Mga Hebreohanon 5–6

Sa dili pa magklase, isulat ang matag usa sa mosunod nga mga ulohan diha sa usa ka lahi nga palid sa papel: Doktor ug Pulis. Dapita ang duha ka estudyante sa pag-adto sa atubangan sa klase, ug hatagi ang matag estudyante og usa sa mga papel. Dayon ipangutana ang mosunod nga mga pangutana:

• Bisan tuod og kini nga mga estudyante nagkupot og mga papel nga nagpakita sa ilang mga titulo, unsa kaha ang inyong mga kabalaka kon si [gamita ang pangalan sa estudyante nga nagkupot sa “Doktor” nga papel] misulay sa pag-opera kaninyo human kamo naaksidente?

• Sa unsang paagi kamo motubag kon si [gamita ang pangalan sa estudyante nga nagkupot sa “Pulis” nga papel] misulay sa paghatag ninyo og multa?

• Ngano kahang dili ninyo buot tugutan kini nga mga estudyante nga mobuhat sa mga tahas nga may kalabutan sa mga titulo nga ilang gidala sa ilang mga kaugalingon? (Kini nga mga estudyante nagkulang sa awtoridad ug abilidad nga mobuhat niadto nga mga tahas.)

Ipasabut nga sa samang paagi nga ang katilingban mi-establisar sa gikinahanglan nga mga kwalipikasyon ug mga pamaagi sa pagbaton og awtoridad aron mobuhat sa pipila ka mga responsibilidad, ang Dios mi-establisar sa gikinahanglan nga mga kwalipikasyon (sama sa pagkamatinud-anon ug katakus) ug mga pamaagi sa pagbaton og awtoridad aron mobuhat sa pipila ka mga responsibilidad diha sa Iyang Simbahan. Dapita ang mga estudyante samtang sila nagtuon sa Mga Hebreohanon 5 nga mangita sa sumbanan nga gi-establisar sa Dios alang sa pagbaton niini nga awtoridad.

Pahinumdumi ang mga estudyante nga, sama sa natala sa Mga Hebreohanon 4:14–16, gihulagway ni Pablo ang Manluluwas nga “dakung labawng sacerdote” (bersikulo 14). Dapita ang usa ka estudyante sa pagbasa og kusog sa Mga Hebreohanon 5:1–3. Hangyoa ang klase sa pagsunod, nga mangita kon unsay gitudlo ni Pablo mahitungod sa tahas sa labawng sacerdote taliwala sa mga Israelite.

• Unsay tahas sa labawng sacerdote taliwala sa mga Israelite?

Ipasabut nga ang katungdanan sa labawng sacerdote nga gihisgutan niini nga mga bersikulo, ubos sa balaod ni Moises, mao ang katungdanan sa pagdumala diha sa Aaronic Priesthood. Si Aaron, ang igsoon nga lalaki ni Moises, mao “ang unang labawng sacerdote sa Aaronic nga kapunongan.” Ang katungdanan usa ka panulundon; human sa panahon ni Aaron, ang labawng sacerdote gipili gikan sa unang natawo sa mga kaliwat ni Aaron ug iyang mga anak nga lalaki. Kasagaran ang labawng sacerdote nag-alagad alang sa nahibilin sa iyang kinabuhi, apan sa katapusan kini nga katungdanan gikontrolar sa dautan nga mga tawo. “Ang mga labawng sacerdote gitudlo ug gipapahawa sumala sa mga tinguha ni Herod ug sa ubang mga Romano sa ilang posisyon sa dili angay nga paagi. Ang katungdanan gihuptan sa 28 ka lain-laing mga lalaki tali sa 37 B.C. ug A.D. 68” (Bible Dictionary, “High priest”).

Dapita ang usa ka estudyante sa pagbasa og kusog sa Mga Hebreohanon 5:4. Hangyoa ang klase sa pagsunod, nga mangita sa unsang paagi gipili ang labawng sacerdote.

• Sa unsang paagi gipili ang labawng sacerdote?

Aron matabangan ang mga estudyante nga makasabut sa unsang paagi si Aaron “tinawag sa Dios” (bersikulo 4), dapita ang usa ka estudyante sa pagbasa og kusog sa Exodo 28:1. Sa dili pa mobasa ang estudyante niini nga bersikulo, ipasabut nga kining komunikasyon nahitabo tali sa Dios ug ni Moises didto sa Bukid sa Sinai.

• Giunsa si Aaron pagtawag sa Dios nga ma-ordinahan sa priesthood?

• Nganong mahinungdanon man nga mihatag ang Ginoo niini nga panudlo ngadto ni Moises imbis nga sa laing tawo? (Si Moises mao ang propeta ug busa gitugyanan nga modawat og samang pagpadayag ug nga modumala sa paggamit sa priesthood diha sa kalibutan.)

• Unsay gikinahanglang mahitabo aron ang usa ka tawo ma-orden ngadto sa priesthood? (Ang mga estudyante mahimong mogamit og lain-laing mga pulong, apan siguroha nga mahibalo sila sa mosunod nga kamatuoran: Kadtong kinsa gi-ordinahan ngadto sa priesthood kinahanglang gitawag sa Dios pinaagi sa pagpadayag pinaagi sa Iyang awtorisado nga mga sulugoon. Mahimo nimong ipasabut nga sa Simbahan karon, ang mga awtorisado nga mga lider sa priesthood mo-interbyu sa matag kandidato sa pag-orden ug motinguha sa paggiya sa Espiritu Santo aron sa pag-ila sa kaandam ug katakus sa usa ka kandidato nga ma-ordinahan ngadto sa priesthood. Tan-awa usab sa Juan 15:16.)

• Unsay kalabutan niini nga kamatuoran sa proseso sa pagtawag og mga tawo nga moserbisyo diha sa mga posisyon sa Simbahan?

Dapita ang usa ka estudyante sa pagbasa og kusog sa ika-lima nga artikulo sa hugot nga pagtuo. Hangyoa ang klase sa pagsunod, nga mangita sa unsang paagi ang kamatuoran nga ilang nahibaloan diha sa Mga Hebreohanon 5:4 nga makita diha sa ika-lima nga artikulo sa hugot nga pagtuo. Ipasabut nga ang panagna nagpasabut nga pagpadayag.

• Sumala niini nga artikulo sa hugot nga pagtuo, unsa pay laing kinahanglang mahitabo aron mahimong awtorisado ang usa ka tawo “sa pagsangyaw sa Ebanghelyo ug sa pagpangalagad sa mga ordinansa niini”?

Imahe

Moses Gives Aaron the Priesthood

I-display ang litrato nga Moises Mihatag ni Aaron sa Priesthood (Libro sa mga Hulagway sa Ebanghelyo [2009], nu. 15; tan-awa usab sa LDS.org). Ipasabut nga ang Daan ug Bag-ong Tugon nagtala nga ang mga propeta, mga tighupot sa priesthood, ug mga magtutudlo sa ebanghelyo midawat sa ilang mga calling pinaagi sa pagpandong sa mga kamot sa usa ka awtorisado nga priesthood holder (tan-awa sa Numeros 27:18–23; Mga Buhat 6:6; 13:2–3; 1 Timoteo 4:14).

• Sa unsang paagi ang proseso sa pagtawag og mga tawo ngadto sa mga posisyon diha sa Simbahan karon nagpadayag sa sumbanan nga gi-establisar diha sa mga kasulatan?

• Nganong mahinungdanon mang masayran nga ang awtoridad sa priesthood madawat pinaagi lamang niini nga paagi?

Dapita ang usa ka estudyante sa pagbasa og kusog sa Mga Hebreohanon 5:5–6. Hangyoa ang klase sa pagsunod, nga mangita kon kinsay mihatag sa Manluluwas sa Iyang awtoridad. Ipasabut nga ang bersikulo 5 nagkutlo sa Mga Salmo 2:7 ug nga ang bersikulo 6 nagkutlo sa Mga Salmo 110:4.

• Kinsay mihatag sa awtoridad sa Manluluwas? (Ang Langitnong Amahan.)

• Unsa nga priesthood ang gihuptan ni Jesukristo? (Ang Melchizedek Priesthood. Ipasabut nga sa sinugdan kini nga priesthood ginganlan sa pangalan sa Manluluwas [tan-awa sa D&P 107:2–4].)

Dapita ang usa ka estudyante sa pagbasa og kusog sa Mga Hebreohanon 5:7–10. Hangyoa ang klase sa pagsunod, nga mangita kon nahimong unsa si Jesukristo. Ipasabut nga ang Mga Hebreohanon 5:7–8 nagtudlo ngadto kang Melchizedek, usa ka propeta ug hari kinsa nagpuyo sa panahon ni Abraham. Bisan pa niana, tungod kay si Melchizedek usa ka simbolo ni Jesukristo, kini nga mga bersikulo kalabut usab sa Manluluwas (tan-awa sa Bruce R. McConkie, Doctrinal New Testament Commentary, 3 vols. [1965–73], 3:157).

• Sumala sa Mga Hebreohanon 5:9, nahimong unsa ang Manluluwas?

• Sa unsang paagi si Jesukristo “tuboran sa dayong kaluwasan” ngadto sa tanan kinsa mosunod Kaniya?

I-summarize ang Mga Hebreohanon 5:11–14 pinaagi sa pagpasabut nga mipahayag si Pablo og tinguha sa pagtudlo og dugang pa mahitungod niini nga hilisgutan apan miingon nga ang mga katawhan nagkulang sa espirituhanon nga pagsabut ug kahingkod sa pagsabut sa mas lawom nga mga pagtulun-an.

• Unsay mga ehemplo sa mga panalangin nga gisaad sa Dios ngadto sa Iyang mga anak? (Ang posible nga mga tubag maglakip sa kalinaw, kalipay, kapasayloan, mga tubag sa pag-ampo, mga panalangin nga lakip sa mga patriyarkal nga panalangin, pagkabanhaw, ug kinabuhing dayon. Ipasabut nga ang pipila ka mga panalangin nagdepende sa atong mga pagpili.)

• Unsay mga ehemplo sa mga kahimtang diin tingali kita maghunahuna kon madawat ba gayud nato ang usa ka gisaad nga panalangin?

Hangyoa ang mga estudyante sa pagsulat sa ilang mga scripture study journal o sa usa ka piraso nga papel og usa ka gisaad nga panalangin nga ilang gidahum nga madawat. Dapita sila nga mangita sa mga kamatuoran diha sa Mga Hebreohanon 6 nga makatabang nila nga makadawat og mga panalangin nga gisaad sa Dios.

Dapita ang usa ka estudyante sa pagbasa og kusog sa Mga Hebreohanon 6:1–3. Hangyoa ang klase sa pagsunod, nga mangita kon unsay gitudlo ni Pablo nga paninguhaon sa mga Santos. Ipasabut nga sa Hubad ni Joseph Smith, ang Mga Hebreohanon 6:1 (diha sa Giya ngadto sa mga Kasulatan ) nagpahayag, “Busa sa walay pagbiya sa mga baruganan sa doktrina ni Kristo” (italics gidugang) ug nga ang Hubad ni Joseph Smith, Mga Hebreohanon 6:3 (diha sa Giya ngadto sa mga Kasulatan) nagpahayag, “Ug kita moadto ngadto sa kahingpitan kon ang Dios motugot.”

• Sumala sa bersikulo 1, unsay gitudlo ni Pablo nga paninguhaon sa mga Santos? (Ipasabut nga ang kahingpitan nagpasabut sa kahimtang nga “sangkap, tibuok, o bug-os nga paglambo. … Ang tinuod nga mga sumusunod ni Kristo mahimo nga hingpit pinaagi sa grasya ug Pag-ula” [Giya ngadto sa mga Kasulatan, “Hingpit,” scriptures.lds.org].)

• Unsa nga mga doktrina nga gihisgutan niini nga mga bersikulo ang naghulma sa pundasyon nga atong angay tukuran samtang naninguha kita padulong sa kahingpitan?

I-summarize ang Mga Hebreohanon 6:4–8 pinaagi sa pagpasabut nga gihulagway ni Pablo kadtong kinsa mga anak sa kapildihan, kinsa dunay hingpit nga kahibalo sa Dios ug dayon mobiya gikan niini nga kamatuoran, mosupak batok sa Manluluwas, ug modumili sa paghinulsol (tan-awa usab sa D&P 29:44–45; 76:31–38). Mitandi si Pablo niini nga mga indibidwal ngadto sa matinud-anon nga mga Santos nga maoy iyang gipakigsultihan niini nga sulat.

Dapita ang mga estudyante sa pagbasa sa Mga Hebreohanon 6:9–10 sa hilum nga paagi, nga mangita kon unsay gidayeg ni Pablo sa Hebreohanon nga mga Santos. Hangyoa ang mga estudyante nga moreport sa ilang nakit-an.

Dapita ang pipila ka mga estudyante nga magpuli-puli sa pagbasa og kusog sa Mga Hebreohanon 6:11–15. Hangyoa ang klase sa pagsunod, nga mangita kon unsay gitinguha ni Pablo sa mga Santos.

• Unsay gitinguha ni Pablo sa mga Santos?

Ipasabut nga ang mga pulong “magapadayag sa samang pagkamasingkamoton sa pagkab-ot sa hingpit nga pagsalig sa paglaum” (bersikulo 11) nagpasabut sa pagkamakuhigon hangtod madawat nato ang gisaad nga mga panalangin sa Dios.

• Sa unsang paagi si Abraham usa ka ehemplo sa pagkamakugihon, hugot nga pagtuo, ug pagpailub sa pagtinguha sa gisaad nga mga panalangin sa Dios?

• Unsa nga baruganan ang atong makat-unan mahitungod sa unsay kinahanglan natong buhaton aron mapanunod ang mga panalangin nga gisaad sa Dios? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga baruganan: Pinaagi sa kakugi hangtud sa katapusan, hugot nga pagtuo diha kang Jesukristo, ug pailub, makapanunod kita sa mga panalangin nga gisaad sa Dios. Isulat sa pisara kini nga baruganan.)

Badlisi ang mga pulong kakugi, hugot nga pagtuo, ug pailub diha sa pisara. Hangyoa ang mga estudyante nga isaysay kini nga mga pulong diha sa ilang mga class notebook o mga scripture study journal. Human sa igong panahon, dapita ang pipila ka mga estudyante sa pagreport sa unsay ilang gisulat.

• Unsay mahimong mahagiton mahitungod sa pagpakita niini nga mga kinaiya?

• Ngano kahang kinahanglan nato kini nga mga kinaiya aron “manag-uswag ngadto sa pagkahamtong”? (Mga Hebreohanon 6:1).

• Kanus-a kamo nakadawat og usa ka gisaad nga panalangin pinaagi sa kakugi, hugot nga pagtuo kang Jesukristo, ug pailub?

Dapita ang usa ka estudyante sa pagbasa og kusog sa Mga Hebreohanon 6:16–20. Hangyoa ang klase sa pagsunod, nga mangita kon unsay gitudlo ni Pablo mahitungod sa paglaum ug sa mga saad sa Dios. Tingali kinahanglan nimong ipasabut nga ang walay pagkausab (bersikulo 18) nagpasabut nga dili mausab.

• Unsa nga kamatuoran ang atong makat-unan gikan sa mga pagtulun-an ni Pablo mahitungod sa paglaum? (Ang mga estudyante mahimong mogamit og lain-laing mga pulong, apan siguroha nga mahibaloan nila ang mosunod nga kamatuoran: Ang atong paglaum sa mga saad sa Dios maoy usa ka espirituhanon nga angkla alang sa atong mga kalag. Isulat sa pisara kini nga kamatuoran.)

Ipasabut nga sama sa paggamit diha sa mga kasulatan, ang paglaum nagpasabut nga “ang masaligon nga pagpaabut sa ug paghandom alang sa gisaad nga mga panalangin sa pagkamatarung” (Giya ngadto sa mga Kasulatan, “Paglaum,” scriptures.lds.org).

• Base sa mga pagtulun-an ni Pablo mahitungod sa Dios diha sa bersikulo 17–18, nganong mahimo man kitang adunay pagsalig sa mga saad sa Dios?

• Sa unsang paagi ang atong paglaum diha sa mga saad sa Dios makatabang nato nga magmakugihon ug mapailubon ug adunay hugot nga pagtuo, ilabi na kon makasinati kita og mga hagit?

Imahe

drawing, anchor

Dapita ang usa ka estudyante sa pagdrowing og litrato sa usa ka angkla diha sa pisara.

• Unsay mahimo sa usa ka angkla alang sa usa ka sakayan?

• Sa unsang paagi ang inyong paglaum sa mga saad sa Dios nahimong usa ka espirituhanon nga angkla alang kaninyo?

Dapita ang mga estudyante sa pagsulat og usa ka tumong nga mas hingpit nga palambuon ang kakugi, hugot nga pagtuo, pailub, ug paglaum. Mahimo nimo silang awhagon sa pagsugod pinaagi sa pagsulat og plano alang sa pagpalambo sa usa niini nga mga kinaiya ug dayon sa pagtutok sa pagpalambo sa lain napud. Awhaga ang mga estudyante nga i-apply unsay ilang gisulat.