1 Mga Taga-Tesalonica 1–2

Dapita ang mga estudyante nga ipakigbahin ang positibong mga kasinatian nga ilang nasinati samtang naningkamot nga makapaambit sa ebanghelyo ngadto sa uban.

• Unsa kaha ang pipila ka mga hagit nga atong masinati samtang maningkamot kita sa pagpaambit sa ebanghelyo?

Dapita ang mga estudyante sa pagpangita sa mga kamatuoran samtang tun-an nila ang 1 Mga Taga-Tesalonia 1–2 nga makatabang nila sa ilang mga paningkamot sa pagpaambit sa ebanghelyo.

Dapita ang mga estudyante nga pangitaon ang Tesalonica diha sa Mapa, nu. 13, “Ang Misyonaryo nga mga Panaw ni Apostol Pablo,” nga makita sa Giya ngadto sa mga Kasulatan. Hangyoa ang usa ka estudyante sa pagbasa og kusog sa mosunod nga deskripsyon bahin sa mga Santos sa Tesalonica:

Ang mga Santos sa Tesalonica mao ang pipila sa nag-una nga mga Taga-Uropa nga konbert [kinabig] sa Simbahan. Sila si Pablo, Silas, ug Timoteo unang misangyaw didto atol sa ikaduhang misyonaryo nga panaw ni Pablo apan giabug sila sa siyudad sa ubang lider sa mga Judeo (tan-awa sa Mga Buhat 17:5–15). Ang mga Santos sa Tesalonica padayon nga gipanggukod bisan mibiya na sila si Pablo ug ang iyang mga kauban. Sa wala madugay misulat si Pablo ngadto sa mga Santos sa paghatag nila og kadasig samtang gipanggukod sila.

Dapita ang usa ka estudyante sa pagbasa og kusog sa 1 Mga Taga-Tesalonica 1:2–4. Hangyoa ang klase sa pagsunod, nga mangita kon nganong gikalipay [gipasigarbo] ni Pablo ang mga Santos sa Tesalonica.

• Nganong gikalipay man ni Pablo ang mga Santos sa Tesalonica?

Dapita ang usa ka estudyante sa pagbasa og kusog sa 1 Mga Taga-Tesalonica 1:5–6. Hangyoa ang klase sa pagsunod, nga mangita kon sa unsang paagi gisangyaw ni Pablo ang ebanghelyo ngadto sa mga Taga-Tesalonica atol sa kanhi niyang pagbisita.

• Sumala sa bersikulo 5, giunsa man sa pagsangyaw ni Pablo ang ebanghelyo ngadto sa mga Taga-Tesalonica? (Gamit ang mga pulong ug gahum sa Dios.)

Hangyoa ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha. Dapita ang klase sa pagpaminaw kon unsay ipasabut sa pulong ug gahum sa ebanghelyo.

Imahe

Elder Bruce R. McConkie

“Ang matuod nga ebanghelyo naglangkob og duha ka butang: Ang Pulong, ug Ang Gahum. Ang tanan mahimong makaangkon sa pulong; ang mga basahon diin kini nasulat magamit sa tanan. Apan ang gahum kinahanglang magagikan sa Dios; kinahanglan kini ug angay gayud nga masangyaw sumala sa iyang hunahuna ug iyang kabubut-on ngadto sa mga motuman sa balaod nga naghatag nila og katungod nga madawat kini.

“Ang pulong sa ebanghelyo mao ang gipamulong o gisulat nga mga istorya kon unsay angayang buhaton sa mga tawo aron maluwas. …

“Apan ang aktwal nga kaluwasan moabut lamang kon ang gahum sa Dios madawat ug gamiton; ug kini nga gahum mao ang gahum sa priesthood ug gahum sa Espiritu Santo” (Doctrinal New Testament Commentary, 3 vols. [1965–73], 3:42–43).

• Sumala ni Elder McConkie, unsa ang gipasabut sa pulong sa ebanghelyo? Unsa ang gipasabut sa gahum sa ebanghelyo?

• Sumala sa bersikulo 6, unsay gibuhat sa mga Taga-Tesalonica human sila makatudlo sa ebanghelyo pinaagi sa pulong ug gahum sa Dios? (Nahimo silang mga sumusunod sa Ginoo ug sa Iyang mga sulugoon.)

• Unsaon ninyo sa pag-summarize ang tambag ni Pablo diha sa bersikulo 5–6 isip usa ka baruganan? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga baruganan: Samtang itudlo nato ang ebanghelyo ni Jesukristo pinaagi sa pulong ug gahum sa Dios, makatabang kita sa uban nga mamahimong sumusunod sa Ginoo ug sa Iyang mga sulugoon.)

• Unsay atong mahimo aron maandam ang atong kaugalingon sa pagtudlo sa ebanghelyo pinaagi sa pulong ug gahum sa Dios?

Dapita ang usa ka estudyante sa pagbasa og kusog sa 1 Mga Taga Tesalonica 1:7–9. Hangyoa ang klase sa pagsunod, nga mangita kon unsa pay laing gihimo sa mga Santos sa Tesalonica human nila madawat ang ebanghelyo.

• Unsa pay laing gihimo sa mga Santos sa Tesalonica human nila madawat ang ebanghelyo? Sa unsang paagi ang ilang ehemplo nakaapekto sa ubang mga tumutuo sa ilang palibut?

• Unsa nga kamatuoran ang atong makat-unan gikan niini nga mga bersikulo kon unsaon nato sa pagpaambit sa ebanghelyo? (Ang mga estudyante mahimong mogamit og lain-laing mga pulong, apan kinahanglang mahibaloan nila ang mosunod nga kamatuoran: Atong mapaambit ang ebanghelyo pinaagi sa atong ehemplo.)

Aron matabangan ang mga estudyante nga makasabut niini nga kamatuoran, dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan:

Imahe

President Dieter F. Uchtdorf

“Ang pinakaepektibong paagi sa pagsangyaw sa ebanghelyo mao ang pinaagi sa ehemplo. Kon kita magpuyo pinasubay sa atong mga gituohan, ang katawhan makamatikod. Kon ang panagway ni Jesukristo mosidlak sa atong kinabuhi, [tan-awa sa Alma 5:14], kon kita malipayon ug malinawon sa kalibutan, ang mga tawo gustong mahibalo ngano. Usa sa pinakamahinungdanong wali nga nalitok kabahin sa misyonaryo nga buhat mao kining yanong hunahuna nga napahinungod kang Saint Francis of Assisi: ‘Isangyaw ang ebanghelyo sa tanang panahon ug kon gikinahanglan, gamiti og mga pulong’ [sa William Fay ug Linda Evans Shepherd, Share Jesus without Fear (1999), 22]” (“Naghulat Diha sa Dalan sa Damasco,” Ensign o Liahona, Mayo 2011, 77).

• Sa unsang paagi ang pagkahimong usa ka ehemplo mas epektibong paagi sa pagpakigbahin sa ebanghelyo kay sa makig-istorya lang mahitungod sa ebanghelyo?

• Sa unsang paagi ang ehemplo sa ubang tawo nakatabang ninyo nga dawaton ang ebanghelyo o sundon sa hingpit ang ebanghelyo?

Ipasabut nga human gidayeg ni Pablo ang mga Santos sa Tesalonica gumikan sa matarung nilang mga ehemplo, iya silang gipahinumduman sa iyang gugma kanila ug sa ehemplo nga iyang gihimo dihang kaniadto nagsangyaw pa siya sa ebanghelyo ngadto kanila.

Isulat sa pisara ang mosunod nga mga reference sa kasulatan ug ang mga pangutana:

Dapita ang mga estudyante nga magpuli-puli sa pagbasa og kusog sa 1 Mga Taga-Tesalonica 2:1–13 samtang magsunod ang klase. O, imbis magdapit og mga estudyante sa pagpabasa og kusog, mahimo nimo silang dapiton sa pagpangita niini nga mga bersikulo sa ginagmayng grupo, nga magpares, o magtinagsa. Hangyoa ang mga estudyante nga pangitaon ang mga pulong nga naghulagway sa iyang mga kompanyon nga gihimo para sa mga Taga-Tesalonica. Mahimo nimong isugyot nga markahan sa mga estudyante ang ilang mga nakit-an.

Human sa igo nga panahon, dapita ang usa ka estudyante sa pag-adto sa pisara sa paglista og usa o duha ka pulong o mga pulong nga ilang nakit-an. Hangyoa sila sa pagpasabut sa unsang paagi kana nga mga pulong makagiya sa atong mga paningkamot sa paghimo og maayong mga ehemplo para sa uban.

I-summarize ang 1 Mga Taga-Tesalonica 2:14–18 pinaagi sa pagpasabut nga miingon si Pablo nga ang mga Santos sa Tesalonica gipanggukod tungod sa pagdawat sa ebanghelyo. Gisultihan niya ang mga Santos nga misulay siya sa pagbisita nila og usab apan “gipanagpugngan” sa kaaway (bersikulo 18).

Dapita ang usa ka estudyante sa pagbasa og kusog sa 1 Mga Taga-Tesalonica 2:19–20. Hangyoa ang klase sa pagsunod, nga mangita kon unsay gihulagway ni Pablo nga iyang “paglaum ug kalipay, o … pagpasigarbo” (bersikulo 19).

• Unsa ang gihulagway ni Pablo nga iyang “paglaum ug kalipay, o … pagpasigarbo”?

• Sa unsang paagi ang paglaum, kalipay, ug pagpasigarbo ni Pablo nagpakita sa paglaum, kalipay, ug pagpasigarbo kanato sa Langitnong Amahan?

Tapusa pinaagi sa pagpamatuod sa mga kamatuoran nga nahibaloan gikan niini nga leksyon. Dapita ang mga estudyante kon sa unsang paagi nila mapakigbahin ang ebanghelyo pinaagi sa pagsulti mahitungod niini ug pinaagi sa paghimo og matarung nga ehemplo. Awhaga sila nga sundon ang mga pag-aghat nga ilang nadawat.