Mateo 4

Pagdapit og usa nga mobarug atubangan sa klase. Hagita ang estudyante sa pagtutok og usa ka butang sulod sa kwarto sulod sa 30 segundos nga walay paglingi-lingi. Inig sugod niya, sulayi sa pagbalda ang iyang pagtutok sa butang. Sama pananglit, mahimo kang magbitay og dekolor nga mga butang, maglangas, o hatagan siya og pagkaon. Human sa 30 segundos, pangutan-a siya:

• Unsa ang imong nasinati? Nganong nakahimo ka, o wala makahimo, sa pagpadayon sa imong pagtutok?

• Unsa ang imong gihunahuna sulod sa 30 segundos?

Pangutan-a ang klase:

• Sa unsang paagi kini nga kasinatian susama sa atong paningkamot nga makatutok sa pagsunod sa mga sugo sa Langitnong Amahan? Unsa ang buot ipasabut sa gitinguhang mga pagbalda niini nga estudyante? (Mga paningkamot nga kita matintal sa pagpakasala.)

• Nganong si Satanas motintal nato sa pagpakasala? (Tan-awa sa 2 Nephi 2:17–18, 27.)

Hangyoa ang mga estudyante sa paghunahuna og mga paagi ni Satanas nga sila matintal sa pagpakasala. Dapita sila samtang magtuon sa Mateo 4 sa pagpangita og baruganan nga ilang magamit nga makatabang nila sa pagbatok sa tintasyon.

Ipasabut nga human sa Iyang bunyag, ang Manluluwas dunay kasinatian nga nakatabang Niya nga maandam alang sa Iyang pagpangalagad sa kalibutan. Dapita ang usa ka estudyante sa pagbasa og kusog sa Mateo 4:1–2, gamit ang mga gikorihir gikan sa Hubad ni Joseph Smith diha sa mga footnote sa duha ka mga bersikulo. Hangyoa ang klase sa pagsunod, nga mangita kon unsay mga nasinati ni Jesus didto sa kamingawan. (Mahimo nimong ipasabut nga dinhi niini nga linya, ang pulong nga makigsulti nagpasabut nga “makig-uban” o may suod, o espirituhanong pagpakig-uban.)

• Sa unsang paagi ang pagpuasa ug pagpakigsulti sa Langitnong Amahan nakatabang ni Jesus nga maandam sa Iyang pagpangalagad sa kalibutan?

• Human migahin si Jesus niining panahon sa pagpuasa ug pagpakigsulti sa Iyang Amahan, unsay gitinguha ni Satanas nga buhaton?

Ipares-pares ang mga estudyante. Hatagi ang matag paris og kopya sa mosunod nga tsart o hangyoa sila sa pagkopya niini diha sa ilang mga class notebook o mga scripture study journal:

Imahe

handout, temptations of Christ

Sugoa ang mga estudyante uban sa ilang kapares sa pagbasa sa gi-assign nga bersikulo ug sa pagkompleto sa tsart. Sa dili pa nila sugdan kini nga kalihokan, ipasabut nga ang Hubad ni Joseph Smith mikorihir sa pamahayag diha sa Mateo 4:5, 8 aron ipakita nga ang Espiritu, dili ang yawa, ang midala sa Manluluwas ngadto sa managlahing dapit nga gihulagway niini nga mga bersikulo (tan-awa usab sa Joseph Smith Translation, Lucas 4:5; Lucas 4:9).

Human makompleto sa mga estudyante ang tsart, dapita ang pipila ka pares sa pagreport kon unsay ilang gisulat sa box. Mahimo kang mangutana sa mga mosunod:

• Unsa nga tinguha ang gisulay og hangyo ni Satanas dihang gitintal niya si Jesus, kinsa nagpuasa, nga ang mga bato himoon nga pan? (Gisulayan niya og hangyo ang tinguha nga pagtagbaw sa pisikal nga panginahanglan.)

• Unsa ang sayop bahin sa tanyag ni Satanas nga ihatag ngadto kang Jesus ang mga gingharian sa kalibutan? (Misaad si Satanas og mga ganti nga dili iyaha ang paghatag ug sa butang nga dili niya ikahatag.)

• Unsa pay gihulagway niini nga istorya bahin sa mga estratehiya ni Satanas sa pagtintal nato sa pagpakasala? (Itumong ni Satanas kon asang dapita diha nato ang pinakahuyang o dali madutlang mga dapit ug balik-balik niya kitang tintalon.)

Ipasabut nga si Jesus sa kadugayan mangitag paagi nga mawagtang ang Iyang kagutom ug mangita og pagkaon (tan-awa sa Juan 2:1–11). Makadawat sab Siya og balaang kumpirmasyon ug tabang sa Iyang pagpangalagad (tan-awa sa Mateo 17:1–5; Lucas 22:41–44), ug Siya sa umaabut maghari sa kalibutan (Zacarias 14:9; Pinadayag 11:15). Hinoon, kon mitugyan pa si Jesus sa panintal ni Satanas aron maangkon ang gitinguha nga mga sangputanan—imbis maghulat sa hustong panahon ug sa hustong paagi—nahimo unta ang hinakog nga pag-abuso sa gahum sa Manluluwas. Si Jesus mopakita sa Iyang balaanong pagka Siya isip Anak sa Dios sa mga pamaagi nga uyon sa kabubut-on sa Langitnong Amahan, dili sa pagbuot ni Satanas. (Tan-awa sa Jeffrey R. Holland, “The Inconvenient Messiah,” Ensign, Peb. 1984, 68–73.)

• Unsa ang pagkasusama sa mga tubag sa Manluluwas ngadto sa matag tintasyon? (Gitubag ni Jesus ang matag panintal ni Satanas pinaagi sa pagkutlo gikan sa mga kasulatan.)

Dapita ang mga estudyante uban sa ilang kapares nga mosulat og usa ka baruganan nga atong makat-unan gikan sa ehemplo sa Manluluwas sa pagbatok sa mga pagpanintal sa yawa. Hangyoa ang pipila ka estudyante nga isulat sa pisara ang mga baruganan nga ilang napili. Samtang mopakigbahin ang mga estudyante sa mga baruganan nga ilang napili, ipasabut kining mosunod nga baruganan: Kon atong hinumduman ug gamiton ang mga kamatuoran nga gitudlo sa mga kasulatan, makabatok kita sa mga pagpanintal sa yawa. Kon kini nga kamatuoran wala kaayo maklaro sa pagpresentar sa baruganan sa mga estudyante, idugang kini nga pamahayag diha sa pisara.

Ipasabut nga wala lamang hinumdumi sa Manluluwas ang mga kasulatan nga nagtino sa hustong buhaton alang sa matag panintal, apan gigamit sab Niya ang mga kamatuoran nga gitudlo niana nga mga kasulatan.

• Sa pagkonsiderar sa baruganan nga atong gipili bahin sa gahum sa paghinumdom ug paggamit sa mga baruganan nga gitudlo sa mga kasulatan, nganong importante man ang pagtuon kanunay sa mga kasulatan?

Hatagi ang matag estudyante og usa ka piraso nga papel, ug pabuhati nila kini og tulo ka kolum. Sugoa sila nga sulatan ang unang kolum og tulo ka sala diin ang kabatan-onan nga sama nila tintalon sa pagbuhat. Hangyoa sila sa pagsulat diha sa ikaduhang kolum sa paagi unsaon ni Satanas sa pag-agni ang usa ka tawo aron mabuhat ang matag sala nga ilang gisulat sa una nga kolum. Sultihi ang mga estudyante nga ibaylo ang ilang mga papel ngadto sa laing pares. Dayon sugoa sila sa pagpangita og usa ka piho nga scripture reference nga nagtudlo og mga kamatuoran nga mahimong hinumduman ug magamit sa usa ka tawo kon tintalon sila sa paghimo sa matag sala nga nakasulat diha sa papel nga ilang nadawat. (Mahimo nimong dapiton ang mga estudyante sa pag-adto sa scripture mastery passages, sama sa Genesis 39:9; Juan 14:15; o sa Doktrina ug mga Pakigsaad 10:5.) Hangyoa ang mga estudyante nga isulat ang mga scripture reference diha sa ikatulo nga kolum.

Human sa pipila ka minutos, dapita ang usa ka estudyante gikan sa matag pares sa pagreport sa scripture reference nga ilang nakit-an nga usa sa mga tintasyon nga naa sa ilang papel. Hangyoa sila nga mopasabut kon sa unsang paagi kana nga kasulatan makatabang nato kon kita nakasinati niana nga tintasyon.

• Kanus-a mo nakasulay nga nalig-on ug nakabatok og usa ka tintasyon tungod kay inyong nahinumduman ug gigamit ang mga kamatuoran nga gitudlo sa mga kasulatan? (Pahinumdumi ang mga estudyante nga dili nila ipakigbahin ang mga personal kaayo o pribado nga mga kasinatian.)

Dapita ang mga estudyante nga isulat nila sa ilang mga class notebook o mga scripture study journal ang usa ka scripture reference nga ilang mahinumduman ug magamit sa sunod higayon nga tintalon sila sa pagpakasala. Awhaga sila nga imemorya ang kasulatan nga ilang gipili.

I-summarize ang Mateo 4:12–15 pinaagi sa pagpasabut nga human sa Iyang kasinatian didto sa kamingawan, ang Manluluwas miadto sa Galilea ug mipuyo sa siyudad sa Capernaum. Nabantayan ni Mateo nga ang pagpangalagad sa Manluluwas sa Galilea mituman sa usa ka panagna nga gihimo ni Isaias (tan-awa sa Isaias 9:1–2). Dapita ang mga estudyante sa pagbasa og hilum sa Mateo 4:16. Mahimo nimong isugyot nga ilang markahan ang gipanagna ni Isaias nga mahitabo. Ipasabut nga gikan niini nga panagna atong nakat-unan nga si Jesukristo nagdala og kahayag sa kinabuhi niadtong anaa sa kangitngit. Awhaga ang mga estudyante nga tan-awon kon giunsa kini sa paghimo sa Manluluwas sa tibuok Niyang pangalagad.

I-summarize ang Mateo 4:17 pinaagi sa pagpasabut nga ang Manluluwas nagsugod og sangyaw sa paghinulsol agig pagpangandam para sa gingharian sa langit nga gi-establisar diha sa mga katawhan.

Imahe

Calling of the Fishermen

I-display ang litrato nga Pagtawag sa mga Mangingisda (Libro sa mga Hulagway sa Ebanghelyo [2009], nu. 37; tan-awa usab sa LDS.org). Ipasabut nga ang duha ka tawo nga naa atubang sa sakayan mao si Pedro ug ang iyang igsoon si Andres.

• Unsa ang ilang gihimo sa pukot [laya]?

Ipasabut nga samtang ang uban nagtan-aw lang ni Pedro ug Andres nga ordinaryong mga mangingisda, nakita ni Jesukristo ang ilang talagsaong potensyal ug nahibalo unsay umaabut kanila.

• Sa unsang mga paagi nga kita sama ni Pedro ug ni Andres?

Samtang padayong magtuon ang mga estudyante sa Mateo 4, dapita sila sa pagtan-aw kon unsay angay natong buhaton aron mamahimo ang tanan nga maoy gusto sa Ginoo kanato.

Dapita ang pipila ka estudyante nga magpuli-puli sa pagbasa og kusog sa Mateo 4:18–22. Hangyoa ang klase sa pagsunod, nga mangita sa inter-aksyon tali sa Manluluwas ug sa pipila ka mangingisda.

• Unsa ang ipabuhat sa Manluluwas sa pagtawag kang Pedro, Andres, Santiago, ug ni Juan? Unsa man kining usa ka “[mangingisdag] tawo”? (bersikulo 19).

• Unsa man ang isakripisyo niining mga tawhana sa pagsunod sa Manluluwas ug pagtabang sa Iyang buhat? Nganong lisud man kaha kini alang kanila?

Dapita ang mga estudyante sa pagpamalandong kon unsaon kaha nila sa pagtubag kon pananglit usa pa sila niadtong mga tawhana.

• Unsa ang inyong namatikdan bahin sa tubag niining mga tawhana? Unsa nga kinaiya ang ilang gipakita bahin sa diha-diha nila nga pagsanong sa pagdapit sa Manluluwas?

• Mas daghan ba og mahimo nga maayo kining mga tawhana sa ilang kinabuhi sa pagka-mangingisda o sa pagka-“mangingisdag tawo”? Ngano kaha?

• Sigun sa gihulagway niini nga istorya, unsay posibling mahitabo kon diha dayon mosanong kita sa mga pagdapit sa Manluluwas nga mosunod Kaniya? (Ang mga estudyante mahimong mogamit og lain-laing mga pulong, apan siguroha nga mahibaloan nila ang mosunod nga baruganan: Kon diha dayon mosanong kita sa mga pagdapit sa Manluluwas sa pagsunod Kaniya, mas daghan Siya og mahimo sa atong kinabuhi kay sa atong mahimo sa atong kaugalingon.)

Dapita ang usa ka estudyante sa pagbasa og kusog sa mosunod nga pamahayag ni Presidente Ezra Taft Benson. Hangyoa ang klase sa pagpaminaw kon sa unsang paagi ang Ginoo mas daghan og mahimo sa atong kinabuhi kon kita mosunod Kaniya.

Imahe

President Ezra Taft Benson

“Ang mga lalaki ug mga babaye kinsa mitugyan sa ilang kinabuhi ngadto sa Dios makakaplag nga siya makahimo og mas daghan pa sa ilang mga kinabuhi kay sa ilang mahimo. Iyang padak-on ang ilang mga kalipay, palapdon ang ilang panan-awon, dugangan ang ilang mga hunahuna, palig-unon ang ilang mga kaugatan, bayawon ang ilang mga espiritu, padaghanon ang ilang mga panalangin, dugangan ang ilang mga kahigayunan, hupayon ang ilang mga kalag, ituboy ang mga higala, ug bu-buan og kalinaw. Kinsa man ang magawagtang sa iyang kinabuhi sa pag-alagad sa Dios makakaplag og kinabuhing dayon” (“Jesus Christ—Gifts and Expectations,” Ensign, Dis. 1988, 4).

• Kanus-a kamo, o inyong kaila, nakasinati og susamang mga panalangin gumikan sa pagbiya sa kalibutanong mga kabalaka aron lang sa pagsunod sa Manluluwas?

• Samtang magkonsiderar kamo sa mga panalangin nga atong nadawat pinaagi sa pagsunod sa Manluluwas, ngano kaha nga importante man ang pagsanong diha-diha dayon sa pagdapit sa Manluluwas nga mosunod Kaniya?

Dapita ang mga estudyante nga isulat nila sa ilang mga class notebook o mga scripture study journal ang tubag sa mosunod nga pangutana:

• Unsaon ninyo nga makasanong og mas maayo sa mga pagdapit sa Manluluwas sa pagsunod Kaniya?

Awhaga ang mga estudyante nga i-apply unsay ilang gisulat.

Hangyoa ang mga estudyante sa pagbasa og hilum sa Mateo 4:23–25, nga mangita sa mga gibuhat sa Manluluwas. Mahimo nimong isugyot sa mga estudyante nga ilang markahan ang ilang mga nakat-unan. Ipasabut nga ang pihong mga hitabo sa pagpanudlo, pagsangyaw, ug pagpang-ayo sa Manluluwas tun-an ra sa tibuok nga mga pagtuon sa Ebanghelyo.