jesus mitudlo sa Iyang mga Apostoles
Paghunahuna og usa ka panahon sa dihang usa ka tawo nga lahi og tinuohan nangutana kanimo og usa ka lisud nga pangutana mahitungod sa ebanghelyo o mahitungod sa usa ka kontrobersyal nga butang kalabut sa Simbahan. Unsa ka kamasaligon nga nahibalo sa unsay imong kinahanglang isulti niana nga sitwasyon?
Samtang imong padayunon ang pagtuon sa Mateo 10, pangita og usa ka baruganan diha sa mga pagtudlo ni Jesus sa Iyang mga Apostoles nga makatabang kanato kon kita kinahanglan nga magpasabut sa ebanghelyo o mopakigbahin sa atong pagpamatuod.
Basaha ang Mateo 10:16–20, nga mangita sa mga matang sa mga hagit nga gisulti ni Jesus nga pagaatubangon sa mga Apostoles samtang sila nagbiyahe ug nagsangyaw.
Sumala sa mga bersikulo 19–20, sa unsa nga paagi mahibalo ang mga Apostoles unsa ang isulti niining mahagiton nga mga sitwasyon? (Ang pulong “ayaw kamo pagkalibug” nagpasabut “nga dili kaayo mabalaka”.)
Gikan sa unsay imong nakat-unan sa Mateo 10:19–20, kompletuha ang mosunod nga baruganan mahitungod sa pagpakigsulti ngadto sa uban: Kon kamo anaa sa pag-alagad sa Ginoo, Siya mo .
Tubaga ang usa o ang duha sa mosunod nga mga pangutana diha sa imong scripture study journal:
Sa unsa nga paagi nga ang baruganan nga imong nailhan diha sa ibabaw motabang nimo kon usa ka tawo mangutana nimo og usa ka mahagitong pangutana mahitungod sa Simbahan?
Kanus-a nimo gibati ang pagdasig sa Ginoo nga mahibalo sa unsay isulti ngadto sa lain nga tawo?
Ang Mateo 10:21–42 nagrekord nga si Jesukristo mipadayon sa paghatag sa Iyang mga Apostoles og mga panudlo, mga pahimatngon, ug paghupay mahitungod sa mga hagit nga ilang atubangon.
Basaha ang Mateo 10:37–38, nga mangita sa mga sakripisyo nga gisulti sa Manluluwas nga kita kinahanglan gayud andam sa paghimo isip iyang mga disipulo. Ang pulong “takus kanako” niini nga mga bersikulo nagpasabut nga takus nga representante sa Ginoo ug takus sa Iyang mga panalangin.
Pamalandungi kon nganong kinahanglan alang sa mga disipulo ni Jesukristo sa paghigugma Kaniya labaw sa tanan—lakip ang ilang kaugalingon nga mga miyembro sa pamilya.
Imahe
Si Kristo nagpas-an sa krus
Ang krus nga giingon diha sa Mateo 10:38 nagpasabut sa pisikal nga krus nga gipas-an ni Jesus aron sa pagtuman sa kabubut-on sa Langitnong Amahan ug pagdala sa kaluwasan ngadto sa uban.
Unsa sa imong hunahuna ang gipasabut ngari kanato sa pagpas-an sa atong krus ug mosunod Kaniya?
Basaha ang Mateo 10:39, nga mangita sa mga baruganan nga gitudlo sa Manluluwas mahitungod sa sakripisyo. Ang Hubad ni Joseph Smith nagklaro sa sinugdanan niini nga bersikulo nga mabasa og, “Ang nagtinguha sa pagluwas sa iyang kinabuhi …” (Hubad ni Joseph Smith, Matthew 10:39 ). Niini nga kinatibuk-ang kahulugan, ang mga pulong “pagluwas sa iyang kinabuhi” nagpasabut nga magpuyo og hinakog kay sa maninguha sa pag-alagad sa Dios ug sa Iyang mga anak.
Sa imong hunahuna sa unsa nga mga paagi ang mga tawo kinsa nakatutok sa ilang kaugalingon nga kabubut-on ug hinakog nga mga tinguha sa kadugayan “kawagtangan” sa ilang kinabuhi? Kompletuha ang mosunod nga baruganan gamit ang imong kaugalingon nga mga pulong: Kon kita maninguha sa pagluwas sa atong kinabuhi, niana .
Ikonsiderar ang pagmarka sa saad diha sa bersikulo 39 nga gihimo sa Manluluwas ngadto niadtong gikalimtan ang ilang mga kinabuhi alang Kaniya. Ang pagkalimot sa atong mga kinabuhi alang Kaniya labaw pa kay sa magpakaandam nga mamatay alang Kaniya. Kini nagpasabut sa pagkaandam sa paghatag sa atong mga kaugalingon sa matag adlaw aron sa pag-alagad Kaniya ug sa mga tawo nga naglibut kanato.
Unsa sa imong hunahuna ang gipasabut nga kita makakaplag sa atong kinabuhi samtang atong kalimtan kini alang Kaniya?
Kompletuha ang mosunod nga baruganan gamit ang imong kaugalingon nga mga pulong: Kon atong kalimtan ang atong kinabuhi alang ni Jesukristo, niana .
Imahe
Presidente Thomas S. Monson
Basaha ang mosunod nga pahayag ni Presidente Thomas S. Monson: “Ako nagtuo nga ang Manluluwas nagsulti kanato nga gawas kon kalimtan nato ang atong kaugalingon diha sa pagserbisyo sa uban, adunay gamay ra nga katuyoan sa atong kaugalingong kinabuhi. Kadtong kinsa nagpakabuhi lamang alang sa ilang kaugalingon sa katapusan maminusan ang ilang pagkatawo ug sa mapasumbingayong paagi mawagtangan sa ilang kinabuhi, samtang kadtong gikalimtan ang ilang kinabuhi diha sa pagserbisyo sa uban motubo ug molambo —ug sa ingon maluwas ang ilang kinabuhi.” (“Unsa may Akong Nabuhat alang sa Usa ka Tawo Karon?” Ensign o Liahona, Nob. 2009, 85.
Tubaga ang mosunod nga mga pangutana diha sa imong scripture study journal:
Kinsa ang imong nahibaloan nga mipili sa pagkalimot sa iyang kinabuhi alang ni Jesukristo? Giunsa niini nga tawo sa paghimo niana?
Unsay epekto niini nga desisyon diha niini nga tawo?
Unsa ang pipila ka mga butang nga imong mabuhat karon o sa umaabut sa pagkalimot sa imong kinabuhi diha sa pag-alagad ni Jesukristo ug sa uban?
Isulat ang mosunod diha ubos sa buluhaton karong adlawa sa imong scripture study journal:
Akong natun-an ang Mat. 8–10 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panabut nga akong gusto nga ipakigbahin sa akong magtutudlo: