2 Pedro 2–3

Isulat sa pisara ang mosunod nga pangutana: Ngano kaha nga ang mga tawo mopili sa pagpakasala bisan og nasayud sila nga ang ilang gibuhat sayop?

Dapita ang mga estudyante sa pagpamalandong niini nga pangutana, ug dayon hangyoa ang pipila kanila nga moreport sa ilang mga tubag.

Ipasabut nga sa 2 Pedro 2 atong mabasa nga si Apostol Pedro mipasidaan sa mga Santos mahitungod sa mga tawo nga naninguha sa paglingla kanila. Dapita ang mga estudyante sa pagpangita sa mga kamatuoran samtang nagtuon sila sa 2 Pedro 2 nga makatabang nila nga mailhan ug malikayan ang mga pagpanglingla nga mosangput ngadto sa sala.

Dapita ang usa ka estudyante sa pagbasa og kusog sa 2 Pedro 2:1–3. Hangyoa ang klase sa pagsunod, nga mangita sa pasidaan ni Pedro mahitungod sa kinsa ang buot mosulay sa paglingla sa mga Santos.

• Mahitungod ni kinsa ang gipasidaan ni Pedro sa mga Santos?

• Unsay gitudlo niining mini nga mga propeta ug mga magtutudlo? (Ipasabut nga ang “makapadaut nga mga herejia” [bersikulo 1] mao ang bakak ug makadaut nga mga pagtulun-an.)

• Unsa nga kamatuoran ang atong makat-unan gikan ni Pedro mahitungod sa unsay gitinguha sa mini nga mga magtutudlo nga buhaton ngari kanato? (Tabangi ang mga estudyante nga makaila og usa ka kamatuoran nga susama sa mosunod: Ang mini nga mga magtutudlo nagtinguha sa paglingla kanato. Isulat sa pisara kini nga kamatuoran.)

Dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles. Hangyoa ang klase sa pagpaminaw alang sa unsay gitudlo karon sa mini nga mga magtutudlo aron sa paglingla kanato.

Imahe

Elder M. Russell Ballard

“Ang mini nga mga propeta ug mini nga mga magtutudlo mao kadtong namahayag nga si Propeta Joseph Smith usa ka dili matinuoron nga manglilimbong; gilimud nila nga ang Unang Panan-awon usa ka tinuod nga kasinatian. Namahayag sila nga ang Basahon ni Mormon ug ang ubang inilang talaan dili karaan nga mga kasulatan. Nagsulay usab sila sa paghatag og lahi nga pagsabut sa kinaiya sa Dios nga Kapangulohan, ug naglimud sila nga ang Dios mihatag na ug nagpadayon pa sa paghatag og pagpadayag karon ngadto sa Iyang gi-orden ug gipaluyohan nga mga propeta. …

“Ang mini nga mga propeta ug mini nga mga magtutudlo mao usab kadtong kinsa nagsulay sa pag-usab sa mga doktrina nga hinatag sa Dios ug gibase sa kasulatan nga nanalipod sa pagkabalaan sa kaminyoon, ang balaanong kinaiya sa pamilya, ug ang mahinungdanon nga doktrina sa personal nga moralidad. Giusab nila ang depinisyon sa moralidad aron mahatagan og katarungan ang pakighilawas sa dili minyo, panapaw, ug homosexual nga mga relasyon” (“Beware of False Prophets and False Teachers,” Ensign, Nob. 1999, 63, 64).

Dapita ang mga estudyante sa paghunahuna og mga higayon dihang sila nakasugat og mga pagtulun-an gikan sa mini nga mga magtutudlo.

• Nganong makatabang man nga magmatngon sa mga mensahe ug mga pagtulun-an sa mini nga mga magtutudlo?

I-summarize ang 2 Pedro 2:4–17 pinaagi sa pagpasabut nga si Pedro mihatag og pipila ka mga ehemplo sa unsay nahitabo sa mga tawo kinsa kaniadto misunod sa mini nga mga magtutudlo. Mihatag usab si Pedro og mga ehemplo sa mga indibidwal kinsa wala na-impluwensya sa mini nga mga magtutudlo. Dayon gihulagway ni Pedro ang dautan nga kinaiya sa mini nga mga magtutudlo.

Imahe

fishing hook, worm

Ipakita ang usa ka pasol ug pipila ka mga paon, o ipakita o i-drowing ang usa ka litrato niini nga mga butang diha sa pisara. (Kon ang laing pamaagi sa pagdakop og isda mas naila sa imong mga estudyante, paggamit og mga butang o mga litrato nga nagpakita niana nga pamaagi.)

Ipasabut nga usa ka pamaagi ang mangingisda makadakup og isda mao ang paggamit og mga paon aron sa pagdani sa isda paingon sa usa ka lit-ag o sa pagpaak sa usa ka taga. Dapita ang mga estudyante sa paghunahuna kon sa unsang paagi ang mga pamaagi sa mangingisda susama sa usa ka mini nga magtutudlo.

Dapita ang usa ka estudyante sa pagbasa og kusog sa 2 Pedro 2:18–19. Hangyoa ang klase sa pagsunod, nga mangita sa unsang paagi ang mga mini nga mga magtutudlo nagdani sa mga Santos aron mosunod sa ilang mga pagtulun-an.

• Sa unsang paagi ang mini nga mga magtutudlo modani og molingla sa mga miyembro sa Simbahan? (Ipasabut nga ang pipila ka mini nga mga magtutudlo mahimong sinsero apan sila usab nalingla.)

• Sa unsang paagi ang mga pagtulun-an sa mini nga mga propeta ug mga magtutudlo susama sa usa ka paon?

• Sumala sa bersikulo 19, unsay gisaad niining mini nga mga magtutudlo? (“Kagawasan.” Sa laing pagkasulti, nagtudlo sila nga ang sala, imbis nga magmasulundon sa mga kasugoan, mosangput ngadto sa mas dako nga kagawasan.)

Dugangi ang kamatuoran nga naa sa pisara aron mabasa kini sama sa mosunod: Ang mini nga mga magtutudlo nagtinguha sa paglingla kanato nga motuo nga ang sala mosangput ngadto sa mas dako nga kagawasan.

Dapita ang mga estudyante sa pagbasa og usab sa bersikulo 19 sa hilum nga paagi, nga mangita kon unsay mahitabo sa mga tawo nga nadani sa bakak nga mga pagtulun-an ug sa sala.

• Unsay mahitabo sa mga tawo nga nadani sa bakak nga mga pagtulun-an ug sa sala? (Maulipon sila niini.)

• Unsay pipila ka bakak nga mga pagtulun-an nga mora og nag-aghat og kagawasan apan sa tinuod mosangput ngadto sa pagkaulipon?

Dapita ang usa ka estudyante sa pagbasa og kusog sa 2 Pedro 2:20–22. Hangyoa ang klase sa pagsunod, nga mangita kon unsay gitudlo ni Pedro mahitungod niadtong kinsa mobalik sa sala human makalingkawas niini.

• Ngano kaha nga sila kadtong “makaikyas gikan sa mga kahugawan sa kalibutan pinaagi ni … Jesukristo” (bersikulo 20) mahimong matintal nga mobalik sa ilang makasasala nga mga pamaagi?

• Unsa nga tambag ang imong mahatag aron sa pagtabang sa usa ka tawo nga magpabiling matinud-anon kang Jesukristo ug sa Iyang ebanghelyo imbis nga mobalik sa nangaging mga sala?

Ipasabut nga sa dihang mitapos si Pedro sa iyang sulat mipahinumdom siya sa mga Santos sa Ikaduhang Pag-anhi ni Jesukristo ug mitudlo kanila unsaon pagpangandam alang niini. I-summarize ang 2 Pedro 3:1–9 pinaagi sa pagpasabut nga mitudlo si Pedro nga sa ulahing mga adlaw ang pipila ka mga tawo motamay ug mobiaybiay niadtong kinsa mituo sa Ikaduhang Pag-anhi.

Hangyoa ang mga estudyante sa pagpasabut nganong nagtuo sila sa Ikaduhang Pag-anhi, bisan pa ang daghang mga tawo dili.

Dapita ang usa ka estudyante sa pagbasa og kusog sa 2 Pedro 3:10–14. Hangyoa ang klase sa pagsunod, nga mangita kon unsay gitudlo ni Pedro mahitungod sa Ikaduhang Pag-anhi. Explain that conversation in verse 11 means conduct (see 1 Timothy 4:12, footnote c) and “hasting unto” in verse 12 means awaiting something eagerly.

• Sumala sa bersikulo 10, unsay gitudlo ni Pedro mahitungod sa Ikaduhang Pag-anhi?

• Sumala sa bersikulo 11–14, unsay gitambag ni Pedro sa mga Santos aron sa pag-andam nila alang sa Ikaduhang Pag-anhi? (Magpakabuhi nga balaan og diosnon, magbantay ug mahinangupong magpaabot sa Ikaduhang Pag-anhi, ug makugihong maninguha nga mahikaplagan nga “wala untay buling o hugaw” [bersikulo 14].)

Ipasabut nga ang mga pulong “wala untay buling o hugaw” (bersikulo 14) nagpasabut nga limpyo gikan sa sala. Kadtong kinsa limpyo sa sala nahiuli na sa Dios ug mahikaplagan nga anaa sa kalinaw uban sa Manluluwas inig abot Niya.

• Unsaon ninyo pag-summarize ang usa ka baruganan nga gitudlo ni Pedro mahitungod sa unsaon nato pagpangandam alang sa Ikaduhang Pag-anhi sa Manluluwas? (Tabangi ang mga estudyante sa pag-ila og usa ka baruganan susama sa mosunod: Makapangandam kita alang sa Ikaduhang Pag-anhi sa Manluluwas pinaagi sa pagpakabuhi nga diosnon ug matinguhaong magbantay sa Iyang Pag-anhi. Ipasabut nga ang “magbantay” mahimong nagpasabut nga mahinangupon kitang nagpaabut sa Pag-anhi sa Manluluwas.)

• Unsay pipila ka mga butang nga mahimo natong buhaton aron magpakabuhi nga diosnon samtang matinguhaon kitang nagbantay sa Ikaduhang Pag-anhi?

I-summarize ang 2 Pedro 3:15–18 pinaagi sa pagpasabut nga mipasidaan si Pedro mahitungod sa pagkahulog ngadto sa pagkadautan. Midapit siya sa mga Santos nga “managtubo sa grasya ug sa kahibalo [kang] … Jesukristo” (bersikulo 18).

Tapusa pinaagi sa pagpamatuod sa mga kamatuoran nga gitudlo sa 2 Pedro 2–3. Dapita ang mga estudyante sa pagtinguha nga mailhan ug malikayan ang bakak nga mga pagtulun-an ug sa makugihong pagpangandam alang sa Ikaduhang Pag-anhi.