Mga Taga-Efeso 4

Dapita ang mga estudyante sa paghunahuna sa mosunod nga duha ka mga sitwasyon:

1. Sa eskwelahan mihangyo ang imong magtutudlo sa klase nga ipahayag ang ilang mga hunahuna bahin sa usa ka kontrobersyal nga hilisgutan. Samtang mipakigbahin ang mga estudyante sa ilang mga opinyon, imong mamatikdan nga kadaghanan nila misuporta sa usa ka butang nga lahi sa mga pagtulun-an sa Simbahan.

2. Ang mga tighimo og balaod sa inyong nasud mihimong legal sa kinaiya nga gitudlo sa mga lider sa Simbahan nga kini sayop.

• Ngano nga ang mga sitwasyon nga ingon niini lisud man sa usa ka miyembro sa Simbahan?

Dapita ang mga estudyante sa pagpangita samtang magtuon sila sa Mga Taga-Efeso 4:1–16 sa kamatuoran kon unsaon nato sa pagkahibalo sa unsay husto ug unsay sayop sa kalibutan nga nagkausab ang mga hiyas ug mga gituohan.

Pahinumdumi ang mga estudyante nga dinhi niini nga sulat tingali si Pablo nagsulat ngadto sa bag-ong mga miyembro sa Simbahan. Dapita ang usa ka estudyante sa pagbasa og kusog sa Mga Taga-Efeso 4:1–6. Hangyoa ang klase sa pagsunod ug mangita sa unsay gitudlo ni Pablo mahitungod sa Simbahan ug sa doktrina niini.

• Unsa man ang gitudlo ni Pablo mahitungod sa Simbahan ug sa doktrina niini?

• Sa inyong hunahuna unsay buot ipasabut ni Pablo dihang gitudlo niya nga duna ray “usa ka Ginoo, usa ka pagtuo, [ug] usa ka bautismo”? (bersikulo 5). (Sa panahon ni Pablo, sama sa atoa, dunay usa ra ka tinuod nga Simbahan ni Jesukristo dinhi sa yuta [tan-awa sa D&P 1:30].)

I-summarize ang Mga Taga-Efeso 4:7–10 pinaagi sa pagpasabut nga si Pablo mitudlo nga pinaagi sa Pag-ula ni Jesukristo, tanan kita gihatagan sa gasa sa Iyang grasya. Gitudlo sab niya nga gihatagan ni Kristo og ubang mga gasa ang katawhan.

Dapita ang usa ka estudyante sa pagbasa og kusog sa Mga Taga-Efeso 4:11. Hangyoa ang klase sa pagsunod, nga mangita kon unsay gihatag sa Ginoo diha sa Simbahan. Dapita ang mga estudyante sa pagreport unsay ilang nakit-an.

• Unsa ang gihatag sa Ginoo ngadto sa Simbahan?

Ipasabut nga ang ngalan sa mga office sa priesthood sa Simbahan karon tingali dili pareho sa ngalan nga gigamit ni Pablo sa iyang panahon ug ang nag-unang Simbahan tingali wala sa tanang calling sama sa ania sa atong Simbahan karong panahuna. Sama pananglit, gitudlo ni Propeta Joseph Smith nga ang “ebanghelista usa ka Patriarch” (Mga Pagtulun-an sa mga Presidente sa Simbahan: Joseph Smith [2007], 164). Usab, ang pastor usa ka magbalantay, o tawo nga naggiya sa usa ka panon—usa ka haum nga deskripsyon sa moderno nga mga bishop, mga branch president, mga stake president, ug mga district president.

Isulat sa pisara ang mosunod nga dili kompleto nga sentence: Ang Ginoo mitawag og mga apostoles, mga propeta, ug uban pang mga lider sa Simbahan sa pagtabang nga …

Dapita ang usa ka estudyante sa pagbasa og kusog sa Mga Taga-Efeso 4:12–13. Hangyoa ang klase sa pagsunod, nga mangita kon nganong ang Ginoo mihatag sa Simbahan og mga apostoles, mga propeta, ug ubang mga lider.

• Sa unsang katuyoan nga ang Ginoo mihatag og mga apostoles, mga propeta, ug uban pang mga lider para sa Iyang Simbahan? (Idugang ang pagsangkap sa mga balaan [paghingpit sa mga Santos nga pamahayag diha sa pisara.)

• Sa unsang mga paagi nga ang mga apostoles, mga propeta, ug uban pang mga lider sa Simbahan makatabang sa paghingpit kanato?

Dapita ang usa ka estudyante sa pagbasa og kusog sa Mga Taga-Efeso 4:14. Hangyoa ang klase sa pagsunod ug mangita og laing rason nganong ang Ginoo mihatag og mga apostoles, mga propeta, ug ubang mga lider.

• Unsa pay ubang hinungdan nga ang Ginoo mihatag niini nga mga lider para sa mga miyembro sa Simbahan? (Idugang sa pisara ang ug pagpanalipud kanila gikan sa sayop nga mga doktrina aron ang tibuok nga kamatuoran mabasa nga: Ang Ginoo mitawag og mga apostoles, mga propeta, ug uban pang mga lider sa Simbahan sa pagtabang nga mahingpit ang mga Santos ug mapanalipdan sila gikan sa mini nga mga doktrina.)

Imahe

boat in rough water

Aron matabangan ang mga estudyante nga makasabut sa paghulagway diha sa bersikulo 14, i-display ang litrato sa usa ka sakayan nga naa sa tunga sa baluron nga dagat. O ikaw o usa ka estudyante modrowing og litrato diha sa pisara sa usa ka sakayan nga naa sa tunga sa baluron nga dagat.

• Unsa ang mahitabo sa sakayan nga gikuso-kuso sa balud diha sa dagat nga may kusog nga bagyo?

I-refer ngadto sa sitwasyon nga gipresentar sa pagsugod sa leksyon.

• Sa unsang paagi ang sakayan nga gikuso-kuso sa balud sa baluron nga dagat ikapahisama sa tawo nga “igatuya-tuya ug igaliyok-liyok” (bersikulo 14) sa mausabon nga hasmag sa sayop nga mga pagtulun-an ug mga opinyon sa katawhan?

• Sa unsang paagi nga ang mga pagtulun-an sa mga apostoles, mga propeta, ug ubang mga lider sa Simbahan makatabang sa mga sumusunod sa Dios sa paglatas niining baluron nga dagat ug luwas nga makabalik ngadto sa Langitnong Amahan?

Isulat sa pisara ang mosunod nga mga calling sa Simbahan: mga apostoles, propeta, patriarch, bishop, ug mga magtutudlo. Dapita ang mga estudyante sa pagpili og duha sa mga calling ug isulat diha sa ilang mga class notebook o scripture study journal kon sa unsang paagi ang usa ka lider makatabang nila nga molambo o motubo sa esprituhanong paagi og makatabang nga sila mapanalipdan gikan sa sayop nga doktrina ug pagkalingla. Human sa igong panahon, dapita ang pipila ka estudyane sa pagpakigbahin og usa sa mga kasinatian nga ilang gisulat.

Dapita ang usa ka estudyante sa pagbasa og kusog sa Mga Taga-Efeso 4:15–16. Hangyoa ang klase sa pagsunod, nga mangita sa pamaagi diin ang atong mga lider sa Simbahan motudlo kanato sa mga kamatuoran sa ebanghelyo.

• Sa unsang paagi ang atong mga lider sa Simbahan motudlo kanato sa mga kamatuoran sa ebanghelyo?

Pagdala sa klase og kaswal nga coat o jacket (mas maayo kanang gisi-gisi na o gum-os na kaayo). Usab, kon posible, pagdala og coat o jacket nga haum pang isul-ob sa maanindot nga kalihokan. (Kon gusto nimo, mahimo nga usa ka kaswal nga t-shirt ug usa ka nindot nga t-shirt ang imong dad-on. Siguroa nga ang duha ka t-shirt may igong kadak-on para sa estudyante nga isapaw sa iyang gisul-ob.) Dapita ang usa ka estudyante sa pagduol sa atubangan sa klase ug ipasul-ob ang kaswal nga coat. Hangyoa ang estudyante sa pagtuyok ug ipakita ang coat ngadto sa klase. Sunod, hangyoa siya sa paghukas sa kaswal nga coat ug dayon ipasul-ob ang mas nindot nga coat ug ipakita kini sa klase. Pasalamati ang estudyante, ug dapita siya sa paghubo sa coat ug palingkura.

• Asa niining duha ka coat ang mas angay para sa nindot nga kalihokan?

Pahinumdumi ang mga estudyante nga si Pablo tingali namulong ngadto sa bag-ong mga kinabig sa Simbahan. Dapita ang mga estudyante sa pagpangita samtang nagtuon sila sa Mga Taga-Efeso 4:17–32 kon sa unsang paagi gigamit ni Pablo ang pagkumpara sa paghukas og usa ka butang ug pagsul-ob og lain sa pagtudlo niining bag-ong mga kinabig unsay ilang gikinahanglang buhaton isip mga disipulo ni Jesukristo.

Dapita ang usa ka estudyante sa pagbasa og kusog sa Mga Taga-Efeso 4:17–20. Hangyoa ang klase sa pagsunod, nga mangita sa mga pulong nga naghulagway sa espirituhanong kahimtang sa mga Hentil nga wala mopasakop sa Simbahan.

• Giunsa sa paghulagway ni Pablo ang espirituhanong kahimtang sa ubang mga Hentil?

• Unsay gisulti ni Pablo nga maoy rason nganong ang ubang mga Hentil anaa niini nga kahimtang?

Dapita ang usa ka estudyante sa pagbasa og kusog sa Mga Taga-Efeso 4:21–24. Hangyoa ang klase sa pagsunod, nga mangita kon unsay nakatabang sa mga miyembro nga mahimong lahi kay sa ubang tawo.

• Sumala sa bersikulo 21, unsay nakatabang sa mga miyembro sa Simbahan nga mahimong lahi kay sa ubang mga tawo?

Mo-refer ngadto sa estudyante nga misul-ob sa duha ka coat, ug pangutan-a ang klase unsay angay buhaton niana nga estudyante sa dili pa niya isul-ob ang mas nindot nga jacket o coat.

• Unsa ang giingon ni Pablo sa mga miyembro sa Simbahan nga “hukason”? (bersikulo 22). (Mahimo nimong pahinumduman ang mga estudyante nga ang pulong nga gihubad isip paggawi kasagaran nag-refer sa kinaiya sa usa ka tawo sa kinatibuk-an.)

• Unsay buot ipasabut sa “isul-ob ang bag-ong pagkatawo”? (bersikulo 24). (Aron matawo pag-usab sa espirituhanong paagi [tan-awa sa Mosiah 27:25] ug makugihong pagsunod sa ebanghelyo ni Jesukristo sa matag adlaw.)

• Unsa nga kamatuoran ang atong mahibaloan gikan niini nga mga bersikulo mahitungod sa mga disipulo ni Jesukristo? (Ang mga estudyante mahimong mogamit og lain-laing mga pulong apan siguroa nga mahibaloan nila ang usa ka kamatuoran nga susama sa mosunod: Ang mga disipulo ni Jesukristo mihukas sa ilang karaan, masalaypong mga kinaiya ug misul-ob sa bag-o, matarung nga mga kinaiya.)

Dapita ang mga estudyante sa pagkopya sa mosunod nga tsart diha sa ilang mga class notebook o mga scripture study journal:

Ipares-pares ang mga estudyante. Dapita ang matag pares sa pagbasa og kusog sa Mga Taga-Efeso 4:25–32. Hangyoa sila nga sulatan ang ilang mga tsart samtang magbasa sila, nga ilista ubos sa “Karaang Kaugalingon” ang mga butang nga kinahanglang “hukason” sa mga disipulo ni Kristo (bersikulo 22) o “isalikway” (bersikulo 31) ug ilista ubos sa “Bag-ong Kaugalingon” ang mga butang nga kinahanglang “isul-ob”sa mga disipulo ni Kristo (bersikulo 24). Ipasabut nga sa Hubad ni Joseph Smith para sa Mga Taga-Efeso 4:26 giilisan ang “Pagkasuko kamo, apan ayaw kamo pagpakasala” sa pangutana nga “Mahimo bang masuko kamo, ug dili makasala.

Human sa igong panahon, dapita ang matag pares sa paghunahuna og usa ka sitwasyon nga naghulagway sa posiblling kinaiya sa usa ka tawo kinsa wala mohukas sa masalaypon niyang kinaiya sa usa sa mga dapit nga gihulagway ni Pablo. Dapita usab ang matag pares sa paghunahuna og usa ka sitwasyon nga naghulagway kon unsa kaha ang linihukan sa mao nga tawo kon siya moduol kang Kristo ug mamahimong bag-o nga tawo. Human ang mga estudyante nakaplano na, dapita ang pipila ka pares sa pagduol sa atubangan sa klase ug mopasabut sa ilang mga sitwasyon. Human ang pipila ka pares makapresentar, pangutan-a ang klase:

• Sa unsang paagi ang usa ka miyembro sa Simbahan nga nahibalo sa kamatuoran apan wala magsunod niini mahisama sa tawo nga gidapit sa nindot nga kalihokan apan wala magsul-ob ug angay nga saput?

• Unsa nga mga hagit ang tingali atong sagubangon samtang maningkamot kita sa paghukas sa atong karaan, masalaypong mga kinaiya ug mamahimong bag-o nga mga disipulo ni Kristo?

• Nganong importante sa mga miyembro sa Simbahan ang paghinumdom nga ang paghukas sa karaang pamaagi ug hingpit nga pagsunod ni Jesukristo usa ka padayong proseso ug dili usa ra ka panahon nga kalihokan?

Ipasabut nga para sa kadaghanan, ang pagsul-ob sa bag-ong mga pamaagi sa pagkamatarung ingon ra ka yano sa paghimo og gagmayng kausaban sama sa pagkahimong mas mabination pa og gamay o mapailubon, mas hingpit og gamay nga pagtuman sa mga sugo, o pagwagtang sa ngil-ad nga mga kinaiya sa atong kinabuhi.

Ipamatuod ang kaimportante sa paghukas sa atong karaan, masalaypong mga pamaagi ug pagsul-ob sa bag-ong mga pamaagi sa pagkamatarung. Dapita ang mga estudyante nga isulat ang usa ka butang nga ilang mahimo karon sa paghukas sa karaan nilang mga pamaagi ug hingpit nga mosunod ni Jesukristo. Awhaga sila nga buhaton ang unsay ilang gisulat.

Aron matabangan ang mga estudyante nga makapasabut sa doktrina nga gitudlo diha sa Mga Taga-Efeso 4:11–14, dapita ang mga estudyante nga moatubang sa ilang kapares ug gamiton ang pagtulun-an ni Pablo sa Mga Taga-Efeso 4:11–14 sa pagpasabut nganong ang Ginoo miestablisar sa Iyang Simbahan ug mitawag og mga lider sa pagserbisyo niini. Dayon dapita ang mga estudyante sa pagpasabut sa unsang paagi nila magamit ang doktrina diha sa Mga Taga-Efeso 4:11–14 sa pagtabang og usa ka higala kinsa mituo nga wala na kinahanglana ang usa ka organisado nga Simbahan.