Pasiuna sa Bag-ong Tugon

Sa dili pa ang klase, Isulat ang mosunod nga mga pangutana diha sa pisara: Unsa ang pipila ka mga luwan nga nasinati sa kabatan-onan sa atong panahon?

Pagdala diha sa klase og walay sulod nga kahon o backpack ug bug-at nga mga butang nga isulod sa kahon o backpack, sama sa dagko nga mga bato o mga libro. Dapita ang usa ka estudyante sa pagduol sa atubangan sa klasehanan ug hangyoa siya sa paggunit sa walay sulod nga kahon o pagbutang sa backpack. Hangyoa ang klase sa pagtubag sa pangutana nga gisulat sa pisara, ug hangyoa ang laing estudyante sa pagsulat sa mga tubag sa mga estudyante diha sa pisara. Human sa matag tubag, isulod ang bug-at nga butang diha sa kahon o backpack hangtud nga mapuno kini.

• Unsay inyong bation kon kamo ang magdala niini nga luwan sa tibuok adlaw?

Hangyoa ang mga estudyante sa pagpasabut sa mga hagit o mga kalisud nga ang pipila sa mga luwan makaapekto sa usa ka tawo.

Ipasabut nga ang Bag-ong Tugon nagtudlo kanato mahitungod sa pangalagad ni Jesukristo sa mortal pa siya ug human sa pagkabanhaw, lakip sa Iyang mga pagtulun-an, mga milagro, maulaong sakripisyo, ug mga pagbisita sa unang mga tinun-an sa simbahan. Sa kinatibuk-an sa Iyang mga pagtulun-an ug mga inter-aksyon sa uban mao ang balik-balik nga kamatuoran nga makatabang sa atong gipas-an nga luwan.

Ipasabut nga ang Mateo 11 naglakip sa ehemplo niining importante nga tema nga makita kanunay sa mga estudyante sa ilang pagtuon sa Bag-ong Tugon niining tuiga. Dapita ang usa ka estudyante sa pagbasa og kusog sa Mateo 11:28. Hangyoa ang klase sa pagsunod, mangita sa imbitasyon sa Manluluwas niadtong kinsa nagpas-an og lisud nga mga luwan.

• Unsa sa inyong hunahuna ang gipasabut sa nabudlay ug nabug-atan?

• Unsa ang gisulti sa Manluluwas nga kinahanglan natong buhaton aron makadawat sa Iyang kapahulayan? (Gamit ang mga pulong sa mga estudyante, isulat ang mosunod nga baruganan sa pisara: Sa atong pagduol ngadto ni Jesukristo uban sa atong mga luwan, kita Iyang papahulayon.)

• Unsa sa inyong hunahuna ang gipasabut sa pagduol ngadto ni Jesukristo?

Sa pagtabang sa mga estudyante nga makasabut unsay gipasabut sa pagduol ngadto ni Kristo, dapita ang usa ka estudyante sa pagbasa og kusog sa Mateo 11:29–30. Hangyoa ang klase sa pagsunod, mangita sa mga instruksyon sa Manluluwas niadtong kinsa nagtinguha sa pagduol ngadto Kaniya.

• Sumala niini nga mga bersikulo, unsay atong kinahanglan nga buhaton aron sa pagduol ngadto ni Kristo?

Pagdrowing og litrato sa yugo alang sa baka diha sa pisara, o ipakita ang litrato sa yugo.

Imahe

kahoy nga yugo

Ang yugo usa ka kahoy nga gibabag, kasagarang gigamit taliwala sa pares nga baka o lain nga mga hayop nga makahimo kanila sa pagbitad og dungan sa luwan.

• Unsay katuyoan ug benepisyo sa usa ka yugo? (Bisan og ang yugo bug-at o luwan, kini makapahiusa sa kusog sa mga hayop, sa ingon makadugang sa ilang kamapuslanon.)

• Unsa sa inyong hunahuna ang ipasabut sa pagdala ngari nato sa yugo sa Manluluwas?

Dapita ang usa ka estudyante sa pagbasa og kusog sa mosunod nga pahayag ni Elder David A. Bednar sa Korum sa Napulog Duha ka mga Apostoles. Hangyoa ang klase sa pagpaminaw kon unsaon nato sa pagdala sa yugo sa Manluluwas ngari nato ug unsa nga mga panalangin ang atong madawat kon atong buhaton.

Imahe

Elder David A. Bednar

“Ang yugo nagbutang sa mga hayop nga mag-abay aron sila makalihok og dungan aron mahimo ang usa ka buhat.

“Hunahunaa ang talagsaong indibidwal nga pagdapit sa Ginoo nga ‘isangon ninyo ang akong yugo diha kaninyo.’ Ang paghimo ug paghupot og sagradong mga pakigsaad nagyugo kanato ngadto ug uban ni Ginoong Jesukristo. Sa tinuod nga kahulugan, ang Manluluwas nagtawag kanato sa pagsalig diha ug pagbitad og dungan uban Kaniya, bisan tuod ang atong labing maayo nga paningkamot dili makatumbas ug dili ikatandi sa Iya. Samtang kita nagsalig ug nagbitad sa atong luwan uban Kaniya panahon sa atong panaw sa mortalidad, sa tinuod masayon ang Iyang yugo ug magaan ang Iyang luwan.

“Kita dili ug dili gayud kinahanglan nga mag-inusara. Makalahutay kita sa atong inadlaw nga mga kinabuhi uban sa langitnong panabang. Pinaagi sa Pag-ula sa Manluluwas makadawat kita og kapasidad ug ‘kalig-on lapas sa atong kaugalingon’ (‘Lord, I Would Follow Thee,’ Hymns, no. 220)” (“Makadaug sa Ilang mga Alantuson uban sa Kasayon,” Ensign or Liahona, Mayo 2014, 88).

• Unsay “nagyugo” nato ngadto sa Manluluwas nga si Jesukristo?

• Sumala ni Elder Bednar, unsa ang mga panalangin nga nayugo ngadto sa Manluluwas?

Ipasabut nga ang saad sa Manluluwas sa “pahulay” sa Mateo 11:28–29 wala magpasabut nga kuhaon Niya kanunay ang atong mga problema o mga hagit. Kasagaran, ang Manluluwas mohatag nato sa kalinaw ug kalig-on nga atong gikinahanglan sa pagbuntog o paglahutay sa atong mga pagsulay, sa ingon nahimong magaan ang atong luwan. Kon matinud-anon kita sa atong mga hagit sa pagkamortal, ang katapusang pahulay nga atong madawat mao ang kahimayaan uban sa Dios (tan-awa sa D&P 84:23–24).

Hangyoa ang mga estudyante sa pagpamalandong sa unsa nga paagi ang Manluluwas mihatag nila og kapahulayan kon sila moduol ngadto Kaniya. Pagdapit og pipila ka mga estudyante sa pagpakigbahin sa ilang mga kasinatian uban sa klase. Mahimo kamong mopakigbahin sa usa sa inyong kaugalingong mga kasinatian.

Dapita ang mga estudyante sa paghimo og mga tumong kabahin sa mga paagi nga sila makaduol ngadto ni Jesukristo niining tibuok tuig sa pagtuon sa Bag-ong Tugon. Awhaga sila nga ilakip sa ilang mga tumong ang pagtuon sa mga kasulatan kada adlaw ug pagbasa sa tibuok Bag-ong Tugon niining tuiga.

Hangyoa ang mga estudyante sa paghunahuna sa mga panahon sa ilang kinabuhi sa dihang sila ganahan ug madasigong mosulti sa uban sa ilang kasinatian o sa ilang nakita, nabasa, o nadunggan. Dapita ang pipila sa mga estudyante sa pag-report unsay ilang giganahan ug madasigong gisulti.

Ipasabut nga ang Bag-ong Tugon naglakip sa daghang mga ehemplo sa mga indibidwal kinsa nalig-on, natudloan, o napanalanginan sa Ginoo ug dayon mibati og tinguha sa pagsulti sa uban mahitungod Kaniya. Dapita ang pipila ka mga estudyante sa pagpuli-puli og basa og kusog gikan sa Juan 1:37–42. Hangyoa ang klase sa pagsunod, mangita kon unsay gibuhat sa duha ka tinun-an ni Juan Bautista human makadungog sa iyang pagpamatuod ni Jesus.

• Unsay nakat-unan ni Andres mahitungod ni Jesus samtang siya nakigsulti Kaniya?

• Unsay gibuhat ni Andres human siya makahibalo nga si Jesus mao ang Mesiyas?

• Sa inyong hunahuna nganong madasigon kaayo siya nga mopakigbahin niini nga balita ngadto sa iyang igsoong lalaki, nga si Simon Pedro?

I-summarize ang Juan 1:43–44 pinaagi sa pagsulti sa mga estudyante nga ang Manluluwas midapit sa usa ka tawo nga ginganlan og Felipe nga mahimo Niyang tinun-an. Dapita ang usa ka estudyante sa pagbasa og kusog sa Juan 1:45–46. Hangyoa ang klase sa pagsunod, mangita kon unsay gibuhat ni Felipe human siya makahibalo nga si Jesus mao ang Mesiyas.

• Unsa ang gisulti ni Felipe ngadto ni Natanael mahitungod ni Jesus sa Nazareth?

• Unsay gitubag ni Natanael ngadto sa pagpamatuod ni Felipe nga si Jesus mao ang Mesiyas?

• Unsa ang imbitasyon ni Felipe ngadto ni Natanael?

Isulat ang mosunod nga dili kompleto nga pamahayag diha sa pisara: Sa atong pagduol ngadto ni Jesukristo, …

• Base niini nga mga ehemplo gikan sa Bag-ong Tugon, unsay atong tinguhaon kon kita moduol ngadto ni Jesukristo? (Samtang motubag ang mga estudyante, kompletuha ang pamahayag diha sa pisara aron kini motudlo sa mosunod nga mga baruganan: Kon kita moduol ngadto ni Jesukristo, mas modako ang atong tinguha sa pagdapit sa uban sa pagduol ngadto Kaniya.)

Sa pagtabang sa mga estudyante nga mas makasabut niini nga baruganan, kopyaha ang gisukip nga diagram diha sa pisara:

Imahe

arrow diagram

• Ngano sa inyong hunahuna nga makabaton kita og mas dako nga tinguha sa pagdapit sa uban sa pagduol ngadto ni Kristo kon kita sa atong kaugalingon moduol ngadto Kaniya?

Ipasabut nga si Presidente Henry B. Eyring sa Unang Kapangulohan mitudlo mahitungod sa daghang mga panalangin nga atong madawat kon kita modapit sa uban nga moduol ngadto ni Jesukristo. Dapita ang usa ka estudyante sa pagbasa og kusog sa mosunod nga pamahayag:

Imahe

Presidente Henry B. Eyring

“Kon kinsasingkasing kamong modapit sa mga tawo sa pagduol ngadto kang Kristo, ang inyong kasingkasing mausab. … Pinaagi sa pagtabang sa uban nga moduol ngadto Kaniya, inyong makita nga kamo mismo moduol ngadto Kaniya” (“Duol ngadto ni Kristo,” Ensign, Mar. 2008, 52).

• Unsay mahitabo sa atong kinabuhi kon kita modapit sa uban sa pagduol ni Kristo.

Dugangi og arrow ang gihulagway diha sa pisara aron kini makita nga susama sa gisukip nga diagram:

Imahe

duha ka arrow nga diagram

• Ngano sa inyong hunahuna nga ang pagdapit sa uban sa pagduol ni Kristo makatabang usab nato nga mas mahiduol Kaniya?

• Kinsa ang nagdapit ninyo sa pagduol ngadto sa Manluluwas ug sa Iyang ebanghelyo? Sa unsa nga paagi nga ang inyong kinabuhi napanalanginan isip resulta?

Awhaga ang mga estudyante sa mainampoon nga paghunahuna kinsa ang ilang dapiton sa pagduol ni Jesukristo.

• Unsay atong mahimo sa pagdapit sa uban sa pagduol ngadto Kaniya?

Ipasabut nga ang pagdapit sa mga higala ug mga kauban sa klase sa pagtambong sa seminary usa ka paagi nga ang mga estudyante makadapit sa uban sa “pagduol ug pagtan-aw” kinsa si Jesukristo ug sa unsa nga paagi nga ang Iyang ebanghelyo makapanalangin sa ilang mga kinabuhi.

Dapita ang usa ka estudyante sa pagbasa og kusog sa Juan 1:47–50. Hangyoa ang klase sa pagsunod, mangita kon unsay nasinati ni Natanael sa dihang iyang nahimamat ang Manluluwas (ipasabut nga ang pulong nga “wala ang pagkalimbongan” nagpasabut nga walay pagpanikas).

• Unsay gisulti sa Manluluwas ang nakaingon nga si Natanael mipahayag nga si Jesus mao ang Anak sa Dios?

• Sumala sa bersikulo 50, unsay gisaad sa Manluluwas ni Nathanael tungod kay siya mituo?

Ipasabut nga uban ni Andres, Pedro, Felipe, ug uban, si Natanael nahimong usa sa mga Apostoles ni Jesus. Tungod kay kini nga mga Apostoles naminaw sa pagdapit sa pagduol ngadto ni Jesukristo, sila nakasaksi og daghang “dagkong mga butang” (bersikulo 50), lakip sa mga milagro ug mga pagtulun-an ni Jesukristo ug sa Iyang Pagkabanhaw ug Pagkayab ngadto sa langit.

Tapusa pinaagi sa pagpamatuod nga kon ang mga estudyante magtuon sa Bag-ong Tugon karong tuiga, ilang mabati ang kanunay nga paghangyo sa Manluluwas sa pagduol ngadto Kaniya. Kon ilang gamiton ang mga doktrina ug mga baruganan nga ilang nakat-unan sa tibuok tuig, ilang madawat ang Iyang panabang sa ilang luwan ug, sama sa karaang mga Apostoles, mapuno sa tinguha sa pagtabang sa uban nga moduol usab Kaniya.