Pasiuna sa Ikaduhang Sulat ni Pablo ngadto sa Mga Taga-Corinto

Ang Ikaduhang Sulat ni Pablo ngadto sa Mga Taga-Corinto mopatigbabaw alang niini nga mga tema sa kahupayan taliwala sa kasakit, kalig-on taliwala sa mga kahuyang (sama sa pagpakita ni Pablo mismo), ug pag-ila sa matuod nga mga magtutudlo batok sa mga mini. Ang ehemplo ug mga pagtulun-an ni Pablo nga narekord sa 2 Mga Taga-Corinto makapadasig sa mga estudyante nga magpabiling matinuoron ug matinud-anon ngadto sa mahangturong mga pakigsaad nga ilang gihimo ngadto sa Dios, ang Amahan sa Kahangturan, sa bisan unsa pay sirkumstansya o mga sangputanan.

Si Pablo ang misulat sa Ikaduhang Sulat ngadto sa Mga Taga-Corinto (tan-awa sa 2 Mga Taga-Corinto 1:1).

Wala madugay human misulat si Pablo sa 1°Mga Taga-Corinto, may kagubot nga mitumaw didto sa Efeso agig pagsupak sa iyang mga pagtulun-an (tan-awa sa Mga Buhat 19:23–41), ug siya mibiya ngadto sa Macedonia (tan-awa sa Mga Buhat 20:1; 2 Mga Taga-Corinto 2:13; 7:5). Kini nagpakita nga samtang anaa siya didto sa Macedonia misulat siya sa 2 Mga Taga-Corinto, anaa sa mga A.D. 55–57 (tan-awa sa Bible Dictionary, “Epistola ni Pablo”; Giya ngadto sa mga Kasulatan, “Epistola ni Pablo,” scriptures.lds.org).

Ang basahon sa 2 Mga Taga-Corinto gisulat ngadto sa mga miyembro sa Simbahan sa Corinto. Samtang si Pablo anaa sa Macedonia atol sa iyang ikatulo nga misyonaryong panaw, si Tito midala kaniya sa mga balita gikan sa Corinto nga ang una nga mga sulat nga iyang gipadala maayong pagkadawat sa mga Santos didto (tan-awa sa 2 Mga Taga-Corinto 7:6–13). Ang sanga sa Corinto nakahimo og kalamboan, apan nahibaloan usab ni Pablo nga ang mga mini nga magtutudlo mituis sa lunsay nga mga doktrina ni Kristo. Dihay panahon human sa unang pagbisita ni Pablo sa Corinto ug tingali may ikaduha pa nga pagbisita (2 Mga Taga-Corinto 1:15–16), dihang si Pablo ingon og mipanton sa pipila sa mga Santos (tan-awa sa 2°Mga Taga-Corinto 2:1; 12:21), ang mga tigsangyaw nga gikan sa dapit sa Jerusalem miabut sa Corinto ug nagsugod sa pagtudlo sa mga Santos nga sila kinahanglan magsunod sa mga binuhatan sa Judeo, supak sa mga pagtulun-an ni Pablo. Kadaghanan sa 2 Mga Taga-Corinto naghisgot sa mga problema sa mini nga mga magtutudlo.

Ang sulat ni Pablo gitumong niadtong kinsa nagtinguha og dugang pa sa iyang mga pulong (tan-awa sa 2 Mga Taga-Corinto 1–9) ug niadtong kinsa nagduha-duha sa pagdawat sa iyang pagtulun-an (tan-awa sa 2 Mga Taga-Corinto 10–13). Sa kinatibuk-an, ang teksto sa 2 Mga Taga-Corinto mipadayag og pipila ka mga katuyoan niini nga sulat:

1. Aron sa pagpamahayag og pasalamat ug magpalig-on sa mga Santos kinsa maayong mitagad sa nag-una niyang sulat

2. Aron sa pagpasidaan sa mini nga mga magtutudlo kinsa mga midaut sa lunsay nga mga doktrina ni Kristo

3. Aron sa pagpanalipod sa iyang personal nga kinaiya ug katungod isip usa ka Apostol ni Jesukristo (tan-awa sa 2 Mga Taga-Corinto 10–13)

4. Aron awhagon ang mga Santos sa Corinto sa paghimo og ubay-ubay nga pinansyal nga halad ngadto sa kabus nga mga Santos sa Jerusalem (tan-awa sa 2 Mga Taga-Corinto 8–9)

Samtang daghan nga mga sulat ni Pablo nag-focus sa doktrina, kadaghanan niining sulat naghatag og gibug-aton sa relasyon ni Pablo sa mga Santos sa Corinto ug sa iyang gugma ug kabalaka alang kanila. Bisan og si Pablo lig-ong misupak ngadto sa iyang mga kritiko, sa tibuok 2 Mga Taga-Corinto atong makita siya nga usa ka malumo nga priesthood lider nga maamumahon alang sa kalipay ug kaayohan sa mga Santos. Mipakigbahin usab si Pablo og pipila ka detalyado nga kaagi bahin sa iyang kinabuhi ug misulat sa iyang “tunok dinhi sa lawas” (2 Mga Taga-Corinto 12:7).

Sa usa ka sagradong kasinatian nga narekord sa 2 Mga Taga-Corinto 12:2–4, si Pablo mihulagway sa iyang kaugalingon isip “usa ka tawo nga anaa kang Kristo” kinsa “gisakgaw dala ngadto sa ikatulong langit,” diin siya nakakita ug nakadungog sa mga butang nga dili ikapamulong. Niini nga panan-awon, midala uban sa iyang miaging doktrinal nga pamahayag mahitungod sa mga kalainan diha sa himaya sa nabanhaw nga lawas (tan-awa sa 1 Mga Taga-Corinto 15:35–44), mahimo nga makita isip usa ka biblia nga pagpahisama sa mga panan-awon nga narekord sa Doktrina ug mga Pakigsaad 76.

2 Mga Taga-Corinto 1–5 si Pablo nagpamatuod nga ang Dios mohupay sa Iyang mga anak sa ilang tanan nga mga kalisdanan. Siya mihagit sa mga Santos sa paghigugma ug pagpasaylo sa usag usa. Ang ebanghelyo ug ang mga kahimoan sa Espiritu sa Ginoo mas mahimayaon kaysa sulat sa balaod ni Moises. Nag-awhag si Pablo sa iyang magbabasa sa ilang mga panahon sa kalisdanan ug nagpahinumdom kanila sa mahangturon nga kinaiya sa gugma ug himaya sa Dios. Gitabangan niya ang mga magbabasa nga makasabut sa ilang panginahanglan nga makig-uli sa Dios pinaagi sa Pag-ula ni Jesukristo.

2°Mga Taga-Corinto 6–13 Samtang nagsagubang sa pagpanaway ug oposisyon gikan sa mini nga mga magtutudlo, si Pablo nanalipod sa iyang pagkamatinud-anon isip sulugoon sa Ginoo ug nagdapit sa iyang mga magbabasa nga magpalahi sa kalibutanon. Siya nagtudlo mahitungod sa “diosnon nga kasubo” (tan-awa sa 2°Mga Taga-Corinto 7:10). Si Pablo nagpasalamat sa mga Santos sa Corinto sa ilang kontribusyon ngadto sa mga kabus sa Jerusalem ug nag-awhag kanila sa pagpadayon sa pagkamahinatagon. Kusganon siyang namulong batok sa “mga apostoles nga mini” (2 Mga Taga-Corinto 11:13). Si Pablo nahimaya diha sa Ginoo ug mipakigbahin sa iyang biographical nga detalye sa iyang mga kalisdanan ug hugot nga pagtuo diha ni Jesukristo. Misulat siya sa iyang panan-awon sa ikatulong langit. Si Pablo nagdapit sa mga Santos sa pagsusi sa ilang mga kaugalingon ug sa pagmatuod sa ilang mga kaugalingon nga matinud-anon.