Pasiuna sa Sukaranang mga Doktrina

Ang mosunod nga Sukaranang mga Doktrina kinahanglang mapasabut og maayo diha sa seminary:

Dios nga Kapangulohan
Plano sa Kaluwasan
Pag-ula ni Jesukristo
Dispensasyon, Apostasiya, ug Pagpahiuli
Mga Propeta ug Pagpadayag
Ang Priesthood ug mga Yawe sa Priesthood
Mga Ordinansa ug mga Pakigsaad
Kaminyoon ug Pamilya
Mga Kasugoan

Ang mga magtutudlo motabang sa mga estudyante sa pag-ila, pagsabut, pagtuo, pagpasabut, ug sa paggamit niining sukaranang mga doktrina sa ebanghelyo samtang magtuon sila sa mga kasulatan. Ang pagbuhat niini makatabang sa mga estudyante sa paglig-on sa ilang mga pagpamatuod ug pagdugang sa ilang pagdayeg sa gipahiuli nga ebanghelyo ni Jesukristo. Ang pagkat-on sa Sukaranang mga Doktrina makatabang usab sa mga estudyante nga mahimong mas andam sa pagsunod sa ebanghelyo ug sa pagtudlo niining importante nga mga kamatuoran ngadto sa uban. Ang mga leksyon niini nga manwal gihimo nga gihunahuna ang Sukaranang mga Doktrina. Importante nga masabtan nga ang ubang importante nga mga doktrina sa ebanghelyo hatagan usab og gibug-aton niini nga manwal, bisan kon wala kini malista diha sa Sukaranang mga Doktrina. Ang pagtudlo sa sukaranang mga doktrina sa ebanghelyo mahitabo samtang magtuon ka sa mga kasulatan matag adlaw uban sa mga estudyante ug samtang imo silang tabangan nga makasag-ulo sa importanting mga tudling sa kasulatan. Ang paglambo diha sa panabut, pagtuo, ug pagsunod sa Sukaranang mga Doktrina usa ka proseso nga mahitabo sulod sa upat ka tuig sa seminary ug magpadayon sa tibuok kinabuhi sa usa ka estudyante. Mahimo nimong hatagan ang mga estudyante sa lista sa Sukaranang mga Doktrina.

Assessment sa Sukaranang mga Doktrina

Usa ka Assessment sa Sukaranang mga Doktrina gidesinyo sa paghatag sa mga magtutudlo og impormasyon nga ilang magamit aron mas makapanalangin sa mga kinabuhi sa ilang mga estudyante. Among girekomendar nga ang mga magtutudlo mopahigayon niini nga assessment atol sa unang semana sa klase ug pag-usab niini sa dayon na nga pagtapos sa tuig. Aron makita ang Assessment sa Sukaranang mga Doktrina ug ubang mga assessment diha sa S&I website (si.lds.org), pangitaa gamit ang pulong nga assessment.

Ang mga magtutudlo kinsa mopadala sa mga resulta sa assessment sa ilang mga estudyante ngadto sa S&I Office of Research makadawat og report nga makatabang kanila sa pagpahiangay sa ilang pagtudlo aron mas makatubag sa mga panginahanglan sa ilang mga estudyante. Sama pananglit, kon ang mga resulta nagpakita nga ang mga estudyante wala makasabut sa doktrina sa paghinulsol, pipila ka mga leksyon diha sa tinuig nga kurikulum ang ipaila nga mahimong makatabang sa mga estudyante nga mas makasabut niini nga doktrina. Samtang ang mga magtutudlo mainampuong mogamit niini nga impormasyon diha sa ilang pasunod nga pamaagi sa pagtudlo sa kasulatan, ang atong mga kabatan-onan ug mga young adult mas maandam sa pagtuman sa Tumong sa Seminaries and Institutes of Religion.