Materyal sa Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang sila nagtuon sa Mga Buhat 6–12 (unit 18) dili tuyo nga itudlo isip kabahin sa imong leksyon. Ang leksyon nga imong itudlo mohugop lamang diha sa diyutay niini nga mga doktrina ug mga baruganan. Sunda ang mga pag-aghat sa Espiritu Santo samtang imong ikonsiderar ang mga panginahanglan sa imong mga estudyante.
Nakat-unan sa mga estudyante nga ang takus nga mga miyembro sa Simbahan gitawag aron motabang sa pagpangalagad ngadto sa mga panginahanglan sa uban. Samtang nagtuon niini nga mga pulong ug sa pagkamartir ni Esteban, ilang nadiskubrehan ang mosunod nga mga kamatuoran: Ang pagbatok sa Espiritu Santo makagiya ngadto sa pagsalikway sa Manluluwas ug sa Iyang mga propeta. Ang Langitnong Amahan, si Jesukristo, ug ang Espiritu Santo mga lain-lain ug lahi nga mga binuhat [beings]. Kon kita magpabiling matinud-anon ngadto ni Jesukristo sa panahon sa mga kalisdanan, Siya magauban kanato.
Sa ilang pagtuon sa Mga Buhat 8, nakat-unan sa mga estudyante ang mosunod nga mga doktrina ug mga baruganan: Ang gasa sa Espiritu Santo gihatag human sa bunyag pinaagi sa pagpandong sa mga kamot sa gihatagan og awtoridad nga mga tighupot sa priesthood. Ang priesthood gitugyan sumala sa kabubut-on sa Dios ug sa sumbanan sa katakus. Samtang kita nagpatalinghug sa mga pag-aghat gikan sa Dios, kita makadawat og mga oportunidad sa pagtabang og giya sa uban ngadto ni Jesukristo.
Sa Mga Buhat 9, ang mga estudyante nakakat-on nga ang Ginoo nagtan-aw kanato ingon nga kita mahimo ug nga nakakita Siya sa atong potensyal alang sa pagtabang Kaniya sa Iyang buhat. Nakat-unan usab nila ang mosunod nga mga baruganan: Kon kita mosunod sa kabubut-on sa Ginoo, niana kita makausab ug makatuman sa potensyal nga Iyang nakita kanato. Pinaagi sa pagpangalagad ngadto sa uban, makatabang kita sa mga tawo sa pagbalik ngadto sa Ginoo ug sa pagtuo diha Kaniya.
Gitun-an sa mga estudyante ang panan-awon ni Pedro mahitungod sa pagsangyaw sa ebanghelyo ngadto sa mga Hentil ug nakat-unan nga kon kita mahibalo nga kadtong kinsa nagdumala sa Simbahan gigiyahan sa Dios, kita masaligong mopaluyo ug mosunod kanila. Nakat-unan usab nila ang mosunod nga mga kamatuoran: Kon kita maningkamot sa pagpahimuot sa uban kay sa Dios, niana kita maggiyahan pa ngadto sa laing sala. Ang atong sinsero ug matinguhaong mga pag-ampo nagdapit sa mga milagro ug mga panalangin sa Dios nganhi sa atong mga kinabuhi ug sa mga kinabuhi sa uban.
Pasiuna
Gipadayag sa Dios ngadto ni Pedro pinaagi sa usa ka panan-awon nga ang ebanghelyo kinahanglan nga isangyaw ngadto sa mga Hentil. Gitudlo ni Pedro ang ebanghelyo ngadto ni Cornelio ug sa iyang sakop sa panimalay ug sa wala madugay mihusay og panagbingkil taliwala sa mga Santos nga Judeo mahitungod sa pagsangyaw sa ebanghelyo ngadto sa mga Hentil.
Nagpadayag ang Dios ngadto ni Pedro pinaagi sa usa ka panan-awon nga ang ebanghelyo kinahanglan nga isangyaw ngadto sa mga Hentil
Dapita ang mga estudyante sa paghanduraw nga usa ka higala nangutana: “Nakadungog ko nga sa 1978 ang inyong simbahan miusab sa baruganan niini sa pagtugot sa tanang mga lalaki sa pagdawat sa priesthood nga walay pagsapayan sa kaliwatan. Kon ikaw nagtuo nga ang inyong simbahan gidumala sa Dios, ug ang Dios usa ka dili mausab nga binuhat, sa unsa nga paagi kana posible?”
Hangyoa ang mga estudyante sa pagsulat diha sa ilang mga class notebook o mga scripture study journal kon sa unsa nga paagi sila motubag ngadto niini nga higala. (Timan-i: Siguroa nga ang mga estudyante motubag sa pangutana kabahin sa kausaban sa pamaagi sa Simbahan kay sa mangagpas og posible nga mga katarungan alang sa pagdili og tugyan sa priesthood. Usab, sa panahon sa inyong paghisgot, ayaw og pangagpas kabahin kon nganong ang pagdili og tugyan sa priesthood gihimo, tungod kay kini nga mga katarungan wala pa gipadayag [tan-awa sa Opisyal nga Pahayag 2].)
Dapita ang mga estudyante samtang sila nagtuon sa Mga Buhat 10 sa pagpangita og mga kamatuoran nga makatabang kanila sa pagtubag og mga pangutana mahitungod kon sa unsa nga paagi ang Ginoo nangulo, naggiya, nag-usab ug nagdumala sa Iyang Simbahan.
Ipasabut nga kutob niini nga bahin sa mga panahon sa Bag-ong Tugon, ang ebanghelyo nasangyaw, nga may pipila ka mga walay labot, eksklusibo ngadto sa mga Judeo samtang gigiyahan sa Manluluwas (tan-awa sa Mateo 10:5–6). Hinoon, diha sa Mga Buhat 10 atong mabasa ang mahitungod sa usa ka mahinungdanong kausaban sa paagi nga ang Simbahan gidumala.
Dapita ang mga estudyante sa pag-summarize kon unsay ilang nakat-unan gikan sa ilang mga pagtuon mahitungod sa usa ka Hentil nga ginganlan og Cornelio. (Siya usa ka opisyal sa kasundalohan nga Romano. Siya ug ang iyang sakop sa panimalay mga tumutoo ug mahinadlukon sa Dios nga mga tawo. Isip usa ka Hentil, dili siya makapasakop sa Simbahan ni Kristo nga dili una magpakabig ngadto sa Judaismo.)
I-summarize ang Mga Buhat 10:3–8 pinaagi sa pagpasabut nga agi og resulta sa pagkamatinud-anon ni Cornelio, usa ka anghel mipakita ngadto kaniya ug mitudlo kaniya sa pagpadala og mga tawo ngadto sa Jope sa pagpangita ni Pedro. Samtang ang mga sulugoon ni Cornelio mibiyahe ngadto sa Jope, si Pedro adunay mahinungdanon nga panan-awon samtang nagpuyo sa balay sa usa ka tawo nga ginganlan og Simon.
Dapita ang pipila ka mga estudyante sa pagpuli-pulig basa og kusog gikan sa Mga Buhat 10:9–16. Hangyoa ang klase sa pagsunod, mangita sa unsay nakita ni Pedro diha sa panan-awon. (Aron sa paglain-lain, mahimong ikaw mohatag sa matag estudyante og piraso nga papel alang sa usa ka drowing nga kalihokan. Dapita ang mga estudyante sa pagbasa og hilum sa Mga Buhat 10:9–16 ug sa pagdrowing og usa ka hulagway sa panan-awon ni Pedro ingon nga kini gihulagway niini nga mga bersikulo. Human sa igong panahon, hangyoa ang mga estudyante sa paggamit sa ilang mga hulagway sa pagpasabut ngadto sa usa ka kauban sa klase kon unsay nahitabo diha sa panan-awon ni Pedro. Sunod sa bisan hain niini nga mga kalihokan, pangutana:
Diha sa pana-awon, unsay gisugo nga ipakaon ni Pedro?
Sumala sa bersikulo 14, unsa ang unang reaksyon ni Pedro ngadto niini nga sugo? (Ipasabut nga ubos sa balaod ni Moises, ang mga Judeo gidid-an sa pagkaon sa mga hayop nga giila nga dili binalaan o mahugaw [tan-awa sa Levitico 11].)
Sumala sa Mga Buhat 10:15, unsay gisulti sa Ginoo mahitungod sa dili mahinlo nga mga hayop nga Iyang gisugo ni Pedro nga kan-on?
I-summarize ang Mga Buhat 10:17–28 pinaagi sa pagpasabut nga si Pedro wala sa sinugdanan makasabut sa kahulugan sa iyang panan-awon. Samtang siya namalandong niini, miabut ang mga sulugoon ni Cornelio ug gisultihan si Pedro mahitungod sa panan-awon ni Cornelio. Sa sunod nga adlaw, si Pedro ug ang ubang mga disipulo miuban kanila sa pagpakigkita ni Cornelio. Bisan pa sa kamatuoran nga kadaghanan sa mga Judeo naghunahuna niini nga supak sa balaod sa pagpakig-uban o pagbisita og usa ka Hentil, misulod si Pedro sa balay ni Cornelio.
Dapita ang usa ka estudyante sa pagbasa og kusog sa Mga Buhat 10:28. Hangyoa ang klase sa pagsunod, mangita sa katarungan nga gihatag ni Pedro sa pagpakig-uban o sa pagbisita og usa ka Hentil.
Unsa nga katarungan ang gihatag ni Pedro sa pagpakig-uban o pagbisita og usa ka Hentil?
I-summarize ang Mga Buhat 10:29–33 pinaagi sa pagpasabut nga si Cornelio misulti ni Pedro mahitungod sa iyang panan-awon. Gipundok usab ni Cornelio ang iyang pamilya ug mga higala aron si Pedro makatudlo kanila.
Dapita ang usa ka estudyante sa pagbasa og kusog sa Mga Buhat 10:34–35. Hangyoa ang klase sa pagsunod, mangita kon unsay nakat-unan ni Pedro.
Sa unsa nga paagi imong i-summarize kon unsa ang nakat-unan ni Pedro? (Imong gikinahanglan tingali ang pagpasabut nga samtang ang Dios dili modapig og mga tawo pinasikad sa mga ilhanan sama sa nasyonalidad o sosyal nga kahimtang, Siya mohukom sa tanan nga mga tawo pinaagi sa ilang mga buhat ug nagpanalangin niadtong kinsa nagsunod Kaniya. Mahimo usab nga imong tan-awon ang artikulo nga “Race and the Church: All Are Alike unto God” [mormonnewsroom.org/article/race-church] nga makatabang.)
I-summarize ang Mga Buhat 10:36–43 pinaagi sa pagpasabut nga gitudloan ni Pedro si Cornelio ug ang iyang mga sakop sa panimalay mahitungod ni Jesukristo ug sa Iyang maayo nga mga buhat, Paglansang diha sa Krus, ug sa Pagkabanhaw. Mipamatuod si Pedro nga kadtong kinsa nagtuo ni Jesukristo makadawat og kapasayloan sa ilang mga sala.
Dapita ang usa ka estudyante sa pagbasa og kusog sa Mga Buhat 10:44–48. Hangyoa ang klase sa pagsunod, mangita alang sa epekto sa pagtudlo ni Pedro diha niini nga mga Hentil. Ipasabut nga ang mga pulong “may sirkunsisyon nga nanguban” diha sa bersikulo 45 nagpasabut ngadto sa mga disipulo nga Judeo kinsa mikuyog ni Pedro gikan sa Jope.
Sumala sa mga bersikulo 44–46, unsa ang epekto sa pagtudlo ni Pedro diha sa sakop sa panimalay ni Cornelio? (Imong gikinahanglan tingali ang pagpasabut nga ang mga pulong “ang gasa sa Espiritu Santo” sa bersikulo 45 nagpasabut ngadto sa gahum sa Espiritu Santo, nga miabut diha niining mga Hentil. Kini lahi gikan sa gasa sa Espiritu Santo, nga atong nadawat pinaagi sa ordinansa sa kumpirmasyon human sa bunyag [tan-awa sa Mga Buhat 8:14–17; Mga Pagtulun-an sa mga Presidente sa Simbahan: Joseph Smith (2007), 97].)
Ngano nga ang mga Judeo kinsa dinha alang niini nga okasyon nahingangha?
Pinaagi sa mga kasinatian ni Pedro nga narekord diha sa Mga Buhat 10, unsa ang gipadayag sa Ginoo ngadto kaniya mahitungod sa mga Hentil?
Aron sa pagtabang sa mga estudyante sa pag-ila og mga doktrina nga atong makat-unan gikan sa Mga Buhat 10, bahina sila ngadto sa mga grupo nga tinagurha o tinagutlo. Hatagi ang matag grupo og kopya sa mosunod nga handout, o isulat kini nga mga pangutana diha sa pisara. Dapita ang mga estudyante sa pagtrabaho uban sa ilang mga grupo sa pagtubag sa mga pangutana.
Manwal sa Seminary Teacher sa Bag-ong Tugon—Leksyon sa Home-Study (Unit 18)
Unsa nga kamatuoran ang atong makat-unan gikan sa istorya ni Pedro ug Cornelio mahitungod kon giunsa pagdumala sa Ginoo ang Iyang Simbahan? (Hinumdumi nga si Pedro mao ang Presidente sa Simbahan.)
Unsa nga kamatuoran ang atong makat-unan gikan sa katinuod nga ang Ginoo mipadayag og kamatuoran ngadto ni Pedro sa hinay-hinay kay sa tanan dayon?
Unsa nga kamatuoran ang atong makat-unan gikan niini nga istorya mahitungod sa unsa kahay buhaton sa Dios sa mga panudlo nga Iyang nahatag sa nanglabay nga panahon?
Human sa igong panahon, dapita ang daghang mga estudyante sa pag-adto sa pisara aron isulat ang mga kamatuoran nga nailhan sa ilang mga grupo. Siguroa nga ang mosunod nga mga kamatuoran makita sa unsay ilang gisulat:
Ang Dios nagdumala sa Iyang Simbahan pinaagi sa pagpadayag ngadto sa Iyang propeta, ang senior nga Apostol.
Kita mahimong makadawat og pagpadayag ug panabut sa hinay-hinay samtang kita nagsunod sa Ginoo.
Ang Dios mahimong mousab o modugang ngadto sa mga panudlo nga Iyang nahatag sa nanglabay nga panahon, sumala sa Iyang kaalam ug sa mga panginahanglan sa Iyang mga anak.
Dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Hangyoa ang klase sa pagpaminaw kon sa unsa nga paagi ang ikatulong kamatuoran nga ilang giila makita sa pamahayag ni Elder Christofferson:
Imahe
Elder D. Todd Christofferson
“Tungod niini nga kasinatian ug pagpadayag ngadto kang Pedro, giusab sa Ginoo ang pamaagi sa Simbahan ug mipadayag og mas kompletong panabut sa doktrina ngadto sa Iyang mga disipulo. Ug ang pagsangyaw sa ebanghelyo ngadto sa tanang katawhan” (“Ang Doktrina ni Kristo,” Ensign o Liahona, May. 2012, 88).
Hatagi ang mga estudyante og panahon sa pagribyu unsay ilang gisulat mahitungod sa unsa nga paagi ilang tubagon ang pangutana sa ilang higala mahitungod sa pag-usab sa pamaagi sa Simbahan. Awhaga sila sa pagsulat og dugang nga mga panlantaw nga ilang naangkon samtang nagtuon sa Mga Buhat 10, ug tuguti sila sa pagpakigbahin niini nga mga panlantaw ngadto sa klase.
Mahimong nagkinahanglan nga imong ipasabut nga bisan tuod ang Dios mahimong mousab og mga pamaagi sa Simbahan ug modugang sa atong panabut sa doktrina pinaagi sa nagpadayon nga pagpadayag (tan-awa sa Mga Artikulo sa Hugot nga Pagtuo 1:9), ang Iyang balaang kinaiyahan, mga hiyas, mga pakigsaad, mga doktrina, ug plano dili gayud mausab. Ang pagkahibalo niini makatabang kanato sa pagbaton og hugot nga pagtuo diha sa Dios ug pagsalig nga Siya mogiya sa Iyang Simbahan sumala sa Iyang kabubut-on ug sa mga panginahanglan sa Iyang mga anak.
Taposa pinaagi sa pagdapit sa mga estudyante sa pagpakigbahin sa ilang mga pagpamatuod sa mga kamatuoran nga ilang nakat-unan.
Dapita ang mga estudyante sa pagpangita og mga tubag ug sa paghunahuna sa mosunod nga mga pangutana sa panahon sa ilang pagtuon sa Mga Buhat 13–19: Unsay gihimo ni Pablo ngadto ni Elimas ang salamangkero? Sa imong hunahuna sa unsa nga paagi mo-react ka kon ikaw gituohan nga usa ka dios? Ngano nga si Pablo ug si Bernabe gisangpit isip mga dios? Sa unsa nga paagi sila miatubang niini? Unsa ang isyu taliwala sa mga miyembro sa Simbahan kalabut sa pagsirkunsidar, ug ngano nga ang hilisgutan kinahanglan nga iadto sa atubangan sa mga Apostoles? Unsa ang ilang desisyon? Sa dihang mibisita si Pablo sa Atenas gisangyaw niya gikan sa Bungtod sa Mars ang mahitungod sa wala ilhi nga dios. Unsa ang gitudlo ni Pablo sa mga tawo?