Si Apostol Pablo misulat ngadto ni Timoteo, usa ka lider sa priesthood didto sa Efeso, ug mitambag kaniya nga siguroon nga natudlo ang tinuod nga doktrina. Gihatag niya ang mga kwalipikasyon alang sa mga bishop ug mga deacon ug mitambag ni Timoteo nga mahimong ehemplo sa mga magtutuo. Gitambagan ni Pablo ang mga Santos nga atimanon ang mga kabus ug mga biyuda. Gitapos niya ang iyang epistola pinaagi sa pagtudlo nga “ang pagkamahigugmaon og salapi mao ang gamut sa tanang pagkadautan” (1 Timoteo 6:10).
Gimanduan ni Pablo si Timoteo kalabut sa iyang mga responsibilidad sa pagbantay sa Simbahan
Imahe
President Thomas S. Monson
Basaha ang mosunod nga istorya nga gihatag ni Presidente Thomas S. Monson: “Ako nakahinumdom og usa ka kasinatian daghang katuigan nang milabay sa dihang nag-alagad pa ako isip usa ka bishop. Atol sa pangbukas nga buluhaton sa among miting sa priesthood usa ka Domingo sa buntag, kami nangandam sa pag-orden sa usa ka batan-ong lalaki ngadto sa katungdanan sa priest. Ang mibisita sa among ward nianang adlawa mao ang usa ka high councilor kinsa nag-alagad usab isip temple worker. Samtang akong giandam ang batan-ong lalaki sa paglingkod atubangan sa kongregasyon aron kami makapadayon sa ordinasyon, ang high councilor mipakgang kanako ug miingon, ‘Bishop, kadtong mga i-orden kanunay gayud nakong ipaatubang sa templo.’ Iyang giliso ang lingkuranan aron ang direksyon sa batan-ong lalaki mag-atubang sa templo. Dayon akong nahibaloan ang wala gitugot nga praktis” (“Pangbukas nga Pakigpulong” [tibuok kalibutan nga miting sa pagbansay sa pagpangulo, Nob. 2010], lds.org/broadcasts).
Isip bishop, si Presidente Monson, imbis nga ang high councilor, mao ang awtorisado nga modumala sa buhat sa Ginoo diha sa iyang ward. Sa imong hunahuna unsa ang kinahanglang buhaton sa usa ka bishop sa ingon nga sitwasyon? (Ang sumpay sa istorya ni Presidente Monson makita sa ulahing bahin niini nga leksyon.)
Misulat si Apostol Pablo og epistola ngadto ni Timoteo, usa ka batan-ong lider sa priesthood didto sa Efeso. Sa branch sa Simbahan nga iyang gidumala, nag-atubang si Timoteo og mga hagit nga susama niadtong giatubang ni Presidente Monson diha sa istorya nga imong nabasa.
Basaha ang 1 Timoteo 1:3–7, nga mangita kon unsa nga responsibilidad ang gihatag ni Pablo kang Timoteo.
Ang mga pulong nga tinumo-tumo nga mga sugilanon (bersikulo 4) nagpasabut sa sayop nga mga pagtulun-an; ang pagtagad sa “dili matapos nga kaasuyan sa kaagi sa mga kagikan” (bersikulo 4) nagpasabut sa sayop nga tradisyon nga ang kaluwasan moabut lamang niadtong pinili nga binhi ni Abraham, nga sa kasagaran nailhan pinaagi sa ilang taas o walay katapusang kaagi sa mga kagikan; ug ang “walay kapuslanan nga mga pagtabi” (bersikulo 6) nagpasabut sa walay pulos nga panaghisgutan.
Sumala sa 1 Timoteo 1:6–7, nganong importante man alang ni Timoteo nga tumanon ang responsibilidad nga gihatag kaniya ni Pablo?
Gikan sa pagtulun-an ni Pablo atong makat-unan nga ang mga lider sa priesthood dunay responsibilidad sa pagsiguro nga ang tinuod nga doktrina ug husto nga mga buluhaton natudlo.
Imahe
President Thomas S. Monson
Basaha ang sumpay sa istorya ni Presidente Monson, nga mangita kon sa unsang paagi niya gitubag ang gibuhat sa high councilor: “Akong nakita ang potensyal niini nga praktis [ang pagpaatubang sa tawo ngadto sa templo] nga mahimong mokuyanap kini. Bisan tuod og manghud lang kaayo sa high councilor, ako nahibalo unsay kinahanglang buhaton. Akong gibalik og liso ang lingkuranan aron mag-atubang na usab kini sa kongregasyon ug misulti ngadto kaniya, ‘Sa among ward, kami mag-atubang sa kongregasyon’” (“Pangbukas nga Pakigpulong,” lds.org/broadcasts).
Diha sa imong scripture study journal, pagsulat bahin kon sa unsang paagi nga ang mga miyembro sa Simbahan napanalanginan sa mga lider sa priesthood nga nagtrabaho aron masiguro nga ang tinuod nga doktrina ug husto nga mga buluhaton natudlo diha sa Simbahan.
Diha sa 1 Timoteo 1:8–11 atong mahibaloan nga gipasidan-an ni Pablo kadtong nagtinguha nga mahimong mga magtutudlo sa balaod sa Dios apan walay husto nga panabut sa balaod. Basaha ang 1 Timoteo 1:12–16, nga mangita kon nganong mipadayag og pasalamat si Pablo ngadto ni Jesukristo.
Sumala sa mga bersikulo 15–16, sa unsang paagi nga si Pablo nahimong “panig-ingnan” alang sa tanan nga mituo ni Jesukristo?
Diha sa 1 Timoteo 1:17–2:15 gitambagan ni Pablo si Timoteo nga mohupot sa iyang pagtuo, ug gitudlo niya nga si Jesukristo mao ang atong Tigpataliwala. Gitambagan usab ni Pablo ang mga babaye nga magsinina og tarung. Diha sa 1 Timoteo 3 atong mabasa ang mga pagtulun-an ni Pablo kalabut sa mga kwalipikasyon alang sa mga bishop ug mga deacon. Hinumdumi nga kining mga deacon sa karaang Simbahan dili mga 12 o 13 anyos nga mga batan-ong lalaki, kon asa komon kini karon.
Gihulagway ni Pablo ang mga kinaiya sa usa ka matinud-anong ministro ni Jesukristo
Diha sa 1 Timoteo 4:1–11 atong mabasa ang panagna ni Apostol Pablo nga “sa kaulahiang mga panahon” (bersikulo 1) ang ubang mga miyembro sa Simbahan mobiya sa pagtuo ug mosunod sa sayop nga mga pagtulun-an ug mga buluhaton, sama sa pagdili sa pagminyo. Giawhag ni Pablo si Timoteo nga amumahan ang mga Santos uban sa tinuod nga doktrina.
Basaha ang 1 Timoteo 4:12, nga mangita kon unsa ang gitambag ni Pablo kang Timoteo nga siya mahimo. Ang pulong nga sinultihan diha sa bersikulo 12 nagpasabut sa pamatasan o kinaiya .
Sa imong hunahuna unsa man ang gipasabut sa mahimong “panig-ingnan sa mga magtutuo”?
Sa unsang mga paagi nga gitambagan ni Pablo si Timoteo nga mahimong panig-ingnan sa mga magtutuo?
Hunahunaa ang mga paagi nga gitambag ni Pablo kang Timoteo nga mahimong panig-ingnan sa mga magtutuo (tan-awa sa 1 Timoteo 4:12). Pagpili og tulo niadtong mga paagi, ug diha sa imong scripture study journal, isulat kon sa unsang paagi nga ang usa ka tawo mahimong ehemplo sa mga magtutuo sa matag usa niadtong mga paagi.
Basaha ang 1 Timoteo 4:13–16, nga mangita sa dugang nga tambag nga gihatag ni Pablo kang Timoteo nga makatabang niya nga mahimong ehemplo sa mga magtutuo.
Sama sa narekord diha sa 1 Timoteo 5, gimanduan ni Pablo si Timoteo kon unsaon sa mga Santos pag-atiman niadtong mga nanginahanglan, lakip na ang mga biyuda.
Giawhag ni Pablo si Timoteo nga tabangan ang uban nga magtinguha og mahangturong mga katigayunan
Imahe
coins and bills
Sa imong hunahuna ang pagbaton ba og daghang salapi moresulta sa dugang nga kadautan o dugang nga kaayohan? Ngano man?
Diha sa 1 Timoteo 6, atong mabasa ang tambag ni Pablo kang Timoteo kalabut sa salapi. Basaha ang 1 Timoteo 6:6–10, nga mangita sa gitudlo ug gipasidaan ni Pablo bahin sa katigayunan.
Sa imong hunahuna unsa man ang gipasabut sa mga pulong nga “ang pagkamahigugmaon og salapi mao ang gamut sa tanang pagkadautan” (1 Timoteo 6:10).
Usa ka kamatuoran nga atong makat-unan gikan sa mga pagtulun-an ni Pablo mao nga ang pagkamahigugmaon og salapi moresulta sa pagkadili matarung ug apostasiya.
Importante nga masabtan nga ang pagkamahigugmaon og salapi kay sa salapi mismo moresulta sa pagkadili matarung. Ikonsiderar kon sa unsang paagi nga ang pasidaan ni Pablo mapatalinghugan sa tanang mga tawo—gikan sa mga kabus ngadto sa mga adunahan.
Diha sa imong scripture study journal, ipasabut kon sa unsang paagi nga ang pagkamahigugmaon og salapi (kay sa salapi mismo) moresulta sa pagkadili matarung.
Basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:
Imahe
Elder Dallin H. Oaks
“Wala gayuy ingon nga nag-uban nga kadautan bahin sa salapi. Ang Maayong Samarianhon migamit sa samang salapi aron moserbisyo sa iyang isigkatawo nga gigamit ni Judas sa pagluib sa Manluluwas. Kini ‘ang pagkamahigugmaon og salapi [nga mao] ang gamut sa tanang pagkadautan.’(1 Tim. 6:10; italics gidugang.) Ang kritikal nga kalainan mao ang matang sa espiritwalidad nga atong gipakita sa pagtan-aw, pagtimbang-timbang, ug pagdumala sa mga butang niining kalibutan ug sa atong mga kasinatian dinhi.
“Kon tugutan nga mahimong butang nga simbahon o prayoridad, ang salapi makapahimo nato nga hakog ug mapahitas-on, ‘manghambog sa kawang nga mga butang sa kalibutan.’ (Alma 5:37.) Sa laing bahin, kon gamiton aron matuman ang atong legal nga mga obligasyon ug sa pagbayad sa atong mga ikapulo ug mga halad, ang salapi makapakita og kaligdong ug makapalambo og pagkadili hakog. Ang espirituhanong linamdagan nga paggamit sa kabtangan makatabang sa pag-andam kanato alang sa mas taas nga balaod sa celestial nga himaya” (“Spirituality,” Ensign, Nob. 1985, 63).
Basaha ang 1 Timoteo 6:11–12, 17–19, nga mangita sa tambag nga gihatag ni Pablo kang Timoteo ug niadtong kinsa mga adunahan.
Ikonsiderar kon sa unsang paagi nga ang tambag ni Pablo makatabang nato aron makabaton sa husto nga kinaiya sa pagtinguha og mga katigayunan ug sa paggamit sa salapi ug uban pang matang sa pisikal nga katigayunan.
Sumala sa 1 Timoteo 6:19, kon misalig ang mga Santos sa Dios ug buhong sa maayong mga binuhatan, unsa may gisulti ni Pablo nga ilang “makuptan”?
Usa ka kamatuoran nga atong makat-unan gikan sa tambag ni Pablo mao nga kon misalig kita sa buhi nga Dios ug buhong sa maayong mga binuhatan, nan makuptan nato ang kinabuhing dayon.
Tubaga ang mosunod nga pangutana diha sa imong scripture study journal: Kon ang pagsalig ngadto sa Dios ug pagtinguha sa pagkamatarung mao ang atong labing dako nga mga prayoridad, sa unsang paagi kana makaapekto sa atong pagtan-aw, pagtinguha, ug paggamit sa salapi?
Samtang mosalig ka sa Dios ug himoon ang pagtinguha sa pagkamatarung nga mao ang imong labing dako nga prayoridad, makabaton ka sa tinuod nga mga katigayunan sa kinabuhing dayon.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang 1 Timoteo ug nahuman kini nga leksyon sa (petsa).
Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: