Panahon sa katapusang semana sa mortal nga pangalagad sa Manluluwas, gipanghimaraut Niya ang pagpakaaron-ingnon sa mga escriba ug mga Pariseo ug naguol nga ang mga tawo sa Jerusalem dili modawat sa Iyang gugma ug panalipod.
Gipanghimaraut sa Manluluwas ang pagkamaut sa mga escriba ug mga Pariseo
Dapita ang mga estudyante sa pagpakita sa usag usa sa ilang hugpong sa mga kasulatan ug sa pagtino kon kinsa ang adunay kinadak-an nga hugpong.
Unsa may inyong reaksyon kon dunay mangangkon nga ang tawo nga dunay kinadak-ang hugpong sa mga kasulatan mao ang labing matarung?
Nganong dili man kini epektibo nga paagi sa pagtino sa pagkamatarung sa usa ka tawo?
Unsa kahay mahitabo kon atong tinuon ang pagkamatarung sa uban pinaagi sa unsay makita sa gawas? (Lakip sa ubang mga problema, mahimong moresulta kini nga ang ubang tawo molihok nga magminaut lang.)
Unsa man ang pagkamaut? (“Ang pulong sa kinatibuk-an nagpasabut sa usa ka tawo nga magpakaaron-ingnon nga relihiyuso apan dili diay siya tinuod nga relihiyuso” [Bible Dictionary, “Hypocrite”]. Nagpasabut usab kini sa usa ka tawo nga magpakaaron-ingnon nga dili relihiyuso apan tinuod gayud diay siya nga relihiyuso.)
Ipasabut nga isip kabahin sa katapusang mensahe sa Manluluwas diha sa kadaghanan nga gihatag didto sa templo sa Jerusalem panahon sa katapusang semana sa Iyang mortal nga pangalagad, Iyang gipanghimaraut ang pagkamaut sa mga escriba ug mga Pariseo.
Dapita ang mga estudyante sa pagpangita sa mga kamatuoran diha sa Mateo 23 nga makatabang kanila nga masayud unsay buhaton kon makakita sila sa uban nga molihok diha sa pagminaut ug unsay ilang mabuhat aron mabuntog ang pagkamaut sa ilang kaugalingong kinabuhi.
Papuli-puliha sa pagbasa og kusog ang pipila ka mga estudyante gikan sa Mateo 23:1–7. Hangyoa ang klase sa pagsunod, nga mangita kon unsay gisulti sa Manluluwas kalabut sa mga paagi diin ang mga escriba ug mga Pariseo nagpakamaut. Ipasabut nga ang mga pulong nga “nanaglingkod sa lingkuranan ni Moises” (bersikulo 2) nagpasabut nga ang mga escriba ug mga Pariseo naghupot og katungdanan nga dunay awtoridad sa pagtudlo sa doktrina ug sa paghubad ug pagpatuman sa balaod. Ang mga pulong mahimo usab nga magpasabut sa literal nga lingkuranan nga makita diha sa karaang mga sinagoga nga gireserba alang niadtong mikonsiderar sa ilang kaugalingon nga mas angayan kay ni bisan kinsa diha sa sinagoga.
Sa unsang mga paagi nga ang mga escriba ug mga Pariseo nagpakamaut?
Imahe
Jewish man wearing phylacteries
Usa ka Judeo nga nagsul-ob og mga pilakteria
Kon anaa, i-display ang hulagway sa usa ka tawo nga nagsul-ob og mga pilakteria, nga gitawag usab og tefillin. Ipasabut nga nakustombre na sa mga Judeo nga magsul-ob og mga pilakteria, nga gagmayng mga kahon nga panit nga ihigot sa agtang ug sa bukton. Sulod sa mga pilakteria mao ang gagmayng linukot nga papel nga naglangkob og mga kinutlo gikan sa Hebreohanon nga kasulatan. Nagsul-ob ang mga Judeo og mga pilakteria aron matabangan sila nga makahinumdom sa pagsunod sa mga sugo sa Dios (tan-awa sa Deuteronomio 6:4–9; 11:13–21; Exodo 13:5–10, 14–16). Wala gipanghimaraut sa Ginoo kadtong nagsul-ob og mga pilakteria, apan Iyang gipanghimaraut kadtong migamit niini sa pagminaut o mipadako niini aron makabantay nila ang uban o aron makita nga mas importante.
Sumala sa Mateo 23:5, nganong gipadak-an man sa mga escriba ug mga Pariseo ang ilang mga pilakteria ug “ang mga borlas sa ilang mga kupo”?
Unsa ang ubang mga paagi nga ilang gitinguha “aron lamang sa pagpakita ngadto sa mga tawo” (bersikulo 5) o makadawat og kalibutanong mga pasidungog?
Sumala sa tambag sa Ginoo ngadto sa Iyang mga disipulo diha sa Mateo 23:3, unsay atong mabuhat kon atong makita ang uban nga naglihok nga nagminaut, o nagpakaaron-ingnon nga matarung apan dili diay sila tinuod nga matarung? (Ang mga estudyante mahimong mogamit og lain-laing mga pulong apan kinahanglang mahibalo og usa ka kamatuoran nga susama sa mosunod: Makapili kita nga mosunod sa mga balaod sa Dios bisan kon atong makita ang uban nga naglihok nga nagminaut.)
Nganong importante man nga sundon nato kini nga kamatuoran sa atong panahon?
Dapita ang usa ka estudyante sa pagbasa og kusog sa Mateo 23:8, ug hangyoa ang klase sa pagpangita kon unsay gitambag sa Ginoo sa mga tawo nga dili nila angayng buhaton. Ipareport sa mga estudyante ang unsay ilang nakit-an.
Ipasabut ang mga pulong nga “kamong tanan mga magsoon” (bersikulo 8) ug ipasabut nga gitudlo sa Manluluwas sa mga tawo nga dili maghunahuna sa ilang kaugalingon nga mas maayo pa kay sa uban, tungod kay mga anak silang tanan sa Dios, patas diha sa Iyang panan-aw.
I-summarize ang Mateo 23:9–10 pinaagi sa pagpasabut nga ang Manluluwas mipamatuod nga ang Langitnong Amahan mao ang atong Tiglalang ug nga Siya, si Kristo, gipadala sa Amahan ug mao ang atong tinuod nga Agalon nga naghatag og kinabuhi (tan-awa sa Hubad ni Joseph Smith, Mateo 23:6; Matthew 23:7 ).
Ipasabut nga ang mga escriba ug mga Pariseo naghunahuna nga ang katungdanan ug kahimtang makapahimo nila nga halangdon. Dapita ang usa ka estudyante sa pagbasa og kusog sa Mateo 23:11–12, ug hangyoa ang klase sa pagpangita kon kinsa ang giingon sa Manluluwas nga Iyang isipon nga halangdon didto sa gingharian sa Dios.
Sumala sa bersikulo 11, kinsa man ang isipon nga halangdon didto sa gingharian sa Dios?
Sumala sa bersikulo 12, unsay mahitabo kon kita, sama sa mga Pariseo, mosulay nga “magapahitaas” (o mobayaw) sa atong kaugalingon ibabaw sa uban? (Human makatubag ang mga estudyante, siguroa nga ilang nasabtan ang mosunod nga baruganan: Kon kita mosulay nga magpahitaas sa atong kaugalingon ibabaw sa uban, kita igapahiubos. Ipasabut nga ang igapahiubos nagpasabut nga ipaus-os o pakaulawan o dili kaayo tahuron.)
Sumala sa bersikulo 11–12, unsay mahitabo kon kita mapaubsanon ug moserbisyo sa uban? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga baruganan: Kon kita mapaubsanon ug moserbisyo sa uban, ang Ginoo mopataas kanato.)
Ipasabut nga ang pulong “igapahitaas” (bersikulo 12) nagpasabut nga ang Ginoo mobayaw kanato ug motabang kanato nga mahisama Kaniya.
Basi sa unsay inyong nakat-unan diha sa Mateo 23, unsay buot ipasabut sa mamahimong mapaubsanon?
Drowinga sa pisara ang mosunod nga continuum. Dapita ang mga estudyante sa pagpamalandong sa ilang maayong binuhatan sa eskwelahan, sa panimalay, ug sa simbahan. Ipahunahuna nila kon asa nila ipahimutang ang ilang kaugalingon diha niini nga continuum basi sa ilang mga tinguha sa pagbuhat og maayong binuhatan ug sa ilang mga paningkamot nga magmapaubsanon.
Awhaga ang mga estudyante sa paghinumdom nga kitang tanan mga anak sa Langitnong Amahan. Mahimo usab nimo silang awhagon nga maghimo og tumong nga moserbisyo og usa ka tawo matag adlaw sa sunod bulan. Hunahunaa ang pagpasulat nila niining kasinatian diha sa ilang kaugalingong journal.
Gipahayag ni Jesukristo ang pagkaalaut sa mga escriba ug mga Pariseo
Sa dili pa magsugod ang klase, pag-andam og tulo ka dili sihag nga tasa. Pahiri og lapok o grasa ang gawas sa una nga tasa ug ang sulod sa ikaduha nga tasa, ug pasagdi nga limpyo ang ikatulong tasa. I-display ang mga tasa, ug pangutan-a ang klase kon hain niana ang gusto nilang imnan. Dapita ang usa ka estudyante sa pagsusi sa mga sulod sa mga tasa ug ipasabut kon hain nga tasa ang gusto niyang imnan ug ngano man.
Sa unsang mga paagi nga ang hugaw nga mga tasa nagrepresentar sa mga maut?
I-summarize ang Mateo 23:13–36 pinaagi sa pagpasabut nga gisaway sa Manluluwas ang mga escriba ug mga Pariseo tungod sa pagkamaut. Ipatan-aw sa mga estudyante kini nga mga bersikulo, nga mangita sa pulong nga gibalik-balik sa Manluluwas diha sa sinugdanan sa pipila ka mga bersikulo. Hangyoa sila sa pagreport kon unsay ilang nakit-an. Mahimo nimong isugyot nga markahan sa mga estudyante ang pulong nga alaut diha niini nga mga bersikulo. Ipasabut nga ang alaut nagpasabut sa kamakaluluoy, kalisud, ug kasubo.
Isulat sa pisara ang mosunod nga mga reference sa kasulatan ug mga pangutana:
Sa unsang paagi nga ang mga escriba ug mga Pariseo nagminaut?
Unsa nga mga ehemplo niining matang sa pagkamaut ang atong makita sa atong panahon karon?
Ipares-pares ang mga estudyante. Ipabasa og kusog sa kada parisan ang matag reference diha sa pisara ug pahisguti ang mga pangutana diha sa pisara human nila mabasa ang matag reference. (Encourage students to read the Joseph Smith Translation excerpts in the footnotes for their assigned passages.)
Human sa igong panahon, hangyoa ang mga estudyante sa pagreport sa ilang mga tubag.
Dapita ang usa ka estudyante sa pagbasa og kusog sa Mateo 23:26, ug hangyoa ang klase sa pagpangita kon unsay gisulti sa Manluluwas nga angayang buhaton sa mga Pariseo aron mabuntog ang ilang pagkamaut.
Unsa may gisulti sa Manluluwas nga angayang buhaton sa mga Pariseo?
Basi sa gitudlo sa Manluluwas ngadto sa mga Pariseo, unsay mahitabo kanato samtang maningkamot kita nga malimpyo sa espirituhanong paagi diha sa sulod nato? (Human makatubag ang mga estudyante, siguroa nga ilang nasabtan ang mosunod nga baruganan: Samtang maningkamot kita nga malimpyo sa espirituhanong paagi diha sa sulod nato, makita kini sa atong dayag nga mga pagpili.)
Unsa ang kinahanglan gayud natong buhaton aron malimpyo sa espirituhanong paagi diha sa sulod nato?
Sa unsang paagi nga ang atong pagkamatarung sa sulod nato makita sa atong dayag nga mga pagpili?
Dapita ang mga estudyante sa pagpamalandong kon hain nga tasa ang mas nagrepresentar sa ilang kasamtangang espirituhanong kahimtang. Ipamatuod ang mahitungod sa miaging baruganan, ug awhaga ang mga estudyante sa paghimo og tumong nga makatabang kanila nga malimpyo sa espirituhanong paagi.
Ang Manluluwas naguol nga ang mga tawo sa Jerusalem dili moduol Kaniya
Imahe
hen, chicks
I-display ang usa ka hulagway sa himongaan nga nanalipod sa iyang mga piso.
Nganong ang mga himongaan motigum man sa ilang mga piso ilawom sa ilang mga pako? (Aron sa pagpanalipod kanila gikan sa peligro. Ipasabut nga ang usa ka himongaan mosakripisyo sa iyang kinabuhi aron sa pagpanalipod sa iyang mga piso.)
Dapita ang usa ka estudyante sa pagbasa og kusog sa Mateo 23:37–39. Hangyoa ang klase sa pagsunod, nga mangita kon giunsa pagsulti sa Manluluwas nga sama Siya sa usa ka himongaan.
Sa unsang paagi nga ang Manluluwas sama sa usa ka himongaan nga nagatigum sa iyang mga piso?
Unsay buot ipasabut sa matigum sa Manluluwas?
Ipasabut ang mga pulong “mabiniyaan ug magamingaw ang inyong balay” (bersikulo 38), ug ipasabut nga ang magamingaw nagpasabut nga walay nagpuyo o giabandonar. Tungod kay ang mga tawo dili andam nga matigum sa Manluluwas, gipasagdan sila nga walay panalipod. Kini nga mga pulong mahimong nagpasabut sa espirituhanong kahimtang sa mga tawo atol sa panahon ni Jesus ingon man usab sa umaabut kon ang Jerusalem pagalaglagon.
Basi sa gitudlo ni Jesus kalabut sa usa ka himongaan ug sa iyang mga piso, unsa may atong madawat kon andam kita nga matigum sa Manluluwas? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga baruganan: Kon andam kita nga matigum sa Manluluwas, nan makadawat kita sa Iyang pag-amuma ug pagpanalipod.)
Sa unsang paagi nato mapakita sa Manluluwas nga andam kita nga matigum Niya? (Ilista sa pisara ang mga tubag sa mga estudyante.)
Aron matabangan ang mga estudyante nga makasabut sa usa ka paagi nga matigum sila ngadto sa Manluluwas, dapita ang usa ka estudyante sa pagbasa og kusog sa mosunod nga pamahayag ni Presidente Henry B. Eyring sa Unang Kapangulohan:
Imahe
President Henry B. Eyring
“Labaw pa sa makausa [ang Manluluwas] miingon nga Siya motigum kanato ingon sa himongaan nga magtigum sa iyang mga piso. Siya miingon nga kita kinahanglan nga mopili nga moduol Kaniya. …
“Usa sa paagi nga buhaton mao ang pagtigum sa mga Santos diha sa Iyang Simbahan. Tambong sa inyong mga miting, bisan kon kini daw malisud. Kon ikaw determinado, Siya motabang nimo nga makaangkon og kalig-on sa pagbuhat niini” (“Diha sa Gahum sa Ginoo,” Ensign o Liahona, Mayo 2004, 18).
Unsay gisulti ni Presidente Eyring nga atong mabuhat aron mapakita ang atong kaandam nga matigum sa Manluluwas?
Hangyoa ang mga estudyante sa pagtan-aw sa lista diha sa pisara mahitungod sa mga paagi nga mapakita nato ang atong kaandam nga matigum ni Kristo. Dapita sila sa pagpakigbahin kon giunsa nila pagkadawat sa pag-amuma ug pagpanalipod pinaagi sa pagtigum ngadto sa Manluluwas sa usa niadtong mga paagi.
Padesisyuni sa mga estudyante kon unsay ilang buhaton nga matigum ngadto sa Manluluwas aron padayon sila nga makadawat sa Iyang pag-amuma ug pagpanalipod.
Si Presidente N. Eldon Tanner sa Unang Kapangulohan mipasabut nga dunay duha ka matang sa pagkamaut:
“Si Harry Emerson Fosdick nakabantay nga adunay duha ka matang sa pagkamaut: kon kita mopakita nga mas maayo kay sa unsa kita, ug kon kita mopakita nga ngil-ad kay sa unsa kita. Kita nakahisgot niana nga matang sa pagkamaut diin ang mga tawo magpakaaron-ingnon nga mas maayo kay sa unsa sila. Sagad kaayo, bisan pa niana, makakita kita og mga miyembro sa Simbahan kinsa sa ilang mga kasingkasing nasayud ug nagtuo, apan tungod sa kahadlok sa opinyon sa publiko napakyas sa pagbarug ug pagdepensa sa kamatuoran. Kini nga matang sa pagkamaut ingon ra usab ka seryuso sa usa” (“Woe unto You … Hypocrites,” Improvement Era, Dis. 1970, 33).
Mateo 23:35. “Zacarias nga anak ni Baraquias, nga inyong gipatay diha sa kinatung-an sa templo ug sa halaran”
Sa Septyembre 1842 nga isyu sa Times and Seasons, nga gimantala samtang si Propeta Joseph Smith nagserbisyo isip editor, usa ka pagpasabut ang gihatag kalabut sa kapalaran ni Zacarias, ang amahan ni Juan Bautista:
“Sa dihang gipagawas ang mando ni Herodes nga patyon ang mga bata, mas magulang si Juan og mga unom ka bulan ni Jesus, ug miabut kining yawan-ong mando, ug gipadala siya ni Zacarias sa iyang inahan ngadto sa kabukiran, diin gipakaon siya og dulon [locust] ug dugos sa kagulangan [wild honey]. Sa dihang ang iyang amahan nagdumili sa pagbutyag sa dapit nga iyang gitagoan, ug kay mao ang tigdumalang ulohan nga sacerdote [high priest] sa Templo nianang tuiga, [siya] gipatay pinaagi sa mando ni Herodes, sa kinatung-an sa balkon ug sa halaran, sama sa gisulti ni Jesus” (“Persecution of the Prophets,” Times and Seasons, Sept. 1, 1842, 902).