Mga Hebreohanon 11

Basaha ang mosunod nga istorya sa usa ka batan-ong babaye gikan sa Pilipinas. Dapita ang mga estudyante sa pagpaminaw kon giunsa sa batan-ong babaye pagpakita og hugot nga pagtuo.

Usa ka batan-ong babaye gikan sa Pilipinas mipasabut nga usa ka ting-init [summer] niana ang iyang amahan gikinahanglang moadto sa layo tungod sa trabaho. Dihang makadawat siya sa iyang suweldo iya kining ipadala sa iyang pamilya. Usa ka Sabado niana, nagamit na sa pamilya ang tanang kwarta gawas sa duha ka 20 pesos nga papel. Dihang ang batan-ong babaye mitan-aw sa listahan sa mga butang nga gikinahanglan sa iyang pamilya, nasayud siya nga kulang ang ilang kwarta aron sa pagpalit sa tanan niining mga butang ug alang sa plete sa iyang pamilya padulong sa simbahan sa sunod adlaw. Nangutana siya sa iyang inahan kon unsay iyang kinahanglang buhaton. Giingnan siya sa iyang inahan nga paliton ang mga butang ug nga ang Dios mohatag og paagi alang sa plete.

Nag-ampo ang batan-ong babaye nga makapalit sa mga butang diha sa listahan ug duna pa gihapoy igong kwarta nga i-plete padulong sa simbahan sa sunod adlaw. Kinahanglan una niyang mopalit og uling aron naay sugnod ang iyang pamilya alang sa pagluto. Nakurat siya sa dihang nahibaloan niya nga ang presyo sa usa ka bag sa uling midoble gikan sa 5 ka pisos ngadto sa 10 ka pisos. Nasayud nga gikinahanglan sa iyang pamilya ang sugnod aron sa pagluto sa ilang pagkaon, mipalit siya og duha ka bag sa uling nga mikabat og 20 ka pisos. Kini nga batan-ong babaye miampo sa mas mainitong paagi nga ang iyang pamilya unta makasimba gihapon. Samtang nag-ampo siya, adunay mihunghong kaniya: “Palita ang mga butang nga inyong gikinahanglan. Mahimo ra kana.” Ug sa ingon siya mipadayon sa paglakaw nga may 20 ka pisos lamang. (Gikuha gikan sa video “Putli ug Simple nga Pagtuo,” LDS.org.)

• Sa unsang mga pamaagi kining batan-ong babaye mipakita sa hugot nga pagtuo?

Dapita ang usa ka estudyante sa pagbasa og kusog sa Mga Hebreohanon 11:1 ug usab sa Hubad ni Joseph Smith, Mga Hebreohanon 11:1 (sa Giya ngadto sa mga Kasulatan). Hangyoa ang klase sa pagsunod, nga mangita kon unsay gitudlo ni Pablo mahitungod sa hugot nga pagtuo.

• Sumala sa bersikulo 1, unsa ang hugot nga pagtuo? (Ang mga estudyante mahimong mogamit og lain-laing mga pulong, apan siguroa nga mahibaloan nila ang mosunod nga kamatuoran: Ang hugot nga pagtuo mao ang pasalig sa mga butang nga atong ginapaabot, ang panghimatuod sa pagkaanaa sa mga butang nga dili makita.)

Ipasabut nga si Elder David A. Bednar sa Korum sa Napulog Duha ka mga Apostoles migamit sa Mga Hebreohanon 11:1 ug usab sa laing mga tinubdan (Alma 32:21; Lectures on Faith) aron sa pagpasabut sa tulo ka sukaranang mga elemento sa hugot nga pagtuo kang Jesukristo. Dapita ang usa ka estudyante sa pagbasa og kusog sa mosunod nga pamahayag ni Elder Bednar.

Imahe

Elder David A. Bednar

“Kini nga mga pagtulun-an miklaro sa tulo ka sukaranang mga elemento sa hugot nga pagtuo: (1) ang hugot nga pagtuo isip kasiguroan sa mga butang nga atong gilauman nga tinuod, (2) ang hugot nga pagtuo isip ang ebidensya sa mga butang nga dili makita, ug (3) ang hugot nga pagtuo isip baruganan sa paglihok sa tanang intelehente nga mga binuhat. Akong gihulagway kining tulo ka mga bahin sa hugot nga pagtuo sa Manluluwas nga nagdungan og atubang sa umaabut, paglantaw sa nangagi, ug pagpasiugda og lihok sa karon” (“Paningkamot sa Pagkat-on pinaagi sa Hugot nga Pagtuo,” Liahona, Sep, 2007, 18).

Isulat sa pisara ang mosunod: Pasalig—pag-atubang sa umaabot; Panghimatuod—paglantaw ngadto sa nangagi; Paglihok—pagpasiugda og lihok niining panahona. Ipasabut nga mitudlo si Elder Bednar nga kining tulo ka elemento sa hugot nga pagtuo—pasalig, panghimatuod, ug paglihok—nagtinabangay samtang kita nag-atubang sa umaabut, naglantaw ngadto sa nangagi, ug naglihok niining panahona.

• Sa unsang paagi ang pagpakita og hugot nga pagtuo kang Jesukristo lahi sa pagtuo lamang Kaniya?

• Sa unsang paagi ang istorya sa Filipina nga batan-ong babaye naghulagway sa tulo ka elemento sa hugot nga pagtuo nga gihulagway ni Elder Bednar?

• Unsay mahimong mahitabo kon magpakita kita og hugot nga pagtuo kang Jesukristo?

Dapita ang usa ka estudyante sa pagbasa og kusog sa Mga Hebreohanon 11:2–5. Hangyoa ang klase sa pagsunod, nga mangita sa mga ehemplo nga gigamit ni Pablo aron sa paghulagway unsay mahimong mahitabo kon ang mga tawo magpakita sa hugot nga pagtuo diha kang Jesukristo.

• Unsay nahitabo tungod kay kining mga tawhana mipakita sa hugot nga pagtuo kang Jesukristo?

Dapita ang mga estudyante sa pagbasa sa Mga Hebreohanon 11:6 sa hilum nga paagi, nga mangita kon unsay gitudlo ni Pablo mahitungod sa hugot nga pagtuo.

• Unsay gitudlo ni Pablo mahitungod sa hugot nga pagtuo?

• Base sa unsay gitudlo ni Pablo, unsay kinahanglan gayud natong buhaton aron mapahimuot ang Dios? (Ang mga estudyante mahimong mogamit og lain-laing mga pulong, apan siguroha nga klaro nga sa pagpahimuot sa Dios kinahanglan gayud natong mopakita sa atong hugot nga pagtuo pinaagi sa pagdangup ngadto Kaniya, sa pagtuo diha Kaniya, ug sa pagtuo nga Siya nagganti niadtong kinsa makugihong nangita Kaniya. Mahimo nimong isugyot nga markahan sa mga estudyante kini nga kamatuoran diha sa bersikulo 6.)

Dapita ang usa ka estudyante sa pagbasa og kusog sa panapos sa istorya sa Filipina nga batan-ong babaye. Hangyoa ang klase nga maminaw alang sa unsay nahitabo tungod kay ang batan-ong babaye mipakita og hugot nga pagtuo kang Jesukristo.

Sa dihang ang batan-ong babaye mipadayon sa pagbayad alang sa ubang mga butang, mikuot siya sa iyang bulsa ug nakamatikod og usa ka bugdo nga papel. Sa dihang giablihan niya kini iyang nakita ang dugang nga lima ka papel nga kwarta nga nagkantidad og 20 ka pisos matag usa nga naputos sa nahibilin niyang usa ka 20 ka pisos nga papel. Nianang higayuna nasayran niya nga aduna siya’y igo aron sa pagpalit sa mga butang nga gikinahanglan sa iyang pamilya ug sa pagbayad sa plete alang sa iyang pamilya padulong sa simbahan. Kining batan-ong babaye mipasabut nga sa panahon niining kasinatian mibati siya sa tabang sa Dios ug sa gugma sa Dios alang kaniya. Sa dihang nakauli na siya nagpasalamat siya sa Langitnong Amahan alang sa milagro. (Gikuha gikan sa “Putli ug Simple nga Pagtuo,” LDS.org.)

• Unsay nahitabo tungod kay kining batan-ong babaye mipakita og hugot nga pagtuo kang Jesukristo?

• Sa unsa kahang paagi kini nga kasinatian makatabang sa batan-ong babaye nga mopakita og hugot nga pagtuo sa umaabot? (Tungod kay nailhan niya ang panghimatuod nga ang Dios mitabang niya sa panahon niini nga kasinatian, makasalig siya nga ang Dios motabang pag-usab kaniya sa umaabot. Tungod sa panghimatuod ug pasalig nga iyang nadawat, mahimo siyang makabaton og hugot nga pagtuo sa paglihok niining panahona. Kon magpadayon siya sa paglihok, kini nga proseso sa paglihok diha sa hugot nga pagtuo mopadayon ug ang iyang hugot nga pagtuo mag-anam og kadako.)

Hangyoa ang mga estudyante sa paghunahuna og usa ka higayon nga mipakita sila sa hugot nga pagtuo. Dapita ang pipila ka mga estudyante sa pagpakigbahin sa ilang mga kasinatian.

• Sa unsang paagi kana nga kasinatian naghatag kaninyo og ebidensya nga ang Dios motabang kaninyo sa umaabot?

• Unsay pipila ka mga sitwasyon nga inyong giatubang karon o atubangon sa umaabot nga nagkinahanglan ninyo nga magpakita og hugot nga pagtuo kang Jesukristo?

Dapita ang mga estudyante sa pagpangita sa mga kamatuoran samtang nagtuon sila sa Mga Hebreohanon 11:7–40 nga makatabang nila nga mahibalo sa mga panalangin nga mahimo nilang madawat samtang nagpakita sila og hugot nga pagtuo kang Jesukristo.

Isulat sa pisara ang mga pulong tungod sa pagtuo ug pinaagi sa pagtuo, ug ipasabut nga mikutlo si Pablo og mga ehemplo sa matarung nga mga tawo diha sa Daang Tugon kinsa nagbaton og hugot nga pagtuo aron sa pagpasalig sa iyang tigpaminaw nga sila usab mapanalanginan pinaagi sa pagbaton og hugot nga pagtuo. Dapita ang mga estudyante sa pagsusi sa Mga Hebreohanon 11 sa madali nga paagi, nga mangita sa mga pulong “tungod sa pagtuo.” Mahimo nimong isugyot nga markahan sa mga estudyante kini nga mga pulong.

Dapita ang usa ka estudyante sa pagbasa og kusog sa Mga Hebreohanon 11:7. Hangyoa ang klase sa pagsunod, nga mangita kon giunsa ni Noe pagpakita og hugot nga pagtuo diha sa Dios. (Mahimo nimong ipasabut nga ang mga pulong “milihok uban ang kahadlok” nagpasabut nga si Noe milihok uban ang paglaum ug pagsalig base sa paggiya sa Dios.)

• Giunsa ni Noe pagpakita og hugot nga pagtuo sa Dios?

• Unsa nga mga elemento sa hugot nga pagtuo nga gihulagway ni Elder Bednar (pasalig, panghimatuod, ug paglihok) ang naipakita niining istorya ni Noe?

• Sa unsang mga pamaagi kini naipakita?

Isulat sa pisara ang mosunod nga mga pakisayran sa kasulatan: Mga Hebreohanon 11:8–10, 11–12, 17–19, 20–22, 23–28, 29–31. Bahina ang klase ngadto sa unom ka grupo ug i-assign sa matag grupo ang usa sa mga pakisayran. (Kon gamay ra ang imong klase, i-assign ang matag estudyante og usa sa mga pakisayran, o ipares-pares ang mga estudyante ug i-assign ang matag pares og labaw sa usa ka pakisayran.) Dapita ang matag grupo sa pagbasa og dungan sa mga pakisayran nga gi-assign sa ila, nga mangita sa mga tubag sa mosunod nga mga pangutana (mahimo nimong isulat sa pisara kini nga mga pangutana):

Human sa igong panahon, pagdapit og usa ka estudyante gikan sa matag grupo sa pagreport sa ilang mga tubag ngadto sa klase.

Dapita ang usa ka estudyante sa pagbasa og kusog sa Mga Hebreohanon 11:13–16. Hangyoa ang klase sa pagsunod, nga mangita kon unsay atong makat-unan gikan sa mga ehemplo ni Abraham, Sara, ug sa uban mahitungod sa pagbaton og hugot nga pagtuo. Ipasabut nga ang “labi pa ka maayong yuta” (bersikulo 16) nagpasabut nga kinabuhing dayon.

• Sumala sa bersikulo 13, unsay nahitabo ngadto ni Abraham ug sa iyang asawa nga si Sara ug usab sa ubang matinud-anong mga tawo?

• Nganong nagpabilin man silang matinud-anon bisan og wala nila nadawat niining kinabuhi ang tanang mga saad sa Dios? (Mahimo nimong ipasabut nga ang paglantaw sa gisaad nga mga panalangin “gikan sa layo” nagpasabut nga magbaton og paglaum ug pagsalig nga madawat ang mga panalangin human sila mamatay.)

• Sa unsang paagi ang ilang mga ehemplo makatabang nato nga magpabiling matinud-anon?

Isulat sa pisara ang mosunod nga mga pulong: Samtang nagpakita kita og hugot nga pagtuo kang Jesukristo, mahimo kitang … Dapita ang mga estudyante sa pagsulat niini nga mga pulong sa ilang mga class notebook o mga scripture study journal.

Dapita ang pipila ka estudyante nga magpuli-puli sa pagbasa og kusog sa Mga Hebreohanon 11:32–40. Dapita ang pipila ka estudyante nga magpuli-puli sa pagbasa og kusog gikan sa Mga Hebreohanon 11:32–40, ug ipasabut nga ang Hubad ni Joseph Smith sa bersikulo 35 nag-usab sa “mangabanhaw ngadto sa labi pa ka maayong kinabuhi” ngadto sa “unang pagkabanhaw.” Ipasabut nga ang Hubad ni Joseph Smith sa bersikulo 40 nag-usab niini nga mabasa, “Sanglit gikatagana man sa Dios ang labi pa ka maayong butang alang kanila pinaagi sa ilang mga pag-antus, kay kon walay pag-antus sila dili niya pagahingpiton.” Hangyoa ang klase sa pagsunod, nga mangita kon unsaon nila pagkompleto ang mga pulong nga ilang gisulat. Mahimo nimong isugyot nga markahan sa mga estudyante ang mga pulong diha sa ilang mga kasulatan nga nakapaikag kanila.

Hangyoa ang mga estudyante sa pagkompleto sa mga pulong base sa bersikulo 32–40. Human sa igong panahon, dapita ang pipila ka andam nga mga estudyante sa pagreport sa unsay ilang gisulat. I-summarize ang mga tubag sa mga estudyante pinaagi sa pagsulat sa pisara sa mosunod nga baruganan: Samtang nagpakita kita og hugot nga pagtuo kang Jesukristo, makasagubang kita sa pag-antus, makahimo og mga milagro, makadawat og balaan nga mga saad, makapalig-on sa atong pagpamatuod Kaniya, ug mopadulong ngadto sa kahingpitan.

• Unsay pipila ka mga pamaagi nga atong mapakita ang hugot nga pagtuo kang Jesukristo?

• Unsa nga mga panalangin ang imong nakita nga miabut sa kinabuhi sa usa ka tawo tungod kay kanang tawhana nagpakita og hugot nga pagtuo?

Dapita pag-usab ang mga estudyante sa paghunahuna og mga sitwasyon nga nagkinahanglan nila o magkinahanglan nila nga magpakita og hugot nga pagtuo kang Jesukristo.

Awhaga sila nga maghimo og usa ka tumong sa pagpakita og hugot nga pagtuo sa Ginoo niana nga mga sitwasyon. Dapita ang mga estudyante sa pagsulat sa tumong pinaagi sa pagkompleto sa mga pulong “Pinaagi sa hugot nga pagtuo ako …”