Giawhag ni Pablo ang mga Santos sa Galacia nga lig-unon og balik ang ilang pagtuo kang Jesukristo ug mosalig nga ang kaluwasan makab-ot lamang pinaagi Kaniya kay sa pagkamasulundon sa balaod ni Moises. Gitapos ni Pablo ang iyang sulat pinaagi sa pagdapit sa mga miyembro sa Simbahan nga magmahimong bag-o nga mga nilalang pinaagi ni Kristo ug motabang sa uban sa paghimo sa ingon.
Giawhag ni Pablo ang mga Santos sa Galacia nga ipahiuli ang ilang pagtuo kang Jesukristo
Imahe
drawing, tug-of-war
Pagdrowing og imahe sa tug-of-war sa pisara.
Unsa ang tug-of-war? Unsaon man ninyo sa pagdaog niini?
Sa unsang mga paagi nga ang atong kinabuhi susama sa tug-of-war?
Kon ang mga estudyante wala mosulti niini, ipasabut nga usa ka aspeto sa atong kinabuhi nga susama sa tug-of-war mao ang atong pagpakigbatok sa tintasyon. Dapita ang mga estudyante sa pagpangita og mga kamatuoran samtang tun-an nila ang Mga Taga-Galacia 5 nga makatabang nila nga mahibalo unsaon nga makadaog sa pagpakigbatok sa tintasyon.
Pahinumdumi ang mga estudyante nga ang ubang mga Judeo nga Kristiyano mipasaag sa mga Santos sa Galacia pinaagi sa pagtudlo nila nga kinahanglan silang mosunod sa balaod ni Moises ug magpasirkunsisyon [magpatuli] aron maluwas. Gihulagway ni Pablo kining sayop nga mga pagtulun-an mahitungod sa balaod ni Moises isip usa ka “yugo sa pagkaulipon” (Mga Taga-Galacia 5:1).
Dapita ang usa ka estudyante sa pagbasa og kusog sa Mga Taga-Galacia 5:1 . Hangyoa ang klase sa pagsunod, nga mangita kon kinsay giingon ni Pablo nga maghatag og kagawasan gikan niining yugo sa pagkaulipon.
Kinsa man ang nagdala og kagawasan gikan niining yugo sa pagkaulipon?
I-summarize ang Mga Taga-Galacia 5:2–15 pinaagi sa pagpasabut nga gipanton ni Pablo ang mga Santos sa Galacia gumikan sa pagkadali rang mapadpad gikan sa kagawasan sa ebanghelyo ni Jesukristo ug mibalik hinoon ngadto sa pagkaulipon sa balaod ni Moises. Dayon iyang giklaro nga bisan og ang mga sumusunod ni Kristo gawasnon na gikan sa pagkaulipon sa balaod ni Moises, wala kana magpasabut nga gawasnon na silang magpatuyang sa pagpakasala.
Dapita ang usa ka estudyante sa pagbasa og kusog sa Mga Taga-Galacia 5:16–17. Hangyoa ang klase sa pagsunod, nga mangita sa duha ka nag-ilog nga pwersa nga gihulagway ni Pablo.
Unsa man ang duha ka nag-ilog nga pwersa nga gihulagway ni Pablo?
Paghimo og tsart sa pisara pinaagi sa pagdrowing og vertical o pinatindog nga linya padung sa tunga sa imahe sa tug-of-war. Isulat ang Panaggawi [Magpakatakus] sa Espiritu sa ibabaw sa unang bahin sa tug-of-war, ug isulat ang Pagtumana ang mga pangibug sa unod sa ibabaw nga laing bahin.
Unsay ipasabut sa “Panaggawi kamo diha sa Espiritu”? (bersikulo 16). (Magpakabuhing takus ug mosunod sa Espiritu Santo.)
Unsa ang gi-refer sa “pangibug sa unod” (bersikulo 16)? (Mga tintasyon sa pagpakasala.)
Sa unsang paagiha nga kini gikonsiderar nga nagkompetensyahay nga mga pwersa?
Unsa nga baruganan ang atong makat-unan gikan sa bersikulo 16 kon unsaon nato sa pagbuntog ang mga tintasyon sa unod? (Ang mga estudyante mahimong mogamit og lain-laing mga pulong apan kinahanglang mahibalo sa baruganan nga susama sa mosunod: Kon molakaw kita kauban sa Espiritu, atong mabuntog ang mga tintasyon sa unod. Isulat kini nga baruganan diha sa pisara.)
Hangyoa ang mga estudyante sa pagpamalandong kon asang dapita sila niining tug-of-war ug asa nga pwersa ang dumadaog sa ilang kinabuhi.
Bahina ang klase ngadto sa grupo nga magtinagurha o tinagutlo. I-assign ang katunga sa grupo sa pagbasa og kusog sa Mga Taga-Galacia 5:19–21 nga magdungan, nga mangita sa mga resulta sa “[pagtuman] sa pangibug sa unod.” Dapita ang laing katunga sa pagbasa og kusog sa Mga Taga-Galacia 5:22–23 nga magdungan, nga mangita sa mga resulta sa paglakaw kauban ang Espiritu. Kon mahuman na ang ilang pagbasa, dapita ang usa ka miyembro gikan sa matag grupo sa paglista ubos sa tukma nga kolum diha sa pisara sa usa sa mga tubag nga ilang nakit-an. Dapita sila nga ipadayon ang paglista sa ilang mga tubag hangtud ang tsart magpakita kon unsay gisulat ni Pablo. Mahimo kang magdala og diksyonaryo sa klase ug dapita ang usa ka estudyante sa pagpangita og bisan unsang mga pulong nga lisud sabton.
Sumala sa bersikulo 21, unsay gihimo ni Pablo nga mahitabo sa mga tawo nga magpadala sa “mga binuhatan sa unod”?
Sumala sa mga bersikulo 22–23, unsa ang mga bunga, o mga resulta, ang nagpasabut nga ang usa ka tawo naglakaw uban sa Espiritu? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Ang mga bunga sa Espiritu mao ang “gugma, kalipay, kalinaw, pailub, pagkamapuanguron, pagkamaayo, hugot nga pagtuo, kaaghup, ug pagpugong sa kaugalingon. Mahimo nimong isugyot nga markahan sa mga estudyante kini nga kamatuoran diha sa ilang mga kasulatan.)
I-refer ngadto sa kilid sa tsart diin nakalista ang mga bunga sa Espiritu.
Ngano nga bililhon ang pag-angkon niini nga mga panalangin?
Sa ubos sa tsart pagdrowing og dakong arrow nga nag-atubang sa kilid diin nakalista ang pangibug sa unod. Hangyoa ang mga estudyante sa paghunahuna nga niining hulagway sa tug-of-war gitugutan nato ang atong kaugalingon nga magpadulong sa pangibug sa unod.
Unsay mahitabo sa mga bunga sa Espiritu kon magpadala kita sa pangibug sa unod? (Magsugod sa pagkawala kanato ang mga bunga sa Espiritu.)
Papasa ang arrow ug pagdrowing og laing arrow nga mag-atubang sa mga bunga sa Espiritu. Hangyoa ang mga estudyante sa paghunahuna nga karon gitugutan nato ang atong kaugalingon nga magpadulong ngadto niining dapita.
Unsay mahitabo sa mga binuhatan sa unod kon maglakaw kita uban sa Espiritu? (Dili na kini mahimong kabahin sa atong kinabuhi.)
Dapita ang mga estudyante nga isulat sa ilang mga class notebook o mga scripture study journal ang mahitungod sa usa ka panahon dihang mibati sila o nakasinati og usa niining mga bunga sa Espiritu. Hangyoa sila nga ilakip ang unsay ilang gihimo sa paglakaw uban sa Espiritu nianang higayuna. Kon mahuman na sila, dapita ang pipila ka estudyante sa pagpakigbahin unsay ilang gisulat.
Dapita ang usa ka estudyante sa pagbasa og kusog sa Mga Taga-Galacia 5:24–25. Hangyoa ang klase sa pagsunod, nga mangita kon unsay gitinguhang buhaton sa mga disipulo ni Jesukristo sa pangibug sa unod.
Unsay gitinguhang buhaton sa mga disipulo ni Jesukristo sa pangibug sa unod? (Ilansang kini, o wagtangon kini sa ilang kinabuhi.)
Dapita ang mga estudyante sa paghunahuna kon unsay ilang buhaton aron maglakaw sa hingpit uban sa Espiritu. Awhaga sila nga sundon ang mga pag-aghat nga ilang nadawat aron ilang matagamtam ang mga bunga sa Espiritu.
Gidapit ni Pablo ang mga Santos sa Galacia nga mag-usab pinaagi ni Jesukristo
Dapita ang mga estudyante sa paghunahuna og tawo nga ilang nailhan nga sa kasamtangan wala makadawat og mga panalangin sa ebanghelyo, bisan og miyembro sa Simbahan kanang tawhana. Hangyoa ang klase sa pagpangita og baruganan samtang sila magtuon sa Mga Taga-Galacia 6 nga makagiya sa ilang mga paningkamot sa pagtabang sa tawo nga ilang nahunahunaan aron makadawat sa mga panalangin sa ebanghelyo.
Dapita ang usa ka estudyante sa pagbasa og kusog sa Mga Taga-Galacia 6:1–2. Hangyoa ang klase sa pagsunod, nga mangita sa unsay gitudlo ni Pablo kon unsay angay nga ipakita sa mga miyembro sa Simbahan sa tawo nga nakasala. (Mahimo nimong ipasabut nga ang “mahiligas ngadto sa kalapasan” sa [bersikulo 1] nagpasabut nga makasala.)
Sumala ni Pablo, unsay angay nga ipakita sa mga miyembro sa Simbahan sa tawo nga nakasala? (“Magpahiuli” sa tawo, o tabangan siya nga makabalik sa dalan sa ebanghelyo.)
Nganong importante ang pag-angkon og “espiritu sa kalumo” sa (bersikulo 1) samtang motabang kita og tawo pagbalik sa dalan sa ebanghelyo?
Unsa ang ubang mga paagi nga kita “magyayungay … sa kabug-at [palas-anon] sa usag usa”? (bersikulo 2).
I-summarize ang Mga Taga-Galacia 6:3–5 pinaagi sa pagpasabut nga gitudlo ni Pablo nga kinahanglang dili kita magmapahitas-on ug magpasigarbuhon sa kaugalingon ug ang matag usa ka tawo kinahanglang “magpas-an sa iyang kaugalingong luwan [palas-anon]” (bersikulo 4), o may tulubagon sa iyang mga pagpili.
I-display ang pipila ka mga binhi sa usa ka bunga o utanon nga dali rang mailhan sa mga estudyante. Hangyoa sila sa pag-ila kon unsa nga matang sa mga binhi o liso kana.
Unsay inyong mapaabut kon itanom ninyo kini nga mga binhi o liso?
Dapita ang usa ka estudyante sa pagbasa og kusog sa Mga Taga-Galacia 6:7–8. Hangyoa ang klase sa pagsunod, nga mangita sa unsay gitudlo ni Pablo kon unsay atong mapaabut kon itanom nato ang mga binhi o liso.
Unsa man ang gitudlo ni Pablo nga mahitabo kon gitanom ang mga liso? (Bisan unsay inyong ipugas, o itanom, mao usab kana ang inyong maani. Mao kini ang gitawag og balaod sa pag-ani.)
Sa unsang paagi ang balaod sa pag-ani may kalabutan sa mga pagdesisyon nga atong gihimo?
Dapita ang mga estudyante sa pagbasa og hilum sa Mga Taga-Galacia 6:9–10. Hangyoa sila sa pagpangita kon nganong gitudlo ni Pablo ang balaod sa pag-ani.
Ngano kaha nga gitudlo man ni Pablo ang balaod sa pag-ani human niya gidapit ang mga Taga-Galacia sa pagtinabangay nga magpabilin o mobalik sa dalan sa ebanghelyo?
Unsa nga baruganan ang atong makat-unan gikan niining mga bersikulo mahitungod sa pagtabang sa uban kinsa wala makatagamtam sa mga panalangin sa ebanghelyo? (Ang mga estudyante mahimong mogamit og lain-laing mga pulong apan kinahanglang mahibalo sa baruganan nga susama sa mosunod: Kon magkugi kita sa maayo nga buhat, atong maani ang mga panalangin sa atong mga binuhatan.)
Sa unsang paagi nga ang saad nga atong maani sa “nahaigo nga panahon” makatabang nato nga dili “magakaluya” (bersikulo 9), o mohunong na lang, sa atong paningkamot nga makaserbisyo sa uban ug magsunod sa ebanghelyo sa kaugalingon natong kinabuhi?
Kanus-a kamo o ang tawo nga inyong nailhan nagkugi sa maayo nga buhat bisan og ang mga panalangin wala dayon moabut? (Mahimo usab nimong ikonsiderar ang pagpakigbahin og usa ka kasinatian.)
I-summarize ang Mga Taga-Galacia 6:11–18 pinaagi sa pagpasabut nga gitapos ni Pablo ang iyang sulat ngadto sa mga Santos sa Galacia pinaagi sa pagbalik-balik og sulti nga ang kalinaw ug kalooy ni Jesukristo maanaa sa tanan nga mamahimong bag-o nga mga nilalang pinaagi sa hugot nga pagtuo sa Iyang ngalan.
Awhaga ang mga estudyante nga “dili managkataka [managkaluya] sa pagbuhat ug maayo” (bersikulo 9) ug sa mainampuong pagkonsiderar kon si kinsa ang ilang matabangan aron makabalik sa dalan sa Ginoo. Dapita sila nga magmakugihon sa pagsunod sa mga impresyon nga ilang nadawat gikan sa Espiritu Santo.
Aron matabangan ang mga estudyante nga mamemorya ang Mga Taga-Galacia 5:22–23, dapita ang klase sa pag-recite niini usa ka pulong sa matag estudyante sa usa ka higayon. Sama pananglit, ang unang estudyante moingon “apan,” ug ang ikaduhang estudyante moingon “ang,” ang ikatulong estudyante moingon nga “bunga,” ug ipadayon hangtud mahuman ang duha ka bersikulo. Orasi ang klase, ug pasulaya sila og kadaghan aron makab-ot ang gi-target nga oras. Samtang gibalik-balik ninyo kini nga kalihokan, ikonsiderar nga magpuli og dapit ang mga estudyante aron lahi na sab nga pulong ang ilang isulti. Mahimo sab nimong isugyot nga praktison sa mga estudyante sulod sa pipila ka adlaw inig sugod sa klase aron mas magkapas-pas sila. Human mabati sa mga estudyante ang gibalik-balik nga kasulatan, dapita sila nga sulayan kini sa pag-recite ngadto sa ilang katapad.
Komentaryo ug Background nga Impormasyon
Mga Taga-Galacia 5:24. “Nanaglansang sa ilang unod diha sa krus dala ang mga pangibug ug mga tinguha niini”
Ang mga pagtulun-an ni Pablo nga “ang mga iya ni Kristo nanaglansang sa unod dala ang mga pangibug ug mga tinguha niini” wala magpasabut nga kadtong mosunod ni Kristo dili na makasinati og tintasyon. Hinoon, nagpasabut kini nga makakat-on sila sa pagbuntog sa ilang mga tintasyon.