Si Pablo namulong bahin sa mga kabalaka gikan sa mga Santos sa Corinto mahitungod sa paggamit sa mga kapanguhaan sa Simbahan sa pagsangkap sa iyang temporal nga mga panginahanglan. Mipasabut siya nga ang katuyoan sa iyang pagsangyaw mao ang pagdala og kaluwasan ngadto sa mga anak sa Dios. Siya nag-awhag kanila sa paglikay sa pagpakasala ingon man usab sa pagpasakit sa uban sa ilang relihiyuso nga pagtuo.
Si Pablo nagsangyaw sa ebanghelyo aron siya ug ang iyang mga tigpaminaw maluwas
Pagdala og alarm clock ngadto sa klase ug itago kini gikan sa mga estudyante. I-set kini nga motingog pagkahuman nga makasugod naka sa imong pagtudlo.
Sa pagsugod sa leksyon, dapita ang mga estudyante sa paghunahuna kon sa unsa kaha mahisama ang kinabuhing dayon. Dapita sila sa pagsulat diha sa ilang notebook sa klase o scripture study journal kon ngano nga ang kinabuhing dayon maoy usa ka butang nga ilang gitinguha. Mahimo kang modapit og pipila ka estudyante sa pagbasa ngadto sa klase sa unsay ilang gisulat.
Sa hinapos niining kalihokan, kinahanglan motingog na ang alarm clock. Kon mahitabo kana hangyoa ang usa ka estudyante sa pagpangita niini ug ipapalong kini.
Unsay imong gibati sa dihang nakadungog ka sa tingog?
Hangyoa ang mga estudyante sa paghunahuna kon sila ba nakigbisog nga makamata sa tingog sa usa ka alarm clock ug nakapalta og usa ka importanteng butang agig resulta. Dapita ang pipila ka estudyante sa pagpakigbahin.
Ipasabut nga sama sa pagpanlimbasug sa pagbangon inig tingog sa alarm clock mahimong mosangput nga mawad-an kita o gani mapakyas nga makab-ot ang importanting mga butang, ang kapakyas sa “pagbangon” sa kinabuhi ug pag-usab sa piho nga mga kinaiya maoy hinungdan nga kita mapakyas sa pagkab-ot sa labing importanting butang sa tanan, ang kinabuhi nga dayon.
Dapita ang mga estudyante sa pagpangita og baruganan samtang sila magtuon sa 1 Mga Taga-Corinto 9 nga makatabang nilang makahibalo unsaon sa pagpaniguro nga ilang maangkon ang kinabuhing dayon.
Dapita ang usa ka estudyante sa pagbasa og kusog sa mosunod nga summary sa 1 Mga Taga-Corinto 9:1–21:
Si Pablo mitubag sa nagkadaiyang mga pangutana gikan sa mga Santos sa Corinto. Misulat siya nga bisan tuod og siya hingpit nga matagbaw nga inabagan sa temporal nga mga kabalaka sa mga miyembro sa Simbahan, wala siya magsalig niini alang sa iyang mga galastuhan. Si Pablo mipasabut nga pinaagi sa pagpahiangay sa nagkalain-laing mga kahimtang nga wala gikompromiso ang mga sumbanan sa ebanghelyo, nakahimo siya sa pagtabang sa mga Judeo, sa mga Hentil, ug ni bisan kinsa nga huyang pa diha sa ebanghelyo sa pagdawat sa ebanghelyo.
Dapita ang usa ka estudyante sa pagbasa og kusog sa 1 Mga Taga-Corinto 9:17. Hangyoa ang klase sa pagsunod, nga mangita kon giunsa sa pagsangyaw ni Pablo sa ebanghelyo. Mahimo nimong ipasabut nga ang pamahayag nga “ang dispensasyon sa ebanghelyo gisangon ngari kanako” nagpasabut ni Pablo sa iyang pagtuman sa katungod o katungdanan ngadto sa pagsangyaw sa ebanghelyo.
Unsay gibati ni Pablo mahitungod sa ebanghelyo?
Dapita ang usa ka estudyante sa pagbasa og kusog sa 1 Mga Taga-Corinto 9:22–23. Hangyoa ang klase sa pagsunod, nga mangita kon nganong andam si Pablo nga magsangyaw sa ebanghelyo.
Nganong andam kaayo si Pablo nga isangyaw ang ebanghelyo?
Pagdapit og estudyante kinsa regular nga misalmut sa usa ka programa sa pagbansay (tingali sa pagka-musikero o sa pagka-atleta) nga moanha sa atubangan sa klase. Pangutan-a ang estudyante sa mosunod nga mga pangutana:
Unsay ikaparehas sa inyong programa sa pagbansay?
Aduna bay usa ka panahon nga nagpraktis o nagbansay ka alang sa usa ka piho nga duwa o tumong? Sa unsang paagi nga ang pagtrabaho sa usa ka piho nga tumong nakapadasig kanimo?
Pasalamati ang estudyante, ug hangyoa siya sa paglingkod.
Dapita ang usa ka estudyante sa pagbasa og kusog sa 1 Mga Taga-Corinto 9:24–25. Hangyoa ang klase sa pagsunod, nga mangita og sangka sa atleta nga nagamit ni Pablo sa pagtudlo sa mga Santos sa Corinto.
Unsa nga sangka sa atleta ang gipasabut ni Pablo?
Unsa nga mga kalidad o kinaiya ang gisulti ni Pablo nga gikinahanglan sa mga runner aron sila magmalampuson? (Ipasabut nga ang “kamapailubon sa tanang butang” nagpasabut og paggamit sa pagkontrolar sa kaugalingon.)
Unsa nga korona nga dili mahugawan ang gipasabut ni Pablo nga molahutay hangtud sa kahangturan? (Kinabuhing dayon.)
Unsa nga baruganan ang atong makat-unan gikan niining bersikulo 25 kalabut sa unsa gayud ang atong buhaton aron makabaton og kinabuhing dayon? (Ang mga estudyante mahimong mogamit og lain-laing mga pulong, apan siguroha nga ilang mahibaloan ang mosunod nga baruganan: Aron makabaton og kinabuhing dayon, kinahanglan gayud kita makakat-on sa paggamit sa pagkontrolar sa kaugalingon sa tanang mga butang. Isulat kini nga baruganan diha sa pisara. Siguroa nga ang mga estudyante nakasabut usab nga samtang ang pagkontrolar sa kaugalingon gikinahanglan, ang kinabuhing dayon sa katapusan moabut lamang “pinaagi sa mga maayo nga buhat, ug kalooy, ug grasya” ni Jesukristo [2 Nephi 2:8] kay sa pinaagi lang sa mismong pagkontrolar sa kaugalingon.)
Sa inyong hunahuna ngano kaha nga ang pagkontrolar sa kaugalingon gikinahanglan aron maangkon ang kinabuhing dayon?
Hangyoa ang usa ka estudyante sa pagbasa og kusog sa 1 Mga Taga-Corinto 9:26–27. Dapita ang klase sa pagsunod, nga mangita kon sa unsang paagi nga gihulagway ni Pablo ang iyang mga paningkamot sa pagkontrolar sa kaugalingon.
Sumala sa bersikulo°26, sa unsang paagi gihulagway ni Pablo ang iyang mga paningkamot aron maangkon ang kinabuhing dayon? (Masaligon ug walay nausik nga paningkamot.)
Sumala sa bersikulo°27, sa inyong hunahuna unsa kaha ang ipasabut ni Pablo sa dihang siya misulat, “hinonoa ginabun-og ko ang akong lawas ug ginapanton ko kini”?
Aron matabangan ang mga estudyante nga makasabut niining baruganan, dapita ang usa ka estudyante sa pagbasa og kusog sa mosunod nga pamahayag ni Presidente Brigham Young:
Imahe
President Brigham Young
“Dili ninyo mapanunod ang kinabuhing dayon, hangtud nga ang inyong mga kaibug maanaa ubos sa pagdumala sa espiritu nga nagpuyo diha kaninyo, kana nga espiritu nga gihatag kanato sa atong Amahan sa Langit. Buot nakong ipasabut ang Amahan sa inyong mga espiritu, niadtong mga espiritu nga iyang gibutang niini nga mga lawas. Ang mga lawas kinahanglang madala ubos sa hingpit nga pagdumala sa espiritu, o ang inyong mga lawas dili mabayaw sa pag-angkon og kinabuhing dayon. … Pagmakugihon sa pagsiksik, hangtud inyong madala ang tanan ngadto ubos sa balaod ni Kristo. …
“…°Kon ang espiritu motugyan ngadto sa lawas, [ang espiritu] madunot kini; apan kon ang lawas motugyan ngadto sa espiritu [ang lawas] mahimo kini nga putli ug balaan” (Mga Pagtulun-an sa mga Presidente sa Simbahan: Brigham Young [1997], 237–239).
Unsa ang pipila ka mga butang nga atong mahimo sa pagtabang sa atong mga lawas aron motugyan ngadto sa Espiritu?
Si Pablo mipasidaan sa mga Santos sa Corinto sa paglikay sa sala ug pagpasakit sa uban
Dapita ang usa ka estudyante sa pagbasa og kusog sa mosunod nga pamahayag ni Presidente James E. Faust sa Unang Kapangulohan:
Imahe
President James E. Faust
“Usa sa dakong mga sugilanon nga dili tinuod sa kinabuhi mao nga0 kon ang [mga indibidwal] nagtuo nga sila dili malupig. Daghan kaayong naghunahuna nga sila [hinimo] sa asero, lig-on aron makasugakod sa bisan unsang tintasyon. Sila milingla sa ilang mga kaugalingon sa paghunahuna, ‘Kini dili mahitabo kanako’” (“It Can’t Happen to Me,” Ensign, Mayo 2002,°46).
Sa unsa nga mga sitwasyon tingali ang mga tawo motugot sa ilang kaugalingon nga mabantang sa tintasyon, naghunahuna nga sila mga lig-on sa pagbuntog niini? (Ilista ang mga tubag sa mga estudyante sa pisara.)
Ipasabut nga si Pablo nagpasabut ngadto sa mga ehemplo gikan sa mga kasaysayan sa Israelite aron sa pagpasidaan sa mga Santos sa Corinto bahin sa tintasyon ug sala. Dapita ang usa ka estudyante sa pagbasa og kusog sa 1 Mga Taga-Corinto 10:1–5. Dapita ang klase sa pagsunod, mangita alang sa pipila ka mga butang nga nasinati sa mga anak sa Israel sa panahon ni Moises nga nakapahimo unta nila nga may espirituhanong kalig-on.
Unsa man ang pipila ka mga butang nga nasinati sa mga anak sa Israel nga naghimo unta kanila nga malig-on sa espirituhanon nga paagi? (Mahimo nimong ipasabut nga si Pablo miila sa “espirituhanon nga Bato”, o Jehova, nga si Kristo [tan-awa usab Deuteronomio 32: 3–4].)
Sumala sa bersikulo°5, unsa ang gibati sa Dios mahitungod sa kinaiya sa daghang niining karaan nga mga Israelite?
Dapita ang pipila ka estudyante nga magpuli-puli sa pagbasa og kusog gikan sa Lucas 10:6–11. Hangyoa ang klase sa pagsunod, nga mangita kon unsay gitudlo ni Pablo sa mga Santos sa Corinto aron makat-on gikan sa ehemplo sa karaang mga Israelite.
Unsa ang katuyoan ni Pablo alang sa pagpakigbahin sa ehemplo sa mga karaang mga Israelite? (Si Pablo gustong mopasidaan sa mga Santos sa Mga Taga-Corinto aron sila unta makalikay sa pagusab-usab sa mga sala sa karaan nga mga Israelite.)
Sa imong kaugalingong mga pulong, unsaon ninyo sa pag-summarize ang mensahe ni Pablo diha sa bersikulo 12?
Dapita ang klase sa paglingkod. Dapita ang usa ka estudyante sa pagbasa og kusog sa 1 Mga Taga-Corinto 10:13. Hangyoa ang klase sa pagsunod, nga mangita kon unsay gitudlo ni Pablo mahitungod sa tintasyon.
Unsa ang gitudlo ni Pablo mahitungod sa tintasyon?
Kon ang Dios dili motugot kanato nga matintal labaw pa sa atong abilidad sa pagbatok, ngano nga nagpadala man sa tintasyon ang karaang Israelite ?
Isulat ang mosunod nga mga pulong diha sa pisara: Ang Dios moandam og paagi alang kanato sa paglikay sa tintasyon, apan kita kinahanglan gayud…
Dapita ang usa ka estudyante sa pagbasa og kusog sa Mga 1 Taga-Corinto 10:14. Hangyoa ang klase sa pagsunod, nga mangita sa unsay gitudlo ni Pablo nga buhaton sa mga Santos sa Corinto.
Unsa man ang gitambag ni Pablo nga buhaton sa mga Santos?
Unsa ang gitudlo diha sa bersikulo 14 ngari kanato mahitungod sa atong mga katungdanan sa paglikay sa tintasyon? (Human makatubag ang mga estudyante, kompletuha ang kamatuoran diha sa pisara aron mabasa sama niini: Ang Dios moandam og paagi alang kanato sa paglikay sa tintasyon, apan kinahanglan pilion nato nga ibulag ang atong kaugalingon gikan sa tintasyon.)
(Mahimo kamong mosugyot nga ang mga estudyante mosulat sa Alma 13:28 sa ilang mga kasulatan duol sa 1 Mga Taga-Corinto 10:13–14.) Hangyoa ang usa ka estudyante sa pagbasa og kusog sa Alma 13:28. Hangyoa ang klase sa pagsunod, nga mangita kon unsay atong mabuhat aron atong mapahilayo ang atong kaugalingon gikan sa tintasyon.
Sumala sa Alma 13:28, unsay atong mabuhat nga makatabang kanato sa pagpalayo sa atong kaugalingon gikan sa tintasyon?
Sa unsang paagi nga ang pagpaubos sa atong kaugalingon ug pagbantay ug padayon nga pag-ampo makatabang kanato nga mahilayo ang atong kaugalingon gikan sa tintasyon?
Iisa ang usa ka kopya sa booklet sa Alang sa Kalig-on sa mga Kabatan-onan, ug hangyoa ang mga estudyante sa pagpasabut unsaon pagsunod sumala sa sumbanan nga gilista dinhi niining booklet nga makatabang kanato nga mahilayo ang atong mga kaugalingon gikan sa tintasyon.
Ipasabut nga ang mga estudyante mahimong dili kanunayng makalikay sa tintasyon. Tungod niini, kinahanglan modesisyon kita karon kon unsaon nato paglihok atubangan sa tintasyon. Dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball:
Imahe
President Spencer W. Kimball
“Ang husto nga mga desisyon maoy pinakasayon nga himoon kon gipangandaman na natong daan, uban sa pinakamahinungdanong mga tumong sa hunahuna, makapawala kini sa daghang kabalaka sa [panahon sa pagdesisyon], kon kapuyon ug gitintal kita og maayo” …
“Palamboa ang pagdisiplina sa kaugalingon aron dili ka na mag-usab-usab sa desisyon nga imong pagabuhaton kon mag-atubang ikaw sa mao gihapon nga pagtintal. Kinahanglan nga kausa ra ka modesisyon sa usa ka butang! …
“Ang panahon sa pag-undang sa dautang mga buhat mao ang sa wala pa sila magsugod. Ang sekreto sa maayong kinabuhi anaa diha sa pagpanalipod ug pagpugong. Kadtong kinsa misunod sa dautan sa kasagaran mao kadtong mibutang sa ilang mga kaugalingon sa makuyaw nga kahimtang” (Mga Pagtulun-an sa Mga Presidente sa Simbahan: Spencer°W. Kimball [2006], 137, 138).
Ipakigbahin ang imong pagpamatuod sa mga baruganan nga nahibaloan sa mga estudyante karon. Hangyoa ang mga estudyante sa pagkonsiderar kon hain nga mga tintasyon nanlibasug sila pag-ayo. Dapita sila sa pagpamalandong sa mosunod nga mga pangutana:
Unsa nga mga kausaban ang inyong mahimo sa paglikay sa tintasyon sa dili pa gayud kamo mag-atubang niini?
Andam ka ba sa paghimo niining mga kausaban?
Dapita ang mga estudyante sa paghimo og plano nga ilang sundon aron makalikay sa tintasyon. Awhaga sila sa pagtinguha og tabang gikan sa Ginoo pinaagi sa pag-ampo samtang sila maningkamot sa pagtuman sa ilang mga plano.
I-summarize ang 1 Corinthians 10:15–33 pinaagi sa pagpasabut nga si Pablo mitambag sa mga Santos sa Corinto sa pagrespeto sa mga relihiyusong gimbuhaton sa uban nga dili makompromiso ang ilang kaugalingon ug misubli na usab nga siya nagsangyaw aron sa pagtabang sa kadaghanan nga maluwas.
Unsa man ang ipasabut ni Pablo sa dihang siya miingon nga siya “nahimong ingon sa Judeo” aron “pagkabig sa mga Judeo” (1 Mga Taga-Corinto 9:20); nahimo isip usa ka tawo nga dili ubos sa balaod, o usa ka Hentil, sa pag-angkon sa mga Hentil; ug nahimo nga mahuyang aron “makabig ang mga mahuyang”? (1 MgaTaga-Corinto 9:22). Si Elder Bruce R. McConkie sa Korum sa Napulog Duha ka mga Apostoles mihatag niining makatabang nga pagpasabut:
“Dinhi si Pablo nag-ingon nga siya mihimo mismo sa tanan nga mga butang ngadto sa tanan nga mga tawo sa paningkamot aron makuha sila nga modawat sa mensahe sa ebanghelyo; kana mao, siya mipahiangay sa iyang kaugalingon ngadto sa mga kondisyon ug kahimtang sa tanang mga klase sa katawhan, isip usa ka paagi sa pagkuha sa ilang pagtagad ngadto sa iyang mga pagtulun-an ug pagpamatuod. Ug unya, basin pa unya og adunay nagdahum nga kini maglakip sa pagdawat sa ilang sayop nga mga doktrina o mga binuhatan, o nga kini diha sa bisan unsa nga paagi naglakip og kompromiso tali sa ebanghelyo ug sa sayop nga mga sistema sa pagsimba, siya dali nga midugang nga siya ug ang tanang tawo kinahanglan gayud nga motuman sa balaod sa ebanghelyo aron maluwas”(Doctrinal New Testament Commentary, 3 vols. [1965–73], 2:353).
Usahay lisud makita kon nganong ang Ginoo nagmando kanato sa pagpugong sa kaugalingon. Elder Richard G. Scott sa Korum sa Napulog Duha ka mga Apostoles mihatag niining makatabang nga pagpasabut:
“Ang usa ka matarung nga kinabuhi nagkinahanglan og disiplina. Ang pagdisiplina mao kana nga kinaiya nga mohatag kaninyo og kalig-on nga dili moundang sa unsay inyong gusto kaayo sa kinabuhi alang sa usa ka butang nga gusto ninyo karon” (“The Power of Righteousness,” Ensign, Nob. 1998, 69).
Ang makanunayon nga pagpasakop sa atong mga lawas ngadto sa kontrol sa espiritu mao ang usa sa dakong pagsulay sa mortal nga kinabuhi. Si Elder M. Russell Ballard sa Korum sa Napulog Duha ka mga Apostoles mitudlo:
“Sa kinabuhi sa wala pa dinhi sa yuta sa wala pa kita mobiya sa presensya sa Langitnong Amahan, Siya mipasidaan ug mipahimangno kanato mahitungod sa bag-ong mga kasinatian nga atong masinati sa mortalidad. Nasayud kita nga makaangkon kita og pisikal nga lawas nga unod ug bukog. Wala man mahimong mortal kaniadto, wala kitay kasinatian sa pag-atubang sa mga tintasyon sa mortalidad. Apan ang Langitnong Amahan nasayud ug nakasabut. Iya kitang gisugo sa pagkontrolar sa atong mga mortal nga lawas ug sa paghimo niini nga ubos sa paglihok sa atong mga espiritu. Ang atong mga espiritu kinahanglan nga mahimong mahanas sa pisikal nga mga tintasyon nga masinati sa atong mga lawas sa temporal nga kalibutan. Ang espirituhanong gahum nga mas labaw pa kay sa impluwensya ni Satanas moabut kanato pinaagi sa pagsunod sa mga sugo sa Ginoo, nga si Jesukristo” (“Keeping Covenants,” Ensign, Mayo 1993, 6).
Si Presidente James E. Faust sa Unang Kapangulohan mitudlo mahitungod sa panginahanglan alang sa tanan aron makalikay sa tintasyon:
“Daghang nagtuo nga … igo na ang ilang kalig-on aron makasugakod sa bisan unsang tintasyon. Gilingla nila ang ilang mga kaugalingon sa paghunahuna nga, ‘Dili Kini mahitabo ngari kanako.’ … Kini mahimong mahitabo kanato sa bisan unsang panahon. …
“Nakadungog ko og usa ka tawo nga misulti sa iyang mga anak nga lalaki, ‘maka-drayb ko nga mas duol sa may ngilit tungod kay ako adunay daghang kasinatian kay kanimo.’ Nagtuo siya nga siya ang nagkontrolar, apan ang tinuod siya naglimud. ‘Ang problema sa paggamit sa mga kasinatian isip usa ka giya mao nga ang katapusang eksamin kanunayng mag-una ug dayon ang leksyon’ [Tagsulat wala mailhi, gikutlo sa 1,911 Best Things Anybody Ever Said, comp. Robert Byrne (1988), 386]. Ang ubang mga tawo naghunahuna nga ang ilang edad ug kasinatian nakapahimo nilang mas makasugakod sa tintasyon. Kini usa ka panghimakak.
“Akong nahinumduman nga nakadungog ni Presidente J.°Reuben Clark Jr. nga misugilon usa ka higayon dihang ang usa sa iyang mga anak nakig-date. Iyaha silang gihangyo nga mamauli sa hustong oras. ‘Mibati og kapungot nianang higayuna, sa dinalian nga pagpahinumdom, ang [batan-on] miingon, “Papa, naunsa ka man, wala kay salig nako?”
“‘Ang iyang tubag nakapakurat sa batan on sa iyang pag-ingon, “Wala, akong [anak], wala ko mosalig nimo. Wala man gani ko mosalig sa akong kaugalingon”’ [sumala sa gikutlo ni Harold B. Lee, The Teachings of Harold B. Lee, ed. Clyde°J. Williams (1996), 629]” (“It Can’t Happen to Me,” Ensign, Mayo 2002, 46–47).