Ang pasiuna sa Sulat ni Apostol Pablo Kang Filemon

Ang Sulat ni Filemon naglangkob sa personal nga tambag gikan ni Pablo kalabut sa sitwasyon ni Onesimo nga ulipon ni Filemon. Samtang ang mga estudyante nagtuon niini nga sulat, ilang makat-unan nga kon ang mga tawo mopasakop sa Simbahan ni Jesukristo, mamahimo silang mga managsoon sa ebanghelyo (tan-awa sa Filemon 1:16). Mobati usab ang mga estudyante sa kaimportante sa katungdanan sa mga disipulo ni Jesukristo sa paghatag og kalooy ug pasaylo ngadto sa uban (tan-awa sa Filemon 1:16–17).

Si Pablo ang mihimo niini nga Sulat ngadto ni Filemon (tan-awa sa Filemon 1:1).

Ang Sulat ni Filemon giandam ni Pablo atol sa unang pagkabilanggo sa Apostol sa Roma, mga A.D. 60–62 (tan-awa sa Filemon 1:1, 9; Giya ngadto sa mga Kasulatan, “Epistola ni Pablo, Mga,” scriptures.lds.org).

“Kini mao ang kinaugalingon nga sulat mahitungod ni Onesimo, ang ulipon kinsa nangawat sa iyang agalon, nga si Filemon, ug milayas ngadto sa Roma” (Giya ngadto sa mga Kasulatan, “Epistola ni Pablo, Mga”). Si Filemon tingali usa ka kinabig nga Gresyanhon ug nagpuyo sa Colosas (tan-awa sa Mga Taga-Colosas 4:9). Gitugot niya nga ang kongregasyon sa Simbahan nga mag-abut sa iyang balay (tan-awa sa Filemon 1:2, 5). Human milayas, si Onesimo mipasakop sa Simbahan ug nahimong “minahal nga igsoon … diha sa Ginoo” (Filemon 1:16; tan-awa sa Filemon 1:10–12).

Gisulatan ni Pablo si Filemon aron awhagon siya nga dawaton og balik si Onesimo isip igsoon sa ebanghelyo nga dili pahamtangan og grabing silot nga kasagaran ipahamtang sa molayas nga ulipon (tan-awa sa Filemon 1:17). Gani mitanyag si Pablo nga bayaran ang bisan unsang nahilabtan ni Onisemo nga gisagubang ni Filemon (tan-awa sa Filemon 1:18–19).

Ang Filemon maoy kinamub-an ug tingali pinaka-personal sa mga sulat ni Pablo. Sulat kini nga gipadala ngadto sa pribadong tawo; sa ingon, wala kini maglangkob og daghang doctrinal nga sulod. Bisan pa, ang pangaliyupo ni Pablo nga si Filemon makig-uli sa ulipon nga si Onesimo naghulagway kon sa unsang paagi ang mga doktrina sa ebanghelyo ma-apply sa inadlawng pagpakabuhi—niini nga sitwasyon, nagpakita nga ang atong relasyon uban ni Jesukristo nagdala kanato sa relasyon kalabut sa pamilya uban sa tanang sumusunod ni Kristo ug naghatag og importansya sa kaimportante sa kalooy ug pagpasaylo.

Filemon 1 si Pablo midayeg ni Filemon tungod sa gugma nga iyang gipakita ngadto sa mga Santos. Gisultihan ni Pablo si Filemon nga ang milayas niya nga ulipon, si Onesimo nakabig sa ebanghelyo. Gihangyo ni Pablo si Filemon nga dawaton og balik si Onisemo isip usa ka igsoon diha sa Ginoo. Mitanyag si Pablo nga bayaran si Filemon sa bisan unsang nahilabtan ni Onisemo nga iyang gisagubang.