Misulat si Santiago og epistola ngadto sa nagkatibulaag nga balay ni Israel, nag-awhag kanila nga magmapailubon sa ilang mga kasakit ug sa pagtinguha og kaalam gikan sa Langitnong Amahan. Mitudlo usab si Santiago kanila nga isakliway ang tintasyon, motuman sa pulong, moalagad sa uban, ug magpabilin nga limpyo sa espirituhanon nga paagi.
Nag-awhag si Santiago sa nagkatibulaag nga Israel nga magmapailubon sa ilang mga kasakit ug nga magtinguha sa kaalam gikan sa Dios
Sa dili pa magklase, isulat ang mosunod nga pamahayag diha sa pisara: Unta mas maalamon ako! Sa pagsugod sa klase, hangyoa ang mga estudyante sa paghunahuna sa pamahayag diha sa pisara. Dapita sila sa paggamit sa ilang mga class notebook o mga scripture study journal sa pagsulat og mga hilisgutan o personal nga mga kahimtang diin ilang gitinguha nga makabaton og kaalam niini. Mahimo nimong isugyot nga maglakip sila og mga hilisgutan sa ebanghelyo ug mahinungdanon nga mga pangutana sa kinabuhi diha sa ilang mga lista. Hangyoa ang pipila ka mga estudyante sa pagpakigbahin sa pipila sa mga hilisgutan o mga pangutana nga ilang gisulat. (Pahinumdumi sila nga dili ipakigbahin ang bisan unsa nga personal o pribado kaayo.)
Unsang mahinungdanon nga mga pangutana ang gipanglimbasog ni Joseph Smith sa dihang bata pa siya? (Kon nagkinahanglan og tabang ang mga estudyante, itudlo sila sa Joseph Smith—Kasaysayan 1:9–10.)
Ipasabut nga si Joseph nagbasa sa Sulat ni Santiago sa dihang iyang nadiskubrehan unsaon pagpangita og mga tubag sa iyang mga pangutana. Si Santiago usa ka Apostol ni Jesukristo ug usa ka bishop sa Jerusalem. Ang Kristiyano nga tradisyon nag-angkon usab nga si Santiago mao ang anak ni Maria ug Jose ug busa usa ka igsoong lalaki sa gawas ni Jesus.
Dapita ang usa ka estudyante sa pagbasa og kusog sa Santiago 1:1–4. Hangyoa ang klase sa pagsunod, nga mangita sa unsay gitudlo ni Santiago sa balay ni Israel mahitungod sa ilang mga panglimbasog ug mga kalisud. Ipasabut nga ang Hubad ni Joseph Smith sa bersikulo 2 nag-usab sa mga pulong “nagkalainlaing mga panulay” ngadto sa “daghan nga mga kasakit.”
Unsay gitudlo ni Santiago sa balay ni Israel mahitungod sa ilang mga panglimbasog ug mga kasakit?
Nganong importante man nga magbaton og pagpailub sa panahon sa mga panglimbasog ug mga kasakit?
Dapita ang usa ka estudyante sa pagbasa og kusog sa Mga Hebreohanon 1:5–6. Hangyoa ang klase sa pagsunod, nga mangita sa unsay nadiskubre ni Joseph Smith nga nakatabang kaniya nga makakaplag sa mga tubag sa iyang mga pangutana.
Unsay gitambag ni Santiago nga buhaton sa iyang mga magbabasa aron makakaplag sa mga tubag sa ilang mga pangutana?
Unsay gipasabut nga ang Dios nagahatag nga “madagayaon” ug “walay pamoyboy”? (bersikulo 5). (Madagayaon nagkahulugan nga manggihatagon o mahinatagon. Pamoyboy nagkahulugan nga nagbadlong o nagsaway.)
Dapita ang usa ka estudyante nga moduol sa pisara aron sa pagsulat og usa ka baruganan nga atong makat-unan gikan sa Santiago 1:5–6. Ang estudyante mahimong mogamit og lainlaing mga pulong apan kinahanglang mahibalo og usa ka baruganan sama sa mosunod: Ang Dios madagayaong mohatag og kaalam niadtong kinsa mangamuyo Kaniya diha sa hugot nga pagtuo.
Unsay gipasabut sa “mangayo uban sa pagtuo, sa walay pagduhaduha”? (bersikulo 6).
Dapita ang usa ka estudyante sa pagpasabut sa unsang paagi ang Santiago 1:5–6 nakaapekto sa batan-ong Joseph Smith samtang misiksik siya alang sa mga tubag (tan-awa sa Joseph Smith—Kasaysayan 1:12). Hangyoa ang lain nga estudyante sa pag-summarize sa resulta sa matinud-anong pag-ampo ni Joseph Smith didto sa kakahoyan duol sa iyang panimalay.
Kanus-a ba madagayaong mitubag ang Langitnong Amahan sa inyong mga pag-ampo human kamo miampo ngadto Kaniya diha sa hugot nga pagtuo?
Ipamatuod nga ang Dios madagayaon nga mohatag og kaalam niadtong nangamuyo Kaniya diha sa hugot nga pagtuo. Dapita ang mga estudyante sa pagsunod sa ehemplo ni Joseph Smith pinaagi sa paggamit niini nga baruganan sa ilang mga kinabuhi aron sila makadawat sa kaalam nga ilang gikinahanglan gikan sa Langitnong Amahan.
I-summarize ang Santiago 1:7–11 pinaagi sa pagpasabut nga mipasidaan si Santiago batok sa pagkamaduhaduhaon, o nagduhaduha sa pagkamaunongon ug pasalig ngadto sa Ginoo. Misulat usab si Santiago nga ang mga dato kinahanglang magmapainubsanon tungod kay ang kalibutanong mga bahandi lumalabay lamang ug sa dili madugay mawala.
Pahinumdom: I-konsiderar ang pagdapit og duha ka estudyante sa pagtudlo sa mosunod nga duha ka scripture block. Makatabang kon ihatag kini nga assignment ngadto sa mga estudyante nga motudlo [student teachers] usa o duha ka adlaw sa wala pa ang klase aron makapangandam sila. Mahimo nimong dapiton ang matag estudyante nga motudlo nga tudluan ang tibuok klase. O, mahimo nimong bahinon ang klase og kaduha, dapiton ang matag estudyante nga motudlo nga itudlo ang iyang scripture block ngadto sa katunga sa klase, ug dayon hangyuon ang duha ka estudyante nga motudlo (o ang klase) nga magbaylo aron matudloan nila ang pikas bahin sa klase.
Unsa nga mga tintasyon ang giatubang sa mga batan-on karon? (Mahimo nimong ilista ang mga tubag sa mga estudyante diha sa pisara.)
Ngano man nga usahay lisud isalikway ang tintasyon?
Dapita ang usa ka estudyante sa pagbasa og kusog sa Santiago 1:12. Hangyoa ang klase sa pagsunod, nga mangita sa panalangin nga gisaad niadtong kinsa nahigugma sa Ginoo ug nagsalikway sa tintasyon. Ipasabut nga ang Joseph Smith Translation niini nga bersikulo nag-usab sa “moantus sa mga pagsulay” ngadto sa “mosalikway sa tintasyon.”
Unsa nga panalangin ang moabut niadtong kinsa nahigugma sa Ginoo ug nagsalikway sa tintasyon? (Human makatubag ang mga estudyante, isulat sa pisara ang mosunod nga baruganan: Nagpakita kita sa atong paghigugma sa Ginoo pinaagi sa pagsalikway sa tintasyon, nga usa sa mga gikinahanglan aron madawat ang korona sa kinabuhing dayon.)
Dapita ang usa ka estudyante sa pagbasa og kusog sa Santiago 1:13–16. Hangyoa ang klase sa pagsunod, nga mangita sa hain naggikan ug wala naggikan ang tintasyon.
Sumala sa bersikulo 13, kinsa ang dili tinubdan sa atong mga tintasyon?
Ipasabut nga ang pulong pagpangibog diha sa bersikulo 14 nagpasabut niadtong dili balaan nga mga tinguha nga mahimong aduna kita tungod sa atong napukan nga kinaiya. Nagdani si Satanas kanato nga motugyan niining dili balaan nga mga tinguha.
Dapita ang mga estudyante sa paghunahuna sa mga tintasyon nga ilang gipanglimbasog.
Sa unsang paagi kita makaangkon og espirituhanon nga gahum sa pagsalikway sa tintasyon?
Sa unsang mga paagi ang pagsalikway sa tintasyon nagpakita sa atong gugma alang sa Ginoo?
Ipamatuod ang katinuod sa baruganan nga nahibaloan sa mga estudyante diha sa Santiago 1:12. Dapita sila sa pagpamalandong kon unsay ilang buhaton aron masalikway ang mga tintasyon nga ilang gipanglimbasog.
I-summarize ang Santiago 1:17–21 pinaagi sa pagpasabut nga mitudlo si Santiago nga ang tanang maayong mga gasa nagagikan sa Dios ug nga kinahanglang hunongon sa mga Santos ang “tanang buling” ug dawaton ang mga pulong sa Ginoo “sa kaaghop” (bersikulo 21).
Nagdapit si Santiago sa iyang mga magbabasa nga maminaw ug motuman sa pulong
Dapita ang usa ka estudyante sa pagbasa og kusog sa mosunod nga istorya ni Elder Quentin L. Cook sa Korum sa Napulog Duha ka mga Apostoles:
Imahe
Elder Quentin L. Cook
“Bag-o lang nakahimamat ko og usa ka batan-ong lalaki. Tumong niya nga makamisyon, makaeskwela, magminyo sa templo, ug dunay malipayong pamilya. … Nakita nakong tinuod siyang gusto nga magmisyon ug gilikayan ang seryusong mga sala nga makapugong niini, apan ang inadlaw niyang buhat wala mag-andam niya alang sa pisikal, emosyonal, sosyal, intelektwal, ug sa espirituhanong hagit nga iyang atubangon. Wala siya maningkamot. Wala niya seryusoha ang pag-eskwela o ang seminary. Mosimba tuod siya, apan wala niya mabasa ang Basahon ni Mormon. Migahin siyag dakong panahon sa video games ug social media. Nagtuo siya nga ang pag-adto sa misyon igo na” (“Maalamong Mopili,” Ensign o Liahona, Nob. 2014, 47).
Kon ikaw anaa sa sitwasyon ni Elder Cook, unsa kaha ang imong mga kabalaka sa kakulang sa pagpangandam sa misyon niining batan-ong lalaki?
Dapita ang usa ka estudyante sa pagbasa og kusog sa Santiago 1:22. Hangyoa ang klase sa pagsunod, nga mangita sa unsay gitudlo ni Santiago nga makatabang sa batan-ong lalaki nga gihulagway diha sa istorya ni Elder Cook.
Unsay gitudlo ni Santiago nga makatabang nianang batan-ong lalaki?
Ipasabut nga, sa natala diha sa Santiago 1:23–24, gipahisama ni Santiago ang tawo nga igo rang maminaw apan dili motuman ngadto sa usa ka tawo kinsa nagasud-ong diha sa salamin sa iyang nawong apan dihadiha mahikalimot lang dayon unsang pagkadagwaya siya inig lakaw niya.
Dapita ang usa ka estudyante sa pagbasa og kusog sa Santiago 1:25. Hangyoa ang klase sa pagsunod, nga mangita sa unsay mahitabo niadtong kinsa nagpili sa paglihok sumala sa mga kamatuoran nga ilang nadungog.
Unsay mahitabo niadtong dili lamang maminaw apan motuman usab? (Human makatubag ang mga estudyante, isulat sa pisara ang mosunod nga baruganan: Samtang kita maminaw og mobuhat sumala sa pulong sa Dios, mopanalangin siya kanato sa atong mga buhat.)
Dapita ang mga estudyante sa pagtino kon unsa sila kamasalundon sa ilang tahas isip mga tigpaminaw ug tigtuman sa pulong sa Dios pinaagi sa pagpamalandong sa mosunod nga mga pangutana. Mahimo nimong basahon og kusog kining mga pangutana o isulat kini sa pisara.
Unsa ka hingpit ang akong pagtuo sa mga kamatuoran nga akong nakat-unan diha sa mga kasulatan, sa panimalay, sa simbahan, ug sa seminary?
Kapila ba ko naghimo og espirituhanon nga mga tumong sa paglihok sa mga kamatuoran nga akong nakat-unan? Kapila ba nako kini mahimo? Kapila ba nako kini makalimtan?
Unsa pa ba’y akong mahimo aron motuman sa pulong ug dili lamang maminaw?
Pagpamatuod sa mga panalangin nga moabut samtang molihok kita sa unsay atong nakat-unan.
Human makatudlo ang duha ka estudyante sa ilang mga scripture block, pangutan-a ang pipila ka estudyante sa pag-summarize sa unsay ilang nakat-unan.
Dapita ang usa ka estudyante sa pagbasa og kusog sa Santiago 1:26–27. Hangyoa ang klase sa pagsunod, nga mangita sa mga sugyot ni Santiago kon unsaon nato pagpakabuhi sa atong relihiyon.
Sumala ni Santiago, unsa’y pipila ka mga pamaagi diin kita makasunod sa atong relihiyon, o magpakita sa atong pagkamatinud-anon ngadto sa Dios?
Ipasabut nga migamit si Santiago sa ideya sa “pagduaw sa mga ilo ug mga babayeng balo” nga nanginahanglan nga isip usa ka ehemplo sa pag-amuma sa uban. Ang “pag-amping sa kaugalingon nga dili mahugawan sa kalibutan” (bersikulo 27) nagpasabut nga magpabiling limpyo, bisan diha sa usa ka kalibutan diin mahimong dayag ang pagkadautan.
Unsa nga kamatuoran ang atong makat-unan gikan sa bersikulo 27? (Ang mga estudyante mahimong mogamit og lain-laing nga mga pulong, apan siguroha nga mahibalo sila sa mosunod nga kamatuoran: Mapakita nato ang relihiyon nga putli kon nag-amuma kita sa uban ug magpabiling limpyo sa espirtuhanong paagi. Isulat sa pisara kini nga kamatuoran.)
Sa unsa kaha nga mga pamaagi ang pag-amuma sa uban ug pagpabiling limpyo sa espirituhanong paagi mahimong mahinungdanong pagpahayag sa atong kamatinud-anon sa Dios?
Kinsa ang inyong nailhan nga usa ka maayong ehemplo sa pagpakita sa “relihiyon nga putli” sa iyang kinabuhi sa adlaw-adlaw? Unsa’y gibuhat niini nga tawo nga nagdasig kaninyo?
Dapita ang mga estudyante sa pagsulat sa usa ka piraso nga papel usa o duha ka mga butang nga ilang buhaton sa sunod nga semana sa pag-amuma sa usa ka tawo nga nanginahanglan o pagpabilin sa ilang kaugalingon nga “walay buling gikan sa kalibutan.” Dapita sila nga motuman sa mga pulong sa Dios pinaagi sa paggamit niini nga baruganan sa ilang mga kinabuhi.
Ipasabut nga ang pagmemorya sa Santiago 1:5–6 motabang sa mga estudyante sa tibuok nilang kinabuhi samtang aduna sila’y mga pangutana mahitungod sa ebanghelyo, samtang nagsiksik sila sa tabang sa Ginoo sa ilang paghimo og mga desisyon, ug samtang nagtudlo sila sa ebanghelyo ngadto sa uban.
Gamita ang usa sa mga memorization acitivities diha sa appendix, o paghimo og usa sa imong kaugalingong mga kalihokan aron matabangan ang mga estudyante sa pagmemorya niini nga passage. Hinumdumi nga ribyuhon sa makadaghan ang namemorya nga mga scripture mastery passage uban ang mga estudyante aron matabangan silang mahinumduman unsay ilang nakat-unan. Ikonsiderar ang pagplano og mga higayon sa umaabut nga mga leksyon sa pagribyu niini nga kasulatan ug sa pagdapit sa mga estudyante sa pagsaysay niini.
Komentaryo ug Background nga Impormasyon
Santiago 1:5. “Kon aduna man kaninyoy nakulangan og kaalam”
Si Elder Bruce R. McConkie sa Korum sa Napulog Duha ka mga Apostoles mihulagway sa talagsaon nga kamahinungdanon sa Santiago 1:5 alang sa mga Santos sa Ulahing mga Adlaw:
“Kining nag-inusara nga bersikulo sa kasulatan adunay dakong epekto ug mas lapad kaayo nga epekto nganha sa tawo kay sa ubang nagbinugtong nga han-ay sa mga pulong nga sukad natala pinaagi ni bisan kinsa nga propeta sa bisan unsa nga kapanahunan. Mahimo usab maingon nga ang labing mahinungdanon nga buhat sa pangalagad ni Santiago dili ang iyang pagkamartir alang sa pagpamatuod kang Jesus, apan ang iyang pagsaysay, diin gigiyahan sa Espiritu Santo, niining simple nga mga pulong nga midala ngadto sa pag-abli sa kalangitan sa modernong panahon.
“Ug mahimo usab madugang nga ang matag investigator sa napadayag nga mga kamatuoran nagbarug, sa panahon sa iyang pagsiksik, diha sa dapit diin si Joseph Smith mibarug. Kinahanglan niyang modangup ngadto sa Makagagahum ug moangkon og kaalam gikan sa Dios pinaagi sa pagpadayag kon tinguha niyang makaangkon og usa ka dapit nianang higpit ug pig-ot nga dalan nga mopadulong sa kinabuhi nga dayon” (Doctrinal New Testament Commentary, 3 vols. [1965–73], 3:246–47).
Si Elder M. Russell Ballard sa Korum sa Napulog Duha ka mga Apostoles mihatag og gibug-aton sa importansya of pagpangutana sa Dios sa atong panahon:
“Karon nagpuyo kita sa usa ka kalibutan diin ang mga tawo dili mangutana sa Dios—mura og ganahan sila mangutana kang Google. Bisan gani mahitungod sa mga pangutana sa pagtuo, adunay daghan kinsa nagsalig sa Internet nga mohatag og tukma, makiangayon, ug balanse nga mga tubag sa ilang mga pangutana kay sa ilang pagsalig sa sukaranon nga tinubdan sa kamatuoran, ang atong Langitnong Amahan. …
“… Karon ang Internet puno niadtong naghulat aron sa pagpangilad sa mga wala’y kahibalo ug wala’y kasinatian.
“Sa atong pagsiksik alang sa kamatuoran sa ebanghelyo, dili lamang nato gikinahanglan ang pagpangita og masaligan nga mga tinubdan apan kinahanglan usab natong mohatag sa Ginoo og pareha nga panahon sa atong inadlaw-adlaw nga mga paninguha. Kinahanglan natong tun-an ang mga kasulatan ug ang mga pulong sa mga sulugoon sa Ginoo. Kinahanglan natong magpakabuhi og matarung sa atubangan sa Dios—kinahanglan natong magbuhat sa Iyang kabubut-on [tan-awa sa Juan 7:16–17]. Ug dili gayud nato mapalabihan pag-asoy ang kamahinungdanon sa pagdala sa atong espirituhanon nga mga kabalaka ngadto sa Dios ug mosalig sa Iyang pagdasig ug paggiya” (“Women of Dedication, Faith, Determination, and Action” [pamulong nga gihatag sa Brigham Young University Women’s Conference, Mayo 1, 2015], ce.byu.edu/cw/womensconference).
Si Elder David A. Bednar sa Korum sa Napulog Duha ka mga Apostoles mipasabut unsay gipasabut sa pagpangayo diha sa pagtuo:
“Ang usa ka walay paglubad nga ehemplo sa pagpangayo pinaagi sa hugot nga pagtuo mao si Joseph Smith ug ang Unang Panan-awon. Samtang ang batan-on nga si Joseph naninguha nga makahibalo sa kamatuoran mahitungod sa relihiyon, nabasa niya ang [Santiago 1:5–6]. …
“Palihug tan-awa ang gikinahanglan sa pagpangayo pinaagi sa hugot nga pagtuo, nga sa akong pagsabut nagkinahanglan sa dili lamang sa pagsulti apan sa pagbuhat, ang duha ka obligasyon sa pagpangamuyo ug sa pagbuhat, ang kinahanglanon sa pagsulti ug sa pagbuhat” (“Pangayo pinaagi sa Hugot nga Pagtuo,” Ensign o Liahona, Mayo 2008, 94).
Si Elder Richard G. Scott sa Korum sa Napulog Duha ka mga Apostoles mitudlo:
“Kon nakahimo na kamo og determinasyon nga mobarug alang sa matarung, kon nakatukod na kamo og personal nga mga sumbanan ug mihimo og mga pakigsaad sa paghupot niini, kon ang mga tintasyon moabut ug kamo molihok sumala sa inyong mga sumbanan, madungagan ang inyong kusog ug mahatagan og kalig-on nga saylo pa sa inyong kaugalingong kasarang kon kana gikinahanglan. Moabut ang kalisud kon mosulod kamo sa gubat sa tintasyon nga wala’y malig’on nga plano” (“Do What Is Right,” Ensign, Hunyo 1997, 53).
Si Presidente Boyd K. Packer sa Korum sa Napulog Duha ka mga Apostoles miingon:
“Kon maka-kontrol kamo sa inyong mga hunahuna, inyong mabuntog ang mga kinaiya, bisan ang makauulaw nga mga kinaiya. Kon makakat-on kamo nga mahimong hanas niini makabaton kamo og malipayon nga kinabuhi. …
“Kon makakat-on kamo sa pagtangtang sa dili takus nga mga hunahuna, himoa nga ang inyong hunahuna okupado [busy] sa pagkat-on og mapuslanon nga mga butang. Usba ang inyong palibot aron aduna’y mga butang sa inyong palibot nga makadasig og maayo ug makapauswag nga mga hunahuna. Pagpaka-okupado sa mga butang nga matarung” (“Inspiring Music—Worthy Thoughts,” Ensign, Ene. 1974, 28).