Mga Materyal para Pagpangandam alang sa Home-Study Teacher
Summary sa mga Leksyon sa Daily Home-Study
Ang mosunod nga summary sa mga panghitabo, mga doktrina, ug mga baruganan nga nakat-unan sa mga estudyante samtang nagtuon sila sa Mateo 18:1–22:26 (unit 5) dili tuyo nga itudlo isip kabahin sa imong leksyon. Ang leksyon nga imong itudlo nagtutok lang sa pipila niining mga doktrina ug mga baruganan. Sunda ang mga pag-aghat sa Balaang Espiritu samtang ikonsiderar nimo ang mga panginahanglan sa imong mga estudyante.
Gikan sa sambingay sa walay kalooy nga sulugoon, nakakat-on ang mga estudyante nga kon gusto ta nga mapasaylo sa Dios, nan kinahanglang andam ta nga mopasaylo sa uban. Nakat-unan usab nila ang kabalaan sa kaminyoon.
Samtang gitun-an sa mga estudyante ang madaugon nga pagsulod sa Manluluwas ngadto sa Jerusalem, ilang nakat-unan nga kon atong dawaton ug hisgutan si Jesukristo sa publiko, atong matabangan ang uban nga mopalambo og tinguha nga mahibalo og dugang mahitungod Kaniya. Gumikan sa gihimo sa Manluluwas nga paglimpyo sa templo, nakat-unan sa mga estudyante nga ang balay sa Ginoo usa ka sagradong dapit, ug tinguha Niya nga kini atong itratar nga may pagtahud. Nakat-unan usab nila nga kon motambong ta sa templo, ang Dios moayo kanato.
Ang mga estudyante nagtuon mahitungod kon giunsa sa pagtunglo sa Manluluwas ang usa ka kahoyng igira ug dayon migamit og daghang sambingay samtang nanudlo Siya sa templo. Nakat-unan nila nga aron makasulod sa gingharian sa Dios, kinahanglang sundon nato ang Langitnong Amahan ug maghinulsol sa atong mga sala kay sa paglitok lamang o pagpakaaron ingnong Siya atong gisunod. Laing kamatuoran nga nakat-unan sa mga estudyante mao nga isip mga miyembro sa Simbahan ni Jesukristo, kita ang responsable sa pagdala og mga bunga sa kamatuoran:
Nakat-unan sa mga estudyante nga gipadayon ni Jesus ang Iyang pagpanudlo sa templo ug gitudloan ang mga tawo nga ang Ginoo naglaum nga kita mamahimong maayong mga lungsuranon ug magtuman sa mga balaod sa yuta. Gitudlo sa Manluluwas nga kadtong wala ma-seal sa awtoridad sa priesthood ngadto sa ilang mga bana o asawa dinhi sa mortalidad o pinaagi sa proxy nga mga ordinansa sulod sa mga templo dili minyo sa kalibutang moabut. Nakat-unan usab sa mga estudyante nga kon tinuoray natong gihigugma ang Dios ug gihigugma ang atong mga isigkatawo sama sa atong kaugalingon, maningkamot kita sa pagtuman sa tanang sugo sa Dios.
Pasiuna
Kini nga leksyon nakatabang sa mga estudyante nga makasabut sa kaimportante sa paghimo ug pagtuman sa sagradong mga pakigsaad uban sa Dios. Nakat-unan usab nila ang kaimportante sa pagmaya kon ang uban mapanalanginan sa Dios.
Gitudlo ni Jesus ang mahitungod sa kinabuhing dayon ug mihatag bahin sa sambingay sa mga sulugoon sa ubasan
Dapita ang usa ka estudyante sa pagduol sa atubangan sa klase. Ingna ang estudyante nga kon maka-push up siya og ka 10, makadawat siya og gamayng ganti (sama sa 10 ka gagmayng piraso sa candy). Human maka-push up og 10 ang estudyante, ihatag sa iyaha ang ganti, dayon paghangyo og laing mobulontaryo. Hangyoa ang ikaduhang estudyante sa paghimo og usa ka push-up, ug dayon pangutan-a ang klase unsa nga ganti sa ilang hunahuna ang angay madawat sa estudyante ug ngano. Palingkura og balik ang duha ka estudyante sa ilang lingkuranan. Pahibaloa ang klase nga unyang taud-taod sa leksyon ang ikaduhang estudyante makadawat sa iyang ganti basi sa unsay makat-unan sa klase diha sa mga kasulatan.
Ipasabut nga dihang nanudlo si Jesus sa baybayon sa Judea, nangutana si Pedro kon unsa ang madawat sa mga disipulo tungod sa pagbiya nila sa kalibutanon nilang mga kabtangan sa pagsunod sa Manluluwas.
Dapita ang usa ka estudyante sa pagbasa og kusog sa Mateo 19:28–30. Hangyoa ang klase sa pagsunod, nga mangita sa tubag sa Manluluwas ngadto kang Pedro.
Sumala sa bersikulo 29, unsa ang mapanunud niadtong mobiya sa tanan aron sa pagsunod sa Manluluwas?
Ipasabut nga gitudlo sa Manluluwas sa Iyang mga disipulo ang sambingay aron matabangan sila nga makasabut sa tinguha sa Langitnong Amahan nga mahatagan ang tanan Niyang mga anak og oportunidad nga makadawat sa kinabuhing dayon. Niini nga sambingay, ang tawo nagsuhol og mga mamumuo sa managlahing panahon sa tibuok adlaw nga motrabaho sa iyang ubasan. Mahimo nimong ipasabut nga ang normal nga oras nga tingtrabaho sa kapanahunan sa Bag-ong Tugon tingali magsugod sa alas 6:00 sa buntag hangtud sa alas 6:00 sa hapon, nga may gamayng kalainan sa magkalahi nga panahon sa tuig.
Kopyaha ang mosunod nga tsart sa pisara o ihatag kini sa mga estudyante isip usa ka handout:
Mga Mamumuo (Oras sa Pagsugod)
Gikauyunan nga Sweldo
Mga Oras nga Gitrabahoan
Kantidad nga Gibayad
Sayo sa buntag (6:00 a.m.)
ikatulong oras (9:00 a.m.)
ikaunom nga oras (12:00 p.m.)
ikasiyam nga oras (3:00 p.m.)
ikaonse nga oras (5:00 p.m.)
Dapita ang mga estudyante nga magtrabaho sa ginagmayng grupo. Dapita sila sa pagbasa sa Mateo 20:1–7 diha sa ilang mga grupo, nga mangita unsa ang gidugayon ang pagtrabaho sa mga mamumuo ug ang sweldo nga ilang gikasabutan. (Ipasabut nga ang “usa ka sensilyo” nagpasabut nga usa ka denario, nga usa ka sensilyo sa Romano nga katugbang sa usa ka adlaw nga sweldo sa usa ka mamumuo.)
Human sa igong panahon, dapita ang pipila ka estudyante sa pag-adto sa pisara ug sulatan ang unang duha ka kolum sa tsart (o dapita sila nga isulat kini diha sa mga kopya nga imong gihatag).
Kinsa sa inyong hunahuna ang angayang mabayaran og dako?
Dapita ang usa ka estudyante sa pagbasa og kusog sa Mateo 20:8–10. Hangyoa ang klase sa pagsunod, nga mangita sa nadawat nga bayad sa matag grupo sa mga mamumuo.
Unsa nga bayad ang nadawat sa matag grupo sa mga sulugoon? (Human makatubag ang mga estudyante, isulat ang 1 ka sensilyo sa matag box sa kolum nga may label nga “Kantidad nga Gibayad.”)
Kon kauban mo sa mga trabahante nga nagtrabaho sa tibuok adlaw, unsa kaha ang inyong mahunahuna o bation nga nakadawat mo og parehas ra nga ganti niadtong mitrabaho lang og usa ka oras?
Dapita ang usa ka estudyante sa pagbasa og kusog sa Mateo 20:11–14. Hangyoa ang klase sa pagsunod, nga mangita sa unsay gisulti sa mga naghago sa tibuok adlaw ngadto sa agalon sa ubasan ug unsay iyang gisulti kanila.
Unsa ang gibagut-butan niadtong mga nagtrabaho sa tibuok adlaw?
Unsa ang gisulti sa agalon sa ubasan agig tubag?
Sa unsang paagi nahimong makiangayon (o patas) ang agalon sa ubasan ngadto sa nagtrabaho og tibuok adlaw?
Aron matabangan ang mga estudyante nga mahibaloan ang kamatuoran gikan niini nga sambingay, ipasabut nga ang sweldo nga usa ka sensilyo magrepresentar og walay katapusan o kinabuhing dayon, sigun sa gihisgutan sa Mateo 19:29. Isulat sa pisara ang mosunod nga dili kompleto nga pamahayag: Ang Dios mohatag og kinabuhing dayon sa tanang tawo kinsa …
Kon ang ganti dinhi sa sambingay nagrepresentar og kinabuhing dayon, unsa ang girepresentaran sa paghago? (Mahimong mohatag og lain-laing tubag ang mga estudyante apan siguroha nga mapasabut og maayo nga ang paghago niini nga sambingay mahimong magrepresentar sa paghimo ug pagtuman sa sagradong mga pakigsaad uban sa Dios. Human makatubag ang mga estudyante, kompletuha diha sa pisara ang kamatuoran sama sa mosunod: Ang Dios mihatag og kinabuhing dayon sa tanang tawo nga mipili sa paghimo ug pagtuman sa sagradong mga pakigsaad uban Kaniya.)
Ipasabut nga kini nga kamatuoran nagtabang natong makasabut sa kamanggiloy-on sa Langitnong Amahan ngadto sa mga tawo nga dili mohimo og motuman sa mga pakigsaad sayo sa ilang kinabuhi ug niadtong walay oportunidad sa paghimo niini hangtud sa ilang pagkamatay (tan-awa sa D&P 137:7–8).
Sa inyong hunahuna nganong importante man nga atong masayran nga iIhatag sa Dios ang kinabuhing dayon ngadto sa tanang tawo kinsa mopili sa paghimo ug pagtuman sa sagradong mga pakigsaad ngadto Kaniya, nga dili magsapayan kon kanus-a kana mahitabo?
Pahinumdumi ang mga estudyante bahin sa ikaduhang estudyante nga mihimo og usa ra ka push-up, ug ipangutana:
Unsa kaha nga ganti ang angayng madawat niini nga estudyante sa paghimo og usa ka push-up? (Hatagi ang estudyante og parehas nga ganti nga imong gihatag sa estudyante nga mihimo og 10 ka push-up.)
Hangyoa ang usa ka estudyante sa pagbasa og kusog sa Mateo 20:15–16. Dapita ang klase sa pagsunod, nga mangita kon giunsa sa pagsanong sa agalon ang sulugoon nga mibagutbot sa iyang kamabination ngadto sa ubang trabahante.
Sa inyong hunahuna unsa kaha ang buot ipasabut sa agalon sa ubasan dihang nangutana siya “Imo ba diay ako nga bagut-butan tungod sa akong pagkamahinatagon?” (bersikulo 15).
Ipasabut nga giusab ni Elder Jeffrey R. Holland sa Korum sa Napulog Duha Ka mga Apostoles kini nga pangutana sama sa mosunod: “Nganong kamo masina man tungod kay ako mipili nga magmabination?” (“Mga Mamumuo sa Ubasan,” Ensign o Liahona, Mayo 2012, 31).
Unsa ang ipasabut diha sa bersikulo 16 nga “adunay daghan nga gitawag, apan pila lamang ang gipili”? (Ang gitawag nagpasabut nga gidapit sa pag-apil sa buluhaton sa Langitnong Amahan. Ang gipili nagpasabut nga makadawat sa Iyang mga panalangin—lakip ang panalangin sa kinabuhing dayon. Tan-awa usab sa D&P 121:34–40.)
Unsa nga baruganan ang atong makat-unan gikan sa bersikulo 16? (Mahimong mahibaloan sa mga estudyante ang pipila ka baruganan, lakip sa mosunod: Kon gipili nato ang pagkasina sa mga panalangin sa Langitnong Amahan ngadto sa uban, niana mawala kanato ang mga panalangin nga gusto Niyang ihatag kanato.)
Basaha og kusog ang pamahayag ni Elder Jeffrey R. Holland, ug dapita ang mga estudyante sa pagpamalandong kon sa unsang paagi sila tintalon sa pagkasina sa mga panalangin nga gihatag sa Langitnong Amahan ngadto sa uban:
Imahe
Elder Jeffrey R. Holland
“Moabut ang mga panahon sa atong kinabuhi diin ang usa ka tawo makadawat og wala dahumang panalangin o makadawat og pipila ka espesyal nga pasalamat. Mohangyo ko kanato nga dili ta masakitan—ug dili gayud mobati og kasina—kon ang swerte moabut sa ubang tawo? Dili kita makuhaan kon ang uban mapanalanginan. Wala kita maglinumbaay aron makita kinsa ang pinakakwartahan, pinakamaayog talento o pinakagwapa o pinakabulahan. Ang lumba nga ato gayud nga giapilan mao ang lumba batok sa sala. …
“… Ang pagkasina, pangyam-id, o pagdaut sa uban dili mopataas sa inyong dungog, gani ang pagdaut sa uban dili mopalambo sa imahe sa inyong kaugalingon. Busa pagmabination, ug pagmapasalamaton nga ang Dios mabination. Usa kini sa malipayong paagi sa pagpakabuhi” (“Laborers in the Vineyard,” 31, 32).
Ipaambit ang inyong pagpamatuod sa mga kamatuoran nga nahibaloan sa mga estudyante dihang gitun-an nila ang sambingay sa mga trabahante [mamumuo] sa ubasan.
Isulat ang mosunod nga pamahayag diha sa pisara. Hatagi og panahon ang mga estudyante nga makompleto ang pamahayag diha sa ilang mga class notebook o mga scripture study journal. Basi sa akong nakat-unan gikan niini nga sambingay …
Human sa igong panahon, dapita ang pipila ka estudyante kinsa komportable nga mopakigbahin sa klase unsay ilang gisulat.
Aron matabangan ang mga estudyante nga maandam para sa sunod nga unit, dapita sila sa paghunahuna unsaon kaha nga maandam nila og maayo ang ilang kaugalingon para sa Ikaduhang Pag-anhi sa Ginoo. Unsa nga mga kamatuoran ang gitudlo dihang gihatag ni Jesukristo ang sambingay sa napulo ka dalagang birhen, sa mga talento, ug sa karnero ug sa mga kanding? Unsa nga ordinansa ang gihimo sa Manluluwas nga puli sa Pagpalabay? Dapita ang mga estudyante sa pagpangita sa mga tubag samtang tun-an nila ang para sa sunod semana.