Giawhag ni Pedro ang mga Santos nga kanunayng andam mopamatuod ni Jesukristo ug magpakabuhi nga matarung aron makapawagtang sila sa sayop nga mga pasangil nga gihimo batok kanila. Mitudlo siya nga si Jesukristo misangyaw sa ebanghelyo didto sa kalibutan sa espiritu human sa Iyang kamatayon. Mipahimangno usab si Pedro sa mga anciano sa Simbahan nga bantayan ang panon sa Dios uban sa samang pag-amuma ni Jesukristo, ang Pangulong Magbalantay.
Nagtambag si Pedro sa mga Santos nga magkahiusa sa pagkamatarung ug kanunayng andam mopamatuod ni Kristo
Dapita ang usa ka estudyante sa pagbasa og kusog sa mosunod nga pamahayag ni Presidente Thomas S. Monson:
Imahe
President Thomas S. Monson
“Makabaton kita og mga oportunidad sa tibuok natong kinabuhi sa pagpakigbahin sa atong mga gituohan, bisan tuod nga wala kita masayud sa kanunay kon kanus-a kita tawagon sa pagbuhat sa ingon. Ang maong oportunidad miabut kanako niadtong 1957 dihang nagtrabaho ko sa negosyo sa pagmantala ug gihangyo nga moadto sa Dallas, Texas, [USA,] kaniadto gitawag og “ang siyudad sa mga simbahan,” aron mamulong sa kombensyon bahin sa negosyo. Human sa kombensyon, misuroy-suroy ko sakay sa bus libut sa sudlunon nga mga dapit sa siyudad. Sa pag-agi namo sa nagkalainlaing mga simbahan, ang among drayber mikomentaryo, ‘Dapit sa wala inyong makita ang simbahan sa Methodist,’ o ‘Diha sa tuo mao ang katedral sa Katoliko.’
“Sa pag-agi namo sa nindot nga pulang building nga hinimo sa brick nga nahimutang sa bungtod, miingon ang drayber, ‘Diha nga building magpundok ang mga Mormon.’ Usa ka babaye sa likod sa bus ang miingon, ‘Drayber, pwede mi nimong sultihan og dugang bahin sa mga Mormon?’
“Ang drayber mipahunong sa bus sa daplin sa karsada, milingi ug mitubag, ‘Day, ang ako ra gyung nahibaloan bahin sa mga Mormon mao nga magpundok sila nianang pulang building nga hinimo sa brick. Aduna bay usa dinhi sa bus nga nahibalo bahin sa mga Mormon?” (“Magmaisugon sa Pagbarug nga Mag-inusara,” Ensign o Liahona, Nob. 2011, 67).
Kon anaa kamo niadto nga bus, unsa kahay inyong gibuhat?
Ngano man nga usahay mahimong lisud ang pagsulti sa ubang tawo mahitungod sa atong mga tinuohan?
Dapita ang mga estudyante sa pagpangita og usa ka baruganan samtang nagtuon sila sa 1 Pedro 3:1–17 nga motabang sa paggiya nila kon duna silay mga oportunidad sa pagpakigbahin sa ebanghelyo ngadto sa uban.
I-summarize ang 1 Pedro 3:1–11 pinaagi sa pagpasabut nga miawhag si Pedro sa mga asawa nga tabangan ang dili matuohon nga mga bana nga dad-on ngadto kang Kristo pinaagi sa ilang matarung nga pamatasan. Mitambag siya sa mga bana nga tahuron ang ilang mga asawa. Mitambag usab siya sa mga miyembro nga magpakabuhi sumala sa mga sumbanan sa ebanghelyo.
Dapita ang usa ka estudyante sa pagbasa og kusog sa 1 Pedro 3:14–16. Hangyoa ang klase sa pagsunod, nga mangita kon unsay gitambag ni Pedro nga buhaton sa mga Santos sa dihang sila miantus og pagpanggukod tungod kay sila nagpakabuhi sa matarung nga paagi.
Unsay gitambag ni Pedro nga buhaton sa mga Santos dihang miantus sila og pagpanggukod tungod kay sila nagpakabuhi nga matarung?
Sumala sa bersikulo 15, unsay gisulti ni Pedro nga kinahanglan kanunayng andam ang mga sumusunod ni Jesukristo sa pagbuhat?
Unsa kaha nga bahin sa ebanghelyo ang naghatag og paglaum sa mga tawo?
Ipasabut nga ang pulong pagtubag sa bersikulo 15 mahimo usab mahubad nga “pagpanalipod”. Mipahimangno si Pedro sa mga Santos sa pagpakigbahin ug pagpanalipod sa ilang relihiyoso nga mga tinuohan.
Unsa nga mga pulong diha sa bersikulo 15 ang naghulagway kon unsaon nato pagpakigbahin ug pagpanalipod sa ebanghelyo ni Jesukristo? (Mahimo nimong ipasabut nga ang kataha nagpasabut nga balaan nga pagtahud dinhi niini nga kinatibuk-ang kahulugan.)
Unsa nga kamatuoran ang atong makat-unan gikan sa 1 Pedro 3:15 mahitungod sa unsay atong kinahanglang paninguhaon nga kanunayng andam sa pagbuhat isip mga sumusunod ni Jesukristo? (Ang mga estudyante kinahanglang mahibalo og usa ka kamatuoran susama sa mosunod: Isip mga sumusunod ni Jesukristo, kinahanglan kitang maningkamot nga kanunayng andam sa pagpakigbahin ug pagpanalipod sa atong mga tinuohan uban ang kaaghup ug pagtahud. Isulat sa pisara kini nga kamatuoran.)
Ngano kaha nga importante ang pagpakigbahin sa atong mga tinuohan uban ang kaaghup ug pagtahud?
Aron sa paghulagway sa kamatuoran diha sa pisara, dapita ang usa ka estudyante sa pagbasa og kusog sa istorya ni Presidente Monson sa iyang kasinatian sa bus:
Imahe
President Thomas S. Monson
“Naghulat ko nga dunay motubag. Akong gitan-aw ang ekspresyon sa nawong sa matag tawo alang sa timailhan kon duna bay nahibalo, duna bay mokomentaryo. Wala. Akong naamguhan nga anaa ra kanako ang paghimo sama sa gisugyot ni Apostol Pedro, nga, ‘andam kamo kanunay sa pagtubag kang bisan kinsa nga mangutana sa hinungdan sa paglaum nga anaa kaninyo.’ Naamguhan usab nako ang kamatuoran sa panultihon ‘Kon moabut ang panahon sa pagdesisyon, ang oras sa pagpangandam milabay na.’
“Sulod sa misunod nga 15 minutos o sobra pa, ako adunay pribilehiyo sa pagpakigbahin sa akong pagpamatuod niadtong anaa sa bus kabahin sa Simbahan ug sa atong mga gituohan. Mapasalamaton ko sa akong pagpamatuod ug mapasalamaton nga andam ko sa pagpakigbahin niini.” (“Magmaisugon sa Pagbarug nga Mag-inusara,” 67).
Unsay pipila ka mga butang nga mahimo natong buhaton aron kanunayng andam sa pagpakigbahin sa atong mga tinuohan?
Dapita ang mga estudyante sa paghunahuna og usa ka higayon dihang mapasalamaton sila nga andam sila sa pagpakigbahin sa ilang mga tinuohan o pagpamatuod. Hangyoa ang pipila ka mga estudyante sa pagpakigbahin sa ilang mga kasinatian uban sa klase.
Dapita ang mga estudyante sa pagpamalandong sa unsay ilang buhaton aron mangandam nga kanunayng andam mopakigbahin ug manalipod sa ilang mga tinuohan. Awhaga sila sa pagbuhat sa bisan unsang mga aghat nga mahimo nilang madawat.
Si Jesukristo misangyaw sa ebanghelyo didto sa kalibutan sa espiritu human sa Iyang kamatayon
Dapita ang mga estudyante sa paghunahuna nga sila mga misyonaryo nga nagtudlo sa usa ka tawo kinsa nag-ingon sa mosunod:
“Nagtuo ako nga ang inyong gitudlo kanako tinuod, apan naghuhuna ko mahitungod sa mga tawo nga mamatay nga walay kahigayunan nga makadungog sa kamatuoran. Mura man og dili makiangayon alang sa Dios nga mosilot kanila o mopugong kanila nga mopuyo pag-usab uban Kaniya kon sila wala gayud nakahigayun nga makat-on mahitungod sa Iyang plano sa kaluwasan.”
Hangyoa ang mga estudyante sa pagpamalandong kon unsaon nila pagtubag.
Dapita ang katunga sa klase sa pagbasa sa 1 Pedro 3:18–20 sa hilum nga paagi, lakip ang Hubad ni Joseph Smith sa 1 Pedro 3:20 diha sa Giya ngadto sa mga Kasulatan. Hangyoa ang pikas katunga nga basahon ang 1 Pedro 4:5–6 sa hilum nga paagi, lakip ang Hubad ni Joseph Smith sa 1 Pedro 4:6 diha sa Giya ngadto sa mga Kasulatan. Hangyoa ang mga estudyante nga mangita og mga kamatuoran nga gitudlo ni Pedro nga mahimo nilang ipakigbahin uban sa tawo diha sa sitwasyon. Ipasabut nga ang mga pulong “mga espiritu nga didto sa sulod sa bilanggoan” diha sa 1 Pedro 3:19 nagpasabut nga kadtong anaa sa kalibutan sa espiritu kinsa wala midawat sa ebanghelyo o adunay oportunidad nga makadungog niini samtang ania niining pagkamortal.
Human sa igong panahon, ipangutana:
Unsay atong makat-unan gikan niini nga mga bersikulo mahitungod niadtong anaa sa kalibutan sa espiritu kinsa wala midawat sa ebanghelyo o adunay oportunidad nga modawat niini dinhi niining kinabuhi?
Imahe
Presidente Joseph F. Smith
Ipakita ang usa ka litrato ni Presidente Joseph F. Smith (Libro sa mga Hulagway sa Ebanghelyo [2009], nu. 127; tan-awa usab sa LDS.org). Ipasabut nga si Presidente Joseph F. Smith namalandong sa gipasabut sa 1 Peter 3:18–20 ug sa 1 Pedro 4:6 dihang nakadawat siya og usa ka pagpadayag ug panan-awon sa pagbisita sa Manluluwas ngadto sa kalibutan sa espiritu. Nakita niya nga si Jesukristo, tali sa panahon sa Iyang kamatayon ug Pagkabanhaw, misangyaw sa ebanghelyo ug personal nga nangalagad sa matarung nga mga espiritu. Gi-organisar ug gitugyanan dayon ni Jesukristo ang matarung nga mga sulugoon sa pagtudlo sa ebanghelyo ngadto sa mga espiritu didto sa bilanggoan sa espiritu (tan-awa sa D&P 138:1–11, 29–30).
Sumala sa 1 Pedro 4:6, nganong gisangyaw man ang ebanghelyo ngadto sa mga patay? (Sa pagpahigayon sa usa ka matarung ug makiangayon nga paghukom pinaagi sa paghatag sa tanang mga anak sa Langitnong Amahan og usa ka oportunidad nga makadungog ug magpakabuhi sumala sa mga balaod sa Dios.)
Unsa nga kamatuoran ang atong mahibaloan gikan sa mga pagtulun-an ni Pedro mahitungod sa pagsangyaw sa ebanghelyo ngadto sa mga patay? (Ang mga estudyante mahimong mogamit og lain-laing mga pulong, apan siguroa nga makahibalo sila og usa ka kamatuoran nga susama sa mosunod: Ang ebanghelyo gisangyaw ngadto kinsa nangamatay na aron sila usab adunay samang oportunidad niadtong kinsa naminaw sa ebanghelyo sa pagkamortal.)
Ribyuha sa daklit ang sitwasyon nga gihatag sa sinugdanan niini nga scripture block ug pangutana:
Sa unsang paagi ang doktrina sa kaluwasan alang sa mga patay usa ka ebidensya sa kalooy ug kapuangod sa Dios alang sa Iyang mga anak?
I-summarize ang 1 Pedro 4:7–19 pinaagi sa pagpasabut nga mipasidaan si Pedro sa mga Santos nga magbaton og mainiton nga gugma nga putli tungod kay ang gugma nga putli nagtabon, o nagpugong, sa daghan nga mga sala (tan-awa sa Hubad ni Joseph Smith, 1 Pedro 4:8 [diha sa Giya ngadto sa mga Kasulatan]). Mitudlo usab si Pedro sa mga Santos nga maglipay kon nag-antus sila og mga pagsulay ug pagbadlong tungod sa ilang pagtuo kang Jesukristo.
Mitambag si Pedro og mga anciano nga bantayan ang panon sa Dios ug miawhag sa mga Santos nga magpabiling makanunayon diha sa hugot nga pagtuo
Ipasabut nga aron matabangan ang mga Santos nga makapangandam alang sa mga pagsulay nga ilang masinati, mitudlo si Pedro sa mga anciano sa Simbahan mahitungod sa ilang responsibilidad isip mga lider sa Simbahan. Dapita ang usa ka estudyante sa pagbasa og kusog sa 1 Pedro 5:1–3. Hangyoa ang klase sa pagsunod, nga mangita sa tambag ni Pedro ngadto sa mga anciano sa Simbahan.
Unsa nga tambag ang gihatag ni Pedro ngadto sa mga anciano sa Simbahan?
Ipasabut nga ang “[pagtagad sa] panon sa Dios” (bersikulo 2) nagpasabut nga amumahon ug bantayan ang mga miyembro sa Simbahan. Ang mga lider sa simbahan kinahanglang andam moserbisyo ug uban sa gugma imbis nga wala’y gusto o tungod kay adunay ganti. Kinahanglan silang mahimong mga ehemplo ngadto sa mga miyembro imbis nga “mga hinarihari” (bersikulo 3) ibabaw kanila.
Gikan sa tambag ni Pedro ngadto sa mga anciano sa Simbahan, unsa nga kamatuoran ang atong makat-unan mahitungod sa responsibilidad sa mga lider sa Simbahan? (Tabangi ang mga estudyante nga mahibalo og usa ka kamatuoran susama sa mosunod: Ang mga lider sa Simbahan adunay responsibilidad sa pag-amuma ug pagbantay sa panon sa Dios diha sa gugma ug pinaagi sa ehemplo. Isulat sa pisara kini nga kamatuoran.)
Dapita ang mga estudyante sa pagbasa sa Lucas 1:38 sa hilum nga paagi, nga mangita kon unsay tawag ni Pedro sa Manluluwas. Hangyoa ang mga estudyante nga moreport sa ilang nakit-an.
Ngano kaha nga ang Manluluwas kasagarang nakita isip usa ka magbalantay?
Unsa nga Kristohanong mga kalidad ug mga kinaiya ang makatabang sa mga lider sa Simbahan sa pagbantay ug pag-amuma sa mga miyembro sa Simbahan?
Sa unsang paagi kamo napanalanginan tungod sa Kristohanon nga gugma o ehemplo sa usa ka lider sa Simbahan?
I-summarize ang 1 Pedro 5:7–14 pinaagi sa pagpasabut nga mitudlo si Pedro ngadto sa mga Santos sa pagtugyan sa tanan nilang kabalaka ngadto sa Manluluwas nga si Jesukristo ug sa pagpabiling makanunayon sa ilang hugot nga pagtuo, bisan adunay mga kasakit. Mipasalig si Pedro kanila nga kon mibuhat sila sa ingon, hingpiton ug lig-unon sila sa Dios.
Tapusa pinaagi sa pag-awhag sa mga estudyante nga mosalig ug mosunod niadtong kinsa gitawag sa Ginoo nga motabang sa pagbantay ug pag-atiman kanila sa espirituhanon nga paagi.
Aron sa pag-awhag sa mga estudyante nga moapil sa buhat sa kaluwasan alang sa ilang mga katigulangan, ribyuha uban kanila ang 1 Pedro 4:6, ug dayon ipangutana:
Unsay mahimo natong buhaton aron matabangan ang atong mga katigulangan kinsa midawat sa ebanghelyo didto sa kalibutan sa espiritu ug kinsa nagpaabot nga makalingkawas gikan sa bilanggoan sa espiritu?
Sa unsang paagi ninyo gibati nga napanalanginan mo pinaagi sa pagbuhat sa family history ug buluhaton sa templo alang sa inyong mga katigulangan?
Dapita ang mga estudyante nga mangita og mga oportunidad sa pagsiksik sa family history mahitungod sa ilang mga katigulangan ug sa pag-apil sa pagbuhat og mga ordinansa sa templo alang niadto nga mga katigulangan.
Komentaryo ug Background nga Impormasyon
1 Pedro 4:6. “Kay kini mao ang hinungdan ngano nga ang Maayong Balita giwali hangtud ngadto sa mga patay”
Si Presidente Joseph Fielding Smith mitudlo sa mosunod mahitungod sa buhat sa kaluwasan alang sa mga patay:
“Tanan kadto kinsa wala’y oportunidad dinhi (sa pagkamortal) nga modawat niini, kinsa didto (sa kalibutan sa espiritu) naghinulsol ug midawat sa ebanghelyo, mahimong manununod sa celestial nga gingharian sa Dios. Ang Manluluwas mipasiugda niining talagsaon nga buhat sa dihang siya miadto ug misangyaw ngadto sa mga espiritu nga gibilanggo, nga sila unta mahukman sumala sa mga tawo diha sa unod (o sa laing pagkasulti, sumala sa mga baruganan sa ebanghelyo) ug dayon magpuyo sumala sa Dios diha sa espiritu, pinaagi sa ilang paghinulsol ug pagdawat sa misyon ni Jesukristo kinsa namatay alang kanila” (Doctrines of Salvation, comp. Bruce R. McConkie, 3 vols. [1954–56], 2:132–33).
Mahitungod sa pagsangyaw sa ebanghelyo didto sa kalibutan sa espiritu, si Presidente Lorenzo Snow mitudlo:
“Kon ang Ebanghelyo isangyaw ngadto sa mga espiritu nga gibilanggo, ang kalampusan nga moresulta gikan niana nga pagsangyaw labing dako kay sa resulta sa pagsangyaw sa atong mga Anciano niini nga kinabuhi. Nagtuo ko nga dyutay ra kaayo niadto nga mga espiritu ang dili malipayong modawat sa Ebanghelyo sa dihang kini gidala ngadto kanila. Ang kahimtang didto kaliboan ka mas mapuslanon” (“Discourse by President Lorenzo Snow,” Millennial Star, Ene. 22, 1894, 50).