Marcos 2–3

Dapita ang mga estudyante sa paghunahuna nga ang usa ka tawo nga ilang gimahal nag-antus sa usa ka makahulga sa kinabuhi nga pisikal nga hagit nga nagkinahanglan og espesyal nga pagtambal.

• Kinsa man ang inyong tinguhaon nga motabang sa inyong minahal? Ngano man?

• Unsay andam ninyong buhaton kon adunay usa lamang ka doktor nga makatabang apan lisud ang pagpaeskedyul niini nga doktor?

I-summarize ang Marcos 2:1–4 pinaagi sa pagpasabut nga sa balangay sa Capernaum sa Galilea, dihay usa ka tawo “nga paralitiko” (bersikulo 3), diin nagpasabut nga siya paralisado. Upat ka laing mga tawo nagyayong niining tawhana ngadto sa balay diin anaa si Jesus. Sa dihang ilang nahibaloan nga ang balay puno kaayo nga sila dili makasulod niini, ilang gibuslotan ang atop sa balay ug ilang gipaubos ang paralitiko ngadto sa presensya sa Manluluwas.

Hangyoa ang usa ka estudyante sa pagbasa og kusog sa Marcos 2:5, ug dapita ang klase sa pagpangita kon unsa ang gisulti ni Jesus ngadto sa paralitiko. Hangyoa ang mga estudyante nga moreport sa unsay ilang nakat-unan.

Dapita ang pipila ka mga estudyante sa pagpuli-puli og basa og kusog sa Marcos 2:6–12. Hangyoa ang klase sa pagsunod, nga mangita kon unsay sunod nga nahitabo.

• Sumala sa mga bersikulo 6–7, unsa man ang reaksyon sa “pipila sa mga escriba” sa mga pulong sa Manluluwas? (Sila nasuko sa Iyang pag-angkon nga mohatag og kapasayloan sa mga sala.)

• Unsay gipangutana ni Jesus sa mga escriba?

• Unsay gipakita ug gitudlo sa Manluluwas pinaagi sa pag-ayo niini nga tawo? (Human makatubag ang mga estudyante, tabangi sila nga makahibalo sa mosunod nga kamatuoran: Si Jesukristo anaay gahum sa pag-ayo kanato sa espiritwal ug pisikal nga paagi.)

Ipasabut nga sa dihang nakita sa mga escriba ang paralitiko nga mibangon sa higdaanan ug milakaw, sila gihatagan og dili ikalimod nga ebidensya nga si Jesukristo adunay gahum sa pag-ayo sa masakiton ug sila nakadungog Kaniya nga nagpamatuod nga Siya makapasaylo sa mga sala. Hinoon, walay timailhan nga kining mga tawhana miduol ni Jesus human niana ug nangayo og kapasayloan sa ilang kaugalingong mga sala.

(Pahinumdom: Ang mga panghitabo nga girekord diha sa Marcos 2:1–12 pagahisgutan og maayo diha sa leksyon alang sa Lucas 5.)

Ipares-pares ang mga estudyante ug hatagi ang matag paris og usa ka piraso nga papel. Dapita ang mga estudyante sa paghisgot sa mosunod nga pangutana uban sa ilang pares ug ilista ang ilang mga tubag diha sa ilang papel.

• Unsa ang pipila ka rason nganong ang mga tawo dili magtinguha sa kapasayloan sa Ginoo alang sa ilang mga sala?

Hangyoa ang pipila ka mga estudyante sa pagreport sa ilang mga tubag, nga mahimong maglakip sa mosunod: ang ubang tawo tingali dili gusto nga mohunong sa pagpakasala; ang uban tingali dili gusto nga moangkon o mokumpisal sa ilang mga sala tungod sa garbo o kaulawan; ang uban tingali naglaum nga ang Ginoo mopasaylo kanila bisan kon sila dili maghinulsol; ug ang uban tingali nagtuo nga ang Ginoo adunay gahum sa pagpasaylo, apan sila kulang sa hugot nga pagtuo nga Siya mopasaylo sa ilang piho nga mga sala.

Dapita ang mga estudyante sa pagpangita og mga kamatuoran diha sa Marcos 2:13–22 nga makaawhag kanato sa pagtinguha og kapasayloan sa Ginoo.

Dapita ang usa ka estudyante sa pagbasa og kusog sa Marcos 2:13–15. Hangyoa ang klase sa pagsunod, nga mangita kon unsay gibuhat ni Jesus human giayo ang paralisado nga tawo.

• Unsay gibuhat sa Manluluwas human sa pag-ayo niini nga tawo?

• Unsa ang reaksyon ni Levi sa pagdapit sa Manluluwas?

Ipasabut nga si Levi nailhan usab sa ngalan nga Mateo ug ang samang Mateo nga misulat sa Ebanghelyo ni Mateo. Ang mga pulong nga “naglingkud sa buhisanan” (bersikulo 14) nagpasabut nga si Mateo usa ka publikano ug “usa ka tigpaniningil sa buhis alang sa mga Romano diha sa Capernaum, malagmit nag-alagad ni Herodes Antipas” (Giya ngadto sa mga Kasulatan, “Mateo”). Daghang mga Judeo ang naglagot sa mga maniningil sa buhis tungod kay ilang nakita ang mga maniningil sa buhis isip mga maluibon kinsa nangolekta og kwarta gikan sa ilang kaugalingon nga mga katawhan alang sa mga taga-Roma.

• Sumala sa bersikulo 15, unsay gibuhat ni Mateo alang sa Manluluwas ug sa Iyang mga disipulo?

• Kinsa pa man ang mitambong niini nga kumbira?

Ipasabut nga atol sa mortal nga pangalagad sa Manluluwas, ang pakig-uban og kaon nagpasabut og mas labaw pa kay sa yano lang nga pagdungan sa pagkaon ug pag-inom. Kini nagpasabut nga ang higot sa panaghigalaay ug kalinaw anaa taliwala sa tanan nga mga tawo nga mitambong.

Dapita ang usa ka estudyante sa pagbasa og kusog sa Marcos 2:16, ug hangyoa ang klase sa pagpangita kon unsay reaksyon sa mga escriba ug Pariseo sa dihang ilang nakita ang Manluluwas nga nagkaon uban sa mga maniningil sa buhis.

• Unsa ang gisulti sa mga escriba ug mga Pariseo?

• Ngano kaha nga gisaway nila si Jesus tungod sa pakigkaon uban sa mga maniningil sa buhis ug mga makasasala?

Hangyoa ang usa ka estudyante sa pagbasa og kusog sa Marcos 2:17, ug hangyoa ang klase sa pagpangita sa tubag sa Manluluwas ngadto sa pagpanaway sa mga escriba ug mga Pariseo.

• Unsa nga pulong ang gigamit sa Manluluwas sa paghulagway sa Iyang kaugalingon? (Ipasabut nga pinaagi sa paggamit sa pulong nga mananambal, ang Manluluwas mimatuod sa Iyang gahum sa pag-ayo sa espiritwal ug pisikal nga paagi.)

• Sa unsang paagi nga ang tubag sa Manluluwas nakatabang sa mga escriba ug mga Pariseo nga makasabut nganong Siya nakig-uban sa mga maniningil sa buhis ug makasasala?

• Unsa nga kamatuoran ang atong makat-unan gikan sa bersikulo 17 mahitungod sa unsay reaksyon sa Manluluwas sa atong mga sala? (Human makatubag ang mga estudyante, isulat sa pisara ang mosunod nga kamatuoran: Ang Manluluwas nagtinguha sa pagtabang kanato nga maghinulsol sa atong mga sala ug mamaayo.)

• Nganong importante man nga motuo nga si Jesus nagtinguha sa pagtabang kanato nga maghinulsol ug mamaayo?

Dapita ang usa ka estudyante sa pagbasa og kusog sa mosunod nga pamahayag ni Elder Craig A. Cardon sa Seventy:

Imahe

Elder Craig A. Cardon

“Nahigugma ang Ginoo kanato ug gusto nga kita makasabut sa Iyang pagkaandam sa pagpasaylo. …

“… Kitang tanan, lakip niadtong nakigbisog sa pagbuntog sa mga makaadik nga kinaiya sama sa drugas o pornograpiya ug niadtong suod nila, makahibalo nga ang Ginoo moila sa atong matarung nga mga paningkamot ug mahigugmaong mopasaylo kon makompleto ang paghinulsol” (“Ang Manluluwas Gusto nga Mopasaylo,” Ensign o Liahona, Mayo 2013, 16).

• Unsaon nato sa pagkahibalo nga ang Ginoo nagtinguha sa pagtabang kanato nga maghinulsol ug modawat sa Iyang pagpasaylo?

Dapita ang mga estudyante sa pagpamalandong kon sama ba sila sa mga maniningil sa buhis ug makasasala (kinsa miila sa ilang panginahanglan sa Manluluwas ug miduol ngadto Kaniya) o sama sa mga escriba ug mga Pariseo (kinsa wala moduol ngadto sa Manluluwas aron magtinguha sa Iyang pagpasaylo ug makaayo nga gahum).

Pagpamatuod sa gahum ug tinguha sa Manluluwas sa pag-ayo kanato, ug awhaga ang mga estudyante sa pagtinguha sa Iyang pagpasaylo pinaagi sa paghinulsol kon gikinahanglan.

I-summarize ang Marcos 2:18–22 pinaagi sa pagpasabut nga si Jesus mitudlo nganong ang Iyang mga disipulo wala magpuasa samtang Siya nag-uban kanila. Mitudlo usab Siya nganong lisud alang sa pipila ka mga tawo ang pagdawat sa Iyang ebanghelyo. (Pahinumdom: Kini nga mga pagtulun-an pagahisgutan og maayo diha sa leksyon alang sa Lucas 5.)

Pangutan-a ang mga estudyante kon nakasulay ba sila nga dili moapil sa usa ka kalihokan aron sa pagbalaan sa adlawng Igpapahulay. Dapita ang pipila sa pagpakigbahin sa ilang mga kasinatian.

Isulat sa pisara ang mosunod nga pangutana ug dapita ang mga estudyante sa pagpamalandong niini samtang sila nagpadayon sa pagtuon sa Marcos 2–3: Unsaon nimo pagkasayud nga ang usa ka kalihokan angayan nga buhaton sa Adlaw nga Igpapahulay?

Tungaa ang klase. Dapita ang katunga sa pagbasa sa Marcos 2:23–28 sa hilum nga paagi. (Awhaga kini nga mga estudyante sa pagbasa usab sa Joseph Smith Translation, Mark 2:26–27). Ipabasa sa laing tunga ang Marcos 3:1–6 sa hilum nga paagi. Sultihi ang mga estudyante sa pagpangita kon unsay gibuhat sa Manluluwas ug sa Iyang mga disipulo nga gituohan sa mga Saduceo nga usa ka pagsupak sa sugo sa pagbalaan sa adlawng Igpapahulay.

Human sa igong panahon, ipangutana ang mosunod:

• Unsa man ang gituohan sa mga Pariseo nga ginadili nga buhaton sa Manluluwas ug sa Iyang mga disipulo sa Igpapahulay? (Pagsanggi og mais ug pag-ayo sa usa ka tawo.)

• Nganong gikonsiderar man sa mga Pariseo nga supak sa balaod sa Dios ang mosanggi og mais o moayo og tawo sa Igpapahulay?

Kon gikinahanglan, pahinumdumi ang mga estudyante nga ang mga magtutudlo nga Judeo midugang sa ilang kaugalingong mga lagda ug mga interpretasyon, gitawag nga bina-ba nga balaod [oral law] o tradisyon, ngadto sa balaod ni Moises. Kining gidugang nga mga lagda gituyo aron malikayan ang pagsupak sa balaod sa Dios, apan kini usab nakapugong sa pipila ka mga tawo sa pagsabut sa tinuod nga katuyoan sa piho nga mga sugo, lakip ang sugo sa pagbalaan sa adlawng Igpapahulay.

Isulat sa pisara ang mosunod nga dili kompleto nga pamahayag: Makahimo kita sa pagbalaan sa adlaw nga Igpapahulay pinaagi sa …

• Unsaon ninyo pagkompleto niini nga pamahayag basi sa mga pagtulun-an sa Manluluwas diha sa Marcos 2–3? (Human makatubag ang mga estudyante, kompletuha ang pamahayag sa pisara aron mapasabut niini ang mosunod nga kamatuoran: Makahimo kita sa pagbalaan sa adlaw nga Igpapahulay pinaagi sa paghimaya sa Dios ug paghimo og mga maayong buhat.)

• Sa unsang mga paagi nga kita makahimaya sa Dios sa Iyang balaan nga adlaw?

• Unsa ang pipila ka mga ehemplo sa paghimo og maayong buhat sa Igpapahulay?

Aron sa pagtabang sa mga estudyante nga makasabut kon unsaon nila pagdeterminar sa mga kalihokan nga angay alang sa Igpapahulay, ipabasa og kusog sa usa ka estudyante ang mosunod nga pamahayag ni Presidente James E. Faust sa Unang Kapangulohan:

Imahe

Presidente James E. Faust

“Asa man ang linya nga nagtimaan sa unsay madawat ug dili madawat sa Igpapahulay? Sulod sa mga sumbanan, ang matag usa kanato kinahanglang motubag niini nga pangutana sa atong kaugalingon. Samtang kini nga mga sumbanan anaa sa mga kasulatan ug sa mga pulong sa modernong mga propeta, kinahanglan usab nga masulat gayud kini sa atong mga kasingkasing ug madumala pinaagi sa atong konsyensya. … Malagmit wala kaayoy seryuso nga kalapasan sa pagsimba sa Igpapahulay kon kita mapainubsanong moduol ngadto sa Ginoo ug ihalad kaniya ang tibuok natong kasingkasing, kalag, ug hunahuna. (Tan-awa sa Mat. 22:37.)

“Kon unsa ang angay o dili angay sa adlaw nga Igpapahulay pagahukman sa matag usa kanato pinaagi sa pagpaningkamot nga mahimong matinuoron sa Ginoo. Sa adlaw nga Igpapahulay atong buhaton ang unsay kinahanglan natong buhaton ug unsay angay natong buhaton uban sa matinahuron nga kinaiya ug dayon limitahan ang uban natong mga kalihokan” (“Ang Adlaw sa Ginoo,” Ensign, Nob. 1991, 35).

• Sa unsang paagi kamo mibati nga napanalanginan samtang kamo naningkamot sa pagsimba sa Dios ug pagbuhat og mga maayo sa Igpapahulay?

Awhaga ang mga estudyante sa pagpamalandong og usa ka paagi nga mas mabalaan nila ang adlaw nga Igpapahulay ug sa pagsulat og usa ka tumong sa pagbuhat niini diha sa ilang mga notebook sa klase o mga scripture study journal.

I-summarize ang Marcos 3:7–35 pinaagi sa pagpasabut nga si Jesus miadto sa Dagat sa Galilea [Lanaw sa Galilea] ug miayo sa daghang mga tawo kinsa misunod Kaniya, lakip sa pipila nga adunay mahugaw nga mga espiritu. Human makapili sa Napulog Duha ka mga Apostoles, si Jesus mi-orden kanila ug mipadala kanila aron sa pagsangyaw, pag-ayo ug pagpapahawa sa mga yawa. Dayon siya mipasidaan sa mga escriba mahitungod sa pagsulti sa pagpasipala batok sa Espiritu Santo ug mitudlo nga ang Iyang pamilya mao ang mga tawo nga nagbuhat sa kabubut-on sa Langitnong Amahan.

(Pahinumdom: Pipila ka mga panghitabo nga girekord diha sa Marcos 3:7–35 mas gihisgutan og maayo diha sa leksyon alang sa Mateo 12:22–35.)

Sa pagtapos, mahimo kang mopamatuod sa mga kamatuoran nga gitudlo sa leksyon.