Mga Buhat 4–5

Hangyoa ang mga estudyante sa pagpamalandong kon unsay ilang buhaton sa mosunod nga mga sitwasyon:

1. Usa ka higala nagsulat og dili tinuod mahitungod sa Simbahan diha sa social media.

2. Usa ka coach nag-iskedyul og dula nga nagkinahanglan sa imong team sa pagdula og Dominggo.

3. Ang imong mga higala nangayo sa imong opinyon mahitungod sa social isyu nga sa kadaghanan popular ug gisuportahan apan supak sa mga pagtulun-an sa Simbahan.

Human sa igo nga panahon, pangutana:

• Unsa ang pipila sa ubang mga sitwasyon diin kita tingali nagkinahanglang mopakigbahin o modepensa sa atong tinuohan?

• Unsa ang makahagit mahitungod sa pagpakigbahin o pagdepensa sa atong tinuohan?

Dapita ang mga estudyante sa pagpangita og mga kamatuoran samtang sila nagtuon sa Mga Buhat 4–5 nga makagiya kanila niining mga matang sa mga sitwasyon.

Dapita ang mga estudyante sa pag-summarize kon unsay ilang nahinumduman mahitungod sa mga panghitabo ug mga pagtulun-an nga narekord diha sa Mga Buhat 3. Kon gikinahanglan, pahinumdumi sila nga human ayoha ang bakol nga lalaki, si Pedro ug si Juan mitudlo og usa ka grupo sa mga tawo kinsa nagpundok libut kanila diha sa templo.

Dapita ang usa ka estudyante sa pagbasa og kusog sa Mga Buhat 4:1–4. Hangyoa ang klase sa pagsunod, mangita sa unsay nahitabo ni Pedro ug ni Juan samtang ilang gitudloan ang mga tawo diha sa templo.

• Unsay nahitabo ni Pedro ug ni Juan?

I-summarize ang Mga Buhat 4:5–6 pinaagi sa pagpasabut nga si Pedro ug si Juan gidakop ug gidala sa atubangan sa tigdumala nga konseho sa mga Judeo nga gitawag og Sanhedrin (tan-awa sa Ang Giya ngadto sa mga Kasulatan, “Sanhedrin”). Pahinumdumi ang mga estudyante nga daghang mga miyembro sa Sanhedrin nga naapil sa pagpahinabo sa pagdakop ug Paglansang diha sa Krus sa Manluluwas.

Dapita ang usa ka estudyante sa pagbasa og kusog sa Mga Buhat 4:7. Hangyoa ang klase sa pagsunod, mangita sa pangutana nga gipangutana sa mga lider nga Judeo ni Pedro ug ni Juan.

• Unsay gipangutana sa mga lider nga Judeo ni Pedro ug ni Juan?

• Unsay mahitabo ni Pedro ug ni Juan kon sila nagpaila nga mga sumusunod sila ni Jesukristo?

Dapita ang daghang mga estudyante sa pagpuli-pulig basa og kusog gikan sa Mga Buhat 4:8–21. Dapita ang mga estudyante sa pagpangita sa unsay gipahayag ni Pedro ngadto sa konseho.

• Sumala sa Mga Buhat 4:10–12, unsa nga mga kamatuoran ang gitudlo ni Pedro sa konseho? (Ang mga estudyante mahimong moila og daghang mga kamatuoran, apan siguroha sa paghatag og gibug-aton nga ang pangalan ni Jesukristo mao lamang ang pangalan diin kita makadawat og kaluwasan.)

• Sumala sa bersikulo 13, ngano nga ang konseho nahibulong diha ni Pedro ug ni Juan?

Dapita ang mga estudyante sa pagribyu sa Mga Buhat 4:8 sa hilum, mangita sa unsay mi-impluwensya ni Pedro ug mitabang kaniya sa pagsulti nga walay kahadlok ngadto sa konseho.

• Sa inyong hunahuna sa unsa nga paagi nga ang pagkapuno og Espiritu Santo mi-impluwensya sa abilidad ni Pedro sa pagtudlo sa ebanghelyo nga walay kahadlok?

• Unsa nga baruganan ang atong makat-unan gikan sa ehemplo ni Pedro ingon nga narekord diha sa mga bersikulo 8 ug 13? (Ang mga estudyante mahimong mogamit sa ilang kaugalingong mga pulong, apan siguroa nga ilang mailhan ang mosunod nga baruganan: Kon kita napuno sa Espiritu Santo, makapaambit kita sa ebanghelyo sa walay kahadlok.)

Dapita ang mga estudyante sa pagpangita og dugang nga mga paghulagway niini nga baruganan samtang nagpadayon sila sa pagtuon sa Mga Buhat 4–5.

• Sumala sa bersikulo 18, unsa nga sugo ang gihatag sa konseho ngadto ni Pedro ug ni Juan?

• Sumala sa mga bersikulo 19–20, sa unsa nga paagi si Pedro ug si Juan mitubag ngadto sa sugo sa konseho?

I-summarize ang Mga Buhat 4:23–28 pinaagi sa pagpasabut nga human gibuhian si Pedro ug si Juan, sila nagpundok kauban sa ubang mga tumutuo ug nag-ampo uban kanila.

Dapita ang usa ka estudyante sa pagbasa og kusog sa Mga Buhat 4:29–30 ug hangyoa ang klase sa pagpangita kon unsa ang gipangayo sa mga tumutuo sa Dios.

• Unsa ang gipangayo sa mga tumutuo sa Dios?

Dapita ang usa ka estudyante sa pagbasa og kusog sa Mga Buhat 4:31, ug hangyoa ang klase sa pagsunod ug sa pagpangita kon unsa ang nahitabo human sa ilang pag-ampo.

• Unsay nahitabo human sa ilang pag-ampo?

• Base niini nga mga bersikulo, unsay atong buhaton sa pagdapit sa Espiritu Santo nga motabang kanato sa pagsulti sa mga pulong sa Dios nga walay kahadlok?

Dangup ngadto sa pipila ka mga sitwasyon nga gihisgutan sa sinugdanan niini nga leksyon.

• Sa unsa nga mga paagi kita mahimong walay kahadlok sa pagpakigbahin sa ebanghelyo sa mga sitwasyon nga sama niini?

• Sa unsa nga paagi kita sa walay kahadlok makigbahin ug makapanalipod sa ebanghelyo ngadto sa uban samtang matinahuron ug may pamatasan gihapon?

• Kanus-a ka gitabangan sa Espiritu Santo sa pagsulti sa pulong sa Dios nga walay kahadlok?

Hangyoa ang mga estudyante sa pagkonsiderar sa mosunod nga mga sitwasyon:

1. Usa ka pundok sa kabatan-onan nagplano sa paghimo og mga pagbunyag alang sa mga patay didto sa templo. Usa ka miyembro sa grupo nahibalo nga siya nagkinahanglan nga makigkita sa bishop alang sa usa ka rekomen, apan nahibalo usab siya nga nakahimo siya og pipila ka mga sala nga wala ikakumpisal.

2. Usa ka batan-ong lalaki nag-andam alang sa misyon. Nahibalo siya nga ang bishop mangutana mahitungod sa iyang katakus sa pagserbisyo og misyon. Naghunahuna siya og mga paagi sa pagtubag niadto nga mga pangutana nga dili kinahanglan nga sultihan ang bishop mahitungod sa pipila ka mga kasaypanan nga iyang nahimo.

Dapita ang mga estudyante sa pagpangita og baruganan samtang sila nagtuon sa Mga Buhat 4:32–5:11 nga makatabang kanila sa pagsabut sa importansya sa pagmatinuoron ngadto sa mga sulugoon sa Dios.

Dapita ang usa ka estudyante sa pagbasa og kusog sa Mga Buhat 4:32–35. Hangyoa ang klase sa pagsunod, mangita kon unsay gibuhat sa mga miyembro sa Simbahan sa ilang mga kabtangan.

• Unsay gibuhat sa mga miyembro sa Simbahan sa ilang mga kabtangan?

• Sumala sa mga bersikulo 34–35, unsa ang ilang proseso alang sa pagbahin sa ilang mga kabtangan?

Dapita ang usa ka estudyante sa pagbasa og kusog sa Mga Buhat 5:1–2. Hangyoa ang klase sa pagsunod, mangita kon unsay gibuhat sa magtiayong Ananias ug Safira sa salapi nga ilang nadawat gikan sa pagbaligya og yuta.

• Unsay gibuhat ni Ananias ug Safira nga seryoso kaayo?

Dapita ang usa ka estudyante sa pagbasa og kusog sa Mga Buhat 5:3–4, ug hangyoa ang klase sa pagpangita kon unsay gisulti ni Pedro ngadto ni Ananias.

• Sumala sa bersikulo 4, ngadto kang kinsa sa katapusan ang gibakakan ni Ananias?

• Gikan sa tubag ni Pedro, unsa nga baruganan ang atong nakat-unan mahitungod sa pagpamakak ngadto sa mga sulugoon sa Dios? (Ang mga estudyante mahimong mogamit sa ilang kaugalingong mga pulong sa pag-ila sa mosunod nga baruganan: Kon kita mamakak ngadto sa mga sulugoon sa Dios, kini sama nga namakak ngadto Kaniya.)

• Ngano sa inyong hunahuna nga ang pagpamakak ngadto sa mga sulugoon sa Dios sama sa pagpamakak ngadto Kaniya?

Dapita ang pipila ka mga estudyante sa pagpuli-pulig basa og kusog gikan sa Mga Buhat 5:5–11. Hangyoa ang klase sa pagsunod, mangita kon unsay nahitabo ngadto ni Ananias ug Safira isip sangputanan sa paglapas sa ilang pakigsaad ug pagpamakak ngadto ni Pedro.

• Unsay nahitabo ni Ananias ug ni Safira?

• Bisan tuod og kita o kadtong atong nailhan wala makasinati sa ingon ka grabe o diha-diha dayon nga mga sangputanan tungod sa pagpamakak, unsa ang pipila ka mga sangputanan nga mahimong atong masinati kon mamakak kita ngadto sa Ginoo o molapas sa atong mga pakigsaad?

Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley. Hangyoa ang mga estudyante sa pagpaminaw alang sa pipila ka mga sangputanan sa pagpanlimbong:

Imahe

President Gordon B. Hinckley

“Sa atong panahon, kadtong masakpan nga manlimbong dili mamatay sama sa nahitabo kang Ananias ug Safira, apan adunay usa ka butang sa sulod kanila ang mamatay. Ang konsyensya minos ang pagkasensitibo, ang pagkatawo mawad-an og gahum, ang respeto sa kaugalingon mawagtang, ang integridad mamatay” (“We Believe in Being Honest,” Ensign, Okt. 1990, 4).

• Sumala ni Presidente Hinckley, unsa ang pipila ka mga sangputanan sa pagpamakak? Dangup ngadto sa mga sitwasyon gikan sa sinugdanan niini nga seksyon sa leksyon.

• Unsa ang gikinahanglang mahibaloan sa mga indibidwal niini nga mga sitwasyon mahitungod sa unsay mahitabo kanato kon kita mamakak ngadto sa usa ka priesthood lider.

• Unsa nga mga panalangin ang moabut sa pagkamatinuoron ngadto sa mga sulugoon sa Ginoo?

Hangyoa ang mga estudyante sa paghunahuna nga sila nagpuyo sa panahon ni Pedro ug ni Juan ug mga reporter alang sa usa ka pamantalaan. Ipasabut nga sila dapiton sa pagtuon og mga bahin sa Mga Buhat 5:12–32 ug dayon pasulaton og ulohan sa balita nga nagsummarize kon unsa ang nahitabo. (Aron sa paghatag og kinatibuk-ang pagsabut niini nga mga tudling, pahinumdumi ang mga estudyante nga ang Sanhedrin misugo ni Pedro ug ni Juan sa paghunong og sulti diha sa pangalan ni Jesukristo.) Sunda ang mga panudlo nga gihatag sa matag hut-ong sa mga bersikulo.

1. Mga Buhat 5:12–16 (Basaha kini nga tudling isip usa ka klase, ug pagdungan og sulat sa ulohan sa balita.)

2. Mga Buhat 5:17–23 (Hangyoa ang mga estudyante sa pagbasa niini nga tudling nga may kauban ug pagsulat og ulohan sa balita. Dapita ang pipila ka mga paris sa pagpakigbahin sa ilang mga ulohan ngadto sa klase.)

3. Mga Buhat 5:24–32 (Hangyoa ang mga estudyante sa pagbasa og tinagsa-tagsa ug sa pagsulat og ulohan sa balita. Dapita ang pipila ka mga estudyante sa pagpakigbahin sa ilang ulohan sa balita ngadto sa klase.)

Human ang mga estudyante nakigbahin sa ilang mga ulohan sa balita, pangutana:

• Sumala sa bersikulo 29, ngano nga si Pedro ug ang ubang mga Apostoles misulti nga sila kinahanglan nga mopadayon sa pagsangyaw diha sa pangalan ni Jesus bisan pa sa sugo gikan sa konseho?

Isulat ang mosunod nga dili kompleto nga pamahayag diha sa pisara: Kon kita mopili sa pagsunod sa Dios kay sa mga tawo, niana …

• Gikan sa unsay imong nabasa diha sa Mga Buhat 4–5, unsa ang pipila ka mga paagi kita makakompleto niini nga pamahayag? (Human mitubag ang mga estudyante, kompletoha ang pamahayag diha sa pisara ingon sa mosunod: Kon kita mopili sa pagsunod sa Dios kay sa mga tawo, niana Siya magauban kanato.)

• Sa unsang mga paagi ang Dios nag-uban ni Pedro ug sa ubang mga Apostoles samtang sila nagmasulundon Kaniya kay sa konseho? (Ang Dios mipuno kanila sa Espiritu Santo [tan-awa sa Mga Buhat 4:8, 31], nakahimo kanila sa pagbuhat og mga milagro [tan-awa sa Mga Buhat 5:12–16], ug mipadala sa Iyang mga anghel sa pagluwas kanila gikan sa bilanggoan [tan-awa sa Mga Buhat 5:17–20].)

• Kanus-a ka o ang usa ka tawo nga imong kaila mipili sa pagsunod sa Dios kay sa mga tawo? Sa unsa nga paagi ang Dios nagpakita nga Siya nag-uban kanimo o niini nga tawo?

Hangyoa ang pipila ka mga estudyante sa pagpuli-pulig basa og kusog gikan sa Mga Buhat 5:33–42. Dapita ang klase sa pagsunod, mangita alang sa dugang nga mga ehemplo kon sa unsa nga paagi ang Ginoo nag-uban ni Pedro ug sa ubang mga Apostoles.

Ipasabut nga atong nakat-unan diha sa Mga Buhat 5:33 nga ang konseho naninguha sa pagpatay ni Pedro ug ni Juan.

• Sumala sa mga bersikulo 41–42, sa unsa nga paagi ang mga Apostoles mipabilin nga matinud-anon ngadto sa Ginoo atubangan niini nga panghulga? Sa unsa nga paagi ang Ginoo nag-uban kanila niini nga panahon?

• Sa unsa nga paagi nga ang mga kamatuoran nga atong naila niini nga leksyon nagtabang kanato samtang kita nagsunod sa ebanghelyo ug nakigbahin niini ngadto sa naglibut kanato?

Ipaambit ang imong pagpamatuod kabahin sa mga kamatuoran nga gitudlo karong adlawa.