Pasiuna sa Sulat ni Pablo ngadto sa mga Taga-Colosas

Si Pablo misulat niini nga Epistola ngadto sa mga taga-Colosas tungod sa usa ka taho nga ang mga Santos sa Colosas nahulog ngadto sa mabug-at nga kasaypanan (tan-awa sa Giya ngadto sa mga Kasulatan, “Epistola ni Pablo, Mga”). Ang sayop nga mga pagtulun-an ug mga buhat sa Colosas nakaimpluwensya sa mga Santos didto ug naghulga sa ilang tinuohan. Ang susama nga mga pagpamugos sa kultura nahimong hagit sa mga miyembro sa Simbahan karon. Ang porsyon sa kabililhon niini nga sulat nag-agad kon giunsa sa pag-ila ug pag-expose ang pagkasayop niini samtang naghatag og importansya sa kabalaan ni Jesukristo ug sa mga buhat sa kaluwasan. Pinaagi sa pagtuon sa basahon sa mga Taga-Colosas, mapalawman sa mga estudyante ang ilang pagkakabig ngadto sa Manluluwas ug pagdawat og proteksyon gikan sa pagpanglingla ug sa sala.

Ang Sulat ngadto sa mga Taga-Colosas gipadala ni Pablo ug Timoteo (tan-awa sa Mga Taga-Colosas 1:1, 23; 4:18). Ingon og makita nga gikinamot ni Pablo ang pagsulat sa kaugalingon niyang pagtimbaya sa katapusan sa sulat (tan-awa sa Mga Taga-Colosas 4:18), nagpasabut nga ang tigsulat, tingali si Timoteo, mitabang niya sa paghimo sa sulat.

Si Pablo mihimo niini nga sulat samtang siya didto sa bilanggoan sa unang higayon sa Roma, mga A.D. 60–62 (tan-awa sa Giya ngadto sa mga Kasulatan, “Epistola ni Pablo, Mga,” scriptures.lds.org). Malagmit nga gihimo ni Pablo kini nga Sulat ngadto sa mga Taga-Colosas sa samang panahon nga gisulat niya ang Mga Taga-Filipos, Mga Taga-Efeso, ug Filemon.

Kini nga epistola gisulat para sa matinud-anong mga Santos sa Colosas, usa ka dapit sa modernong kapanahunan sa Turkey. Gisugo ni Pablo ang mga Santos sa Colosas nga ipakigbahin ang sulat ngadto sa mga miyembro sa Simbahan sa kasikbit nga Laodicea (tan-awa sa Mga Taga-Colosas 4:16).

Gihimo ni Pablo kini nga sulat “human siya bisitahi ni Epafras, ang ministro sa Simbahan sa [Colosas] [tan-awa sa Mga Taga-Colosas 1:7–8]. Si Epafras nagsulti ni Pablo nga ang mga Taga-Colosas nahulog ngadto sa bug-at nga mga kasaypanan—nagtuo sila nga mas maayo sila kay sa ubang tawo kay mainampingon nilang gisunod ang piho nga dayag nga mga ordinansa [tan-awa sa Mga Taga-Colosas 2:16], gidid-an ang ilang mga kaugalingon sa piho nga mga panginahanglang pisikal, ug sa pagsimba og mga anghel [tan-awa sa Mga Taga-Colosas 2:18]. Kini nga mga binuhatan naghimo sa mga Taga-Colosas sa pagbati nga sila nahimong balaan. Gibati sab nila nga ila nang nasabtan ang mga misteryo sa kalibutan kay sa ubang mga miyembro sa Simbahan. Sa iyang sulat, gikorihian sila ni Pablo pinaagi sa pagtudlo nga ang katubsanan moabut lamang pinaagi ni Jesukristo ug kita kinahanglang magmaalamon ug moserbisyo Kaniya” (Guide to the Scriptures, “Colossians, Epistle to,” scriptures.lds.org).

Sa Sulat ngadto sa Mga Taga-Colosas, gisupak ni Pablo ang sayop nga mga pagtulun-an sa Colosas pinaagi sa paghatag og importansya sa kabalaan, makaluwas nga misyon ug pagkalabaw ni Jesukristo (tan-awa sa Mga Taga-Colosas 1:15–23). Gitudlo niya nga si Kristo mao ang pinakahulagway sa Dios nga Amahan, ang Tiglalang, ang Pangulo sa Simbahan, ang una nga nabanhaw, ug ang Manunubos. Siya “ang ulo sa tanang pamunoan ug gahum” (Mga Taga-Colosas 2:10), ug Iyang gituman ang balaan Niya nga misyon ubos sa pagdumala sa Amahan (tan-awa sa Mga Taga-Colosas 1:19; 3:1).

Mipasidaan si Pablo batok niadtong mga motudlo nga ang tinuod nga espiritwalidad naangkon pinaagi sa linahi nga mga ritwal, kalingawan, ug sa mga pagkaon (tan-awa sa Mga Taga-Colosas 2:16–18, 20, 23). Hinoon iyang gitudlo nga ang espirituhanong kahingkod ug ang kahibalo sa Dios ikapakita pinaagi sa pagtumong sa atong mga “hunahuna diha sa mga butang nga anaa sa taas” (Mga Taga-Colosas 3:2), nga biyaan ang dili matarung nga mga buhat (tan-awa sa Mga Taga-Colosas 3:5–9), ug pagpalambo og sama kang Kristo nga mga hiyas (tan-awa sa Mga Taga-Colosas 3:12–17). Gitambagan ni Pablo ang iyang mga tigbasa sa “pagpadayon gayud sa pagtuo ug dili matarug” diha sa ebanghelyo (Mga Taga-Colosas 1:23) ingon man usab sa “ pinagamut ug pinatubo diha ni [Jesukristo], ug lig-on diha sa pagtuo ” (Mga Taga-Colosas 2:7).

Mga Taga-Colosas 1:1–23 Gitimbaya ni Pablo ang mga Taga-Colosas ug mipahayag nga si Jesukristo mao ang Manunubos, ang Unang Natawo sa tanang nilalang, ang Tiglalang, ug ang Ginoo sa tanang balaanong kahingpitan, kinsa mao ang mohiusa sa kalibutan. Giawhag ni Pablo ang mga Santos sa Galacia nga palig-unon ang ilang pagtuo diha ni Jesukristo.

Mga Taga-Colosas 1:24–2:23 Mipasidaan si Pablo batok sa pagtuo sa bisan unsang sayop nga pilosopiya o tradisyon sa katawhan, lakip ang pagsimba sa mga anghel ug ang pagdili sa kaugalingong pisikal nga panginahanglan isip matang sa espirituhanong pagdisiplina.

Mga Taga-Colosas 3:1–4:18 Giawhag ni Pablo ang mga Santos nga itumong ang ilang mga kasingkasing sa mga butang nga anaa sa taas, sa pagbiya sa mga sala sa kanhi nilang pagpakabuhi, ug sa pagkamanggiloloy-on sa usag usa. Mihatag siya og instruksyon kon unsaon sa mga Santos sa pagsimba ug dayon mitambag sa mga asawa, bana, mga anak, mga ginikanan, mga sulugoon, ug sa mga agalon. Gitapos niya ang Sulat ngadto sa mga taga Colosas uban sa pagdayeg, pagtimbaya, ug sa katapusang mga instruksyon ug mga panalangin.