Sa wala madugay human gihimo ang iyang sulat ngadto sa mga Santos sa Tesalonica, gihimo ni Pablo ang iyang ikaduha nga sulat, diin iyang giklaro ang mga kamatuoran mahitungod sa Ikaduhang Pag-anhi. Gitudlo niya nga ang Manluluwas dili pa mobalik hangtud adunay apostasiya nga mahitabo. Dayon gisangyaw ni Pablo ang batok sa pagkatapulan ug gitambagan ang mga Santos nga “ayaw kamo pagkataka [pagkaluya] sa pagbuhat ug maayo” (2 Mga Taga-Tesalonica 3:13).
Giawhag ni Pablo ang mga Santos pinaagi sa pagpanagna mahitungod sa Ikaduhang Pag-anhi ni Jesukristo
Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
Imahe
Elder Jeffrey R. Holland
“Ako moingon sa tanan ug ilabi na sa kabatan-onan sa Simbahan nga kon wala pa kamo tawaga, moabut ang adlaw nga kamo pagatawgon sa pagpanalipod sa inyong tinuohan o tingali bisan sa paglahutay og personal nga mga pang-abuso tungod lang kay kamo mga miyembro sa Simbahan ni Jesukristo sa mga Santos sa Ulahing mga Adlaw” (“Ang Bili—ug mga Panalangin—sa Pagkadisipulo,” Ensign o Liahona, Mayo 2014, 6).
Hangyoa ang klase sa pag-isa sa ilang mga kamot kon nakasulay na sila nga ilang gikinahanglan ang pagpanalipud sa ilang gituohan o molahutay sa oposisyon tungod sa ilang pagkamiyembro sa Simbahan. Dapita ang pipila ka estudyante sa pagpakigbahin sa ilang mga kasinatian.
Ipasabut nga si Pablo mihimo sa ikaduha niya nga sulat ngadto sa mga Santos sa Tesalonica ug gihisgutan ang daghan, lakip na ang oposisyon nga giatubang sa mga Santos. Dapita ang mga estudyante sa pagpangita og usa ka baruganan samtang sila nagtuon sa 2 Mga Taga-Tesalonica 1 nga makatabang nila nga makalahutay sa mga oposisyon ug mga kalisdanan nga ilang sagubangon isip mga miiyembro sa Simbahan.
Dapita ang usa ka estudyante sa pagbasa og kusog sa 2 Mga Taga-Tesalonica 1:3–5. Hangyoa ang klase sa pagsunod, nga mangita kon nganong gidayeg ni Pablo ang mga Santos sa Tesalonica.
Nganong gidayeg ni Pablo ang mga Santos sa Tesalonica?
Sumala sa bersikulo 5, unsa nga ganti ang madawat sa mga Santos gumikan sa paglahutay sa oposisyon ug kalisdanan uban sa “pagkamainantuson ug hugot nga pagtuo”?
Unsa nga baruganan ang atong makat-unan gikan niini nga mga bersikulo kon sa unsang paagi kita mapanalanginan kon kita molahutay sa oposisyon ug kalisdanan uban ang pagkamainantuson ug hugot nga pagtuo? (Ang mga estudyante mahimong mogamit og lain-laing mga pulong apan kinahanglang mahibalo sa baruganan nga susama sa mosunod: Kon magmatinud-anon kita sa paglahutay sa oposisyon ug kalisdanan uban sa pagkamainantuson ug hugot nga pagtuo, pagaiphon kitang takus sa gingharian sa Dios.)
Dapita ang usa ka estudyante sa pagbasa og kusog sa mosunod nga pamahayag ni Presidente Dieter F. Uchtdorf sa Unang Kapangulohan. Ipapaminaw sa klase kon unsay ipasabut sa mapailubong paglahutay:
Imahe
President Dieter F. Uchtdorf
“Ang pailub dili ang kawalay pagtagad, ni kini kapakyas sa pagbuhat tungod sa atong kahadlok. Ang pailub nagkahulugan nga aktibong maghulat ug maglahutay. Nagkahulugan kini nga magpabilin uban sa usa ka butang ug sa pagbuhat kutob sa atong mahimo—motrabaho, molaum, ug mogamit sa hugot nga pagtuo, paglahutay sa kalisud uban sa determinasyon, bisan kon ang mga tinguha sa atong kasingkasing nalangan. Ang pailub dili lamang ang paglahutay; kondili paglahutay og maayo!” (“Ipadayon ang Pagpailub,” Ensign o Liahona, Mayo 2010, 57).
Sumala ni Presidente Uchtdorf, unsay buot ipasabut sa mapailubong paglahutay?
Nganong nagkinahanglan man kita og pagtuo aron mapailubong makalahutay sa oposisyon o kalisdanan?
Dapita ang mga estudyante sa paghunahuna og usa ka tawo nga ilang nahibaloan o nabasa sa mga kasulatan kinsa matinud-anon ug mapailubong milahutay sa oposisyon ug kalisdanan.
Kinsa ang inyong nahunahunaan, ug sa unsang paagi siya matinud-anong mipakita ug mapailubong milahutay sa oposisyon ug kalisdanan?
Dapita ang mga estudyante sa pagpamalandong kalabut sa oposisyon o mga kalisdanan nga tingali ilang gisagubang karon ug sa pagtino kon unsaon nila sa paglahutay kining mga hagit uban sa pagpailub ug pagtuo. Awhaga sila sa pag-ampo alang sa tabang.
Ipasabut nga sigon sa narekord sa 2 Mga Taga-Tesalonica 1:6–10, gipanagna ni Pablo ang Ikaduhang Pag-anhi ni Jesukristo. Bahina ang klase ngadto sa grupo nga tag-duha o tag-tulo. Dapita ang matag grupo sa pagbasa og dungan sa 2 Mga Taga-Tesalonica 1:6–10 ug sa paghisgot sa mosunod nga mga pangutana. (Mahimo nga imong isulat sa pisara kining mga pangutana o ihatag kini isip usa ka handout.) Hangyoa ang mga estudyante sa pagrekord sa ilang mga tubag diha sa ilang mga class notebook o mga scripture study journal.
Unsa nga mga pulong ug hugpong sa mga pulong ang gigamit ni Pablo sa paghulagway sa Ikaduhang Pag-anhi?
Unsay mahitabo sa mga matarung kon moabut na ang Ikaduhang Pag-anhi?
Unsay mahitabo sa mga dautan kon moabut na ang Ikaduhang Pag-anhi?
Human sa igo nga panahon, dapita ang pipila ka estudyante sa pagreport diha sa klase sa unsay ilang mga nakit-an. Isulat sa pisara ang mosunod nga kamatuoran: Sa ikaduhang Pag-anhi ni Jesukristo, ang mga matarung makapahulay ug ang dautan pagagun-ubon.
Sa unsa kahang mga butanga ang mga matarung makapahulay?
Sa unsang paagi kini nga doktrina makahupay niadtong kasamtangan nga nag-antus og mga kalisdanan tungod sa ilang pasalig [komitment] kang Kristo?
Hangyoa ang klase sa pag-isa sa ilang mga kamot kon nakasulay ba sila nga maghunahuna kon kanus-a moabut ang Ikaduhang Pag-anhi ni Jesukristo. Ipasabut nga ang mga Santos sa Tesalonica naghunahuna usab mahitungod niini ug nga si Pablo nabalaka nga basin og nasayop sila.
Dapita ang usa ka estudyante sa pagbasa og kusog sa 2 Mga Taga-Tesalonica 2:1–2. Hangyoa ang klase sa pagsunod, nga mangita kon unsay naa sa hunahuna ni Pablo nga maoy konklusyon sa mga Santos sa Tesalonica mahitungod sa kanus-a gayud ang panahon sa Ikaduhang Pag-anhi.
Unsa ang dili gusto ni Pablo nga tuohan sa mga Taga-Tesalonica mahitungod sa kon kanus-a gayud ang panahon sa Ikaduhang Pag-anhi? (Nga moabutay na kini.)
Hangyoa ang mga estudyante sa pagbasa og hilum sa 2 Mga Taga-Tesalonica 2:3, nga mangita sa unsay giingon ni Pablo nga mahitabo sa dili pa moabut ang Ikaduhang Pag-anhi. Ipasabut nga ang mga pulong nga “kadtong adlawa” nag-refer sa Ikaduhang Pag-anhi, ug ang “pagsupil” nag-refer sa apostasiya.
Unsa nga kamatuoran ang atong makat-unan gikan niini nga mga bersikulo kon unsa ang mahitabo sa dili pa ang Ikaduhang Pag-anhi? (Ang mga estudyante mahimong mogamit og lain-laing mga pulong apan kinahanglang mahibalo sa baruganan nga susama sa mosunod: Sa dili pa ang Ikaduhang Pag-anhi ni Jesukristo, usa ka apostasiya ang mahitabo.)
Ipasabut nga niini nga mga bersikulo, misugyot si Pablo nga ang mga miyembro sa Simbahan sa iyang kapanahunan kinahanglang mas maghunahuna mahitungod sa apostasiya nga nagsugod na diha kanila kay sa kon kanus-a gayud ang panahon sa Ikaduhang Pag-anhi sa Ginoo.
Aron matabangan ang mga estudyante nga makasabut unsa ang Apostasiya, hangyoa ang usa ka estudyante sa pagbasa og kusog sa mosunod nga pagpasabut:
“Human sa kamatayon ni Jesukristo, ang dautang mga tawo migukod sa mga Apostoles ug sa mga miyembro sa Simbahan ug mipatay sa kadaghanan kanila. Uban sa pagkamatay sa mga Apostoles, ang mga yawe sa priesthood ug ang katungod sa pagpangulo sa priesthood gikuha gikan sa yuta. Ang mga Apostoles mibantay sa mga doktrina sa ebanghelyo nga magpabiling lunsay ug mipatunhay og kahusay ug naghimog sumbanan sa katakus alang sa mga miyembro sa Simbahan. Dihang wala na ang mga Apostoles, sa ngadto-ngadto ang mga doktrina nangatuis, ug walay pagtugot nga mga pag-usab gihimo diha sa organisasyon sa Simbahan ug sa mga ordinansa sa priesthood, sama sa bunyag ug pagtugyan sa gasa sa Espiritu Santo” (Isangyaw ang Akong Ebanghelyo: Usa ka Giya sa Misyonaryo nga Pangalagad [2004], 40).
Base niini nga panabut kalabut sa Apostasiya, ngano nga gikinahanglan man ang pagpahiuli sa ebanghelyo ni Jesukristo ug sa Iyang Simbahan?
Ipasabut nga ang “tawo sa kalapasan” nga gihisgutan diha sa 2 Mga Taga-Tesalonica 2:3 nag-refer kang Satanas. Ang Pagpahiuli sa ebanghelyo, lakip ang pagtungha sa Basahon ni Mormon, “mipadayag” (bersikulo 3) sa mga pagpanglingla ni Satanas ug sa iyang mga sumusunod.
I-summarize ang 2 Mga Taga-Tesalonica 2:4–17 pinaagi sa pagpasabut nga nanagna si Pablo nga ang Ginoo motugot nga si Satanas molingla sa mga lumulupyo sa kalibutan hangtud sa Ikaduhang Pag-anhi. Giawhag ni Pablo ang mga Santos sa “pagbarug nga malig-on” sa unsay iyang gitudlo kanila (bersikulo 15).
Gipahimangnoan ni Pablo ang mga tawong dili disiplinado ug gitudloan nga magmapaningkamuton sa kaugalingon
Ipasabut nga sa panahon nga gihimo ni Pablo kini nga Ikaduhang Sulat ngadto sa mga Taga-Tesalonica, ang mga miyembro sa Simbahan regular nga mihimo og usa ka fiesta nga may kalabutan sa pag-ambit sa sakrament. Hinoon ang ubang mga miyembro nga Taga-Tesalonica mitambong sa fiesta aron mokaon apan wala motabang sa paghatag o pag-andam og pagkaon para sa kumbira.
Unsa nga mga problema ang nahimong resulta gumikan niini nga sitwasyon?
I-summarize ang 2 Mga Taga-Tesalonica 3:1–9 pinaagi sa pagpasabut nga si Pablo midayeg sa mga Santos nga nagmatinud-anon ug gipasidan-an sila mahitungod sa pagpakig-uban sa mga “magagawi sa pagkabagdoy,” o walay disiplina (bersikulo 6). Misulat usab si Pablo nga siya ug ang iyang mga kompanyon mipakita og ehemplo sa temporal nga pagka-mapaningkamuton sa kaugalingon pinaagi sa pagtrabaho [pagbudlay] aron sa pagsuporta sa ilang kaugalingon.
Dapita ang usa ka estudyante sa pagbasa og kusog sa 2 Mga Taga-Tesalonica 3:10–13. Hangyoa ang klase sa pagsunod, nga mangita kon unsay gisugo ni Pablo sa mga Santos bahin niadtong dili motrabaho.
Sumala sa bersikulo 12, unsa nga instruksyon ang gihatag ni Pablo niadtong dili motrabaho? (“magbudlay sila nga malinawon, ug makakaon sa kaugalingon nilang pagkaon,” o mag-mapaningkamuton sa kaugalingon pinaagi sa pagsangkap sa kaugalingon nilang panginahanglan.)
Sumala sa bersikulo 13, unsa ang dugang nga instruksyon ang gihatag ni Pablo ngadto sa matinud-anong mga Santos?
Unsay ipasabut sa “ayaw kamo pagkataka [pagkaluya] sa pagbuhat ug maayo”?
Unsa nga kamatuoran ang atong makat-unan gikan niini nga mga bersikulo? (Ang mga estudyante mahimong mogamit og lain-laing mga pulong apan kinahanglang mahibalo sa baruganan nga susama sa mosunod: Gisugo kita sa pagpaningkamot nga mahimong self-reliant ug sa pagtabang sa uban.)
Dapita ang usa ka estudyante sa pagbasa og kusog sa pamahayag gikan sa Alang sa Kalig-on sa Kabatan-onan. Hangyoa ang klase sa pagpaminaw kon sa unsang paagi kita mahimong mapaningkamuton sa kaugalingon.
“Usa sa mga panalangin sa pagtrabaho mao ang paglambo sa pagpaningkamot sa kaugalingon. Kon kamo mapaningkamuton sa kaugalingon, inyong gigamit ang mga panalangin ug mga abilidad nga gihatag sa Dios kaninyo sa pag-atiman sa inyong kaugalingon ug sa inyong pamilya ug sa pagpangita og mga solusyon sa kaugalingon ninyong mga problema. Ang pagpaningkamot sa kaugalingon wala magpasabut nga kamo kinahanglang makahimo sa tanang mga butang nga kamo ra. Aron mahimong tinuoray nga mapaningkamuton sa kaugalingon, kinahanglan kamong makat-on kon unsaon sa pakig-uban og trabaho sa lain ug moduol sa Ginoo alang sa Iyang tabang ug kalig-on.
“Hinumdumi nga ang Dios adunay mahinungdanong buhat nga ipahimo kaninyo. Siya mopanalangin kaninyo sa inyong mga paningkamot sa pagtuman niana nga buhat” (Alang sa Kalig-on sa mga Kabatan-onan [booklet, 2011], 41).
Unsaon nato nga mahimong mapaningkamuton sa kaugalingon?
Unsa ang ubang mga panalangin sa pagka-mapaningkamuton sa kaugalingon?
Ipamatuod nga samtang magtinguha kita nga mag-mapaningkamuton sa kaugalingon, tabangan kita sa Ginoo nga makab-ot ang atong panginahanglan ug tabangan kitang makakita sa mga solusyon sa atong mga problema.
Hangyoa ang mga estudyante sa paghunahuna kon unsay ilang mahimo aron mahimong mapaningkamuton sa kaugalingon karon ug sa umaabut. Dapita sila sa paghimo og tumong nga maoy makatabang nila nga mahimong mas mapaningkamuton sa kaugalingon, ug awhaga sila nga tinguhaon ang tabang sa Ginoo sa pagkab-ot niini.
I-summarize ang 2 Mga Taga-Tesalonica 3:14–18 pinaagi sa pagpasabut nga gitapos ni Pablo ang iyang sulat pinaagi sa pagtambag sa mga Santos nga dili magtinapulan ug mopalayo sa mga tawong tapulan ug sa mga tawo nga balda sa kalamboan. Hinoon, ang mga Santos dili angayang motratar kanila mga kaaway apan sa pagbadlong kanila isip mga igsoon diha sa ebanghelyo.
Tapusa pinaagi sa pagpamatuod sa mga kamatuoran nga gitudlo niini nga leksyon.
Dapita ang matag estudyante sa paggamit sa mga tabang sa pagtuon sa kasulatan (sama sa mga footnotes, sa Giya ngadto sa mga Kasulatan, ) sa pagpangita og uban pang kasulatan kay sa 2 Mga Taga-Tesalonica 2:1–3 nga nagtudlo mahitungod sa Apostasiya. Human sa igo nga panahon, hangyoa ang pipila ka estudyante nga ipakigbahin ang mga kasulatan nga ilang nakit-an ug ipasabut unsay gitudlo niini nga mga kasulatan mahitungod sa Apostasiya. Mahimo nimong ilista sa pisara ang mga reference nga ilang nakit-an. Dapita ang mga estudyante sa pagpili og usa ka kasulatan isip cross-reference sa 2 Mga Taga-Tesalonica 2:1–3. Mahimo nga imong isugyot nga isulat kini nga reference diha sa margin sa ilang mga kasulatan sunod 2 Mga Taga-Tesalonica 2:1–3. Ipasabut nga kini nga mastery passage kasagaran gigamit sa pagtudlo mahitungod sa Apostasiya ug sa panginahanglan alang sa Pagpahiuli. Dapita ang mga estudyante sa paggamit sa 2 Mga Taga-Tesalonica 2:1–3 ug sa usa sa mga reference sa kasulatan diha sa pisara sa pagtudlo sa kapares mahitungod sa Apostasiya.
“‘Ang pagsupil’ usa ka hubad sa pulong sa Gresya nga apostasiya, usa ka pulong nga mas duol og kahulugan sa ‘rebelyon’ o ‘pagbatok.’ Busa si Pablo namulong bahin sa intensyunal nga pakigbatok sa ebanghelyo ni Jesukristo kay sa anam-anam nga pagpalayo gikan niini. Sa Basahon ni Mormon, ang panan-awon ni Nephi bahin sa umaabut nagtudlo kaniya nga ang ‘balay ni Israel’ nagkatigum kauban niadtong anaa sa dako ug lapad nga gambalay ‘sa pagpakig-away batok sa napulog duha ka mga apostoles sa Kordero’ (1 Nephi 11:35). Ang apostasiya sa kasagaran dili yano nga usa ka wala nay pagtagad sa kamatuoran apan usa ka aktibong pagsupak nga naggikan sa sulod sa komunidad nga may pakigsaad” (New Testament Student Manual [manwal sa Church Educational System, 2014], 453).
Si Elder M. Russell Ballard sa Korum sa Napulog Duha ka mga Apostoles mipasabut nga ang Apostasiya nahitabo tungod kay ang mga tawo misalikway kang Kristo ug sa Iyang mga Apostoles:
“Sa mubong panahon nga naglangkob sa Bag-ong Tugon … ang mga tawo misalikway kang Kristo ug sa Iyang mga Apostoles. Ang pagkatumpag hillabihan nga kini atong giila nga Dako nga Apostasiya, nga midala ngadto sa gatusan ka mga tuig sa espirituhanong paghunong ug pagkaignorante nga gitawag og Mangiub nga mga Katuigan [Dark Ages].
“Karon, kinahanglan nga ako klaro kaayo kabahin niining makasaysayanong pagbalik-balik sa mga panghitabo sa apostasiya ug sa espirituhanon nga kangitngit. Ang atong Langitnong Amahan naghigugma sa tanan Niyang mga anak, ug Siya buot nga silang tanan makaangkon sa mga panalangin sa ebanghelyo sa ilang mga kinabuhi. Ang espirituhanong kahayag wala mawala tungod ang Dios mitalikod sa Iyang mga anak. Hinoon, ang espirituhanong kangitngit miresulta sa dihang ang Iyang mga anak naghiusang mitalikud Kaniya” (“Pagkat-on sa mga Leksyon sa Nangagi,” Ensign o Liahona, Mayo 2009, 32).
Daghang mga tawo human sa kamatayon sa mga Apostoles nagpadayon sa pagsunod sa Ginoo. Ang ilang pasalig ngadto sa Ginoo lig-on kaayo nga andam nilang antuson ang oposisyon ug bisan gani ang kamatayon tungod sa ilang mga gituohan. Atol sa kapanahunan sa Pagreporma, daghang tawo ang nakamatikud nga ang ubang mga pagtulun-an sa Kristiyanismo giusab ug wala na mohaum sa mga pagtulun-an sa Biblia. Kini nga mga tigreporma nagtinguha nga ang Kristiyanismo mas mapinasubay sa mga kasulatan. Si Presidente John Taylor miingon kalabut niadtong nagtinguha sa kamatuoran atol sa Mangiub nga mga Katuigan:
“Dunay mga tawo niadtong mga panahuna sa mangiub nga mga katuigan kinsa mahimong makig-istorya sa Dios, ug, pinaagi sa gahum sa pagtuo, mahimong moabli sa tabil sa kahangturan ug makasud-ong sa dili makita nga kalibutan[,] … makadawat og pagpangalagad sa mga anghel, ug makita ang kaugmaon sa kalibutan. Kon kadto mao ang mangiub nga mga katuigan mag-ampo ko nga hatagan ra ko sa Dios og gamayng kangitngit, ug haw-ason ako gikan nianang matang sa kahayag ug salabutan nga nagpatigbabaw sa among kapanuhunan” (sa Journal of Discourses, 16:197). (Alang sa dugang impormasyon kalabut sa matinud-anong mga paningkamot niini nga mga repormista, tan-awa sa Thomas S. Monson, “The Way Home,” Ensign, Mayo 1975, 15–16; tan-awa usab sa Isangyaw ang Akong Ebanghelyo: Usa ka Giya sa Misyonaryo nga Pangalagad [2004], 45–46.)
Gumikan sa paningkamot niini nga mga repormista ug ubang matinud-anong mga sumusunod sa Dios, ang mga kamatuoran mahitungod sa Langitnong Amahan ug sa Iyang plano nakasugakod bisan sa Apostasiya diha sa tanang relihiyon sa kalibutan. Hinoon, ang mga kamatuoran nga gikinahanglan para sa atong kaluwasan nawala, ingon man ang awtoridad sa priesthood sa pagdumala sa buhat ug pagpangalagad sa mga ordinansa sa kaluwasan. Gipaniguro sa Ginoo ngadto sa ubang mga relihiyon nga ang Pagpahiuli sa Simbahan ug ang Basahon ni Mormon wala magpahayag nga ang tanang butang nga ilang gitudlo sayop: “Tan-awa, Ako wala modala niini sa paglaglag niana nga ilang nadawat, apan sa pagtukod niini” (D&P 10:52). Alang niini nga hinungdan, si Presidente Gordon B. Hinckley midapit sa tanang katawhan sa kalibutan nga “dalha ninyo ang tanang anaa ninyo nga mga maayo ug kamatuoran bisan diin kini gikan, ug among susihon kon duna ba kami ikadugang niini” (“The Marvelous Foundation of Our Faith,” Ensign o Liahona, Nob. 2002, 81).