Pasiuna sa Ikaduha nga Sulat ni Apostol Pedro

Si Propeta Joseph Smith miingon, “Gisulat ni Pedro ang labing halangdon nga pinulongan kay ni bisan kinsa sa mga apostoles” (diha sa History of the Church, 5:392). Ang halangdon nagpasabut nga mahimayaon sa hunahuna, labing bililhon, ug daw nagdasig sa pagdayeg.

Isip usa ka saksi sa transpigurasyon ni Jesukristo (tan-awa sa 2 Pedro 1:16–18), miawhag si Pedro sa iyang mga magbabasa nga molambo diha sa ilang kahibalo ni Jesukristo ug magtinguha nga makaangkon og diosnon nga mga kinaiya aron makaambit sila sa “balaanong kinaiya” (tan-awa sa 2 Pedro 1:4–8). Mipasalig siya sa iyang mga magbabasa nga kining espirituhanong paglambo makatabang nila nga “masiguro ang [ilang] pagkatinawag ug pagkapinili” (2 Pedro 1:10). “Mipamatuod pag-usab si Pedro nga ang Ginoo moabut sa kalibutan gikan sa langit sa dakong himaya ug paghukom” (Bible Dictionary, “Peter, Epistles of”). Pinaagi sa pagtuon sa Ikaduha nga Sulat ni Pedro, ang mga estudyante makapalambo og mas dako nga hugot nga pagtuo kang Jesukristo ug makadawat og panudlo ug inspirasyon nga makatabang kanila nga mahimong mas susama Kaniya.

Ang tagsulat sa Ikaduha nga Sulat ni Pedro mao si Simon Pedro, ang labaw nga Apostol ni Jesukristo (tan-awa sa 2 Pedro 1:1).

Wala gayud kita tukma nga nahibalo kon kanus-a ug diin nasulat kini nga epistola. Kasagaran gipakaingon nga kini nga epistola gisulat ni Pedro didto sa Roma, tungod sa sulat nga nailhan isip 1 Pedro, nga lagmit gisulat mga A.D. 64 (tan-awa sa Bible Dictionary, “Peter, Epistles of”).

Gipasabut ni Pedro nga nagsulat siya “nganha kanila nga nanagpakadawat sa pagtoo nga samag kahamili sa amoa” (2 Peter 1:1). Mahimo kining nagpasabut nga ang mamiminaw ni Pedro mao ang samang Hentil nga mga Kristiyano kinsa nakadawat sa Unang Sulat ni Pedro (tan-awa sa 2 Pedro 3:1). Ang sulod sa 2 Pedro 1:12–15 nagpakita nga gusto ni Pedro nga kining sulat usa ka panamilit nga mensahe ngadto sa iyang mga magbabasa.

Dili sama sa Nahauna nga Sulat ni Apostol Pedro, nga nakatabang sa mga Santos nga makasagubang sa pagpanggukod gikan sa gawas, ang Ikaduha nga Sulat ni Apostol Pedro gitumong sa apostasiya nga anaa sa sulod nga mihulga sa kaugmaon sa Simbahan. Ang mini nga mga propeta ug mga magtutudlo nagpakaylap sa “makapadaut nga mga herejia [sayop nga mga pagtulun-an], magapanghimakak pa gani sa Agalon nga maoy nagpalit kanila” (2 Pedro 2:1). Gisulat ni Pedro ang espistola aron sa pag-awhag sa mga Santos nga molambo sa ilang kahibalo sa Ginoo ug mohimo nga “masiguro ang [ilang] pagkatinawag ug pagkapinili” (2 Pedro 1:10).

“Ang ikaduhang sulat klaro nga gitumong sa samang mga simbahan sama sa una ([2 Pedro] 3:1). Gisulat kini duol na sa kamatayon ([2 Pedro] 1:14)” (Bible Dictionary, “Peter, Epistles of”). Naglangkob usab kini sa pipila sa labing kusganon nga mga pulong ug katapusang mga pagpamatuod ni Pedro.

Usa ka dominante nga tema diha sa 2 Pedro mao ang kamahinungdanon sa pag-angkon og kahibalo mahitungod ni Jesukristo. Misaad si Pedro sa iyang mga magbabasa nga kon ilang tinguhaon ang diosnon nga mga kinaiya og mopalambo sa balaanong kinaiya, mahimo silang “[mapahilayo] sa pagkataspukan o sa pagkadili mabungahon diha sa [ilang] kahibalo sa atong Ginoong Jesukristo” (2 Pedro 1:8) ug mohimo nga “masiguro ang [ilang] pagkatinawag ug pagkapinili” (2 Pedro 1:10).

Gitandi ni Pedro ang tinuod nga kahibalo ni Jesukristo uban sa sayop nga kahibalo ug mga pagtulun-an nga gipakaylap sa mga miapostasiya (tan-awa sa 2 Pedro 2). Sa katapusan niini nga sulat, mihatag si Pedro og panapos nga pagdapit ngadto sa mga Santos nga “managtubo sa grasya ug sa kahibalo sa atong Ginoo ug Manluluwas nga si Jesukristo” (2 Pedro 3:18).

2 Pedro 1 Gipasabut ni Pedro nga ang mga saad ni Jesukristo nagtugot sa mga Santos nga mahimong “mag-aambit sa diosnong kinaiya” (2 Pedro 1:4). Nag-awhag siya kanila nga “masiguro ang [ilang] pagkatinawag ug pagkapinili” (2 Pedro 1:10). Nagsaysay si Pedro sa iyang nasinati didto sa Bukid sa Transpigurasyon, sa dihang nasaksihan niya ang nahimaya nga Kristo ug nadungog ang tingog sa Amahan. Nag-ingon si Pedro nga aduna siyay “labing nahimatud-an nga pulong sa profesiya” (2 Pedro 1:19).

2 Pedro 2 Nagpasidaan si Pedro sa mga miyembro sa Simbahan mahitungod sa mini nga mga propeta ug mga magtutudlo kinsa moabut taliwala kanila ug magtinguha nga mopahisalaag sa mga Santos. Kining dautan nga mga magtutudlo molimud sa Ginoo ug pagapasipad-an ang “dalan sa kamatuoran” (2 Pedro 2:2). Nagtudlo si Pedro nga mas maayo pa nga dili modawat sa ebanghelyo kay sa mohimo og mga pakigsaad ug dili motuman niini.

2 Pedro 3 Naghimatuod si Pedro sa kasigurohan nga moabut si Kristo sa Iyang kaugalingong panahon, limpyohan ang kalibutan pinaagi sa kalayo, laglagon ang dautan, ug luwason ang makugihon ug matinud-anon. Nag-awhag si Pedro sa mga Santos nga “managtubo sa grasya ug sa kahibalo [kang] … Jesukristo” (2 Pedro 3:18).