Pasiuna sa Kinatibuk-ang Sulat ni Apostol Judas

Ang Kinatibuk-ang Sulat ni Judas naghulagway sa mga pwersa sa apostasiya nga naglihok sa nag-unang Simbahan. Samtang nagtuon ang mga estudyante niini nga sulat, makat-unan nila unsaon sa pag-ila niadtong nagtinguha nga talikdan sa mga disipulo ang ilang pagtuo kang Jesukristo. Mabatyagan usab sa mga estudyante ang kaimportante sa pagpakigbisog sa pagpanalipud sa pagtuo ug pagpabiling matinuoron niini.

Ang tagsulat niini nga epistola nagpaila sa iyang kaugalingon nga si “Judas, ang ulipon o sulugoon ni Jesukristo ug igsoon ni Santiago” (Judas 1:1). Sa tradisyunal nga paagi ang tagsulat gisabut nga mao si Judas igsoon ni Jesukristo sa inahan (tan-awa sa Mateo 13:55; Marcos 6:3; Giya ngadto sa mga Kasulatan, “Judas”). Si Judas klaro nga usa ka miyembro sa Simbahan nga taas og dungog sa Jerusalem, ug tingali nakabiyahe siya isip usa ka misyonaryo (tan-awa sa Mga Buhat 1:13–14; 1 Mga Taga Corinto 9:5). Walay indikasyon kon unsa nga office sa priesthood ang gihuptan ni Judas, apan ang sulat mismo nag-ingon nga siya dunay katungdanan uban sa awtoridad nga naghimo niyang kwalipikado sa paghimo og mga sulat nga panambag.

Wala kita masayud kon diin gihimo ang Sulat ni Judas. Kon kini nga sulat sa tinuod gihimo man ni Judas nga igsoon ni Jesus, tingali gisulat kini sa tunga-tunga sa tuig A.D. 40 ug 80.

Ang Sulat ni Judas gitumong para sa matinud-anong mga Kristiyanos—“nganha kanila nga tinawag nga mga hinigugma diha sa Dios nga Amahan ug mga binantayan alang kang Jesukristo” (Judas 1:1). Ang gipamahayag ni Judas nga katuyoan mao ang pag-awhag sa iyang mga bumabasa nga “makigbisog sa pagpanalipud sa pagtuo” batok sa dili diosnong mga magtutudlo kinsa nakasulod sa Simbahan ug nagpasiugda og imoral nga mga kinaiya ug sayop nga mga pagtulun-an nga naglimud sa Ginoo nga si Jesukristo (Judas 1:3).

Bisan og usa kini sa kinamub-an nga basahon sa Bag-ong Tugon, ang Sulat ni Judas naglangkob og impormasyon nga dili makita bisan asa sa Biblia. Si Judas namulong kabahin sa mga anghel nga “wala managpabilin diha sa ilang nahimutangan” (bersikulo 6; tan-awa usab sa Abraham 3:26), bahin sa komprontasyon tali ni Miguel ug ni Lucifer mahitungod sa lawas ni Moises (bersikulo 9), ug bahin sa panagna ni Enoch mahitungod sa Ikaduhang Pag-anhi sa Manluluwas (mga bersikulo 14–15; tan-awa usab sa Moises 7:65–66).

Si Elder Bruce R. McConkie sa Korum sa Napulog Duha ka mga Apostoles nakabantay sa pipila ka lahi nga mga butang sa Sulat ni Judas:

“Sa tibuok Biblia, si Judas lamang ang nakapreserbar para nato sa konsepto nga ang kinabuhi sa wala pa dinhi sa yuta mao una natong dapit ug nga ang piho nga mga anghel wala makapasar sa pagsulay.

“Siya ang atong adtoan alang sa gamay natong kahibalo sa panagbangi tali ni Miguel ug ni Lucifer mahitungod sa lawas ni Moises.

“Siya lang ang nagrekord sa mahimayaong panagna ni Enoch mahitungod sa Ikaduhang Pag-anhi sa Anak sa Dios” (Doctrinal New Testament Commentary, 3 vols. [1965–73], 3:415).

Ang mga pulong ni Judas mahait batok niadtong misupak sa Dios ug sa Iyang mga sulugoon ug batok niadtong naghimo og imoral nga pagano nga pagsimba ug nangangkon nga wala silay labut sa pagsunod sa mga sugo sa Dios, lakip sa balaod sa kaputli. Gihulagway ni Judas ang pipila ka mga kinaiya niining dautang mga tawo.

Judas 1 Giawhag ni Judas ang mga miyembro sa Simbahan nga “makigbisog sa pagpanalipud sa pagtuo” (Judas 1:3). Gipasabut niya nga ang mga tawo hilum nga nakasulod kauban sa mga Santos ug nagpakatap og sayop nga doktrina ug nagpasiugda og dautang mga buhat. Mipasidaan si Judas sa mga paghukom nga moabut niadtong mga tawo nga mobiya sa Dios. Gitambagan ni Judas ang mga miyembro sa Simbahan nga palig-unon ang ilang pagtuo ug “[bantayan ang ilang kaugalingon] diha sa gugma sa Dios” (Judas 1:21).