1 Juan

Ipares-pares ang mga estudyante. Isulat sa pisara ang pulong nga apostasiya o hingpit nga pagbiya. Dapita ang mga estudyante sa pag-atubang sa ilang mga kapares ug sa makadiyot ipasabut ang kahulugan sa apostasiya. Dayon dapita ang mga estudyante sa pag-adto sa pisara ug isulat ang depinisyon sa apostasiya. Ang depinisyon kinahanglang magpasabut nga ang apostasiya nagpasabut sa pagbiya sa kamatuoran (tan-awa sa Giya ngadto sa mga Kasulatan, “Hingpit nga Pagbiya,” scriptures.lds.org).

Ipasabut nga si Apostol Juan misulat sa epistola sa 1 Juan sa panahon dihang ang apostasiya naghulga sa Simbahan. Niini nga sulat, gipasidan-an ni Juan ang mga Santos batok sa mga anti-kristo (tan-awa sa 1 Juan 2:18–26; 4:3). Ang anti-kristo mao kadtong “bisan kinsa o bisan unsa nga mahasupak sa tinuod nga ebanghelyo sa laraw sa kaluwasan ug nga sa dayag ug sa tinago misupak kang Kristo” ug sa awtoridad ug sa mga pagtulun-an sa Iyang pinili nga mga sulugoon (Giya ngadto sa mga Kasulatan, “Anti-kristo,” scriptures.lds.org). Ang pipila sa mga anti-kristo sa panahon ni Juan nagtudlo nga si Jesukristo walay pisikal nga lawas samtang dinhi sa yuta apan nagpakita nga mora og usa ka pisikal nga binuhat.

Dapita ang usa ka estudyante sa pagbasa og kusog sa 1 Juan 1:1–4. Hangyoa ang klase sa pagsunod, nga mangita kon unsa ang gipamatuod ni Juan nga ikabatok niining sayop nga pagtulun-an. Ipasabut nga ang mga pulong nga “ang Pulong sa kinabuhi” (bersikulo 1) nag-refer kang Jesukristo.

• Unsa nga mga pulong ang gigamit ni Juan sa pagpakigbatok sa sayop nga mga ideya nga si Jesukristo walay pisikal nga lawas?

• Sumala sa mga bersikulo 3–4, nganong gipakigbahin man ni Juan kining sagrado nga pagsaksi mahitungod ni Jesukristo ngadto sa mga miyembro sa Simbahan? (Iyang tuyo nga sila makighiusa sa mga lider sa Simbahan, kinsa nakighiusa sa Langitnong Amahan ug ni Jesukristo. Nagtinguha usab siya nga ilang masinati ang hingpit nga kalipay.)

Ipasabut nga ang kahiusahan nagpasabut sa pagtagamtam og relasyon sa pagsalig, panag-ambit, ug pareho nga katuyoan. Makighiusa kita sa mga lider sa Simbahan kon kita modawat og mosunod sa ilang mga pagtulun-an ug tambag.

Isulat sa pisara ang mosunod nga dili kompleto nga pamahayag: Kon dawaton nato ug sundon ang mga pagtulun-an sa mga propeta ug mga apostoles, kita …

• Base sa mga pagtulun-an ni Juan diha sa Juan 1:3, unsaon ninyo sa pagkompleto kini nga pamahayag aron makaporma og baruganan? (Gamit ang pulong sa mga estudyante, kompletuha ang pamahayag nga naa sa pisara aron kini maghatag sa mosunod nga baruganan: Kon dawaton nato ug sundon ang mga pagtulun-an sa mga propeta ug mga apostoles, maangkon nato ang kahiusahan uban sa Amahan ug sa Anak.)

I-display ang mga litrato sa kasamtangang Presidente sa Simbahan ug sa ubang mga propeta ug mga apostoles.

• Sa unsang paagi ang pagsunod sa mga pagtulun-an sa mga propeta ug mga apostoles makatabang nato nga maangkon ang kahiusahan uban sa atong Langitnong Amahan ug sa Iyang Anak, si Jesukristo?

Dapita ang usa ka estudyante sa pagbasa og kusog sa 1 Juan 1:5-6. Hangyoa ang klase sa pagsunod, nga mangita kon unsay makapugong kanato sa pagbaton og kahiusahan uban sa atong Amahan sa Langit.

• Unsa ang makapugong kanato sa pakighiusa uban sa atong Amahan sa Langit?

Ipasabut nga ang paggamit ni Juan sa pulong nga kangitngit nagpasabut sa esprituhanong kangitngit.

• Unsa kaha ang ipasabut sa paglakaw sa espirituhanong kangitngit?

Dapita ang mga estudyante sa pagtuon sa 1 Juan 1:7–10; 2:1–6, nga mangita sa mga kamatuoran nga gitudlo ni Juan nga makatabang nato sa pagkahibalo unsaon sa paglakaw sa kahayag sa ebanghelyo. Ipasabut nga ang pulong nga halad-pasig-uli diha sa 1 Juan 2:2 nagpasabut sa maulaon nga sakripisyo nga nagtagbaw sa kamakiangayon sa Dios. Dapita ang mga estudyante nga tun-an sa hilum kini nga mga bersikulo sa ilang kaugalingon o uban sa ilang mga kapares o sa ginagmayng grupo.

• Unsa nga mga kamatuoran ang inyong nahibaloan niini nga mga bersikulo? (Ikonsiderar ang pagsulat sa tubag sa mga estudyante diha sa pisara. Tingali maglakip kini sa mga kamatuoran sama sa mosunod: Si Jesukristo mitubos sa atong mga sala. Kon atong tumanon ang mga sugo sa Dios, mahingpit ang atong gugma sa Dios.)

• Ngano kaha nga ang atong gugma sa Dios mas mahingpit man, o makompleto, kon atong tumanon ang Iyang mga sugo?

• Kanus-a kamo nakasinati og mas dakong gugma para sa Dios samtang naningkamot kamo sa pagtuman sa Iyang mga sugo?

Basaha og kusog ang mosunod nga mga deskripsyon sa duha ka mga batan-ong Santos sa Ulahing mga Adlaw. Dapita ang mga estudyante sa pagpaminaw sa usa ka partikular nga sugo diin kining duha ka indibidwal naglisud sa pagtuman.

1. Usa ka batan-ong lalaki mibasa sa mga kasulatan matag adlaw ug matinud-anong mibuhat sa daghan niyang mga katungdanan sa priesthood, apan sa kasagaran dili siya buotan sa iyang manghod nga lalaki.

2. Usa ka batan-ong babaye kanunay nga motambong sa iyang mga miting sa Simbahan ug nakadawat sa iyang Pahalipay sa Batan-ong Pagkababaye. Bisan pa niana, kanunay siyang mag-post og bati nga mga komentaryo mahitungod sa pipila sa iyang mga classmate ug mga magtutudlo diha sa social media.

• Unsa nga sugo diin kining duha ka batan-on naglisud sa pagsunod?

Dapita ang mga estudyante sa paghunahuna og mga sitwasyon diin sila tingali naglisud sa pagpakita og gugma sa uban.

Dapita ang pipila ka estudyante nga magpuli-puli sa pagbasa og kusog sa 1 Juan 2:9–11; 4:7–11, 19–21. Hangyoa ang klase sa pagsunod, nga mangita kon unsay gitudlo ni Juan mahitungod sa gugma. Mahimo nimong dapiton ang mga estudyante nga ikonsiderar ang pagmarka sa mga pagtulun-an niini nga mga bersikulo nga makahuluganon para kanila.

• Asa sa mga pagtulun-an ni Juan mahitungod sa gugma ang makahuluganon kaninyo? Ngano man?

• Unsa nga baruganan ang atong mahibaloan gikan niini nga mga bersikulo kon unsay atong buhaton kon higugmaon nato ang Dios? (Ang mga estudyante mahimong mogamit og lain-laing mga pulong, apan kinahanglang mahibaloan nila ang usa ka baruganan nga susama sa mosunod: Kon nahigugma kita sa Dios, higugmaon nato ang uban.)

• Ngano kaha nga ipakita man nato ang atong gugma sa uban kon tinuoray kitang nahigugma sa Dios?

Ipasabut nga samtang gigamit ni Juan ang pulong nga nagadumot diha sa 1 Juan 4:20, dunay daghang paagi nga atong mapugngan ang paghigugma o maayong pagbati ngadto sa uban gawas sa pagdumot kanila. Dapita ang mga estudyante sa pagpasabut unsa kaha sa ilang hunahuna ang ubang mga paagi.

Dapita ang usa ka estudyante sa pagbasa og kusog sa 1 John 3:17–18, ug hangyoa ang klase sa pagpangita kon unsay angay natong buhaton sa pagpakita sa atong gugma sa uban. Dapita ang mga estudyante sa pagreport sa unsay ilang nakit-an. Kinahanglang madiskubrihan sa mga estudyante ang kaimportante sa paghigugma nga dili lang “sa pulong” apan usab “sa buhat.”

• Ngano kaha nga importante nga atong ikapakita ang atong gugma pinaagi sa atong mga buhat ug dili kay sa mga pulong lamang?

• Kinsa ang inyong nailhan nga usa ka maayong ehemplo sa pagpakita og gugma ngadto sa uban? Unsa man ang gihimo niining tawhana nga nagpakita sa iyang gugma sa uban?

Dapita ang mga estudyante sa paghunahuna og usa ka tawo sa ilang kinabuhi diin sila makapakita og mas dako nga gugma. Hangyoa sila nga isulat sa usa ka pirasong papel ang ngalan niana nga tawo kauban sa mga butang nga piho nilang mahimo aron ikapakita ang gugma o kamabination diha niana nga tawo. Ipasabut nga wala kinahanglana nga ipakita nila ang gugma sa sobrang mga paagi ug nga ang ginagmay, yanong mga buhat sa gugmang putli ug kamabination sa kasagaran maoy labing mahinungdanon. Dapita sila nga ilang dad-on ang papel sa ilang balay ug lihukon kon unsay ilang gisulat.

Ipasabut nga kon mopakita kita sa atong gugma pinaagi sa atong mga buhat, atong gisunod ang ehemplo ni Jesukristo (tan-awa sa 1 Juan 2:6; 3:1–3). Mahimo nimong tapuson ang leksyon pinaagi sa pagpaambit sa imong pagpamatuod sa mga kamatuoran nga nahibaloan sa mga estudyante sa ilang pagtuon sa 1 Juan. Awhaga ang mga estudyante sa paggamit niini nga mga kamatuoran diha sa ilang kinabuhi.