Diha sa ganghaan sa templo, si Pedro, inubanan ni Juan, giayo ang usa ka tawo kinsa natawo nga bakol. Gitudloan dayon ni Pedro ang mga tawo kinsa nakasaksi sa pag-ayo niini nga tawo. Mipamatuod siya ni Jesukristo, midapit kanila sa paghinulsol, ug mipanagna sa ulahing adlaw nga Pagpahiuli sa ebanghelyo.
Nag-ayo si Pedro ug si Juan sa usa ka tawo kinsa natawo mga bakol
Dapita ang mga estudyante sa paghunahuna og usa ka panahon nga sila nangayo og usa ka piho nga butang (tingali usa ka inadlawan o regalo sa Pasko) apan nakadawat hinoon og laing butang. Hangyoa ang pipila kanila sa pagpakigbahin sa ilang mga kasinatian ug sa pagpasabut kon unsay ilang gibati sa dihang wala nila madawat ang unsay ilang gusto.
Sa unsa nga paagi kaha atong matandi kini nga mga kasinatian ngadto sa pagpangayo og mga panalangin gikan sa Langitnong Amahan pinaagi sa pag-ampo? (Usahay ang Langitnong Amahan dili motubag sa atong mga pag-ampo sa mga paagi nga atong gipaabut o naghatag sa mga panalangin nga atong gipangayo.)
Hangyoa ang mga estudyante sa pagpamalandong og mga kasinatian nga diin wala nila madawat ang tubag o panalangin nga ilang gipaabut gikan sa Langitnong Amahan.
Dapita ang mga estudyante sa pagpangita og usa ka baruganan samtang sila nagtuon sa Mga Buhat 3 nga motabang kanila sa panahon nga wala nila madawat ang mga tubag o mga panalangin nga ilang gipaabut gikan sa Ginoo.
Dapita ang usa ka estudyante sa pagbasa og kusog sa Mga Buhat 3:1–3. Hangyoa ang klase sa pagsunod, mangita kon kinsa ang gikasugat ni Pedro ug ni Juan sa ganghaan sa templo.
Kinsa ang gikasugat ni Pedro ug ni Juan sa ganghaan sa templo?
Unsa ang gipasabut niini nga kini nga tawo “nangayo og limos”? (bersikulo 3). (Mahimo nga inyong ipasabut nga ang limos mga butang nga ihatag sa mga tawo ngadto sa mga kabus.)
Ipasabut nga atong nahibaloan gikan sa Mga Buhat 4:22 nga ang bakol nga tawo sobra na sa 40 anyos ang panuigon.
Nagkonsiderar nga kini nga tawo dili makalakaw sulod sa 40 ka tuig, unsang kahimtang kaha ang mga bitiis sa bakol nga tawo?
Dapita ang klase sa pagkonsiderar kon unsay pagabation nga maanaa sa lugar sa bakol nga tawo?
Unsa ang kasagarang mga paagi diin ang mga tawo tingali motubag ngadto sa usa nga anaa sa sitwasyon niini nga tawo?
Dapita ang usa ka estudyante sa pagbasa og kusog sa Mga Buhat 3:4–7. Hangyoa ang klase sa pagsunod, mangita kon unsay gibuhat ni Pedro alang niini nga tawo.
Unsay gibuhat ni Pedro alang niini nga tawo?
Unsa ang molabaw kanimo mahitungod sa mga lihok ug mga pulong ni Pedro?
Dapita ang usa ka estudyante sa pagbasa og kusog sa Mga Buhat 3:8, ug hangyoa ang klase sa pagpangita kon unsay gibuhat sa tawo human “siya gialsa” ni Pedro (bersikulo 7).
Unsay gibuhat sa tawo human “siya gialsa” ni Pedro?
Sa unsa nga mga paagi nga ang mga panalangin nga nadawat niini nga tawo mas dako kay sa mga limos nga sa una iyang gipangayo?
Awhaga ang mga estudyante sa paghinumdum sa kasinatian diin nadawat nila ang tubag o panalangin gikan sa Langitnong Amahan nga lahi gikan sa tubag o panalangin nga ilang gipaabut.
Unsa nga kamatuoran ang atong makat-unan gikan sa Mga Buhat 3:1–8 nga makatabang kanato kon dili nato madawat ang tubag o panalangin nga atong gipaabut gikan sa Langitnong Amahan? (Ang mga estudyante mahimong mogamit og lain-laing mga pulong apan kinahanglan nga ilang mailhan ang mosunod nga baruganan: Ang Langitnong Amahan tingali dili motubag sa atong mga pag-ampo sa mga paagi nga atong gusto o gipaabut nga buhaton Niya, apan ang Iyang mga tubag kanunay alang sa atong mas dakong kaayohan. Isulat kini nga kamatuoran diha sa pisara, ug ikonsiderar ang pagdapit sa mga estudyante sa pagsulat niini diha sa margin sa ilang mga kasulatan tupad sa bersikulo 6.)
Sa unsa nga paagi kaha ang Langitnong Amahan nagtubag sa atong mga pag-ampo sa lahi nga paagi kaysa atong gusto o nagpaabut Kaniya sa paghimo? (Sama pananglit, tingali Siya mohatag kanato og kalig-on sa paglahutay og pagsulay kaysa wagtangon kini, o tingali Siya mohatag kanato og kaalam sa pagtabang kanato sa pagsulbad og problema kaysa sulbaron kini alang kanato.)
Ipasabut nga sa istorya nga girekord diha sa Mga Buhat 3:1–8, kini tataw nga unsay nadawat niini nga tawo mas labaw kaysa unsay iyang gipangayo. Hinoon, sa uban nga mga sitwasyon dili kini ingon ka tataw nga unsay atong nadawat mas labaw kaysa unsay atong gipangayo.
Sa unsa nga paagi nga ang paghinumdum sa kamatuoran nga gisulat diha sa pisara nagtabang kanato kon kita nakadawat og tubag sa pag-ampo nga lahi gikan sa tubag nga atong gipaabut?
Dapita ang mga estudyante sa pagpamalandong og mga kasinatian diin ang tubag sa Ginoo sa ilang mga pag-ampo lahi gikan sa tubag nga ilang gitinguha apan nahimong alang sa ilang mas dakong kaayohan. Hangyoa ang pipila ka mga estudyante sa pagpakigbahin sa ilang mga kasinatian. Mahimong ikaw usab gustong mopakigbahin og usa ka kasinatian nga imong kaugalingon.
Dapita ang usa ka estudyante sa pagbasa og kusog sa Mga Buhat 3:9–11. Hangyoa ang klase sa pagsunod, mangita kon unsa ang reaksyon sa mga tawo ngadto sa pagkaayo niini nga tawo.
Unsa ang reaksyon sa mga tawo ngadto sa pagkaayo niini nga tawo?
Nagpamatuod si Pedro ni Jesukristo ug nagsangyaw og paghinulsol
Dapita ang klase sa paghanduraw nga sila kauban sa mga tawo didto sa templo kinsa misaksi sa pagkaayo sa bakol nga tawo. Ipasabut nga kini nga mga tawo kasagarang nakakita sa bakol nga tawo nga nagpakilimos samtang sila misulod sa mga ganghaan sa templo, apan human siya giayo, nakita nila siya nga naglukso ug naglakaw.
Kon ikaw usa sa mga tawo didto sa templo, sa unsa nga paagi sa imong hunahuna ang imong pagtan-aw ni Pedro ug ni Juan mahimong mausab human makasaksi niini nga milagro?
Bahina ang mga estudyante ngadto sa paris. Dapita ang matag paris nga magdungan sa pabasa og kusog sa Mga Buhat 3:12–16, mangita kon sa unsa nga paagi gipasabut ni Pedro ang pagkaayo sa bakol nga tawo ngadto sa pundok sa katawhan. Human sa igo nga panahon, pangutana:
Personal bang giangkon ni Pedro ang pagkaayo sa tawo?
Pinaagi sa unsa nga gahum gisulti ni Pedro ang tawo nga naayo? (Human sa tubag sa mga estudyante, isulat ang mosunod nga kamatuoran diha sa pisara: Ang mga sulugoon ni Jesukristo makahimo og mga milagro pinaagi sa hugot nga pagtuo diha sa Iyang ngalan.)
Ipasabut nga gigamit ni Pedro kini nga higayon sa pagtudlo sa mga tawo mahitungod ni Jesukristo, kinsa bag-ohay nga gihukman og kamatayon sa Iyang kaugalingong mga tawo apan nabuntog ang kamatayon pinaagi sa Iyang Pagkabanhaw.
Dapita ang usa ka estudyante sa pagbasa og kusog sa Mga Buhat 3:17–21, . Hangyoa ang klase sa pagsunod, mangita sa pagdapit ni Pedro ngadto sa mga tawo.
Unsay gidapit ni Pedro sa mga tawo nga pagabuhaton?
Aron sa pagtabang sa mga estudyante sa pagsabut sa mensahe ni Pedro, ipasabut nga si Pedro nagsulti ngadto sa mga tawo kinsa nanawagan o miuyon sa Paglansang sa Krus ni Jesukristo (tan-awa sa Mga Buhat 3:14–15). Dapita ang usa ka estudyante sa pagbasa og kusog sa mosunod nga pamahayag ni Propeta Joseph Smith:
Imahe
Propeta Joseph Smith
“Si [Pedro] wala moingon ngadto kanila, ‘Paghinulsol ug pagpabunyag alang sa kapasayloan sa inyong mga sala;’ apan siya miingon, ‘Paghinulsol kamo, ug pamalik na kamo kaniya, aron mapala ang inyong mga sala, aron ang mga panahon sa kahayahay magaabut gikan sa atubangan sa Ginoo.’ [Mga Buhat 3:19.]
“… Dili sila mabunyagan alang sa kapasayloan sa mga sala tungod kay sila nakapaagas og inosente nga dugo” (sa History of the Church, 6:253).
Ipasabut ang mga pulong “aron ang mga panahon sa kahayahay magaabut gikan sa atubangan sa Ginoo; ug aron iyang ipadala si Jesus ang Kristo” (mga bersikulo 19–20).
Sa inyong hunahuna unsa ang gipasabut niini nga mga pulong?
Dapita ang usa ka estudyante sa pagbasa og kusog sa mosunod nga pamahayag ni Elder Bruce R. McConkie sa Korum sa Napulog Duha ka mga Apostoles:
Imahe
Elder Bruce R. McConkie
“Kining gigahin nga panahon, kining mga panahon sa kahayahay, mahitabo sa ikaduhang pag-anhi sa Anak sa Tawo, sa adlaw nga ipadala sa Ginoo si Kristo pag-usab nganhi sa yuta.
“… Kini ang adlaw nga ‘ang yuta pagabag-ohon ug makadawat sa iyang paraisohanon nga himaya.’ (Ikanapulo nga Artikulo sa Hugot nga Pagtuo.) Kini ang adlaw sa ‘bag-ong yuta’ nga nakita ni Isaias (Isa. 65:17), ang yuta nga mopatigbabaw sa panahon nga ang pagkadautan mohunong, kon ang panahon sa milenyum mosugod na” (sa Conference Report, Okt. 1967, 43).
Imahe
Ang Ikaduhang Pag-anhi
Diha sa pisara, ipakita ang hulagway sa Ang Ikaduhang Pag-anhi (Libro sa mga Hulagway sa Ebanghelyo [2009], no. 66; tan-awa usab LDS.org). Pangalani kini pinaagi sa pagsulat og Ang mga panahon sa kahayahay diha sa pisara duol sa hulagway.
Sa unsa nga paagi ang yuta mahayahay sa Ikaduhang Pag-anhi ni Jesukristo? (Kini pagalimpyohan sa pagkadautan.)
Ipasabut ang mga pulong “mga panahon sa pagtuman na sa tanan” (bersikulo 21).
Unsa sa imong hunahuna ang “mga panahon sa pagtuman na sa tanan” nagpasabut? (Mahimo nga imong ipasabut ang Mga Buhat 3:21, aron sa pagtabang sa mga estudyante nga masabtan nga kini nagpasabut ngadto sa Pagpahiuli sa ebanghelyo sa ulahing mga adlaw. Magpabilin si Jesukristo sa langit atol sa umaabut nga panahon sa apostasiya, apan mobalik Siya sa yuta sa pagpahinabo sa pag-uli o pagpahiuli sa tanang mga butang kalabut ngadto sa ebanghelyo. Mahimo usab nga imong ipasabut nga gigamit ni Pedro ang mga pulong nga “mga panahon sa pagpahiuli sa tanang mga butang” sa paghulagway og mga higayon nga si Jesukristo mobisita sa yuta sa dili pa ang Iyang Ikaduhang Pag-anhi.)
Kanus-a si Jesukristo mibisita sa yuta isip kabahin sa ulahing adlaw nga Pagpahiuli sa ebanghelyo? (Tingali mohisgot ang mga estudyante sa mga pagpakita sa Manluluwas diha sa Unang Panan-awon ni Joseph Smith [tan-awa sa Joseph Smith—Kasaysayan 1:17] ug sa Templo sa Kirtland [tan-awa sa D&P 110:2–5].)
Imahe
Ang Unang Panan-awon
Diha sa pisara, ipakita ang hulagway sa Ang Unang Panan-awon (Libro sa mga Hulagway sa Ebanghelyo, no. 90; tan-awa usab LDS.org). Pangalani kini pinaagi sa pagsulat og Ang mga panahon sa pagpahiuli sa tanang mga butang diha sa pisara duol sa hulagway.
Sumala sa bersikulo 21 kinsa agi og dugang ni Pedro ang nagsulti kalabut sa ulahing adlaw nga Pagpahiuli sa ebanghelyo? (Gamit ang ilang kaugalingong mga pulong, ang mga estudyante kinahanglang makaila sa mosunod nga doktrina: Ang mga propeta sa tanang mga panahon nanagna sa ulahing adlaw nga Pagpahiuli sa ebanghelyo.)
I-summarize ang Mga Buhat 3:22–26 pinaagi sa pagpasabut nga si Pedro mipamatuod nga si Moises ug ang tanang mga propeta gikan ni Samuel ug kadtong nagsunod human” (bersikulo 24) misulti kabahin ni Jesukristo ug mipahimangno sa mga sangputanan sa pagdumili Kaniya (bersikulo 23).
Mahimong imong tapuson pinaagi sa pagpakigbahin sa imong pagpamatuod nga si Jesukristo mianhi sa yuta isip kabahin sa ulahing adlaw nga Pagpahiuli sa ebanghelyo ug nga Siya mobalik sa Iyang Ikaduhang Pag-anhi aron sa paglimpyo sa yuta sa pagkadautan.
Aron sa pagtabang sa mga estudyante sa pagsabut kon unsaon sa paggamit sa Mga Buhat 3:19–21 diha sa usa ka misyonaryong sitwasyon, ipakita ang mosunod nga talan-awon: Usa ka investigator nangutana, “Asa sa Biblia nag-ingon nga ang ebanghelyo ipahiuli sa katapusang mga adlaw?”
Bahina ang mga estudyante ngadto sa paris. Hangyoa ang matag paris sa pag-andam og tubag niini nga pangutana gamit ang Mga Buhat 3:19–21 ug labing minos usa nga laing tudling sa Biblia. Mahimong imong awhagon sila sa pagpangita ubos sa “Pagpahiuli sa Ebanghelyo” diha sa Giya Ngadto Sa Mga Kasulatan.
Human sa igong panahon, dapita ang usa ka estudyante sa pag-role play isip usa ka investigator ug usa sa mga paris sa mga estudyante sa pag-role play isip mga misyonaryo diha sa atubangan sa klase. Hangyoa ang paris nga mga estudyante nga nagrole-play isip mga misyonaryo sa pagpakigbahin sa ilang giandam nga tubag ngadto sa estudyante kinsa nagrole-play isip investigator.
Samtang nagserbisyo isip dean sa religiuos instruction sa Brigham Young University, si Elder Jeffrey R. Holland sa Korum sa Napulog Duha ka mga Apostoles mipasabut:
“Si Pedro walay salapi apan siya adunay mga bahandi: ‘ingon sa anaa kaniya’ lakip ang matag yawe ngadto sa gingharian sa Dios dinhi sa yuta, gahum sa priesthood sa pagbuhi sa patay, hugot nga pagtuo sa paglig-on sa mga kabukugan ug mga kaugatan, usa ka lig-ong tuo nga kamot sa Kristyanong panaghigalaay. Dili siya makahatag og plata o bulawan apan makahatag siya niana nga kanunay nga gipalit ‘sa walay salapi ug sa walay bili’ (Isa. 55:1)—ug gihatag niya kini” (“The Lengthening Shadow of Peter,” Ensign, Sept. 1975, 30).
Mga Buhat 3:7. “Ug iyang gikuptan siya sa tuong kamot ug gialsa”
Si Elder Bruce R. McConkie sa Korum sa Napulog Duha ka mga Apostoles mipasabaut nga ang istorya ni Pedro nga nag-ayo sa bakol nga tawo nagpakita sa kamatuoran nga ang mga tighupot sa priesthood nagbuhat ilis ni Jesukristo kon maghatag sila og mga panalangin:
“Si Pedro wala manghangyo sa Ginoo sa pag-ayo sa bakol, wala siya mag-ampo ngadto sa Dios sa pagbu-bu sa iyang grasya ug hiyas sa pagpang-ayo diha sa bakol nga tawo. Hinoon—ang paglihok diha sa pangalan sa Ginoo ug pinaagi sa katungod sa pagtugyan sa awtoridad nga angay sa priesthood nga nadawat na—mismo siya mimando sa milagro nga mahitabo. Si Pedro sulugoon sa Ginoo, iyang tigpamaba ug tinugyanan; siya nagbarug diha sa lugar ug ilis ni Kristo, nagbuhat unsay buhaton unta sa Agalon kon sa personal anaa” (Doctrinal New Testament Commentary, 3 vols. [1965–73], 2:46).
Kini nga kamatuoran gipakita usab diha sa Doktrina ug mga Pakigsaad 36:2, nga ang Ginoo miingon, “Ug Ako mopandong sa akong kamot diha kanimo [Edward Partridge] pinaagi sa kamot sa akong sulugoon nga si Sidney Rigdon.”
Si Presidente Harold B. Lee mitudlo og laing importanting kamatuoran, naggamit sa ehemplo sa kinaiya ni Pedro human giayo ni Pedro ang bakol nga tawo pinaagi sa gahum sa priesthood:
“Inyo bang makita ang hulagway karon nianang halangdon nga kalag, kana nga pinakapunoan sa mga apostoles, tingali ang iyang mga bukton anaa libut sa mga abaga niini nga tawo, ug nag-ingon, ‘Karon, tawo nga buotan, pagbaton og kaisug, kuyugan ko ikaw og pipila ka lakang. Magdungan kita og lakaw, ug akong isiguro kanimo nga ikaw makalakaw, tungod kay ikaw nakadawat sa panalangin pinaagi sa gahum ug awtoridad nga gihatag sa Dios ngari kanamo isip mga tawo, iyang mga sulugoon.’ Dayon ang tawo milukso sa hingpit nga kalipay.
“Dili ninyo maalsa ang usa ka kalag hangtud nga kamo nagbarug sa mas taas nga yuta kay sa kaniya. Kinahanglan ninyong siguroon, kon luwason man ninyo kana nga tawo, nga kamo mismo nagpakita sa sama nga ehemplo kon unsa ang inyong gusto nga mahitabo kaniya. Dili kamo makadagkot og kalayo ngadto sa laing kalag gawas kon kini nagsiga diha sa kaugalingon ninyong kalag” (“Stand Ye in Holy Places,” Ensign, Hulyo 1973, 123).
