Mga Kalihokan sa Scripture Mastery

Ang pagmarka sa mga scripture mastery passage makatabang sa mga estudyante sa paghinumdom niini nga mga tudling ug sa pagpangita niini nga mas dali. Ikonsiderar ang pag-awhag sa mga estudyante nga markahan kining importanteng mga tudling sa paagi nga magpalahi niini sa ubang mga tudling nga ilang markahan.

Ang pagsag-ulo sa mga pangalan ug han-ay sa mga basahon diha sa Bag-ong Tugon makatabang sa mga estudyante nga mas daling makit-an ang mga scripture mastery passage. Ang mosunod mao ang pipila sa mga ehemplo sa mga kalihokan nga makatabang sa mga estudyante nga mahimong pamilyar sa mga basahon diha sa Bag-ong Tugon.

• Pagpangita sa Talaan sa mga Sulod—Tabangi ang mga estudyante nga mapamilyar sa talaan sa mga sulod sa Biblia aron matabangan sila sa pagpangita sa mga basahon diin makita ang mga scripture mastery reference.

• Pagkanta og usa ka kanta—Ilisi ang mga pulong sa sinati nga himno o kanta sa primary gamit ang mga ngalan sa mga basahon sa Bag-ong Tugon. Itudlo ang kanta ngadto sa imong mga estudyante (o gamita ang kanta “The Books in the New Testament” [Children’s Songbook, 116–17]). Ipakanta sa mga estudyante kini nga kanta matag karon ug unya sa tibuok tuig aron sa pagtabang nila nga mahinumduman ang mga ngalan ug han-ay sa mga libro sa Bag-ong Tugon.

• Gamita ang Unang mga Letra—Isulat ang unang mga letra sa mga basahon diha sa pisara (M, M, L, J, ug uban pa). Ipapraktis sa mga estudyante ang pagsulti sa mga ngalan sa mga basahon nga motukma sa matag letra. Balik-balika kini nga kalihokan hangtud nga maka-recite sila sa mga pangalan sa mga basahon gikan sa panumduman.

• Book Chase [Paunhanay sa pagpangita sa basahon]—Isulti ang usa sa mga basahon diin nahimutang ang usa ka scripture mastery passage, ug paablihi sa mga estudyante ang ilang mga kasulatan ngadto sa bisan unsa nga pahina niana nga basahon. Orasi kon unsay kadugay nga makit-an sa tibuok klase ang matag usa sa mga basahon. Kini nga kalihokan mahimong balikon aron mahimong mas makamao ang mga estudyante sa paghinumdom ug pagpangita sa mga basahon sa Bag-ong Tugon.

Samtang ang mga estudyante nagkat-on sa mga lokasyon ug unod sa mga scripture mastery passage, ang Espiritu Santo makatabang kanila nga makahinumdom sa mga pakisayran sa kasulatan kon gikinahanglan (tan-awa sa Juan 14:26). Ang importante nga mga pulong, sama sa “igaanak sa tubig ug sa Espiritu” (Juan 3:5) ug “ang bunga sa Espiritu” (Mga Taga-Galacia 5:22–23), makatabang sa mga estudyante sa paghinumdom sa unod ug mga pagtulun-an sa doktrina diha sa matag tudling. Ang mosunod nga mga pamaagi makatabang sa mga estudyante nga makonektar ang mga pakisayran sa scripture mastery ngadto sa ilang unod o importante nga mga pulong. (Mahimong unya na nimo buhaton sa ulahing bahin sa tuig ang mga kalihokan nga maglakip og kompetisyon, lumba, o sukdon ang oras, human ang mga estudyante makapakita nga kahibalo na sila kon asa makit-an ang mga scripture mastery passage. Ang ingon nga mga kalihokan makatabang sa pagpalig-on sa unsay ilang nakat-unan.)

• Mga Pakisayran [References] ug Importanting mga Pulong [Key Words]—Dasiga ang mga estudyante sa pagsag-ulo sa mga pakisayran ug importanteng mga pulong sa matag scripture mastery passage nga gilista diha sa mga scripture mastery card. (Ang mga scripture mastery card mahimong ma-order online sa store.lds.org. Mahimo usab nimong pahimoon ang mga estudyante og kaugalingon nilang mga hugpong sa mga scripture mastery card.) Hatagi ang mga estudyante og panahon sa pagtuon sa mga kard uban sa usa ka pares ug dayon pangutan-on ang usag usa. Awhaga ang mga estudyante nga magmamugnaon sa mga paagi nga dungan silang magtuon ug magpangutan-anay sa usag usa. Samtang mahimo silang mas hanas sa mga scripture mastery passage, mahimo nimo silang dapiton sa paggamit og mga timailhan nga naglakip og kinatibuk-ang kahulugan o paggamit sa mga doktrina ug mga baruganan gikan sa mga tudling. Ang tawo nga gipangutana mahimong motubag pinaagi sa pagsulti o pagsulat.

• Mga Scripture Mastery Card—Kini nga kalihokan mahimong gamiton sa pagpaila o pagribyu og usa ka hugpong sa mga scripture mastery passage. Pagpili og mga scripture mastery card, ug pangandami ang pag-apud-apod niini sa imong mga estudyante. (Siguroha nga duna pay laing mga kopya sa matag kard aron sobra sa usa ka estudyante ang makadawat sa sama gihapon nga scripture mastery passage. Mahimo nga duna kay daghang kard para ang matag estudyante mahatagan nimo og duha o tulo ka managlahi nga mga tudling.) Iapud-apod kini sa klase. Hatagi og panahon ang mga estuyante nga makatuon sa scripture mastery passage, sa reference, sa mga key word, sa pamahayag sa kinatibuk-ang kahulugan, sa doktrina o baruganan, ug sa mga ideya sa paggamit nga naa sa matag kard. Pagsulti og pipila ka timailhan gikan sa mga card (sama pananglit, mga pulong gikan sa scripture mastery passage o mga key word, kinatibuk-ang kahulugan, doktrina o baruganan, o paggamit). Ang mga estudyante nga naggunit sa mao nga kard kinahanglang mobarug ug mosulti og kusog sa reference sa scripture mastery.

• Scripture Chase—Paggamit og mga timailhan aron matabangan ang mga estudyante sa pagpraktis sa paspas nga pagpangita sa mga tudling diha sa ilang mga kasulatan. Alang sa mga timailhan, mahimo kang mogamit og mga keyword [mahinungdanong mga pulong], mga context statement [pamahayag sa kinatubuk-ang kahulugan], mga doktrina ug baruganan, ug mga application ideas gikan sa mga scripture mastery card. Mahimo sab nga maghimo ka og kaugalingon nimong mga timailhan. Ang scripture chase nga mga kalihokan diin maglumba ang mga estudyante og pangita sa mga tudling makatabang nga maaktibo ang ilang pag-apil sa pagkat-on sa mga scripture mastery passage. Kon mogamit ka og scripture chase nga mga kalihokan aron sa pagtabang sa scripture mastery, buhata kini sa paagi nga dili makapasakit og mga pagbati o makasilo sa Espiritu. Tabangi ang mga estudyante nga likayan ang walay pagtahud nga paggamit nila sa mga kasulatan o mosubra ang kompetisyon. Ikonsiderar usab nga i-kompetensya ang mga estudyante sa usa ka sumbanan kay sa usag usa. Sama pananglit, ang mga estudyante mahimong makiglumba sa magtutudlo, o mahimo nimo silang palumbaon aron masuta kon ang piho nga gidaghanon sa klase makakita ba sa partikular nga tudling sa piho nga gidugayon sa oras.

• Story Chase [Paunhanay sa pagpangita sa tudling sa kasulatan basi sa sitwasyon]—Paghatag og mga timailhan pinaagi sa paghimo og mga sitwasyon nga nagpakita sa kamahinungdanon sa mga scripture mastery passage sa matag adlaw nga kinabuhi. Sama pananglit, isip usa ka timailhan alang sa Mateo 28:19–20 o Mga Taga-Filipos 4:13, mahimo kang moingon, “Si Daniel angayan na nga moserbisyo og misyon ug mibati nga iyang katungdanan sa priesthood ang pagbuhat niini, apan nabalaka siya nga wala siyay igong kahibalo aron maayo nga makatudlo sa ebanghelyo. Nabalaka usab siya nga maglisud siya sa pagpakig-istorya sa mga estranghero. Samtang nag-ampo siya alang sa kasiguroan, nakahinumdom siya nga human mabanhaw si Jesukristo, Iyang gisangunan ang Iyang mga Apostoles sa ‘Panglakaw … ug tudloi ang tanang kanasuran’ ug nga ang Ginoo magauban kanila sa kanunay. Si Daniel naghunahuna usab sa mga pulong ni Pablo, ‘Mahimo ko ang tanang butang pinaagi kang Kristo nga nagapalig-on kanako.’” Samtang ang mga estudyante maminaw sa mga sitwasyon, ipapangita kanila ang haum nga mga scripture mastery passage sa ilang mga kasulatan.

• Mga Quiz ug mga Test—Hatagi ang mga estudyante og mga oportunidad nga matestingan ang ilang paghinumdom sa mga scripture mastery passage. Ang mga timailhan maglakip sa mga key word [mahinungdanong mga timailhan] o mga scripture reference, mga kinutlo gikan sa mga tudling sa kasulatan, o mga sitwasyon nga naghulagway sa mga kamatuoran nga gitudlo diha sa mga tudling. Ang mga quiz ug test mahimong idikta, o isulat sa pisara, o sa papel. Human ang mga estudyante makakuha og quiz o test, ikonsiderar ang pagpares sa mga estudyante nga tag-as og score ngadto sa mga estudyante nga ubos og mga score. Ang taas og score nga estudyante mahimong maoy motudlo aron matabangan sa pagtuon ug paglambo ang mas mubo og score nga estudyante. Isip kabahin niini nga paningkamot, ang paresan makahimo usab og tumong nga makakab-ot og mas taas nga hiniusang grado sa sunod nga test. Ikonsiderar ang paghimo og tsart o bulletin board aron mapakita ang mga tumong sa mga estudyante ug makita ang ilang pag-uswag.

Ang pagpasabut sa mga pulong diha sa mga scripture mastery passage (o pagtabang sa mga estudyante sa pagpasabut niini) makatabang sa mga estudyante nga makasabut sa kahulugan sa tibuok tudling. Kon ang ingon nga mga kahulugan mahinungdanon kaayo sa pagsabut sa mga doktrina ug mga baruganan diha sa usa ka tudling, mahimo kang mosugyot nga isulat sa mga estudyante kini nga mga kahulugan diha sa ilang mga kasulatan. Ribyuha ang mga kahulugan sa mga pulong samtang imong giribyu ang mga scripture mastery passage.

Ang pag-ila sa konteksto sa usa ka tudling sa kasulatan makatabang sa mga estudyante nga mas makasabut sa kahulugan sa tudling. Ang konteksto naglakip og impormasyon mahitungod kon si kinsa ang namulong ngadto ni kinsa ug ngano, ang sitwasyon sa tudling (kasaysayan, kultura ug hiyograpika), ug ang pangutana o sitwasyon diin mitumaw ang sulod sa tudling sa kasulatan. Sama pananglit, ang mga pagtulun-an sa Ginoo diha sa Juan 3:5 usa ka bahin sa panagsultihanay tali ni Jesukristo ug sa usa ka makiuyunon nga Pariseo nga ginganlan og Nicodemo kinsa miadto sa Manluluwas sa pagkagabii aron mangutana mahitungod sa Iyang doktrina. Ang Ginoo misulti kang Nicodemo nga gawas kon kita “igaanak pag-usab,” kita “dili makakita sa gingharian sa Dios” (Juan 3:3). Naglibug, si Nicodemo nangutana kon sa unsang paagi ang usa ka tigulang matawo pag-usab. Ang Juan 3:5 naglakip sa tubag sa Ginoo sa pangutana ni Nicodemo. Ang pagkasayud niini nga impormasyon makatabang sa mga estudyante nga mas klarong makasabut kon unsa nga mga pangutana ang gitubag sa Ginoo sa dihang Siya mipahayag nga “gawas kon ang tawo igaanak sa tubig ug sa Espiritu, dili siya makasulod sa gingharian sa Dios.” Samtang magtudlo ka sa mga leksyon nga naglakip sa mga scripture mastery passage, ipasabut og maayo ang konteksto nga naglibut niadto nga mga tudling. Ang dugang nga mga kalihokan sama sa mosunod makatabang usab sa mga estudyante sa pagsabut niining importanting mga tudling:

• Pag-ila sa Konteksto—Isulat ang mosunod nga mga ulohan sa ibabaw sa pisara: Mamumulong, Nanambong, Katuyoan, ug Ubang Makatabang nga mga Ideya. Igrupo-grupo ang mga estudyante, ug pag-assign og usa ka scripture mastery passage sa matag grupo. Dapita sila sa pagdiskobre sa konteksto sa gi-assign kanila nga mga tudling pinaagi sa pag-ila sa impormasyon nga motakdo sa mga ulohan diha sa pisara. Ipasulat sa pisara ang ilang mga nasayran. Dayon hangyoa ang matag grupo sa pagpasabut sa konteksto sa gi-assign kanila nga mga tudling ug sa unsang paagi kini nga impormasyon nakaapekto sa ilang pagsabut sa mga kamatuoran diha sa matag tudling. Aron mahimong mas makapainteres kini nga kalihokan, mahimo nimong hagiton ang klase sa pagtag-an sa mga scripture mastery reference base sa mga paghulagway diha sa pisara sa dili pa mopasabut ang matag grupo sa unsay ilang gisulat.

Ang pag-analisar naglakip sa pag-ila sa mga doktrina ug mga baruganan nga anaa sa mga tudling sa kasulatan. Naglakip usab kini sa pagtabang sa mga estudyante nga makasabut kon sa unsang paagi kini nga mga kamatuoran mapuslanon ngadto kanila. Kini moresulta sa mas lawom nga paggamit sa mga doktrina ug mga baruganan diha sa ilang mga kinabuhi. Ang mosunod nga kalihokan makatabang sa mga estudyante sa pag-analisar sa mga scripture mastery passage:

• Pagsulat og mga Timailhan—Samtang ang mga estudyante nahimong mas pamilyar sa mga scripture mastery passage, dapita sila sa paghimo og mga pangutana, mga sitwasyon, o uban nga mga timailhan nga maghulagway sa mga doktrina ug mga baruganan nga gitudlo sa mga tudling. Magamit kini aron sa pagpangutana sa klase.

Ang paghimo sa mga estudyante nga maoy mopasabut sa mga tudling sa kasulatan makapalawom sa ilang pagsabut ug makapalambo sa ilang abilidad sa pagtudlo sa mga doktrina ug mga baruganan gikan sa mga kasulatan. Ang mosunod mao ang duha ka mga paagi nga makatabang sa mga estudyante nga makat-on sa pagpasabut sa mga scripture mastery passage:

• Importanting mga Pulong [Key Words] ug Hugpong sa Pulong—Dapita ang mga estudyante sa pagbasa sa samang scripture mastery passage sa ilang kaugalingon ug ilhon ang usa ka pulong o hugpong sa mga pulong nga sa ilang hunahuna importante kaayo sa kahulugan sa tudling. Dayon dapita ang usa ka estudyante sa pagbasa sa tudling ngadto sa klase ug hatagan og gibug-aton ang pulong o hugpong sa mga pulong nga iyang gipili. Hangyoa ang estudyante sa pagpasabut nganong kana nga pulong o hugpong sa mga pulong importante sa pagsabut sa tudling. Dapita ang pipila pa ka mga estudyante sa pagbuhat usab sa ingon. Ang mga estudyante mahimong mopili og lain-laing mga pulong o hugpong sa mga pulong alang sa mao gihapon nga tudling. Samtang ang mga sakop sa klase makadungog niining managlahi nga panglantaw, makaangkon sila og mas lawom nga pagsabut sa tudling.

• Pag-andam og usa ka Debosyunal—Hatagi ang mga estudyante og mga oportunidad sa paggamit sa scripture mastery passage samtang mangandam ug mopresentar sila og mga debosyonal sa sinugdanan sa klase. Tabangi sila nga maandam sa pag-summarize sa konteksto, pagpasabut sa mga doktrina ug mga baruganan, pagpakigbahin og makahuluganong mga kasinatian o mga ehemplo, ug pagpamatuod sa mga doktrina ug mga baruganan diha sa mga tudling. Mahimo usab kang mosugyot nga ang mga estudyante mokonsiderar sa paggamit og butang sa pagpasabut sa mga ideya diha sa mga tudling.

Tabangi ang mga estudyante nga makasabut ug makaangkon og espirituhanong saksi sa mga doktrina ug mga baruganan nga gitudlo diha sa mga scripture mastery passage. Si Elder Robert D. Hales sa Korum sa Napulog Duha ka mga Apostoles mipasabut, “Ang tinuod nga magtutudlo, human niya matudlo ang mga kamatuoran [sa ebanghelyo] …, dad-on pa [ang mga estudyante] sa sunod nga lakang sa pagkaangkon sa espirituhanon nga pagsaksi ug sa pagsabut diha sa ilang mga kasingkasing nga moresulta sa paglihok ug pagbuhat” (“Teaching by Faith” [pakigpulong ngadto sa mga CES religious educator, Peb. 1, 2002], 5, si.lds.org; tan-awa usab sa Teaching Seminary: Preservice Readings [2004], 92). Kon ang mga estudyante mobati sa kamatuoran, kaimportante, ug kakinahanglanon sa usa ka doktrina o baruganan pinaagi sa impluwensya sa Espiritu Santo, ang ilang tinguha sa paggamit niana nga kamatuoran sa ilang kinabuhi modako. Ang mga magtutudlo makatabang sa mga estudyante sa pagdapit ug pag-amuma niini nga mga pagbati sa Espiritu Santo pinaagi sa paghatag kanila og mga oportunidad sa pagpakigbahin sa ilang mga kasinatian sa pagsunod sa mga baruganan sa ebanghelyo nga makita diha sa mga scripture mastery passage. Makatabang kini sa mga estudyante nga mas makasabut sa mga kamatuoran nga gitudlo diha sa mga scripture mastery passage ug mosiguro nga kini nga mga kamatuoran masilsil diha sa mga kasingkasing sa mga estudyante. Ang mosunod nga kalihokan makatabang sa mga estudyante nga mobati sa kaimportante sa mga doktrina ug mga baruganan nga gitudlo sa mga scripture mastery passage:

• Pagpaminaw sa mga Tudling sa Kasulatan—Dapita ang mga estudyante sa pagpaminaw sa mga scripture mastery passage diha sa mga pakigpulong ug mga leksyon sa simbahan, sa mga pakigpulong sa kinatibuk-ang komperensya, ug sa mga diskusyon sa pamilya ug mga higala. Matag karon ug unya dapita ang mga estudyante sa pagreport bahin sa mga tudling nga ilang nadungog, giunsa paggamit ang mga tudling, unsa nga mga kamatuoran ang gitudlo, ug kon unsa nga mga kasinatian ang naangkon nila o sa uban bahin sa mga kamatuoran nga gitudlo. Pangita og mga oportunidad nga makapamatuod (ug sa pagdapit sa mga estudyante sa pagpamatuod) sa mga kamatuoran nga gitudlo sa mga scripture mastery passage.

Ang mga scripture mastery passage ug ang Sukaranang mga Doktrina dungan nga gihimo ug tuyo nga gipahiangay alang sa kaayohan sa mga estudyante. (Ang mga scripture mastery passage gipakita sa tibuok Sukaranang mga Doktrina nga dokumento.) Kon ang mga estudyante makakat-on ug makapahayag sa mga doktrina ug mga baruganan nga anaa sa mga scripture mastery passage, sila usab magkat-on ug magpahayag sa Sukaranang mga Doktrina. Ug samtang ang mga estudyante makat-on sa pagpahayag sa Sukaranang mga Doktrina sa ilang kaugalingong mga pulong, makasalig sila sa gisag-ulo nga mga scripture mastery passage nga motabang kanila. Ang paghatag sa mga estudyante og mga oportunidad sa pagtudlo sa mga doktrina ug mga baruganan sa ebanghelyo gamit ang mga scripture mastery passage makapalambo sa ilang pagsalig diha sa ilang mga kaugalingon ug sa ilang kahibalo sa mga kasulatan. Kon ang mga estudyante motudlo ug mopamatuod sa mga doktrina ug mga baruganan nga makita diha sa mga scripture mastery passage, sila makapalig-on usab sa ilang mga pagpamatuod. Awhaga ang mga estudyante sa paggamit sa mga scripture mastery passage sa pagtudlo ug pagpasabut sa ebanghelyo diha sa klase ug sa pagpakig-istorya sa mga higala, pamilya, ug sa uban.

• Pagpresenta og Mensahe—I-assign ang mga estudyante sa pag-andam og tulo ngadto sa lima ka minuto nga pakigpulong o leksyon nga gibase sa mga scripture mastery passage. Paandama sila diha sa klase o sa balay. Agig dugang sa mga scripture mastery passage, makagamit sila og ubang mga kapanguhaan aron sa pagtabang kanila sa pagpangandam, sama sa mga scripture mastery card, ang Giya ngadto sa mga Kasulatan, o Matinud-anon sa Tinuhoan: Usa ka Pakisayran sa Ebanghelyo. Ang matag pakigpulong o leksyon kinahanglang maglakip og introduksyon, ang scripture mastery passage, usa ka istorya mahitungod o ehemplo sa baruganan nga gitudlo, ug pagpamatuod sa estudyante. Ang mga estudyante makaboluntaryo nga ipresentar ang ilang mga mensahe diha sa klase, sa family home evening, o sa ilang mga korum o mga klase isip kabahin sa ilang mga paningkamot sa Katungdanan ngadto sa Dios o sa Personal nga Kauswagan. Kon ang mga estudyante mopresentar sa ilang mga pakigpulong o mga leksyon sa gawas sa klase, ikonsiderar ang pagdapit kanila sa pagreport sa ilang mga kasinatian.

• Pag-role Play isip Misyonaryo—Pag-andam og pipila ka mga kard nga adunay mga pangutana nga mahimong ipangutana sa usa ka investigator nga matubag gamit ang tabang sa mga scripture mastery passage (sama pananglit, “Unsay gituohan sa mga miyembro sa inyong simbahan mahitungod ni Jesukristo?”). Dapita ang mga pares sa mga estudyante sa pag-anha sa atubangan sa klase aron sa pagtubag og pangutana nga gipili gikan sa mga kard. Aron matabangan ang mga estudyante nga makasabut unsaon sa mga misyonaryo pagtubag ang susama nga mga pangutana, makasugyot ka og pipila ka mga pamaagi sa epektibo nga pagtudlo, sama sa (1) pagsulti sa konteksto sa tudling sa kasulatan, (2) pagpasabut sa usa ka doktrina o baruganan, (3) pagpangutana aron sa pagsuta kon ang ilang gitudloan nakasabut o mituo ba sa unsay gitudlo, (4) pagpakigbahin og mga kasinatian ug pagpamatuod, ug (5) pagdapit niadtong ilang gitudloan sa pagsunod sa kamatuoran nga gitudlo. Hangyoa ang klase sa paghatag og feedback sa unsay ilang ganahan mahitungod sa paagi nga ang matag panag-uban mitubag sa ilang pangutana.

• Pagpamatuod—Dapita ang mga estudyante sa pagtan-aw sa mga scripture mastery passage ug pagpili og usa nga adunay usa ka doktrina o baruganan nga sila makapamatuod. Dapita sila sa pagpamatuod kabahin sa kamatuoran nga ilang gipili ug pagpakigbahin og mga kasinatian nga nakahimo kanila sa pagpamatuod niini. Samtang ang mga estudyante mopakigbahin sa ilang mga pagpamatuod, ang Espiritu Santo manghimatuod sa kamatuoran sa mga doktrina o mga baruganan nga ilang gipamatud-an. Ang ilang mga pagpamatuod mahimong modasig usab sa uban sa paglihok diha sa hugot nga pagtuo.

Pahinumdom: Ang mga oportunidad alang sa mga estudyante sa pagpakigbahin sa ilang mga pagpamatuod kinahanglan nga boluntaryo. Ang mga estudyante kinahanglang dili pugson sa pagpakigbahin sa ilang mga pagpamatuod o ipabati kanila nga kinahanglan silang mangangkon nga adunay kahibalo nga wala nila gibati nga aduna. Agig dugang, ang pipila ka mga estudyante magpanagana sa pagpakigbahin sa ilang mga pagpamatuod tungod kay nasayop sila sa paghunahuna nga kinahanglan nilang sugdan sa “Gusto kong mohatag sa akong pagpamatuod …” o nga ang ilang pagpahayag og pagpamatuod kinahanglang pagaubanan sa pagpakita og emosyon. Tabangi ang mga estudyante nga makasabut nga kon sila nagpamatuod, makahimo sila sa pagpakigbahin lamang sa mga doktrina o mga baruganan nga ilang nahibaloan nga tinuod. Ang pagpakigbahin og pagpamatuod mahimong sama ka yano sa pag-ingon “Ako nagtuo nga kini tinuod” o “Ako nasayud nga kini tinuod” o “Ako nagtuo niini sa tibuok nakong kasingkasing.”

Ang pagsugyot og mga paagi nga magamit sa mga estudyante ang mga doktrina ug mga baruganan nga anaa sa mga tudling sa kasulatan (o pagdapit sa mga estudyante sa paghunahuna og mga paagi) naghatag kanila og mga oportunidad sa pagkat-on pinaagi sa pagpakita og hugot nga pagtuo.

Si Elder David A. Bednar sa Korum sa Napulog Duha ka mga Apostoles miingon:

“Ang usa ka nagkat-on nga naggamit sa kabubut-on pinaagi sa paglihok sumala sa sakto nga mga baruganan mibukas sa iyang kasingkasing ngadto sa Espiritu Santo ug nagdapit sa Iyang pagtudlo, gahum sa pagpamatuod, ug panghimatuod nga saksi. Ang pagkat-on pinaagi sa pagtuo nagkinahanglan sa espirituhanon, mental, ug pisikal nga pagpaningkamot ug dili lamang lumalabay nga pagbati. Ang kinasingkasing ug pagkamakanunayon sa atong paglihok nga dinasig sa hugot nga pagtuo nga atong gipakita ngadto sa atong Langitnong Amahan ug sa Iyang Anak, si Jesukristo, sa atong pagkaandam nga makat-on ug pagdawat og panudlo gikan sa Espiritu Santo” (“Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 64).

Hatagi ang mga estudyante og mga oportunidad sa pagpakigbahin ug pagpamatuod sa mga kasinatian nga ilang nasinati sa paggamit sa mga doktrina ug mga baruganan. Ang mosunod mao ang usa ka paagi sa pag-awhag sa mga estudyante sa paggamit sa mga scripture mastery passage sa ilang mga kinabuhi:

• Paghimo og mga Tumong—Base sa seksyon sa application sa mga scripture mastery card, dapita ang mga estudyante sa paghimo og piho nga mga tumong nga mas makasunod sa mga baruganan nga makita diha sa mga scripture mastery passage. Ipasulat nila ang ilang mga tumong sa usa ka piraso nga papel nga ilang madala-dala isip pahinumdom. Kon angay, pagdapit og mga estudyante sa pagreport sa ilang mga kalampusan.

Ang pagsag-ulo sa mga tudling sa kasulatan makapalawom sa panabut ug makapalambo sa abilidad sa estudyante sa pagtudlo sa ebanghelyo. Kon ang mga estudyante mosag-ulo sa mga kasulatan, ang Espiritu Santo makapahinumdom kanila sa mga pulong ug mga ideya sa mga panahon sa panginahanglan (tan-awa sa Juan 14:26; D&P 11:21). Hinumdumi nga ipahiangay ang mga kalihokan sa pagsag-ulo ngadto sa mga abilidad sa imong mga estudyante.

Si Elder Richard G. Scott sa Korum sa Napulog Duha ka mga Apostoles miawhag og pagsag-ulo sa mga kasulatan sa dihang siya mingon:

“Talagsaong gahum moabut gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama sa pagdiskobre og bag-ong tawo nga makatabang panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban” (“Ang Gahum sa Kasulatan,” Ensign o Liahona, Nob. 2011, 6).

Ang matag usa sa mosunod nga mga kalihokan mahimong balikon sa mosunod nga pipila ka adlaw diha sa sinugdanan o katapusan sa klase aron matabangan ang mga estudyante nga makakab-ot og malungtaron nga pagkasag-ulo:

• Lumba sa Tagsa ka Pulong [One-Word Race]—Hagita ang mga klase sa pagsulti og usa ka scripture mastery passage usa ka pulong kada estudyante matag higayon. Sama pananglit, samtang nagtabang sa mga estudyante sa pagsag-ulo sa Mateo 5:14–16, ang unang estudyante mosulti sa pulong nga kamo, ang ikaduha nga estudyante mosulti sa mao, ang ikatulo nga estudyante mosulti sa ang, ug uban pa hangtud nga makompleto ang tibuok nga tudling. Orasi ang klase, ug tugoti sila nga mosulay sa makadaghan aron makab-ot ang gitumong nga oras. Samtang imong balikon kini nga kalihokan, ikonsiderar ang pag-usab sa han-ay sa mga estudyante aron lain-laing mga pulong ang ilang masulti.

• Una nga mga Letra—Isulat sa pisara ang unang mga letra sa matag pulong sa usa ka scripture mastery passage. Itudlo ang mga letra samtang ang klase mosulti sa tudling uban nimo, mogamit sa ilang mga kasulatan kon gikinahanglan. Balika kini nga kalihokan hangtud nga ang mga estudyante mobati nga masaligon sa ilang abilidad sa pag-recite sa usa ka tudling uban lamang sa tabang sa unang mga letra. Mahimo nimong papason ang pipila sa mga letra sa matag higayon nga ang mga estudyante mo-recite sa tudling. Hinay-hinay kini nga modugang sa kalisud hangtud nga ang mga estudyante makasulti og balik sa tudling nga dili mogamit sa mga unang letra.

• Mga Wordstrip Puzzle—Isulat, o ipasulat sa mga estudyante, ang mga pulong sa usa ka scripture mastery passage sa gilinyahan nga piraso nga papel. Guntinga ang mga papel aron mahimong mga gilis, nga ipabilin ang mga linya sa kasulatan. Guntinga nga mugbo ang pipila sa mga gilis aron pipila lang ka mga pulong sa tudling ang malakip diha sa matag usa. Isagol ang mga gilis sa papel ug ihatag kini ngadto sa mga pares o gagmayng grupo sa mga estudyante. Hagita ang mga estudyante sa paghan-ay sa mga gilis sa papel, nga gamiton ang ilang mga kasulatan isip giya. Ipapraktis kini kanila hangtud nga dili na sila kinahanglang mogamit sa ilang mga kasulatan. Kon mahuman na sila, hangyoa sila sa pag-recite og kusog sa tudling. Mahimo usab nimong orasan ang mga estudyante aron makita kon kinsa nga grupo ang labing paspas nga makapahimutang sa mga gilis sa papel sa sakto nga han-ay. O mahimo nimong orasan ang tibuok klase aron makita kon unsa ka dugay nga makompleto sa tanang grupo ang puzzle (kon ang unang mga grupo mahuman na, patabanga sila sa mas hinay nga mga grupo).